SOERA NGAʼÕTÕ II. FAZA 12.
FAZA 12.
I. Isoewõ mado Joeda Zizaki, razo Miseraji. II. Itegoe ndra Rehabeamo Semaja, ba irara dõdõra dania. III. Faʼawoewoe Rehabeamo ba faʼamatenia.
(Faigi gõi Raz. I. 14, 21—31)
1I. Ba me no aro waʼarazo chõ Rehabeamo ba me no isõndra waʼabõlõ, ba iʼerogõ goroisa Jehowa, ba awõnia Ndraono Gizeraëli fefoe. 2Ba me no aloea mendrõfa fache razo Rehabeamo, ba so moroi si tooe Zizaki, razo Miseraji, mõi moesoewõ Jeroezalema, bõrõ me no farõi ira chõ Jehowa. 31200 goereta chõ Zizaki ba 60,000 niha si fakoedo, ba sato, si fao chõnia moroi ba danõ Miseraji, ba lõ moetaha moeʼerai: Dawa Libia ba Dawa Zoechi ba Dawa Gaitiofia. 4Atoeʼa ia ba mbanoea saro andrõ, ba danõ mado Joeda, ba iroegi Jeroezalema. (F. 11, 5—10).
5II. Ba so Zemaja samaʼeleʼõ andrõ; mõi ia chõ ndra Rehabeamo satoea mado Joeda, si no mõi mijomo ba Jeroezalema, ba waʼataʼoera Zizaki, imane chõra: Daʼõ niw̃aʼõ Jehowa: No miʼerogõ ndraʼodo, ba oeloeloe saʼae gõi ami ba danga Zizaki! 6Ba mangaloeloe zatoea mado Joeda, awõ razo, ba lamane: 7Satoelõ nilaoe Jehowa! Ba me iʼila Jehowa, no mangaloeloe ira, ba hoemede ia chõ Zemaja, imane: No mangaloeloe ira, ba lõ oefakiko ira, oefaigi sa chõra wangorifi maʼifoe, fa lõ oebeʼe ifatõrõ ba Jeroezalema wõnoegoe Sizaki. 8Ba si mõi barõ mbawania sa ira, enaʼõ laʼila, wa no faehoe ira weʼamõi enonigoe weʼamõi enoni razo niha baero.
9III. Ba so Zisaki, razo Miseraji, isaw̃a Jeroezalema, ba ihalõ girõgirõ andrõ ba gosali Jehowa, awõ girõgirõ ba gõdo razo, ahori ihalõ; ba he baloese anaʼa andrõ, nifafazõchiʼõ Zelomo, ba ihalõ. 10Ba iʼangaliʼõ baloese tõla Rehabeamo ba ibeʼe ba danga goemandra wazoeri, sanaro ba mbawandroehõ gõdo razo. 11Ba ero na mõi ba gosali Jehowa razo, ba so wazoeri andrõ ba laʼamaloese mbaloese no mege, ba lafoeli dania ba naha wazoeri. 12Ba me mangaloeloe razo, ba alõ wõnoe Jehowa chõnia, lõ ifaloea ifakiko; so sa atṍ na maʼifoe zi sõchi ba mado Joeda. 13Ba tobali iʼaroʼõ ia ba Jeroezalema razo Rehabeamo; ba Jeroezalema razo ia; 41 fache ia, me tobali razo ia, ba mewelewitoe fache razo ia ba Jeroezalema, ba mbanoea andrõ nitoejoe Jehowa ba mado Ndraono Gizeraëli fefoe, ba wamonahia tõinia ba daʼõ. Tõi ninania, ba Naʼama, Iraono Moabi. (F. 6, 20). 14Ba si lõ sõchi ilaoe; lõʼõ sa ibeʼe dõdõnia wangaloei Jehowa. 15Ba hikaja Rehabeamo andrõ, he famobõrõ, ba he safoeria, ba no moetanõ ba zoera hikaja andrõ chõ Zemaja samaʼeleʼõ ba chõ Ido sangiʼila andrõ. Ba fasoewõta ndra Rehabeamo Jerobeamo, ba no sagõtõ faʼara. 16Ba mate Rehabeamo, itõrõ lala ndra amania, ba ba mbanoea Dawido andrõ lakoʼo ia. Ba fangalinia razo, ba ononia Abia.
Currently Selected:
SOERA NGAʼÕTÕ II. FAZA 12.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.