LOS HECHOS 14

Pablo y Bernabé en Iconio

1Pablo jãa Iconiopʉ eja, ca-jʉgoyepʉ Antioquíapʉre na ca-bairicarore bairona judío maja na neñapo buerica wiipʉ ca-jãajuparã. Ti wiipʉ jãa ejarã topʉ ca-neñaporãre ca-buioyuparã Jesú ye quetire. Caroaro api majirica wame na ca-ĩi buioro apirã capaarã judío maja, aperã judío maja mee quena Jesú ye quetire ca-apiʉjayuparã. 2To bairo na ca-apiʉjaro tʉjʉrã judío maja Jesú ye quetire ca-booquẽna maca judío maja ca-aniquẽnare na ca-buio matayuparã, na apiʉjaqueticõato ĩirã. To bairo nare na ca-ĩiro to macana rooro ca-tʉgooñañuparã Jesúre ca-apiʉjarãre. 3To bairi Pablo jãa na buionemogarã yoaro Iconiopʉ ca-tuayuparã. Ti macapʉ ãnaa seeto tʉgooña ocabʉtiri, “Mani Ʉpaʉ Jesú caroaro áami camajare,” ca-ĩi buionucuñuparã. To bairo na ca-ĩi buiori paʉ Dio ca-acʉori wame áti iñoorica wamerire na cá-áti majipere na ca-jooyupʉ, “Cariape ĩima,” camaja na ca-ĩi api nʉcʉbʉgoparore bairo ĩi. 4To bairi to macana ca-tʉgooña ricawatiyuparã ricati jeto. Aperã judío majare bairona ca-tʉgooñañuparã. Aperã Pablo, Bernabé jãa Jesú ye quetire ca-buiorã na ca-ĩri wamere bairona ca-tʉgooña apiʉjayuparã. 5To bairi judío maja, aperã judío maja mee na ʉparã mena neñapori, “Pablo, Bernabé jãare na popiyeyerã ʉ̃ta rupaa mena na mani ree jĩarã,” ca-ame ĩiñuparã. 6-7Pablo jãa maca to bairo nare na cá-átigarijere queti apirã ca-ruticoajuparã Licaonia ca-wamecʉti yepapʉ. Ti yepapʉ ejari Listra, Derbe ca-wamecʉti macaripʉre, ti macari tʉjaroripʉ quenare Jesú ye quetire ca-buio teñañuparã yua.

Apedrean a Pablo en Listra

8Listrapʉre ca-añupʉ jicãʉ camajocʉ to bairona ca-buiaricʉ cá-aá majiquẽcʉ. 9Cʉ̃ ca-apiyupʉ Pablo camajare cʉ̃ ca-buiorijere. To bairi, “Dio caroaro yʉ netoo majiimi,” ca-ĩi tʉgooñañupʉ. To bairo Diore cʉ̃ ca-ĩi tʉgooñarijere tʉjʉ majiri Pablo cʉ̃ riapena cʉ̃ tʉjʉ:

10—¡Wamʉnʉcaña! baujarije cʉ̃ ca-ĩi wadayupʉ.

To bairo Pablo cʉ̃ ca-ĩirona ca-bapa wamʉ nʉcacoajupʉ cá-aá majiquetibatacʉ. 11To bairo Pablo cʉ̃ ca-ĩiro cʉ̃ ca-ñuuro tʉjʉrã to macana Licaonia macana na oca na ca-wadarije mena ĩi awajari:

—¡Abʉ name! ca-ĩiñuparã. —Mani cá-áti nʉcʉbʉgonucurãna ʉmʉrecóo macana camaja jeeñari mani tʉpʉ ruirã ejarã baima ati maja, ca-ĩiñuparã.

12Bernabére Júpiter cʉ̃ ca-ĩi wameyeyuparã jicãʉ na ca-weericʉ, Dio ca-aniquẽcʉ na ca-ñuu bue nʉcʉbʉgoʉ wame. Pablo macare Mercurio cʉ̃ ca-wameyeyuparã apeĩ na cá-áti nʉcʉbʉgoʉ wame, na ca-buio jʉgoʉ cʉ̃ ca-ano maca. 13Ti maca tʉjaropʉ Júpitere na ca-ñuu bueri wii ca-añupe. Ti wii macacʉ sacerdote to macana mena Pablo jãare nare na cá-áti nʉcʉbʉgorijere iñoogʉ wecʉare caroa oó wẽeri ca-bʉjaricarãre na cʉ̃ ca-jĩa joe buje mʉgoparãre ca-tʉ̃ga ajupʉ maca tʉjaro ca-ani amojoreri janiro na ca-jãari jopepʉ. 14To bairo na cá-átigari wame tʉjʉrã Pablo, Bernabé na majuuna na jutiire ca-tʉ̃ga wooyuparã. To bairo mʉja cá-átigarije caroorije majuu ãa, camajare na iñoorã to bairona cá-ájuparã. 15To bairo átiri camaja watoapʉ atʉ aá:

—¿Nope ĩirã to bairo jã mʉja átigatí? ca-ĩi awajayuparã. —Jã quena mʉjaare bairona camaja jã ãa. Cá-áti nʉcʉbʉgo rotiparã mee jã ãa. Caroa quetire buiora anaa jã apʉ́, Dio ca-anicõa aninucu majuʉ macare mʉja cá-áti nʉcʉbʉgoparore bairo ĩirã. Cʉ̃ cá-ájupi ʉmʉrecóo, ati yepa, riaa nipetirije tiepʉ ca-anipe, ca-aniparãre. To bairi atie mʉja cá-átinucurijere to cõona áti janaña. Atie mʉja cá-áti nʉcʉbʉgorije ñuuquẽe. Ñee maa tie. 16Ca-jʉgoyepʉ judío maja ca-aniquẽna aperã unare na ca-boori wame na cá-áti nʉcʉbʉgoro Dio to bairona ca-tʉjʉcõañupi. Na ca-mataquẽjupi. 17Cʉ̃re na cá-áti nʉcʉbʉgoquetibato quena camaja nipetirãre na ca-iñooñupi Dio cʉ̃ ca-aniere. To bairi caroaro camajare na átibojaʉ oco ca-ocarije, oterique quenare ca-ricacʉto áami. Ʉgarique quenare joo, wariñuurique quenare joomi, na ca-ĩi buioyuparã Pablo jãa.

18To bairo na ca-ĩrije to ca-anibato quena Pablo jãare áti nʉcʉbʉgogarã seeto wecʉare ca-jĩa joe buje mʉgo joogabajuparã. To bairi Pablo jãa ĩi maji ocabʉtiri na ca-boca ĩi matayuparã yua.

19Cabero judío maja Antioquía macana, Iconio na ca-ĩri maca macana Listrapʉ ca-ejayuparã. Eja, to macanare Pablo jãare na ca-buio matayuparã tunu. To bairo na ca-ĩi buioro to macana nare bairona Pablo jãare na ca-punijiniñuparã. To bairi Pablore ʉ̃ta rupaari cʉ̃ ree jĩa, maca tʉjaropʉ cʉ̃ ca-ne aá rocayuparã. “Meere, yajicoapi,” cʉ̃ ca-ĩi tʉgooñabajuparã. 20Topʉ cʉ̃ na ca-rocaro beroacã aperã Jesúre ca-apiʉjarã cʉ̃ ca-cuñaropʉ cʉ̃ ca-tʉjʉ ejanʉcarã ejayuparã. Cʉ̃ na ca-tʉjʉ ejanʉcarona cʉ̃ maca wamʉnʉca yua, na mena ca-piya aácoajupʉ macapʉ tunu. Ape rʉmʉ Bernabé mena Derbepʉ cá-aácoajupʉ yua.

21Derbepʉ ejarã Jesú ye quetire ca-buioyuparã. Na ca-buioro camaja capaarã ca-apiʉjayuparã. Cabero ca-tunu aájuparã na ca-buio teñarica macaripʉna tunu Listra, Iconio, Antioquíapʉ. 22Ti macaripʉ to macana Jesú ye quetire ca-apiʉja jʉgoricarãre tʉgooña tutuariquere na ca-buioyuparã, na tʉgooña ocabʉtiato ĩirã.

—Jesúre tʉgooña janaquẽja. Capee popiye tamuorique anigaro mani Jesúre ca-apiʉjarãre cʉ̃ tʉpʉ mani cá-aáparo jʉgoye, na ca-ĩiñuparã na tʉgooña tutuariquere buiori. Ĩi buio yaparo ca-netocoajuparã. 23Jesúre ca-apiʉjarãre to canacã poa macanare na ca-jʉgo átiparãre ca-cũuñuparã. To bairi ʉgaquẽnana na mena Diore jeni, “Jesú, mani ca-api nʉcʉbʉgoʉ mʉjaare cʉ̃ átinemoato,” na ca-ĩi jeniboja cũuñuparã Pablo, Bernabé.

Pablo y Bernabé vuelven a Antioquía de Siria

24Ti macaripʉ ca-ãnana buti, Pisidia yepapʉ ca-neto aájuparã. Neto aá, Panfilia yepa Perge ca-wamecʉti macapʉ ca-ejayuparã. 25Topʉ ejarã Jesú ye quetire ca-buioyuparã. Cabero cá-aácoajuparã tunu Atalia ca-wamecʉti macapʉ, ca-pairi ya tʉ ca-ani maca. 26Topʉ ca-ãnana cumua mena cá-aácoajuparã Antioquíapʉ nemoopʉre na cá-atí jʉgorica macapʉ. Na ca-buio teñaparo jʉgoye Jesúre ca-apiʉjarã, “Dio caroaro mʉjaare cʉ̃ coteato,” ĩri nare na cá-aá roti jʉgorica maca ca-añupe. To bairi Espíritu Santo na cʉ̃ ca-buio teña rotiricarore bairona yaparorã ca-tunu ejayuparã. 27Antioquíapʉ tunu eja, Jesúre ca-apiʉjarãre na neñapo roti, na ca-buio peticõañuparã na cá-aá teñaricaroripʉre na jʉgori Dio cʉ̃ cá-átajere.

—Aperã judío maja ca-aniquẽna na quena Jesúre apiʉjarã áama yucʉacã, na ca-ĩi buioyuparã. 28Ti macapʉ yoaro ca-añuparã Jesúre ca-apiʉjarã mena yua.

Currently Selected:

LOS HECHOS 14: TAVNT2

Highlight

Compare

Copy