ROMANOS 10

1Yʉ yarã, Israel majare Dio na cʉ̃ ca-popiyeyepe nare cʉ̃ ca-netooro seeto yʉ boo. To bairi nare cʉ̃ netooato ĩi yʉ yeripʉ tʉgooñari nare yʉ jeniboja Diore. 2Na ca-aniere oco bairo áama: Dio cʉ̃ ca-boorijere átigabana quena cʉ̃ ca-boorije majuu cariape api majiquẽema. 3To bairi Jesucristore na ca-api nʉcʉbʉgoata, “Caroarã ãma,” na ĩi tʉjʉboʉmi Dio. Ti wamere api majiquẽema. Ti wamere api majiquetibana, “Mani majuuna tʉgooña ocabʉtiri caroa jeto mani áti ocabʉtigarã. To bairo mani majuuna caroare mani cá-áti ocabʉtiro tʉjʉʉ, ‘Caroarã ãma,’ mani ĩigʉmi Dio,” ĩi tʉgooñabama. To bairo ĩi tʉgooñabana quena Dio cʉ̃ ca-boorije majuure ca-bai netoorã ãma. To bairo ca-bairã na ca-ano, “Caroarã ãma,” na ĩiquẽemi Dio. 4Moisépʉre Dio cʉ̃ ca-rotirique nipetirijere cá-áti peoyupi Jesucristo jicã wame rʉjaquẽto. Mani maca tiere mani áti peo majiqueti majuucõa. To bairi noa Jesucristore ca-api nʉcʉbʉgorãre, “Caroarã ãma,” manire ĩmi Dio. Cristo manire cʉ̃ ca-bai yajibojarique jʉgori mani netoomi Dio. Cʉ̃ ca-rotirique mani cá-áti peo majiquẽtie to ca-anibato quena mani netoo catíomi.

5Moisé oco bairo ca-ĩi ucayupi Dio cʉ̃ ca-rotiriquere mani cá-áto Dio mena caroaro mani ca-anipere: “Noa nipetirã yʉ ca-rotiriquere cá-áti peorã caroaro Dio mena anicõa anigarãma.” 6Jesucristore ca-api nʉcʉbʉgorã Dio mena caroaro mani ca-anicõa anipe macare oco bairo ca-ĩi ucayupi Moisé: “Ʉmʉrecoopʉ wamʉ aácõari Cristore, ‘Jãare átinemoʉ rui ajá,’ cʉ̃ ca-ĩipe ãa,” ĩiqueticõaña. 7Ape wame tunu: “ ‘Ca-bai yajiricarã ãnana na ca-anopʉ yepa pupeapʉ rui aácõari Cristore cʉ̃ ca-wamʉ atí rotipe ãa,’ tiere ĩiqueticõaña.” 8Oco bairo maca ĩrique ãa Dio Wadariquepʉ cʉ̃ ye quetire api majirique, tiere api nʉcʉbʉgorique majirioquẽe ĩiro:

Dio ye queti ca-yoaropʉ ca-ĩi buiorijere bairo me ãa. To bairi mʉja ca-api majiquẽtie me ãa. Meere Dio ye quetire mʉja maji mʉja yeripʉ. Tiere mʉja ame buio maji, ca-ĩi ucayupi Moisé.#Deuteronomio 30.12-14

Tie quetirena jã buio teñanucu camajare, Cristore cʉ̃ api nʉcʉbʉgoya ĩirã. 9To bairi tie quetire apiʉjari, “Jesú yʉ Ʉpaʉ ãmi, jocarã mee,” ĩri, “Ca-bai yajiricʉpʉre cʉ̃ ca-tunu catíoyupi Dio,” ĩrica wame mani yeripʉre mani ca-nʉcʉbʉgoro mani netoobojagʉmi cʉ̃re ca-nʉcʉbʉgoquẽnare cʉ̃ ca-popiyeyepere. 10Mani yeripʉre Jesucristore mani ca-nʉcʉbʉgoro, “Ca-ñuurã ãma,” mani ĩi tʉjʉmi Dio. To bairo, “Caroarã ãma,” mani ĩi tʉjʉri mani netoomi cʉ̃ ca-popiyeyebopere. To bairo manire cʉ̃ ca-netoobojaro aperãre ca-buiope ãa tunu.

11“Jesucristore ca-api nʉcʉbʉgorã wariñuurique bʉgagarãma. Tʉgooñarique paiquetigarãma cʉ̃re nʉcʉbʉgorã,” ĩi ucarique ãa Dio Wadariquepʉre. 12Camaja nipetirãre jicãrore bairo na tʉjʉmi Dio, judío majare, judío maja ca-aniquẽna quenare. Jicãʉna ãmi mani Ʉpaʉ. Camaja nipetirã Ʉpaʉ ãmi Dio. To bairi camaja nipetirã nʉcʉbʉgorique mena cʉ̃re ca-jenirãre capee ca-ñuurijere na joo netogʉmi Dio. “Aperã ãma,” ĩricaro mano, jicãro cõo jetona na joogʉmi. 13Dio ye queti ucarica pũuripʉ oco bairo ĩrique ãa: “Noa mani Ʉpaʉre, ‘Caroorije yʉ cá-átajere yʉ majirioya,’ ca-ĩi jenirãre na netoogʉmi Dio nare cʉ̃ ca-popiyeyebopere,” ĩi ucarique ãa. 14To bairije cʉ̃ ĩi jeni majiquẽema, Cristore api nʉcʉbʉgoquetibana. Cʉ̃ api nʉcʉbʉgo majiquẽema, cʉ̃ ye quetire ca-buio ecooquetana aniri. Cʉ̃ ye quetire api majiquẽema nare ca-buioparã na ca-mano maca. 15To bairi nare ca-buioparãre aperã nare na ca-jooquẽpata na buiora aá majiquetigarãma. Dio ye queti ucarica pũuropʉ oco bairo ĩi ucarique a: “Seeto wariñuurique ãa caroa quetire Dio yere ca-buio teñarã na ca-buio teñarã ejaro,” ĩi ucarique ãa.

16Tie quetire na ca-buio ejabato quena capaarã apiʉjagaquẽema. To bairona ca-ĩi ucayupi Isaía tirʉmʉpʉ macacʉ: “Yʉ Ʉpaʉ, jã ca-buiorijere apiʉjagaquẽema,” ca-ĩi ucayupi Isaía Diore cʉ̃ ĩi. 17To bairi Cristo ye quetire apirã jicãarã cʉ̃ nʉcʉbʉgogarãma aperã tiere na ca-buioro.

18Judío maja maca Dio ye quetire ca-buio ecooquetana me ãma na maca. Nairoacã buiori maja nare ca-buionucubajupa. To bairije ĩrique ãa Dio ye queti ucarica pũuripʉre:

Dio yere buiori maja na ca-buiorije ati yepa nipetiropʉ jejacoapa. To bairi nipetiropʉ macana api peticoama na ca-buiorijere, ĩi ucarique ãa.

19Apeye mʉjaare yʉ ĩi buiogʉ tunu: Israel maja Dio yere buiori maja na ca-buiorijere apirã cariape api majibatanama. Cariape api majibana quena ca-bai netoo nʉcañupa. Tiere mʉjaare buionemoʉ Moisé tirʉmʉpʉ macacʉ Dio ye queti Israel majare cʉ̃ ca-ucarica wamere oco bairije mʉjaare yʉ ĩi buiopa:

“Aperã macare caroaro na yʉ átibojagʉ. ‘Dio yarã me ãma, ca-tʉgooña majiquẽna ãma,’ mʉja ca-ĩirãre caroaro na yʉ átibojagʉ. To bairo caroaro na yʉ cá-átibojaro na mʉja tʉjʉ punijinigarã, na tʉjʉ ʉgoorã,” ĩmi Dio, ca-ĩi ucayupi Moisé. #Deuteronomio 32.21

20Cabero Isaía ĩi ocabʉtiri cʉ̃ quena oco bairo ca-ĩi ucayupi:

“Yʉre ca-macaquẽna maca yʉre ca-bʉgawã,” ĩmi Dio. “Yʉ ca-aniere ca-jeniñaquetana macare yʉ ca-aniere na yʉ ca-majiowʉ,” ĩmi Dio.

Judío maja ca-aniquẽna cʉ̃re na ca-apiʉjapere ĩi, ca-ĩi ucayupi Isaía tiere. 21Judío maja macare oco bairo ca-ĩi ucayupi Isaía nare Dio cʉ̃ ca-ĩriquere:

“Yʉre apiʉjari yʉ mena macana ãña,” na yʉ ĩi piinucubapʉ yʉre ca-bai netoo nʉcanucurãre.#Isaías 65.1-2

Currently Selected:

ROMANOS 10: TAVNT2

Highlight

Compare

Copy