ROMANOS 12

La vida consagrada a Dios

1Yʉ yarã, caroaro mani ca-bopaco tʉjʉyupi Dio manire. To bairi Dio cʉ̃ ca-boorijere cá-ána anicõaña mʉja quena. Cʉ̃ yarã jeto anicõaña, caroorije átiquẽnana. To bairona ca-aninucurã mʉja ca-ano mʉja tʉjʉ wariñuugʉmi Dio. Diore, “Mʉ yʉ nʉcʉbʉgo majuucõa,” cʉ̃ ĩirã to bairona ca-anicõa aninucupe ãa. To bairo caroaro na anicõato ĩi seetobʉja mʉjaare yʉ ĩi buio atiere. 2Ati yepa macana Diore ca-nʉcʉbʉgoquẽnare bairo aniqueticõaña. Ca-jʉgoye nare bairona ñuuquẽto mʉja ca-tʉgooñabatajere wajoacõari, caroa macare tʉgooñaña. To bairo ána, “Oco bairo boomi Dio,” mʉja ĩi majigarã. “Atie maca caroa macaje ãa, atie maca Dio cʉ̃ ca-tʉjoorije ãa,” mʉja ĩi majigarã.

3Dio yʉre mai tʉjʉri cʉ̃ ye quetire mʉjaare ca-buiopaʉre yʉ ca-cũuñupi. To bairo mʉjaare cʉ̃ ca-buio rotiricʉ aniri oco bairo mʉjaare yʉ ĩi buio nipetirãre: “Ca-ãni majuʉ yʉ ãa, aperã netoro cá-áti majii yʉ ãa,” ĩi tʉgooñaqueticõaña mʉjaa. Oco bairo maca tʉgooñaña: “Diore apiʉjari yʉre cʉ̃ cá-áti majiori wame cõona yʉ áti maji,” tʉgooñaña mʉjaa. 4Buio majiorica wame mena mʉjaare yʉ buiopa: Mani rupaʉ jicã rupaʉ anibato quena capee paʉri ricawati. Tie nipetirijena jicãro cõo me ãa. Mani cape mena mani tʉjʉ maji. Mani amoorori mena mani api maji. Mani rʉpori mena mani aá maji. Ricatiri jeto átaje ãa. 5To bairona mani bai Jesucristore ca-apiʉjarã. Capaarã anibana quena jicã poa macana mani ãa, jicã rupaʉre bairona, Jesúre ca-apiʉjarã mani ca-ãmata. Mani nipetirã jicã rupaʉ ani turoricarore bairona mani ãa.

6To bairi Jesucristore ca-apiʉjarã mani ca-ano to canacãʉre mani joomi Dio ricati jeto mani cá-áti majipa wamerire, ricati mani ca-ame átinemopa wamerire. Mani mai tʉjʉri mani cá-áti majipa wamerire noo cʉ̃ ca-joogarijere mani joomi. To bairi to canacãʉna caroaro cá-átipe ãa manire cʉ̃ ca-joori wamere. Jicãarãre cʉ̃ ye quetire buio majiriquere joomi Dio. To bairi nare Dio cʉ̃ ca-buio rotiri wame cõona caroaro na buioato Cristo ye quetire. 7Aperãre na cũumi Dio aperãre cá-átinemoparãre. To bairo na cʉ̃ cá-áto caroaro aperãre na átinemoato. Aperãre Dio Wadariquere bue majiriquere na cʉ̃ ca-jooro caroaro aperãre na bueato. 8Aperã caroaro ca-tʉgooña ocabʉti majirã una caroaro aperãre tʉgooña ocabʉtiriquere nare na buioato. Noa niyeru, apeye uniere ca-joorã wariñuurique mena na joato, na ye ca-anibopere tʉgooñaquẽnana. Noa jʉgo áti majiriquere Dio na cʉ̃ ca-jooro caroaro na yarãre na jʉgo áticõa aninucuato. Noa ca-bopacoorãre cá-átinemorã wariñuurique mena nare na átinemoato.

Deberes de la vida cristiana

9Aperãre mairã, na mai riata majuucõaña. Caroorije átajere teeya. Caroa átaje macare áti ʉjacõa aninucuña. 10Jicãʉ punaare bairo mani ãa, Cristore ca-apiʉjarã aniri. To bairi caroaro ame mairi ame átinemoña. Mʉja majuuna mʉja ca-mairo netoro aperã quenare na maiña.

11Tʉgooña ocabʉtirique mena mʉja cá-átipa wamere caroaro ája. Teeye paiqueticõaña. Mani Ʉpaʉ Dio cʉ̃ ca-tʉjoorijere caroaro wariñuurique mena ája.

12Caroaro majuu mani átibojagʉmi Dio ĩirã wariñuucõa aninucuña. Mʉja ca-popiye tamuoata tʉgooña tutuaya. Diore cʉ̃ jeni nʉcʉbʉgocõa aninucuña.

13Aperã Jesucristore ca-apiʉjarã bopacooro na ca-ãmata, na átinemoña. Aáteñari maja mʉja tʉpʉ na ca-ejaro caroaro wariñuurique mena mʉja tʉpʉ na ani rotiya.

14Rooro mʉjaare cá-ánare, “Rooro mʉjaare to baiato,” na ĩiqueticõaña. Caroaro na ca-baipe macare Diore na jenibojaya.

15Noa ca-wariñuurãre na wariñuunemoña. Aperã ca-yeri tʉgooñarique pairãre tʉgooña ocabʉtiriquere na buioya.

16Caroaro wariñuurique mena jicãro mena ame jʉgo anicõaña. “Aperã netoro ca-ani majuʉ yʉ ãa,” ĩi tʉgooñaquẽja mʉjaa. “Cawatoa ca-ãcʉ̃ yʉ ãa,” macare ĩi tʉgooñaña. To bairi, “Caroaro ca-majii yʉ ãa, aperã netoro,” ĩi tʉgooñaquẽja.

17Aperã rooro mʉjaare na cá-átibato quena rooro na áti amequẽja. Ca-ñuurije, cariape macaje jetore ája, aperã, “Caroaro cá-ána ãma,” mʉjaare na ca-ĩiparore bairo. 18Aperã nipetirã menare caroaro na mena jʉgo áti anicõaña mʉja ca-ani majiro cõo. 19Yʉ yarã, yʉ ca-mairã, aperã rooro mʉjaare na cá-átibato quena rooro na ame átiquẽja. Dio maca na popiyeyegʉmi rooro mʉjaare na cá-átie wapa. Dio ye queti ucarica pũuropʉ oco bairo ĩi ucarique ãa:

“Yʉna yʉ ãa camaja caroorije na cá-átie wapa nare ca-popiyeyepaʉ. Cariape nare yʉ popiyeyegʉ,” ĩi buiomi mani Ʉpaʉ, ĩi ucarique ãa.#Deuteronomio 32.35

20Ape wame quenare oco bairo ĩi ucarique ãa:

Mʉjaare ca-tʉjʉ tutii ucʉ̃ quenare cʉ̃ ca-ñigo riaata cʉ̃ nuuña. Ocore cʉ̃ ca-etigaro quenare cʉ̃ tĩaña. To bairo mʉja cá-áto rooro mʉjaare cʉ̃ cá-átajere bobogʉmi, ĩi ucarique ãa.#Proverbios 25.21-22

21To bairi aperã rooro mʉjaare na cá-átibato quena rooro na ame átiquẽja. Rooro nare mʉja ca-ame ápata netobʉjaro rooro majuu ame átaje aniboro. To bairo ca-bairo ñuuqueti majuucõaboro mʉjaare. To bairi caroa macare na ája. Caroa macare na átiri nare mʉja netogarã.

Currently Selected:

ROMANOS 12: TAVNT2

Highlight

Compare

Copy