ROMANOS 16

Saludos personales

1Mani yao Febe ca-wamecʉcore mʉja tʉpʉ cõ yʉ joo. Jesucristore ca-apiʉjarã Sencrea ca-wamecʉti macapʉ ca-ãnare cá-átinemoo ãmo Febe. 2Capaarãre na cá-átinemoo ãmo. Yʉ quenare yʉ cá-átinemowõ. To bairi mʉjaa mani Ʉpaʉ Jesucristore ca-apiʉjarã caroaro mʉja tʉpʉ cõ ani rotiya cõ ca-ejaro. To bairona Jesucristore ca-apiʉjarãre na ca-ĩi nʉcʉbʉgope ãa. Cõ ca-boori wamere cõ átinemoña.

3Aquila, cʉ̃ nʉmo Prisila mena na ñuato. Na ya paʉpʉ Jesucristo ye quetire yʉ ca-buio teñaro yʉre cá-átinemorã ca-ãma. 4Aperã yʉre na ca-jĩagaro yʉre cá-átinemowã. To bairo yʉre na cá-átinemoro tʉjʉrã na quenare na ca-jĩacõaboyupa aperã. To bairi, “Caroaro Pablore mʉja cá-ájupa,” na ĩiña. Aperã judío maja ca-aniquẽna Jesucristore ca-apiʉjarã ca-ani poari macana nipetirã na quena, “Caroaro mʉja cá-ájupa,” Aquilare, Prisilare na ĩi jooma. 5Aquila, Prisila ya wiipʉ Jesucristore ca-apiʉjarã ca-neñaponucurã na quena na ñuato. Apeĩ yʉ ca-maii Epeneto cʉ̃ ñuato. Cʉ̃na ãmi Acayapʉ Cristo ye quetire ca-apiʉja nʉcʉbʉgo jʉgoricʉ. 6Cõ ñuato María quena. Pairo majuu mʉja tʉpʉ ãcõpʉ cá-átinemoñupo Dio ye macajere. 7Yʉ ya maca macana Andrónico, Junias na ñuato. Na quena atopʉ presopʉ ca-joo ecooricarã ca-ãma. Yʉ jʉgoye Cristore ca-apiʉjayupa. Jesú cʉ̃ ca-bue jʉgoricarã, “Andrónico, Junias caroaro majuu átinucuma,” na ĩi nʉcʉbʉgonucuma.

8Apeĩ mani Ʉpaʉ Jesúre ca-apiʉjaʉ Amplia cʉ̃ ñuato. Cʉ̃ quena yʉ ca-maii ãmi. 9Apeĩ mani mena Jesucristo ye quetire ca-buionemoʉ Urbano cʉ̃ ñuato. Apeĩ yʉ ca-maii Estaqui cʉ̃ ñuato. 10Apeles quena cʉ̃ ñuato. Nipetirije caroaro cʉ̃ cá-átie tʉjʉri, “Caroaro Cristore ca-apiʉjaʉ ãmi,” cʉ̃re mani ĩi maji. Aristóbulo, cʉ̃ ya wii macana na ñuato. 11Yʉ yaʉ Herodión cʉ̃ ñuato. Narsiso, cʉ̃ ya wii macana mani Ʉpaʉ Jesúre ca-apiʉjarã na ñuato. 12Trifena, Trifosa na quena na ñuato. Na romiri pʉgarã mani Ʉpaʉ Jesú yere paanucuma. Apeo mani ca-maio Pérsida cõ ñuato. Cõ quena seeto mani Ʉpaʉ Jesucristo yere paanucumo. 13Rufo cʉ̃ ñuato. Mani Ʉpaʉ Jesúre ca-apiʉja netoʉ ãmi cʉ̃a. Cʉ̃ paco quena cõ ñuato. Yʉ pacore bairona yʉ ca-tʉjʉo ãmo. 14Asíncrito, Flegonte, Ermas, Patróba, Herme, aperã Jesúre ca-apiʉjarã na mena ca-ãna na ñuato. 15Aperã Filólogo, Julia mena, apeĩ Nereo cʉ̃ baio mena, Olimpa, aperã Jesúre ca-apiʉjarã nipetirã na mena ca-ãna na ñuato.

16Caroaro ame mairique mena ame ñuu rotiri, ame tʉjʉnucuña. Jesúre ca-apiʉjarã nipetiri poa macana ñuu roti jooma.

17Yʉ yarã, apeye mʉjaare yʉ buiopa. Ãnama jicãarã mʉja ca-ricawati tʉgooñaro, mʉja ca-ame wada netoro, mʉja ca-rooye tuaro cá-átigarã. Nemoona Jesú ye quetire aperã cariape mʉjaare na ca-buioriquere bairo buioquẽema. Ricati maca buioma. To bairo ca-ãnare caroaro na tʉjʉ majiña. Na apiʉjaqueticõaña. Na bapa cʉtiqueticõaña. 18Mani Ʉpaʉ Jesucristo yere cá-ána me ãma naa. Na majuuna caroorije na cá-átigarije macare cá-ána ãma. Caroaro api tʉjooriquere ĩitori, caroaro ca-api majiquẽnare na macare na ca-apiʉjaro ánama. 19Mʉja maca caroaro Jesú cʉ̃ ca-boorije cá-ána mʉja ãa. To bairo caroaro mʉja cá-áti aniere majima aperã Jesúre ca-apiʉjarã nipetirã. To bairi seeto mʉjaare yʉ tʉgooña wariñuu. Caroa macaje jetore mʉja cá-áti majipere yʉ boo. Caroorije macare mʉja cá-átiquẽto yʉ boo. 20Caroa ani yerijã wariñuuriquere ca-joʉ ãmi Dio. Petoacã bero caroorije ʉpaʉ Satanáre mʉja ca-netoro átigʉmi, cʉ̃ macare cʉ̃ ca-rooye tuaro mʉja átibojagʉmi Dio. Mani Ʉpaʉ Jesú caroare mʉjaare cʉ̃ joato.

21Ñuu rotimi Timoteo. Yʉ mena Jesú ye quetire ca-buio teñanemoʉ ãmi. Yʉ ya maca macana Lucio, Jasón, Sosípate ñuu rotima na quena.

22Yʉ Tersio, Pablo cʉ̃ ca-ĩi uca rotiro cʉ̃ yʉ ucaboja ati pũurore. Yʉ quena mani Ʉpaʉ Jesúre ca-api nʉcʉbʉgoʉ aniri mʉjaare yʉ ñuu roti joo.

23Gayo ñuu rotimi. Cʉ̃ ya wiipʉ yʉ ãa, yʉre cʉ̃ ca-ani rotiro. Atopʉ cʉ̃ ya wiipʉ neñaponucuma Jesúre ca-api nʉcʉbʉgorã. Erasto ati maca ʉparã ye niyerure ca-cotebojaʉ ñuu rotimi cʉ̃ quena. Mani yaʉ Jesúre ca-apiʉjaʉ Cuarto ñuu rotimi cʉ̃ quena.

24Mani Ʉpaʉ Jesucristo caroaro mʉjaare nipetirãre cʉ̃ átibojaato.

Alabanza final

25-26Diore caroaro wariñuuriquere cʉ̃re mani joorã. Jesucristo ye quetire, caroa quetire yʉ ca-buiorijere mʉja ca-apiʉja netoro mʉja áti majimi Dio. Nemoopʉre tie quetire buioriquere ca-tʉgooña majiña manibajupa. Ati yʉteapʉre Dio ye quetire ca-buioricarã tirʉmʉpʉ macana na ca-ucarique jʉgori majirique ãa yua. Dio ca-catícõa aninucuʉ maca to bairona na ca-buio rotiyupi. Yʉ quena Pablo tie quetire yʉ buionucu. Nipetiri yepa macana tie quetire na majiato ĩi cʉ̃ yarãre na ca-buio rotiyupi Dio. To bairo tie quetire na ca-nʉcʉbʉgoro, cʉ̃ ca-boorije na cá-áto boʉ cʉ̃ ye quetire yʉ ca-buio rotiwĩ Dio yʉ quenare.

27Jicãʉna ãmi Dio nipetirijere ca-majii. To bairi cʉ̃re mani wariñuu nʉcʉbʉgocõa aninucugarã, Jesucristo yarã aniri. Amén.

To cõona ãa.

Currently Selected:

ROMANOS 16: TAVNT2

Highlight

Compare

Copy