SOERA NGAʼÕTÕ II. FAZA 28.
FAZA 28.
I. Razo Ahasi, samosoemange Lowalangi bõʼõ. Teʼala ia labeʼe Dawa Garamo, awõ mado Geferaji. II. Lafaʼoheʼõ mangawoeli niraʼoe andrõ, me no itenawa ira Odedi. III. Samoeza tõ teʼala Gahasi. IV. Awoewoe na ia. Faʼamatenia.
(Faigi gõi Raz. II. 16, 1—14)
1I. Doea woeloe fache Gahasi, me tobali razo ia, ba 16 fache razo ia ba Jeroezalema. Ba tenga somasi Jehowa wolaoenia, tenga si mane toeania Dawido. 2Itõrõ lala razo Ndraono Gizeraëli; ba ifalaoeʼõ nadoe Baʼali, nifahele. 3Manoenoe koemõjõ ia ba ndraso Mbeni-Hinomo, ba ifatõrõ ba galitõ nononia matoea, ba iʼohiaʼõ zogoro ita andrõ ba niha baero, nitimba Jehowa mege, fõna Ndraono Gizeraëli. (Moz. III. 18, 21. Raz. II. 21, 6. Jer. 7, 31). 4Mameʼe soemange ia ba manoenoe koemõjõ ba hilihili andrõ misa, ba idozigõ bõrõ geoe saoeri. 5Andrõ wa ibeʼe ba danga razo Ndrawa Garamo ia Lowalanginia Jehowa: teʼala ia labeʼe ba ato sibai laraʼoe banoeania, ba laʼoloiʼõ ba Ndramaseko. Ba ba danga razo Ndraono Gizeraëli gõi tebeʼe ia; abõlõ sibai teʼala ia ibeʼe daʼõ [gõi]. (Jes. 7, 1). 6120,000 iboenoe Feka, ono Remalia, mado Joeda, ha maʼõmaʼõchõ, oi niha sabõlõ, bõrõ me no laʼerogõ Jehowa, Lowalangi ndra toeara. 7Ba Sichiri, sabõlõ mado Geferaji, ba iboenoe Maʼaseja, ono razo, ba Asirika, mandroe ba gõdo, ba Elikana, tambalina razo. 8Ba 200,000 laʼoloiʼõ talifoesõra [mado Joeda], ira alawe ba ono matoea ba ono alawe, ba eboea sibai zahoeloe ira ba mado Joeda, ba laʼohe ba Zamaria gahoeloea andrõ.
9II. Ba so ba daʼõ zameʼeleʼõ chõ Jehowa, Odedi dõinia. Ba iʼondrasi zanoewõ andrõ, me mangawoeli ira ba Zamaria, ba imane chõra: Si ndroehoe, bõrõ wõnoe Jehowa, Lowalangi ndra toeami, ba mado Joeda, wa no ibeʼe ba dangami ira, wa tola miboeboenoe ira, ba mbachoebachoe dõdõmi andrõ, siroegi ba mbanoea si jaw̃a. 10Ba ijaʼe, ba edõna ami mibaliʼõ sawoejoemi mado Joeda andrõ ba banoea Jeroezalema, ira matoea ba ira alawe. Ba hadia, si lõ horõ ami chõ Lowalangimi Jehowa? 11Ba mifondrondrongo ligoe, ba mifofanõ niraʼoe andrõ, niʼoloiʼõmi, talifoesõmi, alacha mangawoeli ira; noa sa tohare chõmi wõnoe Jehowa, fõnoe sabõlõbõlõ! 12Ba maoso zatoea mado Geferaji õsa, Asaria, ono Johanano, ba Berechia, ono Mesilemoto, ba Hisikia, ono Zaloemi, ba Amasa, ono Hadilai, latenaw̃a zangawoeli andrõ, si oroi manoewõ, lamane chõra: 13Lõ tola miʼohe ba daʼe niraʼoe andrõ! Edõna minõnõ horõda, awõ lalõda andrõ, nõnõnõnõ lalõda andrõ chõ Jehowa, ba hoeloeda. Noa sa eboea sibai horõda, ba no tohare ba Ndraono Gizeraëli wõnoe [Jehowa], fõnoe sabõlõbõlõ. 14Ba labeʼe aefa niraʼoe andrõ ba lafoeli gahoeloea andrõ, ba zi so satoea, awõ niha sato fefoe. 15Ba maoso niha andrõ nitõtõi tõi mege, latolo niraʼoe andrõ, lafonoecha fefoe zi lõ noecha, ahoeloea no mege laʼogoenaʼõ, labeʼe chõra noecha ba badagahe ba labeʼe gõ, ba ha waʼato zi tebai mofanõ, ba lafokalide, ba laʼohe ba Jericho, banoea chorema andrõ, ba zahatõ ba niwara, ba lafoeli ira ba Zamaria.
16III. Ba me loeo daʼõ, ba ifatenge ba razo Asiria razo Ahasi, enaʼõ latolo ia. 17Ba so na gõi Ndraono Gedomo, ba teʼala mado Joeda, ba laʼoloiʼõ õsa niraʼoe. 18Ba lasoewõ mbanoea ba zaloʼo ba ba danõ mado Joeda tánõ raja Dawa Wilisiti, atoeʼa ira ba Mbetiseme ba ba Najalona ba ba Gederoti ba ba Zocho ba ba halama soja chõra, ba ba Dimena ba ba halama soja chõra, ba ba Giméso ba ba halama soja chõra, ba laʼiagõ manõ daʼõ. 19Jehowa saʼae zi hõndrõgõ mado Joeda, bõrõ Gahasi andrõ, razo Ndraono Gizeraëli, me ifobõrõ wa lõ ngaroro ba mado Joeda, ba me no farõi ia chõ Jehowa. 20Ba so moroi sa Digilata-Filineze, razo Asiria, ba wanoewõ jaʼia, isasagõ, faja wanolonia jaʼia. 21Ihalõ saʼae ganaʼa ba gosali Jehowa ba ba gõdo razo ba anaʼa zatoea mbanoea Ahasi, ba ibeʼe chõ razo Asiria, ba si lõ boto.
22IV. Ba he me loeo isasagõ ia razo Asiria ba ifoeli mosala chõ Jehowa razo Ahasi. 23Ifosoemange Lowalangi Ndramaseko, si no mangalani jaʼia, imane: Lowalangi razo Ndrawa Garamo zanolo jaʼira mege; daʼo oefosoemange, enaʼõ latolo ndraʼo gõi. Ba tobali famakikonia ba famakiko Ndraono Gizeraëli fefoe. 24Ba iʼozaragõ gamagama ba gosali Lowalangi Ahasi ba ifoefoe; ikoesi mbawandroehõ gosali Jehowa, ba idozigõ fatalinga Jeroezalema wamaʼanõ naha wameʼe soemange chõnia. 25Ba banoea mado Joeda fefoe, ba idozigõ wamazõchi hilihili, ba wanoenoe koemõjõ ba Lowalangi bõʼõ, ba tobali iʼandrõ wõnoe Jehowa, Lowalangi ndra toeania. 26Ba bõʼõnia hikajania, ba hadia nilaoenia fefoe, he famobõrõ mege, ba he safoeria andrõ, ba no moetanõ ba zoera razo Ndraono Gizeraëli. 27Ba mate Gahasi, itõrõ lala ndra amania, ba ba Jeroezalema lakoʼo ia, bacha ba mbanoea; lõʼõ sa labeʼe ba lewatõ razo Ndraono Gizeraëli. Ba fangalinia razo, ba ononia Hisikia.
Currently Selected:
SOERA NGAʼÕTÕ II. FAZA 28.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.