SOERA NGAʼÕTÕ II. FAZA 13.
FAZA 13.
I. Fasoewõ ira Gabia Jerobeamo. Hoehoeo Gabia ba Ndraono Gizeraëli. II. Abõlõ Gabia, teʼala Ndraono Gizeraëli. Lachõmi Gabia ba faʼamatenia.
(Faigi gõi Raz. I. 15, 1—8)
1I. Me no aloea mewelewitoe fache razo Jerobeamo tobali razo mado Joeda Gabia. 2Medõloe fache razo ia ba Jeroezalema; ba tõi ninania, ba Maʼacha, ono Goeriëli, banoea Gibea. Ba fasoewõ ira Gabia Jerobeamo. 3Abia zi bõrõtaigõ fasoewõta andrõ, ato sibai chõnia zabõlõ, 400,000 nitoetoejoe. Ba ifaondragõ ia Jerobeamo, no teʼanõ gõi ira, 800,000, sabõlõ. 4Ba iʼagõ zoezoe hili Zemaraʼi Abia, ba hili mado Geferaji, ba moeʼao ia, imane: Mifondrondrongo, jaʼoegõ Jerobeamo ba jaʼami Iraono Gizeraëli! 5Hadia, lõ miʼila enaʼõ wa no chõ Dawido ba ba ngaʼõtõnia ibeʼe waʼarazo ba Ndraono Gizeraëli Jehowa, Lowalangi Ndraono Gizeraëli, si lõ mamalõmalõ, ba wawoeʼoesa li andrõ nilaoe asio? (Moz. III. 2, 13. Moz. IV. 18, 19). 6Ba no maoso Jerobeamo andrõ, ono Nebati, enoni Zelomo ono Dawido, ilaw̃a zochõ jaʼia. (Raz. I. 11, 26). 7Ba no mangondra chõnia niha sambõ eraʼera, niha si lõ ngaroro, ba no lahõndrõgõ Rehabeamo, ono Zelomo; me no ono matoea na Rehabeamo, sambõ faʼabeʼe dõdõ, ba tebai itimba ira. 8Ba iadaʼe, ba miwai miʼila milaw̃a waʼarazo andrõ chõ Jehowa, si so ba danga ngaʼõtõ Dawido, me no ato sibai ami, ba me no awõmi nono zaw̃i balaki andrõ, nifazõchi Jerobeamo Lowalangimi. (Raz. I. 12, 28). 9Hadia, tenga no mitiboʼõ gere andrõ chõ Jehowa, ngaʼõtõ Gaʼaroni andrõ, fabaja Ono Lewi, ba tenga no miwõwõi chõmi gere, si mane ere ba niha baero? Ha niha zolohe ono zaw̃i, sageoe, ba biribiri si matoea, fitoe ngaʼeoe, ba wamamataroʼõ jaʼia ere, ba tefataro ere ba zi tenga Lowalangi. (Moz. II. 18, 41. Moz. V. 32, 17. F. 11, 15). 10Ba Lowalangimā, ba Jehowa, ba lõ niʼerogõma jaʼia, ba ere chõ Jehowa ngaʼõtõ Gaʼaroni, ba lahalõhalõ halõw̃õra Ono Lewi, 11ero mahemoloe ba ero owī latoenoetoenoe chõ Jehowa zoemange nitoenoe ba koemõjõ ba hadia ia zamohoea, ba lafaʼoli roti andrõ ba meza balaki, ba ero owi, ba latoenoe wandroe, ba naha wandroe anaʼa andrõ. Me matõngõni nifachoi Lowalangima, Jehowa, ba jaʼami, ba no miʼerogõ ia! (Moz. II. 6, 12. Moz. IV. 28, 3—8). 12Si ndroehoe, itolo ndraʼaga Lowalangi, solohe jaʼaga, ba no fao chõma gere andrõ chõnia ba torofe andrõ fangechoegõ niha, ba wangechoegõ niha, chõmi. He jaʼami, Iraono Gizeraëli! Bõi milaw̃a Jehowa, Lowalangi ndra toeami, ba wa lõ boto sa atṍ aechoe chõmi! (Moz. IV. 10, 8. 9).
13II. Ba iw̃aʼõ Jerobeamo lafasoei mado Joeda si no maminiʼõ jaʼira mege; ba tobali lafaondragõ mado Joeda, ba so gõi moroi foeri zi no tobini mege. 14Ba me labaliʼõ ira foeri mado Joeda, ba laʼila, faoma lalaoe chõra, he moroi fõna ba he moroi foeri. Ba laʼangarõfi li Jehowa, ba lalaoe dorofe ere, 15ba lahahagõ mado Joeda; ba me lahahagõ, ba teʼala Jerobeamo ba Iraono Gizeraëli fefoe, ibeʼe Lowalangi, chõ Gabia ba ba ba mado Joeda. 16Ba moloi Ndraono Gizeraëli labeʼe mado Joeda, ba ibeʼe ba danga mado Joeda ira Lowalangi. 17Ba ato sibai ira niboenoe ndra Abia sabõlõ andrõ chõnia, tobali 500,000 zi mate niboenoe, Iraono Gizeraëli. 18Ba tobali nihõndrõgõ Ndraono Gizeraëli, ba sabõlõ mado Joeda, me no labeʼe weʼeweʼe dõdõra Jehowa, Lowalangi ndra toeara. 19Ba igohi Jerobeamo Abia, ba ifadõni chõnia mbanoea õsa: Betiëli, fabaja halama soja chõra, ba Eferona, fabaja halama soja chõra. 20Ba no amomó Jerobeamo, ba gõtõ Gabia andrõ. Ba ibõzi ia Jehowa ba mate ia. 21Ba itoegoe abõlõ Gabia; 14 ihalõ ira alawe, ba 22 nononia, ono matoea, ba 16 nono alawe. 22Ba hadia na niw̃aʼõ enaʼõ, ba chõ Gabia andrõ, ba boeaboeania ba hoehoeonia, ba no moetanõ ba zoera hikaja andrõ chõ Ido samaʼeleʼõ. (F. 12, 15).
Currently Selected:
SOERA NGAʼÕTÕ II. FAZA 13.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.