SOERA NGAʼÕTÕ II. FAZA 26.
FAZA 26.
I. Oesia, razo somasi Lowalangi, ba sofozoe wolaoenia. II. Fajaw̃asania. Gõna booe aoeri ia ba mate ia.
(Faigi gõi Raz. II. 14, 21. 22: 15, 1—7)
1I. Ba lahalõ Oesia andrõ niha sato ba danõ, ba lafataro razo ia, fangali namania Amasia, he w̃aʼae ha meweleõnõ fache na waʼeboeania. 2Daʼõ zangaroʼõ Eloto, ifoeli ihalõ banoea mado Joeda, me no mate razo [amania]. 3Meweleõnõ fache waʼeboea Oesia andrõ, me tobali razo ia, ba 52 fache razo ia ba Jeroezalema. Ba tõi ninania, ba Jecholia, banoea Jeroezalema. 4Ba somasi Jehowa ilaoe, iʼohiaʼõ sibai nilaoe namania Amasia mege. (F. 25, 2). 5Iʼaloealoei zi lõ aefa ia chõ Lowalangi, gõtõ waʼanaoe noso Zacharia andrõ, samahaõ ba wangataʼoefi Lowalangi; ba fatoea lõ ibõhõli Jehowa, ba mofozoe nilaoenia ibeʼe Lowalangi. (Raz. II. 12, 2). 6Mõi ia moesoewõ Ndrawa Wilisiti, idoedoegõ gõli Gata ba õli Jabene ba õli Gasoto ba itaroeʼõ mbanoea ba ngai Gasoto ba heza na ba danõ Ndrawa Wilisiti. 7Ba itolo ia Lowalangi ba Ndrawa Wilisiti ba ba Ndrawa Ara andrõ, ba Goeri-Mbaʼali ba ba mbanoea Moini andrõ. 8Ba Iraono Gamoni gõi, ba mameʼe beo chõ Oesia, ba iroegi danõ Miseraji, ba terongo doeriania, me no sabõlõ sibai ia. 9Ba ilaoe malige Oesia, ba Jeroezalema, ba mbawa gõli ba watalinga ba ba mbawa gõli ba ndraso ba ba zanalinga siʼoe, ba iʼaʼaroʼõ. (Neh. 3, 19). 10Ba ilaoe gõi malige ba danõ si mate, ba oja ifachaoʼõ baʼa. Me no oja sibai goerifõ chõnia he ba ndraso, ba he ba zaloʼo, ba sonowi chõnia ba toeka kaboe nagoe, he ba hili, ba he ba danõ nowi ba zaloʼo; me no somasi fangahalõ ia. 11Ba ato chõ Oesia sabõlõ, ato sibai na mõi fasoewõ; ha waʼato niʼofaja doeroetoeli andrõ, Jeïeli, ba koemandroe andrõ, Maʼaseja, barõ mbawa Hanania, koemandroe seboea chõ razo. 12Faʼato hõgõ ngafōē andrõ, niha sabõlõ, ba no 2600. 13Daʼõ zolohe sato, 307,500, sabõlõ sibai ba wasoewõta, ba wanolo razo ba nemali. 14Chõra fefoe ifaigi wangõna Oesia: baloese ba toho ba tetenaoeloe ba õrõba ba kara riboribo. 15Ba ifafazõchiʼõ na necheneche fana ba Jeroezalema, nibeʼe ba malige andrõ, ba ba watalinga gõli; ba wamazaoemba ono wana ba kara seboea. Ba arõoe misa hoemõngõ doeriania, me no sahõlihõli dõdõda wanolo [Jehowa] jaʼia, irege sabõlõ sibai ia.
16II. Ba me no sabõlõ saʼae ia, ba fajaw̃a dõdõnia, famakiko, ba mosala ia chõ Lowalanginia Jehowa; mõi ia ba gosali Jehowa, ba wanoenoe koemõjõ ba naha wanoenoe. (F. 25, 19). 17Ba laʼoʼõ ia Asaria ere andrõ, awõ gere bõʼõ, 80, ere Jehowa, sadõlõ tõdõ. 18Latenaw̃a razo Oesia, lamane chõnia: Tenga halõw̃õoe wanoenoe koemõjõ chõ Jehowa, jaʼoegõ Oesia, halõw̃õ gere ngaʼõtõ Gaʼaroni daʼõ, ere si no moeʼamoniʼõ ba wanoenoe koemõjõ. Hetaʼõ ba niʼamoniʼõ andre, no mosala ndraʼoegõ; tenga fangeboea dõimõ chõ Jehowa, Lowalangi! (Moz. IV. 18, 7). 19Ba mofõnoe Oesia, naha goemõjõ ba dangania, ba wanoenoe. Ba barõ wofõnoenia ba gere andrõ, ba toemboe ba gangangonia mbooe aoeri, ba zanehe gere andrõ, ba gosali Jehowa, ba ngai naha wanoenoe koemõjõ. (Moz. IV. 12, 10). 20Ba me lanehegõ ia Asaria, ere seboea ba ere andrõ fefoe, ba hiza, ba no mobooe aoeri ia ba gangango. Ba lafangaõsõ ia, lafofanõ, ba jaʼia gõi, ba aõsõ weʼamõi baero, me no ibõzi ia Jehowa. 21Ba sobooe aoeri razo Oesia, iroegi mate ia; ba jomo so ia si no tonia, sobooe aoeri; lõʼõ sa tola mõi ia ba gosali Jehowa. Ba satoea baomo ba gõdo, razo, ba ononia Jotamo, jaʼia gõi zamatoenõ hoehoeo niha ba danõ. (Moz. IV. 5, 2). 22Ba bõʼõnia hikaja Oesia, he famobõrõ, ba he safoeria andrõ, ba no Jesaja samaʼeleʼõ, ono Gamosi, zanoera. (Jes. 1, 1; 6, 1). 23Ba mate Oesia, itõrõ lala ndra amania, ba ba ngai ndra amania lakoʼo ia, ba mbenoea, ba ngai lewatõ razo; lamane sa: Sobooe aoeri! Ba fangalinia razo, ba ononia Jotamo.
Currently Selected:
SOERA NGAʼÕTÕ II. FAZA 26.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.