SOERA NGAʼÕTÕ II. FAZA 14.
FAZA 14.
I. Razo Asa, razo satoelõ tõdõ, ba sofozoe wolaoenia. II. Lasoewõ ia Dawa Gaitiofia, ba jaʼia zabõlõ.
(A. 14, 1—4: Raz. I. 15, 11. 12)
1I. Ba mate Gabia, itorõ lala ndra amania, ba ba mbanoea Dawido andrõ lakoʼo ia. Ba fangalinia razo, ba ononia Asa. Ba me razo daʼõ, ba lõ hadia ia, sahono manõ ira ba danõ, mewoeloe fache. 2Ba satoelõ ilaoe Asa ba si sõchi wamaigi Lowalanginia, Jehowa. 3Iheta naha wameʼe soemange bõʼõ andrõ, fabaja hilihili andrõ, irasa harefa, ba iʼobõ geoe niʼamoniʼõ. 4Ba iw̃aʼõ ba mado Joeda, Jehowa, Lowalangi ndra toeara laʼolembai ba laʼoʼõ goroisa, awõ gamachoita. 5Iheta hilihili andrõ, awõ nadoe loeo, ba mbanoea mado Joeda fefoe, ba sahono gamatõrõw̃ania, ba gõtõnia. (Moz. III. 26, 30). 6Ba iʼaroʼõ mbanoea mado Joeda õsa; me no sahono ira ba danõ, ba me lõʼõ manõ sanoewõ jaʼira, ba gõtõ daʼõ, me no ifaigi chõra waʼahono Jehowa. (F. 15, 15). 7Andrõ wa imane Asa ba mado Joeda: Datataroeʼõ mbanoea andrõ ba taʼõlini õli kara ba tafomalige ba tafobawa gõli nilazi, me no fõnada manõ na danõ, bõrõ me lõ nibõhõlida Jehowa, Lowalangi ndra toeada. No jaʼia taʼolembai, ba lõ hadia ia chõda, fasoei manõ, ibeʼe. Ba lalaoe, ba mofozoe. 8Ba no ato zabõlõ chõ Asa, solohe baloese ba toho: mado Joeda, ba 300,000, ba mado Mbenijami, ba 280,000, solohe baloese ba sogai fana, — oi sabõlõ.
9II. Ba so moroi si tooe Zera, Dawa Gaitiofia, mõi manoewõ jaʼira, 1,000,000 chõnia zabõlõ ba 300 goereta, ba iroegi Maresa. 10Ba ifaondragõ ia Asa, ba ndraso Zefata lafaʼanõ ira, ba ngai Maresa. 11Ba iʼangarõfi li Lowalanginia Jehowa Asa, mangandrõ ia, imane: ”He Jehowa, ha jaʼoegõ zangila manolo si tebai ba zabõlõ. Tologa, jaʼoegõ Jehowa, Lowalangima! Jaʼoegõ sa weʼeweʼe dõdõ, ba no moroi ba dõimõ, wa no mafaondragõ zato sibai andrõ. He Jehowa, Lowalangima ndraʼoegõ; lõ sangila molaw̃a jaʼoegõ niha si mate andrõ!” (Sam. I. 14, 6). 12Ba ibõzi Ndrawa Gaitiofia Jehowa, fõna Asa ba fõna mado Joeda, ba moloi ira. 13Ba lagohi ira Asa ba awõnia sabõlõ andrõ, iroegi ba Gerara. Ba ato sibai zi mate Dawa Gaitiofia, lõ fangorifi saʼae; nirasa saʼae ira chõ Jehowa ba ba zabõlõ andrõ chõnia. Ba eboea sibai zahoeloe mado Joeda, 14ba atoeʼa ira ba mbanoea andrõ fefoe, si tefasoei Gerara; noa sa ihawoei faʼataʼoe chõ Jehowa mbanoea andrõ. Ba laʼoloiʼõ ganaʼa ba hadia ia na ba mbanoea andrõ fefoe [mado Joeda], eboea sibai nisõndrara chõra. 15Ba ose goerifõ, ba lahawoei ba oja sibai laʼoloiʼõ biribiri ba ondra, ahoeloeara, ba lafoeli ira ba Jeroezalema.
Currently Selected:
SOERA NGAʼÕTÕ II. FAZA 14.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.