SOERA NGAʼÕTÕ II. FAZA 24.
FAZA 24.
I. Ihaogõ gosali Jehoasi. II. Iʼerogõ Lowalangi ba mameʼe adoe, me no mate Jojada ba me no ifaboenoeʼõ nono Jojada. III. Fasoewõta ba Ndrawa Garamo. Laboenoe Jehoasi.
(Faigi gõi Raz. II. 12)
1I. Ha mewitoe fache waʼeboea Jehoasi, me tobali razo ia, ba 40 fache razo ia ba Jeroezalema; ba tõi ninania, ba Sibia, banoea Mbereseba. 2Ba somasi Jehowa ilaoe Jehoasi, fatoea lõ si mate Jojada ere andrõ. 3Jojada zamangowaloe jaʼia, domboea ihalõ chõnia ira alawe, ba moʼono ia, ono matoea ba ono alawe. 4Ba iw̃aʼõ tõdõnia Jehoasi, ihaogõ gosali Jehowa. 5Ba ifaloechaʼõ gere ba Ono Lewi, ba ibeʼe li chõra, imane: Mitõrõi mbanoea mado Joeda, ba miw̃aʼõ mbalazo ba Ndraono Gizeraëli fefoe, enaʼõ ero rõfi taʼazõchi gosali Lowalangimi; ba mitaʼitaʼi wolaoe daʼõ! Ba lõ laʼaliogõ Ono Lewi andrõ. 6Ba ifakaoniʼõ Jojada hõgõ [gere] razo, ba imane chõnia: Hana wa lõ ibeʼe dõdõoe wangoemaʼõ ba Nono Lewi, enaʼõ laʼozaragõ ba mado Joeda ba ba mbanoea Jeroezalema mbobotolõ andrõ, niw̃aʼõ Moze, enoni Jehowa, õmõ Ndraono Gizeraëli sato, balazo nose goroisa. (Moz. II. 30, 12. 13). 7Me no adoedoe õsa ba gosali Lowalangi labeʼe Atalia, ira alawe seboea horõ andrõ, ba iraononia, ba no ahori manõ lafake ba Mbaʼali andrõ gameʼela andrõ, nibeʼe ba gosali Jehowa, niʼamoniʼõ. (F. 22, 3. 4). 8Ba lafazõchi kotakota, niw̃aʼõ razo, ba labeʼe ba zinga mbawandroehõ gosali Jehowa. 9Ba lafarongogõ ba mado Joeda, ba ba mbanoea Jeroezalema, ndramoebeʼe chõ Jehowa mbobotolõ andrõ niw̃aʼõ Moze, enoni Lowalangi, ba Ndraono Gizeraëli, ba danõ si mate. (A. 6). 10Ba omoeso dõdõ zatoea, awõ niha sato fefoe, ba laʼohe ba labeʼe ba kotakota andrõ, dozi ira. 11Ba ero na ifaʼoheʼõ ba zamaigi nifataro razo kotakota andrõ, ba Nono Lewi, ba na laʼila, oja bacha anaʼa, ba so doeroetoeli razo, awõ nifatenge gere seboea, ba lahalõ nõsi kotakota ba lafoeli ia ba nahania. Ba laʼerogõ maṍchõ zi manõ ba eboea laʼozaragõ anaʼa. 12Ba labeʼe ba mandroe doeka andrõ, ba halõw̃õ ba gosali Jehowa, razo ba Jojada, ba daʼõ dania zangoni sanoto kara ba sotomo, ba wangaʼazõchi osali Jehowa, ba he siamboe siʼõli ba tõla, ba wangehao osali Jehowa. 13Ba mohalõhalõw̃õ doeka andrõ, ba tedooe wangaʼazõchi andrõ labeʼe, ba tobali lafoeli lafazõchi gosali Lowalangi, dali nifachoi andrõ, lafoeli lahaogõ. 14Ba me no awai chõra daʼõ, ba laʼohe chõ razo ba chõ Jojada ganaʼa andrõ, si tosai, ba labaliʼõ fakake ba gosali Jehowa — fakake ba halõw̃õ andrõ ba ba wameʼe soemange, figa ba gamagama bõʼõ, anaʼa ba firõ. Ba lõ lafamalõmalõ wameʼemeʼe soemange nitoenoe ba gosali Jehowa, gõtõ waʼanaoe noso Jojada.
15II. Ba atoea Jojada ba afõli waʼaoeri ba mate ia, 130 fache ia, me mate ia. 16Ba ba mbanoea Dawido, ba ngai razo lakoʼo ia, me no si sõchi nilaoenia ba Ndraono Gizeraëli, ba he chõ Lowalangi ba ba gosalinia. 17Ba me no mate Jojada, ba laʼondrasi razo satoea mado Joeda, mangaloeloe ira chõnia; ba ifondrondrongo chõra razo. 18Ba laʼerogõ gosali Jehowa, osali Lowalangi ndra toeara, ba lafosoemange Gasera andrõ ba adoe nifofoë. Ba gõna fõnoe sabõlõbõlõ [fõnoe Lowalangi] mado Joeda ba banoea Jeroezalema, bõrõ lalõra andrõ. 19Ba ifatenge chõra zamaʼeleʼõ, solohe mangawoeli jaʼira chõ Jehowa enaʼõ. Ba moroi siʼaikõ ba dõdõra lafarooe ira ba lõ lafondrondrongo. 20Ba iraʼoe Zacharia, ono Jojada ere, Eheha Lowalangi, ba mõi ia ba niha sato, ba imane chõra: Daʼõ niw̃aʼõ Lowalangi: Hana wa misawõ goroisa Jehowa? andrõ wa si lõ fozoe wolaoemi. Me no miʼerogõ Jehowa, andrõ wa no iʼerogõ gõi ami. (Sangoehoek. 6, 34. Ngaʼõt. II. 15, 2). 21Ba mamagõlõ ira ba chõnia andrõ, ba laboenoe ia, lateboe kara, ba golajama gosali Jehowa, niw̃aʼõ razo chõra. (Mat. 23, 35. Heb. 11, 27). 22Lõʼõ saʼae itõrõ tõdõ razo Jehoasi waʼahachõ dõdõ nama Zacharia Jojada chõnia, ifaboenoeʼõ nononia. Ba imane daʼõ, me mate ia: Jehowa zangila ba ilaoe mbalõ dania!
23III. Ba me no aloea ndrõfi andrõ, ba so moroi si jaw̃a zabõlõ Ndrawa Garamo, ba wanoewõ Jehoasi. Ba me no laroegi danõ mado Joeda ba banoea Jeroezalema, ba lahori fefoe zatoea mbanoea ba mbanoeara; ba hadia ia gahoeloea fefoe, sahoeloe ira ba chõra, ba lafaʼoheʼõ chõ razo ba Ndramaseko. 24Ba he w̃aʼae lõ ato sibai zabõlõ Ndrawa Garamo, ba ibeʼe zoei ba dangara Jehowa zato sibai [Iraono Gizeraëli], me no laʼerogõ Jehowa, Lowalangi ndra toeara, ba tobali lafatõrõ chõ Jehoasi hoekoe andrõ chõ Lowalangi. 25Ba me labõhõli ia — mofõchõ sibai ia, me mofanõ ira —, ba mamagõlõ genoninia, ba chõnia, bõrõ wamoenoenia ono Jojada ere andrõ, ba laboenoe ia ba gasonia tooe. Ba mate ia, ba ba mbanoea Dawido lakoʼo ia, ba tenga sa ba lewatõ razo. (F. 21, 20). 26Ba daʼe zamagõlõ mege, ba wamoenoe jaʼia: Sabada, ono Ndraono Gamoni andrõ, ira alawe, Simeata ba Josabada, ono Zimeriti, Iraono Moabi ira alawe. 27Ba ononia andrõ, ba ha waʼeboea gõmõnia labeʼe [Dawa Garamo] ba fangaʼazõchi osali andrõ, ba hiza, ba no moetanõ ba zoera hikaja razo. Ba fangalinia razo, ba ononia Amasia.
Currently Selected:
SOERA NGAʼÕTÕ II. FAZA 24.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.