SOERA NGAʼÕTÕ II. FAZA 23.
FAZA 23.
I. Ifataro razo Joasi Jojada, ere. II. Faʼamate Gatalia. Lahori Mbaʼali.
(Faigi gõi Raz. II. 11, 4—20)
1I. Ba me no aloea meõnõ fache, ba maoso Jojada, iʼohe awõnia goemandra zi otoe andrõ — Asaria, ono Jerohama, ba Simaʼeli, ono Johanano, ba Asariahoe, ono Gobedi, ba Maʼaseja, ono Gadaja, ba Elisafati, ono Zichiri — si faʼawõ chõnia. 2Daʼõ zanõrõi banoea mado Joeda, ba laʼowoeloi Nono Lewi, moroi ba mbanoea mado Joeda fefoe, awõhõgõ ngafōē Ndraono Gizeraëli, ba weʼamõi ba Jeroezalema. 3Ba fawoeʼoe li chõ razo zato andrõ fefoe, ba gosali Lowalangi. Ba imane chõra [Jojada]: Ono razo andrõ nibeʼe razo, dali nifaboeʼoe Jehowa ba chõ ngaʼõtõ Dawido andrõ. (F. 21, 7). 4Ba mimane wolaoe: Si saraõ jaʼami — ere ba ono Lewi — nifataro na loeo sabato, ba nibeʼe sanaro ba mbawandroehõ tooe, 5ba si saraõ, ba ba gõdo razo toemaro, ba si saraõ zoei, ba ba mbawandroehõ Jezodi, ba niha sato, ba ba golajama gosali Jehowa. 6Ba ba gosali Jehowa, ba lõ tola mõi niha, ha niha ia, ha ere andrõ ba Ono Lewi, sangaingai halõw̃õ. Jaʼira zi tola mõi, me no niʼamoniʼõ ira. Ba niha sato fefoe, ba laʼoʼõ nifachoi Jehowa. (Ngaʼõt. I, 23, 28). 7Ba labeʼe ba hoenõra bacha razo Ono Lewi andrõ; dozi ira, ba fangõna ba dangara, ba sanõndragõ jaʼia ba gosali, ba niboenoe. Ba miʼiagõ awõ razo, na mõi ia tooe ba na ifoeli ia jomo. 8Ba laʼoʼõ Ono Lewi niw̃aʼõ Jojada chõra, iʼohe nawõnia zamõsana, he saheta sanaro na loeo sabato, ba he sawena mõi sanaro; lõʼõ sa niʼefaʼõ Jojada ere ngenolira andrõ. 9Ba Jojada ere, ba ibeʼe ba goemandra zi otoe andrõ doho andrõ ba baloese, chõ razo Dawido mege, si so ba gosali Lowalangi. 10Ba ifataro samasoei razo niha sato fefoe, — oi dozi fangõna ba danga, iʼotarai ngai gosali tánõ raja, noemalõ ba ngainia tánõ jõoe, iroegi naha wameʼe soemange, ba mangawoeli ba gosali. 11Ba laʼohe baero nono razo andrõ, lafanaemboe ia, ba labeʼe chõnia zoera goroisa, ba lafataro razo ia; ba labajoini ia Jojada ba ononia, ba moeʼao ira, lamane: Ja ahowoe razo!
12II. Ba me irongo weʼao zato Atalia, feʼao zi hoeroefai jaʼira, samahowoeʼõ razo, ba isaw̃a niha sato ba gosali. 13Ba iʼila saʼae razo, ba zinga mbawandroehõ, ba nahania, awõ goemandra andrõ ba solaoe torofe ba ngai razo, awõ niha ba danõ fefoe, si no omoeso tõdõ ba solaoelaoe torofe, ba sanoenõ andrõ, solaoe hadia ia nifolī, wameʼe tandra ba wanoenõ. Ba itika noechania Atalia ba imane: Folaw̃a! Folaw̃a! 14Ba hoemede Jojada ere ba goemandra zi otoe andrõ, solohe sabõlõ, ba imane chõra: Miʼohe baero ia ba gotaloea ngenoli, ba soloʼõ jaʼia, ba niboenoe si õli! Noa sa imane ere: Bõi miboenoe ia ba gosali Jehowa bacha. 15Ba laraʼoe ia, ba me no laroegi mbawandroehõ koedo ba gõdo razo, ba laboenoe ia ba daʼõ. 16Ba fawoeʼoe li ira Jojada niha sato, awõ razo, wa edõna ira banoea Jehowa ira saʼae. (F. 15, 12). 17Ba lasaw̃a gosali Mbaʼali sato fefoe ba ladoedoegõ; naha wameʼe soemange chõnia ba famaedonia andrõ, ba lafoefoe; ba laboenoe Matana andrõ, ere chõ Mbaʼali, fõna naha wameʼe soemange. (Moz. V. 13, 9). 18Aefa daʼõ, ba ifataro zanaro ba gosali Jehowa Jojada, ere ono Lewi andrõ, niʼangenoligõ Dawido no [ba halõw̃õ] ba gosali Jehowa, enaʼõ labeʼebeʼe zoemange nitoenoe andrõ chõ Jehowa, dali goroisa Moze, si fao faʼowoeawoea dõdõ ba fanoenõ, si mane nifachoi Dawido. (Moz. III, 1, 3. F. 29, 30). 19Ba ifataro ba zinga mbawandroehõ gosali Jehowa zanaro ba mbawandroehõ, fa bõi mõi bacha zi so faʼaraʼiõ hadia ia. (Moz. IV. 3, 10). 20Ba iʼohe goemandra zi otoe ba satoea ba samatõrõ niha sato, awõ niha ba danõ fefoe, ba ifasao mitooe razo, laʼotarai gosali Jehowa. Ba me no latõrõ mbawandroehõ tánõ jaw̃a andrõ, me no tohare ira ba gõdo, ba lafedadao ba dadaoma zalaw̃a razo. 21Ba oi omoeso dõdõ niha sato, ba sahono manõ mbanoea. Ba Atalia, ba laboenoe siʼõli.
Currently Selected:
SOERA NGAʼÕTÕ II. FAZA 23.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.