SOERA NGAʼÕTÕ II. FAZA 18.
FAZA 18.
I. Lasoewõ Ndrawa Garamo ira Jozafati Ahabi. II. Iʼombachaʼõ wa lõ fozoe Micha samaʼeleʼõ. III. Mate Gahabi ba wanoewõ andrõ.
(Faigi gõi Raz. I. 22)
1I. Ba tobali fahõna ganaʼa ba lachõmi chõ Jozafati, ba fambambatõ ia chõ Gahabi. (F. 17, 5). 2Ba so medõloe fache, ba mõi ia misi tooe chõ Gahabi ba Zamaria. Ba oja ngaʼeoe ihalõ Ahabi biribiri ba saw̃i, diwonia ba diwo nawõnia fao, ba ifowõhõ ia ba wefao ba wanoewõ Ramoti ba danõ Gileadi. 3Imane Ahabi, razo Ndraono Gizeraëli, chõ Jozafati, razo mado Joeda: Hadia, mõiʼõ awõgoe ba Ramoti ba danõ Gileadi? Ba imane chõnia: Si mane jaʼoegõ ndraʼodo; ba banoeagoe, ba si mane banoeaoe, ba mõido awõoe ba wanoewõ! 4Ba imane na Jozafati chõ razo Ndraono Gizeraëli: Tema sofoe oea, ha iw̃aʼõ Jehowa! (Sam. I. 23, 2. Raz. II. 3, 11). 5Ba ifaloechaʼõ zamaʼeleʼõ andrõ razo Ndraono Gizeraëli, 400, ba isofoe chõra, imane: Hadia, mõido manoewõ Ramoti ba danõ Gileadi, ba ma alacha lõʼõ? Ba lamane chõnia: Aeʼe, enaʼõ ibeʼe ba danga razo ira Lowalangi! 6Ba imane Jozafati: Hadia, lõ baero õ samaʼeleʼõ chõ Jehowa, enaʼõ chõnia tasofoe? 7Ba imane razo Ndraono Gizeraëli chõ Jozafati: So na zamõsa tõ, si tola tabeʼe sanofoe chõ Jehowa; ba no abao dõdõgoe chõnia, me tenga si sõchi nifaʼeleʼeleʼõnia ba chõgoe andre, ha si lõ sõchi: Micha andrõ, ono Jiméla. Ba imane Jozafati: Bõi w̃aʼõ daʼõ, jaʼoegõ razo. 8Ba hoemede razo Ndraono Gizeraëli chõ genoninia, imane: Taʼitaʼi hede chõ Micha andrõ, ono Jiméla! 9Ba razo Ndraono Gizeraëli ba Jozafati, razo mado Joeda, ba no doemadao ba mbawa gõli Zamaria, baroe loeo mbaroera, ba dadaomania doemadao zamõsana, ba mamaʼeleʼõ zamaʼeleʼõ andrõ fefoe fõnara. 10Ba ifotandroe siʼõli ia Sedekia, ono Genaʼana, ba imane: Daʼõ niw̃aʼõ Jehowa: Õtandroe dania tooe Ndrawa Garamo tandroe si mane daʼe, irege no ahori ira õbeʼe! 11Ba si manõ wamaʼeleʼõ andrõ fefoe, ba lamane: Ae ba Ramoti andrõ, ba danõ Gileadi, ba si sõchi dania wozoe chõoe, ba ibeʼe ba danga razo ira Jehowa! 12Ba imane chõ Micha andrõ sinenge andrõ, si no mõi mogaoni jaʼia: Hiza, ha sara manõ li zamaʼeleʼõ andrõ, wangombacha si sõchi chõ razo, ba bõi faehoesi niw̃aʼõoe ba niw̃aʼõra fefoe; si sõchi w̃aʼõ. 13Ba imane Micha: Faja wa no saoeri Jehowa, na tenga ha sambalõ niw̃aʼõ Lowalalangigoe chõgoe oew̃aʼõ!
14II. Ba me iroegi razo, ba imane chõnia razo: He Micha, hadia, mõiga manoewõ Ramoti ba danõ Gileadi, ma lõʼõ? Ba imane: Miʼaeʼe, ba mofozoe wolaoemi, ba tebeʼe ba dangami ira. 15Ba imane chõnia razo: Ha me oega oebeʼe ba hõloe ndraʼoegõ, enaʼõ ha sambalõ si doehoe õʼombachaʼõ chõgoe ba dõi Jehowa? 16Ba imane: No oeʼila, no moezaewe Ndraono Gizeraëli fefoe, ba hili, hoelõ mbiribiri si lõ koebalo. Ba imane Jehowa: Si lõ sõchi daʼõ; hana na ifoeli ia chõra zamõsana, ja lõ hadia ia chõra! 17Ba imane razo Ndraono Gizeraëli chõ Jozafati: Tenga no oew̃aʼõ chõoe: Lõ hadia ia zi sõchi ifaʼeleʼõ ba chõgoe andre, ha si lõ sõchi? 18Ba imane Micha: Bõi oea! Mifondrondrongo niw̃aʼõ Jehowa! No oeʼila, no doemadao Jehowa ba dadaomania, ba no lafatambai ia banoea zoroego sato. 19Ba imane Jehowa: Ha niha zi mõi mamowõhõ Ahabi andrõ, razo Ndraono Gizeraëli, enaʼõ mõi ia manoewõ, ba enaʼõ ba Ramoti ba danõ Gileadi mate ia? Ba oi fabõʼõ niw̃aʼõra. 20Ba so zamõsa mbechoe, iʼondrasi Jehowa, ba imane: Jaʼo zi mõi mamowõhõ jaʼia! Ba imane chõnia Jehowa: Ha õbeʼe famowõhõ? (Job. 1, 6). 21Ba imane: Mõido bechoe sofaja ba mbewe zamaʼeleʼõ andrõ chõnia fefoe. Ba imane Jehowa: Jaʼia daʼõ, õfaloea dania wamowõhõ andrõ; aeʼe ba laoe daʼõ! 22Ba hiza, ba no ibeʼe ba mbewe zamaʼeleʼõ andrõ chõoe fefoe mbechoe sofaja Jehowa, ba noa sa ihonogõi chõoe wamakiko Jehowa. 23Ba maoso Zedekia andrõ, ono Genaʼana, itema ifalisi mbawa Micha, ba imane: Ba hadia lala waʼaheta Geheha Jehowa chõgoe, ba wehedegoe chõoe? (Mar. 14, 25. Hal. zin. 23, 2.A. 10). 24Ba imane Micha: Hiza, õʼila dania, na loeo õtõrõi mbateʼe jomo, ba waminiʼõ jaʼoegõ! 25Ba imane razo Ndraono Gizeraëli: Mihalõ Micha, ba miʼohe mangawoeli ia chõ Gamoni koemandra ba mbanoea ba chõ Joasi, ono razo, 26ba mimane: Daʼõ niw̃aʼõ razo: Mikoeroe daʼe, ba ha maʼifoe mibeʼe gõ ba ha maʼifoe nidanõ, irege mangawoelido lõ hadia ia chõgoe. (F. 16, 10). 27Ba imane Micha: Na mangawoeli ndraʼoegõ lõ hadia ia chõoe, ba tenga taroma li Jehowa nifaʼemagoe! Ba imane na: Mifondrondrongo, jaʼami niha fefoe!
28III. Ba mõi razo Ndraono Gizeraëli, awõ Jozafati, razo mado Joeda, lasaw̃a Ramoti ba danõ Gileadi. 29Ba imane razo Ndraono Gizeraëli chõ Jozafati: Daʼoeʼonoecha noecha niha bõʼõ, ba wanoewõ andrõ, ba jaʼoegõ, ba bõi boelõʼõ noechamõ. Ba ifohani ia razo Ndraono Gizeraëli, ba lasaw̃a zi fasõndra ira. 30Ba no ibeʼe li razo Ndrawa Garamo ba goemandra goereta ba wanoewõ andrõ chõnia, no imane: Bõi milaoe ba niha bõʼõ, he ono mbanoea ba he salaw̃a, ha sambalõ chõ razo Ndraono Gizeraëli andrõ! 31Ba me laʼila Jozafati koemandra goereta andrõ, ba lamane: Daʼõ razo Ndraono Gizeraëli andrõ! Ba lafaʼoeʼoe ia, ba wolaoe chõnia. Ba moeʼiraʼira Jozafati, ba itolo ia Jehowa, idõnisi misa ira Lowalangi, enaʼõ labõhõli ia. 32Ba me laʼila koemandra goereta andrõ, wa tenga razo Ndraono Gizeraëli ia, ba labõhõli ia, lafoeli ira. 33Ba so zogai fanania, si lõ moedõnadõna, ba iʼefasi, ba gõna chõ razo Ndraono Gizeraëli, ba gotaloeara mbõbõ taloe gõrõba. Ba imane chõ zolohe koeretania: Baliʼõ, ohe misa ndraʼo, hetado ba wasõndrata; noa sa mesocho ndraʼo! 34Ba itoegoe abõlõbõlõ wasõndrata, me loeo daʼõ, ba razo Ndraono Gizeraëli, ba sizizio ba goereta, fetahõ Ndrawa Garamo, iroegi tánõ owi; ba me aechoeʼaechoe loeo, ba mate ia.
Currently Selected:
SOERA NGAʼÕTÕ II. FAZA 18.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.