SOERA NGAʼÕTÕ II. FAZA 17.
FAZA 17.
I. Faʼatoelõ dõdõ Jozafati, awõ wofozoe wolaoenia. II. Itiboʼõ nadoe. III. Faʼeboea dõinia ba faʼabõlõnia.
1I. Ba ononia Jozafati zi tobali razo fangalinia, ba abeʼe daʼõ, oedoe Ndraono Gizeraëli. (Raz. I. 15, 24). 2Ba idozigõ banoea saro wamataro sabõlõ, ba ba danõ mado Joeda ba ba mbanoea mado Geferaji andrõ, nifadõni namania Asa chõra, ba ifataro zanaro. 3Ba itolo Jozafati Jehowa, me no sanõrõ lala doeania Dawido ia, lala ba mbõrõta, ba tenga si olembai Baʼali andrõ ia, 4lõʼõ sa ibõhõli Lowalangi doeania andrõ, iʼoʼõ goroisania, tenga si mane Iraono Gizeraëli. 5Andrõ tedooe waʼasalaw̃a, me jaʼia zolohe, ibeʼe Jehowa; ba mado Joeda fefoe, ba momamoeala chõ Jozafati, ba tobali fahõna chõnia ganaʼa, ba he soemange. (Raz. I. 10, 25. F. 18, 1).
6II. Ba me itoegoe abeʼe dõdõnia wanõrõ lala andrõ, nifachoi Jehowa, ba iheta gõi hilihili andrõ, fabaja eoe niʼamoniʼõ andrõ, ba mado Joeda. 7Ba me no aloea mendroea fache razo ia, ba ifatenge nawõnia salaw̃a andrõ: Benihaili ba Obadia ba Sacharia ba Netanaʼeli ba Michaja, ba wamahaõ banoea mado Joeda, 8ba ibeʼe awõra Nono Lewi: Semaja ba Netania ba Sebadia ba Azaheli ba Semiramoto ba Jonata ba Adonia ba Tobia ba Tobi-Adonia, Ono Lewi andrõ, ba fao na gõi gere, Elisama ba Joramo. 9Daʼõ zamahaõ mado Joeda; laʼohe zoera goroisa Jehowa ba latõrõi mbanoea mado Joeda fefoe, mamahaõ niha sato.
10III. Ba ihawoei faʼataʼoe Jehowa gamatõrõw̃a niha baero fefoe, si tefasoei mado Joeda, ba tobali lõ lasoewõ Jozafati. 11Ba Dawa Wilisiti õsa, ba laʼohe mboeala chõ Jozafati, ba firõ, beo; ba he Dawa Ara, ba laʼohe chõnia goerifõ sideʼide: 7700 mbiribiri si matoea, ba 7700 nambi si matoea. (Raz. I. 5, 1). 12Ba tobali itoegoe tedooe manõ waʼabõlõ Jozafati, irege no fahõna, ba itaroeʼõ hati ba danõ mado Joeda ba banoea ba nihõna balazo. 13Ba no fahõna chõra mbalazo ba mbanoea mado Joeda andrõ ba ato zabõlõ ba Jeroezalema. 14Ba daʼõ wamaʼoli jaʼira, ba ngafoera andrõ: hõgõ ngahõnõ ba mado Joeda, ba Adéna, hõgõ, ba 800,000 nawõnia sabõlõ; 15aefa daʼõ, ba Johanano, hõgõ gõi, 16ba 280,000 nawõnia sabõlõ, ba aefa daʼõ, ba Amasia, ono Zichiri, si no mangoroʼõ jaʼia chõ Jehowa, saoha gõlõ, ba 200,000 nawõnia sabõlõ. 17Ba mado Mbenijami, ba Eliada sabõlõ andrõ, ba 200,000 nawõnia si no mangaró, fana ba baloese, 18ba aefa daʼõ, ba Josabada ba 180,000 nawõnia, si no mangaró, ba wasoewõta. 19Daʼõ genoni razo andrõ, lõ lai nifataronia ba mbanoea saro andrõ, ba danõ mado Joeda maʼasagõrõ.
Currently Selected:
SOERA NGAʼÕTÕ II. FAZA 17.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.