SOERA NGAʼÕTÕ II. FAZA 29.
FAZA 29.
I. Iw̃aʼõ ba gere Hisikia lafoeli lahaogõ gosali. II. Laʼoʼõ niw̃aʼõnia. III. Mameʼe soemange razo, awõ niha sato, lafosoemange Lowalangi.
1I. Doea woeloe a lima fache Hisikia, me tobali razo ia, ba 29 fache razo ia ba Jeroezalema. Ba tõi ninania, ba Abija, ono Zacharia. (Raz. II. 18, 1—3). 2Ba somasi Jehowa ilaoe, iʼoʼõ sibai nilaoe doeania Dawido mege. 3Ba mbawa si fõfõna ba ndrõfi waʼarazonia si fõfõna ibokai mbawandroehõ gosali Jehowa ba ifoeli iʼazõchi. 4Ba iʼoroiʼõ gere, awõ Nono Lewi ba iʼowoeloi ira ba golajama tánõ ba gatoemboecha loeo. 5Ba imane chõra: Mifondrondrongo, jaʼami Ono Lewi! Miʼamoni saʼae ba miʼamoniʼõ gosali Jehowa, Lowalangi ndra toeami, ba miheta zi taʼoenõ ba niʼamoniʼõ andrõ! 6Noa sa mosala ndra amada ba no lalaoe zi fatoewoe chõ Lowalangida Jehowa, ba no laʼerogõ ia. No labõhõli wangotahõgõ nahia Jehowa, no laʼerogõ. 7Ba no lakoesi mbawandroehõ ba geweʼewe andrõ, ba fandroe, ba no laboenoe, ba lõ nitoenoera koemõjõ, ba lõ nibeʼera saʼae soemange chõ Lowalangi Ndraono Gizeraëli, ba niʼamoniʼõ andrõ. 8Andrõ wa no gõna fõnoe Jehowa mado Joeda ba banoea Jeroezalema, fõnoe sabõlõbõlõ, awõ wa no ibeʼe fametaʼoe niha ira ba bõrõ wehocha mboe, awõ wa fasī niha bõʼõ, no hõrõmi zangila. (Raz. I. 9, 8). 9Ba hiza, ba no mate ba mbawa ziʼõli ndra amada, ba onoda matoea ba onoda alawe ba ira alaweda, ba no moeʼoloiʼõ, bõrõ daʼõ. (F. 28, 8). 10Ba no oew̃aʼõ tõdõgoe, fawoeʼoe li ndraʼo chõ Jehowa, Lowalangi Ndraono Gizeraëli, enaʼõ alõ wõnoenia sabõlõbõlõ andrõ chõda. 11Ba bõi areoe ami, jaʼami iraonogoe! Me no jaʼami nitoetoejoe Jehowa, enaʼõ fõnania so ami, ngoningoninia, ba enaʼõ enoninia ami, ba wanoenoe koemõjõ chõnia.
12II. Ba maoso Nono Lewi andrõ: Mahata, ono Gamasai, ba Joëli, ono Gasaria, maʼoewoe Gahati. Ba maʼoewoe Merari, ba Kisi, ono Gabidi, ba Asaria, ono Jehaleleli. Ba maʼoewoe Gereso, ba Joa, ono Zima ba Edena, ono Joa. 13Ba maʼoewoe Gelisafa, ba Simeri ba Jeīeli. Ba maʼoewoe Gasafo, ba Sacharia ba Matania. 14Ba maʼoewoe Hemano, ba Jehiëli ba Simeʼi. Ba maʼoewoe Jedoetoeno, ba Semaja ba Oesiëli. 15Daʼõ zamaloechaʼõ iwara, mamoni ira, ba mõi ira, ba wangehao osali, laʼoʼõ goroisa razo, dali nifachoi Jehowa. 16Ba mõi bacha ba gosali gere andrõ, ba wangehao; fefoe zi taʼoenõ ba gosali Jehowa, ba labeʼe baero ba golajama, ba latema Ono Lewi, ba wanibo ba nidanõ ba Gendrona. 17Me samboea desaʼa ba mbaw̃a si fõfõna labõrõtaigõ wamoni ba ba zi mew̃aloe, ba laroegi geweʼewe andrõ chõ Jehowa: ba lahaogõ gosali Jehowa, 8 ngaloeo, ba ba zi sese, ba mbaw̃a si fõfõna andrõ, ba awai chõra. 18Ba mõi ira jomo chõ razo Hisikia, ba lamane: No mahaogõ gosali Jehowa, maʼasamboea, awõ naha wameʼe soemange nitoenoe, awõ wakake andrõ chõnia, fefoe, he meza andrõ, naha roti nifaigifaigi, fabaja fakake chõnia, fefoe. 19Ba fakake andrõ fefoe, nitiboʼõ razo Ahasi, si lõ ba dõdõnia, ba gõtõ waʼarazonia, bõrõ wangerogõnia Jehowa, ba no mafoeli ba nahania ba no mafoeli maʼamoniʼõ; no so ba daʼõ, fõna naha wameʼe soemange, chõ Jehowa.
20III. Ba ihoelõ wongi razo Hisikia, iʼowoeloi zatoea mbanoea fefoe, ba mõi ira mijaw̃a ba gosali Jehowa. 21Ba mameʼe soemange ba daʼõ, fitoe ngaʼeoe nono zaw̃i ba fitoe ngaʼeoe mbiribiri si matoea ba fitoe rozi nono mbiribiri; ba baero õ, ba fitoe ngaʼeoe nambi si matoea, soemange fameta horõ, tána ba waʼarazo ba ba niʼamoniʼõ ba ba mado Joeda. Ba ibeʼe li [razo] ba maʼoewoe Gaʼaroni, ere andrõ, ba naha wameʼe soemange andrõ chõ Jehowa labeʼe. 22Ba lataba zaw̃i andrõ, ba laʼedogõ ndro ere, ba labeʼe fanefe naha wameʼe soemange. Ba lataba mbiribiri si matoea andrõ, ba labeʼe fanefe naha wameʼe soemange ndro. Ba lataba gõi nono mbiribiri; ba labeʼe fanefe naha wameʼe soemange ndro. (Moz. III. 8, 15. Heber. 9, 21). 23Ba aefa daʼõ, ba laʼohe fõna razo ba fõna zato nambi si matoea andrõ, soemange fameta horõ, ba latoefa tangara. (Moz. III, 4, 15). 24Ba lataba ere ba labeʼe ba naha wameʼe soemange ndro, fameta horõ, ba wameta sala Ndraono Gizeraëli fefoe; me no iw̃aʼõ razo: ba Ndraono Gizeraëli fefoe zoemange nitoenoe andrõ, awõ zoemange fameta horõ. 25Ba fõna gosali Jehowa ifataro Nono Lewi, si so faritia ba biola nitika, seboea ba sideʼide, dali nifachoi Dawido fõna ba Gado andrõ, sangiʼila chõ razo, ba Natano samaʼeleʼõ. Me no nifachoi Jehowa daʼõ, ba samaʼema zamaʼeleʼõ andrõ chõnia. (Ngaʼõt. I. 16, 4; 23, 5). 26Ba so ba daʼõ Nono Lewi andrõ, si so nilaoelaoe andrõ, chõ Dawido, ba torofe ba gere. (Moz. IV. 10, 10). 27Ba iw̃aʼõ Hisikia laʼohe ba naha wameʼe soemange zoemange nitoenoe andrõ; ba ha siʼaikõ lafobõrõ wameʼe soemange nitoenoe andrõ, ba labõrõtaigõ gõi zinoenõ andrõ chõ Jehowa ba lalaoe dorofe, dali nilaoelaoe andrõ chõ Dawido, razo Ndraono Gizeraëli. 28Ba lafalõgoe tooe ira sato fefoe; ba manoenõ zanoenõ andrõ ba telaoe dorofe — oi irege awai wameʼe soemange nitoenoe andrõ. 29Ba me no awai wameʼe, ba labalõdoehini tooe danõ razo ba awõnia andrõ fefoe, ba lafalõgoe tooe ira. 30Ba law̃aʼõ ba Nono Lewi razo Hisikia ba satoea andrõ, lasoeno Jehowa fanoenõ ndra Dawido Asafo sangiʼila andrõ. Ba lalaoe wanoenõ andrõ, somoeso tõdõ ira, ba lafaõndrõ ira ba lafalõgoe tooe ira. 31Ba hoemede Hisikia, imane: No [mifoeli] miʼamoniʼõ ami chõ Jehowa; ba miʼae miʼohe ba gosali Jehowa zoemange nitaba ba soemange fanoeno! Ba laʼohe zoemange nitaba ba soemange fanoeno sato, ba dozi si terooe tõdõ, ba labeʼe zoemange nitoenoe. 32Ba soemange fefoe nibeʼe zato, ba 70 ngaʼeoe zaw̃i ba 100 ngaʼeoe mbiribiri si matoea ba 200 rozi nono mbiribiri; oi soemange nitoenoe, soemange Jehowa. 33Ba niʼamoniʼõra, ba 600 ngaʼeoe zaw̃i ba 3000 ngaʼeoe mbiribiri. 34Ba ambõ ere; tebai ahori laboʼai goeli zoemange; ba latolo ira iwara, Ono Lewi andrõ, irege awai halõw̃õra ba irege laʼamoniʼõ ira ere; me no moroi ba dõdõ ba Nono Lewi andrõ wamoni; ambõ ba gere. 35Ba oja sibai gõi zoemange nitoenoe, awõ dawõ zoemamange fangorifi, awõ zoemange nibadoe, nifao ba zoemange nitoenoe andrõ. Ba tobali no moefoeli moeʼohe ba lala wameʼe soemange andrõ ba gosali Jehowa. 36Ba somoeso tõdõ Hisikia, awõ niha sato fefoe, bõrõ niʼasogõ Lowalangi chõra; noa sa iʼogomoezaõ manõ daʼõ fefoe. (Raz. I. 8, 66).
Currently Selected:
SOERA NGAʼÕTÕ II. FAZA 29.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.