SOERA NGAʼÕTÕ II. FAZA 31.
FAZA 31.
I. Fangohori adoe. Famataro ere ba Ono Lewi ba fangoemaʼõ balazora. II. Fameʼe lala ba nibeʼe saoha gõlõ.
1I. Ba me no awai daʼõ fefoe, ba lasaw̃a mbanoea mado Joeda Iraono Gizeraëli fefoe, si so mege, ba larasa harefa andrõ ba laʼobõ Gasera ba ladoedoegõ hilihili andrõ, fabaja naha wameʼe soemange ba mado Joeda fefoe ba ba mado Mbenijami ba ba mado Geferaji ba ba mado Manase, irege ahori fefoe labeʼe. Ba awena lafoeli ira chõra Iraono Gizeraëli fefoe, ba mbanoeara. (Moz. V. 7, 5. Raz. II. 18, 4). 2Ba ifataro ngenoli gere andrõ Hisikia, ba Ono Lewi, dali ngenolira andrõ, balazi hadia halõw̃õ zamõsana, halõw̃õ gere ba halõw̃õ Nono Lewi, ba wameʼe soemange nitoenoe ba soemange fangorifi, enaʼõ enoni ira ba golajama nahia Jehowa, ba enaʼõ lalaoe wangandrõ zaoha gõlõ ba fanoeno. 3Ba boeala razo, anaʼania, ba bõli zoemange nitoenoe andrõ, soemange nitoenoe na mahemoloe mbanoea, ba na tánõ owi ba ba loeo sabato ba ba wasoelõna ba ba gowasa andrõ, dali nifachoi ba goroisa Jehowa andrõ. (Moz. IV. 28). 4Ba ibeʼe li razo ba zato, banoea Jeroezalema, ba wameʼe ba gere ba ba Nono Lewi tána chõra, fa bõi labõhõli goroisa Jehowa. 5Ba me no larongo niw̃aʼõnia andrõ Iraono Gizeraëli, ba labeʼe zi aʼa mboea nowi ba agoe ba fanicha ba w̃e w̃ani, si aʼa mboea nowi fefoe, oja sibai, samboea niʼofoeloe hadia ia fefoe laʼohe, ba no fahõna. 6Ba Iraono Gizeraëli, awõ mado Joeda, ba mbanoea mado Joeda misa, ba samboea niʼofoeloe gõi laʼohe saw̃i ba biribiri, ba samboea niʼofoeloe gõi mboeala andrõ niʼamoniʼõ chõ Lowalangira Jehowa; oi lafõfõʼõ wameʼe tooe. (Moz. III. 27, 30). 7Ba mbaw̃a si tõloe labõrõtaigõ wangõhõna andrõ, ba ba mbaw̃a si fitoe moʼahonoa chõra.
8II. Ba so Hisikia, awõ zatoea mbanoea, lafaigi nihõna andrõ, ba lasoeno Jehowa ba banoeania Iraono Gizeraëli. 9Ba me isofoe ba gere ba ba Nono Lewi lala nihõna andrõ Hisikia, 10ba imane chõnia Asaria, ere seboea, maʼoewoe Zadoki: Iʼotarai me labõrõtaigõ molohe ba gosali Jehowa saoha gõlõ andrõ, ba mangamanga ndraʼaga, aboesoga ba eboea na zi tosai; noa sa ifahowoeʼõ mbanoeania Jehowa, ba tobali tosai na chõma zi fahõna andre. 11Ba iw̃aʼõ Hisikia, lafoʼotoʼoto mbateʼe ba gosali Jehowa; ba me no awai daʼõ, (Raz. I. 6, 5), 12ba lahaogõ wolohe ba daʼõ mboeala andrõ nibeʼe saoha gõlõ ba si samboea niʼofoeloe andrõ, awõ mboeala niʼamoniʼõ. Ba samaigimaigi, ba Ono Lewi andrõ, Chanania, ba tambalinania nachinia Simeʼi. Ba nibeʼe tohoetohoe danga ndra Chanania achinia Simeʼi, 13ba Jehiëli ba Azasia ba Mahata ba Azaheli ba Jerimoto ba Josabada ba Eliëli ba Jesimachia ba Mahata ba Benaja, dali nifachoi razo Hisikia awõ Gasaria, satoea ba gosali Jehowa. 14Ba samaigimaigi boeala andrõ, nibeʼe saoha gõlõ chõ Lowalangi, ba Ono Lewi andrõ, Kore, ono Jimina, sanaro ba mbawandroehõ, enaʼõ tebeʼe mboeala andrõ, saoha gõlõ, tána chõ Jehowa, awõ gameʼela andrõ, niʼamoniʼõ sibai. 15Ba barõ mbawania ndra Edena Minijami ba Jesoea ba Semaja ba Amaria ba Sechania, enaʼõ laʼatoelõʼõ wameʼe ba niwara ba mbanoea gere andrõ, niʼangenoligõ, he ba zatoea, ba he ba ndraono, lõ lai ndra matoea andrõ, 16si no moetanõ ba zoera ngaʼõtõ, iʼotarai zi medõloe fache faʼeboea ba si aʼa moroi andrõ, dozi si mõimõi ba gosali Jehowa, na inõtõ zamõsana, ba wangai halõw̃õra, sangesangenoli, dali nifachoi chõra. 17Ba ba wananõ ba zoera ngaʼõtõ andrõ ere andrõ, ba sawoesawōē latanõ, ba ba Nono Lewi, ba iʼotarai zi 20 fache, ba si aʼa moroi andrõ, dali halõhalõw̃õra, ba ngenolira. 18Ba fabaja onora sawoejoe ba foʼomora ba onora matoea ba onora alawe — chõra fefoe — latanõ; noa sa aʼoi dõdõra weʼamoniʼõ jaʼira, ba niʼamoniʼõ andrõ. 19Ba so ba ngaʼõtõ Gaʼaroni, ere andrõ, ba nowi ba mbenoea andrõ, si fabõbõ ba mbanoeara andrõ, niha — no moetõtõi dõira — sameʼe ba ndra matoea, ere, fefoe, ba ba Nono Lewi fefoe, si no moetanõ ba zoera, tána chõra. 20Si manõ wolaoe Hisikia ba mado Joeda fefoe; si sõchi ba satoelõ ba si doehoe wamaigi Lowalanginia Jehowa ilaoe. 21Fefoe hadia ia nilaoenia ba halõw̃õ andrõ, ba gosali Jehowa ba ba goroisa andrõ ba ba gamachoita, ba wangaloei Lowalanginia, ba no soroi ba dõdõ, ba mofozoe gõi.
Currently Selected:
SOERA NGAʼÕTÕ II. FAZA 31.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.