SOERA NGAʼÕTÕ II. FAZA 30.
FAZA 30.
I. Ifatenge zinenge Hisikia ba mado Joeda ba ba Ndraono Gizeraëli, sogaoni jaʼira, ba wolaoe fasa. II. Lalaoe wasa, ba somoeso tõdõ ira.
1I. Ba ifatenge Hisikia ba Ndraono Gizeraëli fefoe, ba ba mado Joeda ba ifaʼoheʼõ gõi zoera ba mado Geferaji ba ba mado Manase, enaʼõ mõi ira ba gosali Jehowa, ba Jeroezalema, ba wolaoe fasa chõ Jehowa, Lowalangi Ndraono Gizeraëli. 2Ba lahonogõi saʼae salaw̃a ba satoea mbanoea andrõ chõnia, ba banoea Jeroezalema fefoe, ba mbaw̃a si doea lalaoe wasa. (Moz. II. 12, 6. Moz. IV. 9, 11). 3No tebai mege lalaoelaoe ba ginõtõnia, me no ambõ ere si amoniʼõ jaʼira, ba me lõʼõ na sowoelo niha sato ba Jeroezalema. 4Ba somasi razo ba somasi zato fefoe wamagõlõ andrõ. 5Ba lahonogõi na, ba Ndraono Gizeraëli fefoe, iʼotarai Mbereseba, noemalõ ba Dano, ba lafarongogõ, enaʼõ mõi ira, ba wolaoe fasa andrõ chõ Jehowa, Lowalangi Ndraono Gizeraëli, ba Jeroezalema. Noa saʼae ara lõ nilaoera jaʼia, lõ moeʼoʼõ nifachoi. 6Ba latõrõi mbanoea Ndraono Gizeraëli ba banoea mado Joeda fefoe si fagohi andrõ, laʼohe zoera andrõ nibeʼe razo ba satoea mbanoea andrõ chõnia, ba laʼombachaʼõ niʼoroiʼõ razo, no imane: Jaʼami Iraono Gizeraëli, mifoeli ami chõ Jehowa, Lowalangi [ndra toeami] Aberahamo Izaʼaki, Izeraëli, enaʼõ ifoeli iʼotahõgõ zoloi andrõ, si no aefa ba danga razo Asiria, si tosai na, jaʼami. (Raz. II. 15, 16). 7Bõi mifaomagõ ami chõ ndra amami ba ba niwami andrõ, si no farõi chõ Jehowa, Lowalangi ndra toeara, ba no tobali ibeʼe nifakiko ira, sanehe ami. 8Ba bõi sabeʼe tandro ami, si mane ira amami; miraʼoe danga Jehowa ba miʼae ba niʼamoniʼõ andrõ chõnia, niʼamoniʼõnia, si lõ teboelõ, ba miʼoʼõ niw̃aʼõ Lowalangimi Jehowa, enaʼõ dõhõ wõnoenia chõmi, fõnoe sabõlõbõlõ andrõ. 9Na mifalalini geraʼerami, wamoeli jaʼami chõ Jehowa, ba faloecha waʼahachõ dõdõ dalifoesõmi ba iraonomi, faʼahachõ dõdõ zangoloiʼõ jaʼira mege, fa tola mangawoeli ira ba danõ andre. Me no seboea tõdõ ba sahachõ tõdõ Lowalangimi Jehowa, ba lõ iʼerogõ ami, na mifoeli ami chõnia. 10Ba latõrõi mbanoea si fagohi andrõ, ba danõ mado Geferaji ba ba danõ mado Manase, ba iroegi danõ mado Zeboeloni, ba laʼigiʼigiʼõ ira ba laʼoʼaja. 11Ba so õsa — lõ atotó — mado Gaseri ba mado Manase ba mado Zeboeloni, sangideʼideʼõ jaʼira, ba mõi ba Jeroezalema. (Raz. I. 6, 5). 12Ba ifahisi gõi mado Joeda tanga Lowalangi, iʼosaraʼõ dõdõra, ba woloʼõ oroisa andrõ, nibeʼe razo ba satoea andrõ chõnia, dali niʼoroiʼõ Jehowa. 13Ba owoelo niha ba Jeroezalema ato sibai, ba wolaoe owasa roti si lõ moeʼaisõni, ba mbaw̃a si doea, owoeloa sato sibai niha.
14II. Ba latema laheta naha wameʼe soemange [ba nadoe], ba Jeroezalema; ba he naha wanoenoe koemõjõ andrõ fefoe, ba laheta, ba latiboʼõ ba mbombo, ba Gendrona. 15Ba aefa daʼõ, ba lataba wasa, ba zi meweleõfa, ba mbaw̃a si doea. Ba saila gere ba Ono Lewi, ba laʼomoniʼõ ira, ba laʼohe ba gosali Jehowa zoemange nitoenoe. 16Ba laʼiagõ nahiara, dali nifachoi chõra ba goroisa Moze, enoni Lowalangi andrõ; ere zogoeleʼõ do andrõ, nifaʼema Nono Lewi chõra. 17Ato sa ba gowoeloa andrõ, si lõ moeʼamoniʼõ, ba Ono Lewi saʼae zanaba ono mbiribiri fasa andrõ, salahi zi raʼiõ fefoe, ba weʼamoniʼõ jaʼira chõ Jehowa. 18Niha sato andrõ sa, mado Geferaji ba mado Manase ba mado Isasari ba mado Zeboeloni — ato ira — ba lõ nihaogõra jaʼira, laʼā wasa, ba tenga soloʼõ nifachoi. Ba no mangandrõ Hisikia, salahira, no imane: Jehowa si no eboea tõdõ, 19ba jamoebologõ dõdõnia chõra fefoe, si no mameʼe ba dõdõra wangaloei Lowalangi, Jehowa, Lowalangi ndra toeara, lõ lai wa lõ moetõrõ wangehao andrõ, sogoena ba niʼamoniʼõ andrõ. (Moz. IV. 9, 6). 20Ba ifondrondrongo li Hisikia Jehowa ba iʼorifi niha sato. 21Ba lalaoe gowasa roti si lõ moeʼaisõni Iraono Gizeraëli andrõ, si so ba Jeroezalema, fitoe ngaloeo, omoeso sibai dõdõra, ba ero maʼṍchõ lasoeno Jehowa Ono Lewi ba ere, aʼoi dõlara. 22Ba ihaogõ wehedenia Hisikia ba Nono Lewi fefoe, saboto ba dõdõ Jehowa. Ba laʼagaʼagā zoemange andrõ, fitoe bongi waʼara, ladabadaba zoemange fangorifi ba lasoeno Jehowa, Lowalangi ndra toeara. 23Ba mamagõlõ zato fefoe, fitoe bongi tõ na lõ laʼetoeʼõ gowasa, ba fitoe ngaloeo tõ lalaoe zowoeawoea dõdõra. 24No 1000 nono zaw̃i ba 7000 mbiribiri nibeʼe Hisikia, razo mado Joeda, saoha gõlõnia ba zato; ba satoea mbanoea gõi, ba 1000 gõi labeʼe ono zaw̃i ba 10,000 mbiribiri, saoha gõlõra. Ba ato zi amoniʼõ jaʼira ere. 25Ba somoeso tõdõ zato, mado Joeda, awõ gere, awõ Nono Lewi, awõ zato andrõ fefoe, Iraono Gizeraëli si no mangondra, awõ niha bõʼõ andrõ, si oroi danõ Ndraono Gizeraëli, ba he si fatewoe ba mado Joeda. 26Ba no faʼomoeso dõdõ seboea ba Jeroezalema; me no lõ niʼilara saʼae si mane daʼõ, ba Jeroezalema, iʼotarai loeo Zelomo, ono Dawido, razo Ndraono Gizeraëli. 27Ba maoso gere andrõ, ono Lewi, ba lafahowoeʼõ zato, ba terongo lira, ba fangandrõra, ba iroegi nahia Jehowa andrõ, niʼamoniʼõ, ba zoroego. (Moz. IV. 6, 23).
Currently Selected:
SOERA NGAʼÕTÕ II. FAZA 30.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.