SOERA NGAʼÕTÕ I. FAZA 28.
FAZA 28.
I. Hoehoeo Dawido ba waloechata, ba wolaoe osali andrõ. Ifadoehoeʼõ chõra nononia Selomo. II. Iw̃aʼõ chõ Zelomo wolaoe osali.
1I. Ba ifaloechaʼõ Dawido zatoea Ndraono Gizeraëli, awõ hõgõ madora ba solohe ngenoli genoni razo andrõ, ba koemandra ngahõnõ ba koemandra ngaotoe ba hõgõ mandroe ba gochõta razo ba ba goerifõnia ba ba goerifõ ndraononia ba enoninia jomo ba saradadoe andrõ ba dozi solohe baloese; ba Jeroezalema waloechata andrõ. 2Ba maoso Dawido, ba imane: Mifondrondrongo, jaʼami ira talifoesõgoe ba jaʼami banoeagoe! No oew̃aʼõ tõdõgoe, oelaoe nahia sahono dawõla goroisa Jehowa andrõ ba bakoebakoe gahe andrõ chõ Lowalangida, ba no oehõnagõ oefaigi hadia ia, ba wolaoe jaʼia. (F. 22, 7—10). 3Ba no imane chõgoe Lowalangi: Tenga jaʼoegõ zolaoe osali ba dõigoe andrõ, me no niha sanoewõnoewõ ndraʼoegõ, ba me no adoewa ndro niha õbeʼe. (Sam. II, 7, 5). 4Ba no itoejoe ndraʼo Jehowa, Lowalangi Ndraono Gizeraëli, ba zi sawōē jaʼaga, enaʼõ si lõ mamamamalõmalõ razo ndraʼo ba Ndraono Gizeraëli. Me no mado Joeda itoejoe salaw̃a, ba ba mado Joeda andrõ, ba si sawōē jaʼaga, ba ba ndraono namagoe, ba jaʼodo zomasi ia ibeʼe razo Ndraono Gizeraëli fefoe. (Moz. I. 49, 10. Sam. I. 16, 1. 12). 5Ba ba ndraonogoe andrõ fefoe — no oja nibeʼe Jehowa chõgoe ono matoea — ba onogoe Selomo itoejoe, enaʼõ jaʼia zidadao ba dadaoma zalaw̃a andrõ chõ Jehowa, razo Ndraono Gizeraëli. 6No imane chõgoe: Onooe Selomo andrõ zolaoe osali, awõ golajama andrõ chõgoe; noa sa jaʼia nitoejoegoe onogoe, ba amania saʼae ndraʼõ. 7Ba oeʼaroʼõ waʼarazonia, si lõ mamalõmalõ, na lõ iboelõʼõ woloʼõ oroisagoe, awõ nifachoigoe andrõ, si mane maʼõchṍ. 8Ba hiza, ba zanehe Ndraono Gizeraëli fefoe, banoea Jehowa andre, ba ba zamondrongo Lowalangida; Miʼoʼõ sibai goroisa Jehowa, Lowalangimi, fefoe, enaʼõ si lõ teboelõ ba danõ si sõchi andre ami, ba enaʼõ ondrõitami ba ngaʼõtõmi ia, gõtõgõtõ waʼara. 9Ba jaʼoegõ, onogoe Selomo, ba jaʼaboto ba dõdõoe Lowalangi namaoe, ba iagõ enoninia, moroi siʼaikõ ba dõdõoe, moroi ba dõdõ sedõna! Isechegõ sa dõdõ fefoe Jehowa, ba ahori iʼila nichoi dõdõ, awõ geraʼera. Na õʼaloei ia, ba ibeʼe nisõndraoe ia; ba na õʼerogõ ia, ba itiboʼõ ndraʼoegõ, si lõ foelitõ. (Sam. I. 16, 6. Raz. I. 8, 39. Sin. 7, 10). 10Ba faigi, he õwisa! Noa sa itoejoe ndraʼoegõ Jehowa, ba wolaoe omo, niʼamoniʼõ; ba laboe, abeʼeʼõ dõdõoe!
11II. Ba ibeʼe Dawido chõ nononia Selomo doemadoema golajama nifosagõ andrõ ba doemadoema gosali, he wisa gotoʼoto ba he wisa mbateʼe girõgirõ andrõ ba bateʼe ba zi sagõtõ, ba bacha ba nõsi nomo, awõ nahia [dawõla, fabaja] lagõ andrõ, (Moz. II. 25, 9), 12ba doemadoema hadia ia fefoe zi so ba dõdõnia: olajama gosali Jehowa, ba bateʼe andrõ fefoe, fasoei, ba bateʼe girõgirõ ba gosali Lowalangi ba bateʼe nihõna andrõ, ameʼela niʼamoniʼõ; 13awõ wamaʼoli gere ba Ono Lewi, ba he wisa halõw̃õ ba gosali Jehowa fefoe ba doemadoema wakake fefoe, sogoena ba halõw̃õ ba gosali Jehowa. 14Ba anaʼa, ha waʼeboea mogoena ba wamazõchi fakake andrõ, ba ngawalõ halõw̃õ andrõ, ba sogoena ba wakake firõ andrõ fefoe, ha waʼeboea zogoena ba wakake andrõ, ba ngawalõ halõw̃õ andrõ. 15Ba sogoena ba naha wandroe anaʼa andrõ, fabaja fandroe anaʼa, ha waʼaboea naha wandroe andrõ, samboesamboea, fabaja fandroenia, ba ba naha wandroe firõ, ha waʼaboea naha wandroe andrõ, samboesamboea, fabaja fandroe, dali wogoena naha wandroe andrõ fefoe. 16Ba anaʼa sogoena ba wamazõchi meza andrõ, ha oega, meza roti nifaigifaigi andrõ, ba firõ ba meza firõ, 17ba sogoena ba garafoe andrõ ba ba wiga ba ba gendri, balaki, ba ba mako balaki andrõ, ha oega nifazõchi, awõ zogoena ba mako firõ andrõ. 18Ba balaki, ha waʼeboea mogoena ba naha wanoenoe koemõjõ, ba doemadoema goereta andrõ, keroebi balaki, samologõ afira, ba samaloegõ tawõla goroisa Jehowa andrõ. 19”Ba zoera nisoera danga Jehowa so daʼõ fefoe; no ifahaõ ndraʼo ba doemadoema andro fefoe, he wisa wolaoe”. [Imano Dawido]. 20Ba imane na Dawido chõ nononia Selomo: Abeʼeʼõ dõdõoe, ja sabõlõ ndraʼoegõ, ba laboe ba halõw̃õ! Bõi boesi dõdõoe, ba bõi beʼe nikeani ndraoegõ; itoloʼõ sa Lowalangi, Jehowa, Lowalangigoe. Lõ ibõda dangania ba lõ ibõhõli ndraʼoegõ, irege no awai fefoe nilaoe andrõ ba halõw̃õ andrõ ba gosali Jehowa. (F. 22, 13. Moz. V. 31, 6). 21Ba hiza ngenoli gere andrõ, awõ ngenoli Nono Lewi, ba halõw̃õ andrõ fefoe ba gosali Lowalangi; hadia ia halõw̃õ, ba no so chõoe niha, ha niha, si no aoha õlõ, ba wolaoe hadia ia fefoe, ba waʼatoekara adrõ, ba si manõ gõi zatoea andrõ, awõ niha sato fefoe, ba lõ mamalõmalõ, wa samondrongo lioe ira.
Currently Selected:
SOERA NGAʼÕTÕ I. FAZA 28.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.