LOS HECHOS 12

Muerte de Jacobo y encarcelamiento de Pedro

1To bairo Antioquíapʉ to ca-bairi paʉna Herode Judea yepa ʉpaʉ Jesúre ca-apiʉjarãre Jerusalén macana jicãarãre na ca-popiyeye jʉgoyupʉ. 2To bairi Juan jʉgocʉ Jacobore cʉ̃re na ca-jĩa rotiyupʉ. 3To bairi cʉ̃ na ca-jĩaro judío maja Jesúre ca-apiʉjaquẽna maca seeto ca-wariñuuñuparã. To bairi Herode maca na ca-wariñuuro tʉjʉʉ Pedro quenare na ca-ñee rotiyupʉ. Boje rʉmʉri ca-añupe, ʉgarique ca-wauoya maniere na ca-ʉgari boje rʉmʉri majuu, pascua na ca-ĩri boje rʉmʉri. 4To bairi Pedrore cʉ̃ ñee roti, presopʉ cʉ̃ ca-jõoñupʉ. Rutiremi ĩi, bapari canacã puna majuu, bapari canacãʉ jeto ca-ãnare polisíare cʉ̃re na ca-cote rotiyupʉ. “Pascua na ca-ĩri boje rʉmʉri bero camaja na ca-tʉjʉro Pedrore na yʉ jĩa rotigʉ,” ca-ĩi tʉgooñabajupʉ Herode. 5To bairi Pedro presopʉ cʉ̃ ca-ano caroaro cʉ̃ ca-cotecõañuparã polisía. Jesúre ca-apiʉjarã maca Pedro presopʉ cʉ̃ ca-ano seeto Diore cʉ̃ ca-jenibojanucuñuparã.

Dios libra de la cárcel a Pedro

6To bairi, “Pedrore bujiyʉ camaja na ca-tʉjʉ jooro cʉ̃re na yʉ jĩa rotigʉ,” Herode cʉ̃ ca-ĩri ñami majuu come wẽeri mena pʉga nʉgoa tʉpʉrena jiacõaricʉ pʉgarã polisía watoapʉre ca-cani cuñañupʉ Pedro. Aperã polisía jope tʉna cʉ̃ ca-coteyuparã. 7To cõona Dio tʉ macacʉ ángel Pedro tʉ ca-buia ejayupʉ. Cʉ̃ ca-buia ejarona ti arʉa ca-bujuyupe. To bairi Pedrore ángel cʉ̃ ca-paña yupioyupʉ.

—¡Uwaro wamʉnʉcaña! Pedrore cʉ̃ ca-ĩiñupʉ.

To bairo cʉ̃ ca-ĩri paʉna Pedro wamorire cʉ̃ na ca-jiabata wẽeri ca-weticoajupe. 8To bairi:

—Mʉ jutii jañaña, mʉ rʉpo jutii quenare cʉta jiaya, cʉ̃ ca-ĩiñupʉ Dio tʉ macacʉ. To bairona cá-ájupʉ Pedro.

Cʉ̃ cá-áti yaparoro:

—Ca-bui macá wʉre jañari, adʉja yʉ mena, cʉ̃ ca-ĩiñupʉ Dio tʉ macacʉ Pedrore.

9To bairo cʉ̃ ca-ĩiro Pedro cʉ̃ ca-ʉja buti aájupʉ. “¿Jocʉ mee yʉ baibauparí? Yʉ baiquẽcʉ. Quẽguei yʉ baii,” ca-ĩi tʉgooñañupʉ Pedro. Ti wii pupea macá arʉapʉ buti aána polisía jicãʉre cʉ̃ ca-neto aájuparã. 10Cabero apeĩre cʉ̃ ca-neto buti aájuparã. Neto buti aá, maca yepa majuure ca-buti aápa jope come jope tʉpʉ ca-ejayuparã. Ti jope na ca-ejarona to majuuna ca-pãañupe. Ca-pãaro macapʉ ca-buti aájuparã. To bairi maca recomaca ca-ani wãa cá-aájuparã. To cõona na cá-aáti paʉna Dio tʉ macacʉ Pedrore cʉ̃ cá-aáweoyupʉ yua. 11To bairi Dio tʉ macacʉ cʉ̃re cʉ̃ cá-aáweoro Pedro ca-ĩi tʉgooña majiñupʉ: “Quẽguei mee yʉ baiyupa. ‘Quẽguei yʉ baii,’ yʉ ĩibapʉ,” ca-ĩi tʉgooñañupʉ. “Yʉ Ʉpaʉ Dio cʉ̃ tʉ macacʉre yʉre buu joo rotiyupi, Herode cʉ̃ jĩaqueticõato ĩi. Judío maja Jesucristore ca-apiʉjaquẽnare na quenare caroorije yʉ na cá-átigari wamere yʉ matabojayupi Dio,” ca-ĩi tʉgooñañupʉ Pedro.

12To bairi Juan Marco paco María ya wiipʉ cá-aácoajupʉ Pedro. Ti wiipʉre camaja capaarã Diore cʉ̃ jenibojarã neñaporã cá-ájuparã. 13Ti wiipʉ ejaʉ jope tʉpʉ ca-piiyupʉ. Ti wii macanare ca-paabojao Rode ca-wamecʉco Pedro cʉ̃ ca-piirijere apiri ca-tʉjʉo aájupo. 14Jope tʉ ejao Pedro cʉ̃ ca-wadarijere ca-api majiñupo. “Pedrona anicʉmi,” ca-ĩi api majiñupo. Api majiri wariñuurique mena Pedrore jope cʉ̃ pãabojaquẽcona atʉ aá, wii ca-ãnare:

—Pedro jope tʉpʉ tʉjʉnucumi, na ca-ĩiñupo.

To bairo na cõ ca-ĩiro:

15—Jocona mʉ ĩi mecʉcõa, cõ ca-boca ĩiñuparã.

To bairo cõ na ca-ĩiro:

—Joco mee yʉ ĩi. Tona tʉjʉnucuwĩ, na ca-ĩiñupo.

To bairo cõ ca-ĩiro:

—Cʉ̃ ãnacʉ wãti maca ãcʉmi, cõ ca-ĩiñuparã.

16To bairo na ca-ame ĩi wadari paʉna Pedro maca jope tʉpʉ ca-piinemoñupʉ. Cʉ̃ ca-piinemorijere apirã to cõona jopere ca-pãañuparã. Pãa, Pedrore ca-tʉjʉ acʉayuparã. 17To bairi cʉ̃ na ca-acʉa tʉjʉro tʉjʉri cʉ̃ wamo mena, “Ĩiqueticõaña,” ñu camotari na ca-ĩi janaoñupʉ.

—Oco bairo yʉ buumi Dio presopʉ ca-ãnacʉre, na ca-ĩiñupʉ. —Jacobore cʉ̃ buioya mʉjaa. Aperã Jesúre ca-apiʉjarã mani yarã quenare na buioya, na ca-ĩiñupʉ Pedro. To bairo na ĩi, buti aá, ape paʉpʉ cá-aácoajupʉ Pedro.

18Ca-bujuri paʉ ca-ano yua polisía preso wii ca-cotebatana Pedro cʉ̃ ca-mano tʉjʉri seeto ca-acʉa tʉgooñañuparã.

—¿Dope bairo cʉ̃ baiyuparí? ca-ame ĩiñuparã.

19To bairi Herode maca Pedro cʉ̃ ca-maniere ca-queti apiyupʉ. Apiri cʉ̃re na ca-maca rotibajupʉ. Cʉ̃re ca-bʉgaquẽjuparã. Cʉ̃re na ca-bʉgaquẽto apiri:

—¿Dope bairo cʉ̃ bai rutiyuparí? ¿Cʉ̃re mʉja cotequẽtí? na ca-ĩi jeniñañupʉ.

To bairo na cʉ̃ ca-ĩiro na maca dope bairo cʉ̃ ca-ĩi yʉ majiquẽjuparã. To bairi Herode ca-jĩa rotiyupʉ polisíare preso wiipʉ Pedrore ca-cotebatanare yua. Cabero Herode Judea yepapʉ ca-ãnacʉ Cesarea ca-wamecʉti macapʉ cá-aáteñaʉ aácoajupʉ yua.

La muerte de Herodes

20Herode cʉ̃ ya yepa macaje ʉgarique, apeye unie quena ca-joonucuñupʉ Tiro, Sidón ca-wamecʉti macari macanare. Cabero ti macari macanare na ca-punijiniñupʉ. To bairo na cʉ̃ ca-bairo na maca neñapori, ʉgarique, apeye mani jooquetiremi ĩirã, cʉ̃ mena ca-wada quenoogayuparã. To bairi cʉ̃ mena wada quenoogarã cʉ̃ ca-tʉjʉra aájuparã. Jicãʉ Blasto ca-wamecʉcʉ ca-añupʉ Herode yere ca-rotibojaʉ. Cʉ̃ mena ca-wada peniñuparã Herode mena wada penigarã jʉgoye. To bairi:

—Herode mena jã wada penibojaya, cʉ̃ ca-ĩiñuparã Blastore.

21To bairo cʉ̃ na ca-ĩiro apii Herode mena na ca-wada penibojayupʉ Blasto. Herode maca cʉ̃re cʉ̃ ca-ĩibojarijere apii:

—Ti rʉmʉ ca-ano majuu na mena yʉ wadapeni quenoogʉ, ca-ĩiñupʉ Herode Blastore.

Tiro, Sidón macaripʉ cá-atána na mena cʉ̃ ca-wadapenipa rʉmʉ ca-ano majuu cʉ̃ ye jutii caroa caʉpaʉ jañariquere jaña, caʉpaʉ ruiricaropʉ rui átiri camajare na ca-buio jʉgoyupʉ. 22Na cʉ̃ buio jʉgorijere apirã camaja:

—Ani camajocʉ me ãcʉmi. Jicãʉ ʉmʉrecóo macacʉna mani cá-áti nʉcʉbʉgopaʉ ucʉ̃ ãcʉmi, ca-ĩi wariñuu awajayuparã.

23To bairo na ca-ĩi awajaro apii Herode, “Caʉpaʉ majuu yʉ ãa. To bairo yʉre na ca-ĩi nʉcʉbʉgopaʉna yʉ ãa,” ca-ĩi tʉgooñañupʉ. “ ‘Jicãʉ ʉmʉrecóo macacʉna mani cá-áti nʉcʉbʉgopaʉ ucʉ̃ ãcʉmi,’ yʉ ĩiqueticõaña, Dio jetona ãmi cá-áti nʉcʉbʉgopaʉ,” ca-ĩiquẽjupʉ. To bairo cʉ̃ ca-ĩiquẽtie wapa nemoo Dio tʉ macacʉ cʉ̃ ca-riaro cʉ̃ cá-ájupʉ. Cʉ̃ ca-riarona becoa cʉ̃ ca-ʉga jĩa rocayuparã yua.

24To bairo ca-bairo bero Dio ye quetire ca-apiʉjarã ca-aninemoñuparã.

25Bernabé, Saulo jãa Jerusalén macana Jesúre ca-apiʉjarãre niyerure na joo, yeri ocabʉtirique na ĩi buio, Antioquíapʉ ca-tunucoajuparã. Juan Marcore na mena ca-ne aájuparã.

Currently Selected:

LOS HECHOS 12: TAVNT2

Highlight

Compare

Copy