SOERA NGAʼÕTÕ I. FAZA 29.
FAZA 29.
I. Labeʼe zaoha gõlõra Dawido ba satoea andrõ, ba wolaoe osali. II. Isoeno Lowalangi Dawido. III. Faʼomoeso dõdõ zato. Razo saʼae Zelomo. IV. Faʼamate Dawido.
1I. Ba imane na razo, Dawido, ba niha sato fefoe: Onogoe Selomo andre, ba ha jaʼia nitoejoe Lowalangi; ba no iraono na, sambõ faʼabeʼe; ba halõw̃õ andrõ, ba no seboea sibai; tenga sa nahia niha dania gõdo andrõ, no nahia Lowalangi, Jehowa. (F. 22, 5). 2Ba no oeʼositõlagõ wangõhõna balazo gosali Lowalangigoe andrõ anaʼa, ba gamagama anaʼa andrõ, ba firõ ba gamagama firõ, ba tõla ba gamagama tõla, ba siʼõli ba gamagama siʼõli, ba eoe ba gamagama eoe, ba he batoe oena, ba kara lesi, kara saitõ, ba kara solaʼalaʼa ba feremata, hadia ia, ba kara maremara, oja sibai. 3Ba baero õ, ba oebeʼe na balazo gosali Lowalangigoe si so chõgoe, anaʼa ba firõ, bõrõ waʼomoeso dõdõgoe andrõ ba gosali Lowalangigoe andrõ, lõ lai fefoe zi no oehõna balazo niʼomoniʼõ andrõ: 42376 fikoe ganaʼa ba 4927 fikoe wirõ, si no moetoenoe, ba wamoʼoeli bagolõ tánõ bacha, 5ba anaʼa ba gamagama anaʼa andrõ ba firõ ba gamagama firõ, ba ba nilaoe doeka andrõ dania, fefoe. Ba ha niha zaona õlõ, maʼõchṍ, ba wameʼe chõ Jehowa? (Raz. I. 9, 28. Moz. II. 35, 5). 6Ba aoha gõlõ hõgõ ngafōē, ba hõgõ mado Ndraono Gizeraëli ba hõgõ ngahõnõ andrõ ba hõgõ ngaotoe ba satoea genoni razo, 7ba labeʼe, balazo ba wolaoe osali Lowalangi andrõ, ba 3960 fikoe ganaʼa ba 10,000 roefia balaki ba 7040 fikoe wirõ ba 18,000 fikoe dõla ba 100,000 fikoe ziʼõli. 8Ba si so feremata, ba ibeʼe girõgirõ ba gosali, niʼirõʼõ Jehiëli, maʼoewoe Gereso. (Moz. II. 35, 27). 9Ba somoeso tõdõ niha sato, ba waʼobõwõra andrõ, me no moroi siʼaikõ ba dõdõra labeʼe chõ Jehowa, saoha gõlõ, ba omoeso sibai gõi dõdõ razo Dawido.
10II. Ba isoeno Jehowa Dawido ba zanehe zato fefoe; imane Dawido: ”Nisoeno ndraʼoegõ, jaoego Jehowa, Lowalangi woeroegõma Izeraëli, gõtõgõtõ waʼara! 11Chõoe waʼeboea, jaʼoegõ Jehowa, ba chõoe waʼabõlõ, awõ lachõmi, awõ waʼeboea doi, awõ waʼasalaw̃a, me no chõoe fefoe hadia ia ba zoroego ba ba goeli danõ. Chõoe waʼasalaw̃a, jaʼoegõ Jehowa, ba dangaoe so zamaliʼõ hõgõ niha fefoe jaʼia. (Mat. 6, 13. Tim. I, 1, 17. Fam. 4, 11; 5, 13). 12Ba foʼanaʼa ba faʼatetoeria, ba ba chõoe moroi; jaʼoegõ zamatõrõ fefoe hadia ia. Ba ba dangaoe so waʼabeʼe ba faʼabõlõ, ba he fangabeʼe ba he fangabõlõ niha. (Ngaʼõt. II. 20, 6). 13Ba iadaʼe jaʼoegõ Lowalangima, ba maʼandrõ saoha gõlõ chõoe ba masoeno dõimõ, si sõchi sibai andrõ. 14Ha niha sa ndraʼodo andre, ba hadia mbanoeagoe andre, wa tola enaʼõ mabeʼe daʼõ fefoe, saoha gõlõ? Moroi ba chõoe fefoe hadia ia, ba moroi ba dangaoe wa no mabeʼe ia chõoe. 15Tome sa ndraʼaga fõnaoe ba si fatewoe, si mane ira toeama fefoe. Hoelõ loemõ nosoma ba goeli danõ, lõ tõtõnafõ. (Sin. 39. 13; 102, 12. Job. 8, 9; 14, 2. Heb. 11, 13). 16He Jehowa, Lowalangima, anaʼa andrõ fefoe, si no mahõna ba wolaoe osali chõoe — osali dõimõ andrõ niʼamoniʼõ — ba ba dangaoe moroi, no chõoe ia fefoe! 17Ba no aboto ba dõdõgoe, jaʼoegõ Lowalangigoe, wa no sanechegõ tõdõ ndraʼoegõ, awõ wa faʼadõlõ dõdõ zomasiʼõ. Jaʼodo andre, ba no sadõlõ tõdõ wameʼe daʼõ fefoe, saoha gõlo, ba ijaʼe, ba somoeso tõdõ ndraʼo, me no oeʼila, noa gõi aoha gõlõ mbanoeamõ andre, si so ba daʼe, wameʼe. (F. 28, 9). 18He Jehowa, Lowalangi ndra toeama, Aberahamo, Izaʼaki, Jakobo, bõi beʼe teboelõ dõdõ si manõ ba eraʼera si manõ ba dõdõ mbanoeaoe andre, ba ba chõoe dõnisi dõdõra. 19Ba chõ nonogoe Selomo, ba tõdõ sangendrõna beʼe chõnia, enaʼõ itõngõni goroisamõ ba famadoehoeʼõmõ ba amachoitamõ, ba enaʼõ ifaloea daʼõ no mege, fefoe, wolaoe gõdo andrõ, niʼoladaegoe saʼae.”
20III. Ba imane Dawido ba zato: Misoeno Lowalangimi, Jehowa! Ba lasoeno Jehowa, Lowalangi ndra toeara, sato fefoe, lafaõndrõ ira, ba lafalõgoe tooe ira fõna Jehowa ba fõna razo. 21Ba mahemoloe õ, ba lahoelõ wongi wanaba soemange, chõ Jehowa, labeʼe chõnia zoemange nitoenoe: 1000 nono zaw̃i si matoea, ba 1000 mbiribiri si matoea ba 1000 nono mbiribiri, awõ zoemange nibadoe, nifao ba daʼõ, ba soemange nitaba, oja sibai, nibeʼe Ndraono Gizeraëli fefoe. 22Ba mangamanga ira ba labadoebadoe hadia ia, me loeo daʼõ, fõna Jehowa, omoeso sibai dõdõra; ba samoeza tõ lafataro razo Zelomo, ono Dawido, ba labajoini ia chõ Jehowa, labaliʼõ samatõrõ, ba labajoini gõi Zadoki andrõ, labaliʼõ ere. (Raz. I. 1, 38 b. t. F. 23, 1). 23Ba doemadao saʼae ba dadaoma zalaw̃a andrõ chõ Jehowa Zelomo, razo ia, fangali namania Dawido, ba mofozoe nilaoenia, ba laʼoʼõ chõnia Iraono Gizeraëli fefoe. (F. 28, 5. Raz. I. 1, 35. 39). 24He koemandra andrõ fefoe, awõ zaradadoe andrõ, ba he ono razo Dawido, fefoe, ba mõi barõ mbawa razo Selomo. 25Ba eboea sibai lachõmi Zelomo, ibeʼe Jehowa, ba zanehe Ndraono Gizeraëli fefoe; faʼasalaw̃a seboea toeria ibeʼe chõnia, si lõ irai ba razo Ndraono Gizeraëli, fõnania (Raz. I. 3, 13. Ngaʼõt. II. 1, 1).
26IV. Ba no razo Ndraono Gizeraëli fefoe mege Dawido, ono Gizaʼi. 27Õfa woeloe fache waʼara razo ia ba Ndraono Gizeraëli. Mewitoe fache ba Heberona, ba ba Jeroezalema, ba 33 fache (Raz. I. 2, 11). 28Ba mate ia, me no biha waʼatoea, me no afõli ia waʼaoeri ba foʼanaʼa ba soemange; ba ononia Selomo zi tobali razo, fangalinia. 29Ba hikaja razo Dawido andrõ, he hikajania me ono matoea ia, ba he safoeria andrõ, ba no moetanõ ba zoera hikaja andrõ, nisoera Zamoeëli, sangiʼila andrõ, ba ba zoera hikaja chõ Natano, samaʼeleʼõ, ba ba zoera Gado sangiʼila, (F. 21, 9.), 30awõ waʼabõlõnia, faʼabõlõ razo, ba folaoenia, nifolaoe zabõlõ, ba hadia ia ba gõtõnia andrõ, ba ba gõtõ Ndraono Gizeraëli ba ba gõtõ gamatõrõw̃a niha baero, me loeo daʼõ.
Currently Selected:
SOERA NGAʼÕTÕ I. FAZA 29.: NIA
Highlight
Copy
Compare
Share
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.