1 CORINTIOS 7

Consejos sobre el matrimonio

1Yucʉacã yʉre mʉja ca-jeniña uca jooriquere mʉjaare yʉ uca joogʉ. Nʉmo cʉtiquetaje, manapʉ cʉtiquetaje ñuubʉja bairo pʉa. 2To bairo to ca-anibato quena aperã capaarã noo na ca-booro áti epe teñanucuma. To bairi caʉmʉa na ca-ano cõo ca-nʉmo cʉtiparã ãma. To bairi cãromia quena na ca-ano cõo ca-manapʉ cʉtiparã ãma. 3To bairi cõ manapʉ caroaro cõ mena jeto cá-áti anipaʉ ãmi. To bairona cãromio quena caroaro cõ manapʉ mena jeto cá-áti anipao ãmo. 4Dico ca-manapʉcʉco ũcõ cõ majuuna cõ cá-átie ca-rotipao me ãmo. Cõ manapʉ cʉ̃ ca-boorije macare cá-átipao ãmo. To bairona caʉmʉ ca-nʉmocʉcʉ quena cʉ̃ majuuna cʉ̃ cá-átie ca-rotipaʉ me ãmi. Cʉ̃ nʉmo cõ ca-boorije macare cá-átipaʉ ãmi. 5To bairi jicãʉ ucʉ̃ cʉ̃ nʉmo mena na cá-átinucurijere cʉ̃ cá-átigaro, “Yʉ átiquẽe,” cʉ̃re ca-ĩiquetipao ãmo. Cõ quena cõ cá-átigaro, “Yʉ átiquẽe,” cõre ca-ĩiquetipaʉ ãmi cʉ̃ quena. Ape paʉra, “To cõo yoaro mani átiquetigarã, ti yʉteapʉ Diore ca-jeni nʉcʉbʉgorã mani anigarã,” jicãro mena ĩirã, mʉja cá-átiquẽto ñuucõaro. Ti yʉtea ca-netoro to cõo mʉja cá-átinucurijere bairona mʉja átigarã tunu, caroorijere Sataná mani áti wadajãremi ĩirã. Nʉca majiquetibana noo mʉja ca-booro caroorije mʉja átiborã, Sataná mʉjaare cʉ̃ ca-wadajãrije jʉgori.

6To bairije mʉjaare yʉ cá-áti roti majuurijere bairo ĩi mee yʉ ĩi. To bairo mʉja cá-átigaata ñuugaro ĩi, to bairona yʉ ĩi. 7Mʉja nipetirã yʉre bairona ca-nʉmo mana mʉja ca-ano ñuuboro bairo pʉa. Dio maca camaja mani ca-ano cõo mani cá-áti ocabʉtipere ca-cũuñupi. To bairi jicãarã ca-nʉmo mana o ca-manapʉ mana ca-aniparãre na ca-cũuñupi. Aperã maca ca-nʉmo cʉtiparãre, ca-manapʉ cʉtiparãre na ca-cũuñupi Dio.

8Ca-nʉmo mana, ca-manapʉ mana, ca-wapearicarã quenare, oco bairo mʉjaare yʉ ĩi: Yʉre bairona ca-nʉmo mana, ca-manapʉ mana mʉja ca-anicõaata ñuugaro. 9Ca-nʉmoa mana na ca-aniere ca-nʉca majiquẽna una maca ca-nʉmo cʉtiparã ãma. Bapa manibana popiye na ca-tamuoro ñuuquẽe. Na ca-bapacʉto maca ñuubʉjaro.

10Ca-manapʉ cʉnare, ca-nʉmocʉnare oco bairo mʉjaare yʉ ĩi: Mʉjaa cãromia mʉja manapʉare na ca-reequetipe ãa. Tie mani Ʉpaʉ Jesucristo cʉ̃ ca-rotirije ãa. Rocaqueticõaña ĩi mʉjaare yʉ buio neto. 11Jicão cõ manapʉre ca-rocarico cõ ca-ãmata, apeĩ mena cõ aniqueticõato. Cõ manapʉ mena ca-wada quenoopao ãmo. Cʉ̃ mena cõ ca-wada quenooquẽpata jicãona cõ tuaato. Caʉmʉ quena cʉ̃ nʉmore cʉ̃ rocaqueticõato.

12Apeye mʉjaare yʉ buiogʉ yʉ majuuna yʉ ca-tʉgooñari wame. Dio yʉre cʉ̃ ca-buio rotiri wame majuu me ãa. Oco bairo ãa: Jicãarã mʉja nʉmoa Jesúre ca-nʉcʉbʉgoquẽna ãma. Jesúre ca-nʉcʉbʉgoquẽna na ca-anibato quena mʉjaare na cá-aáweogaquẽto, na rocaqueticõaña mʉjaa. 13To bairona jicãarã cãromia mʉja manapʉa Jesúre ca-nʉcʉbʉgoquẽna ãma. Jesúre ca-nʉcʉbʉgoquẽna na ca-anibato quena na rocaqueticõaña mʉjaare na cá-aáweogaquẽto. 14Jesúre ca-api nʉcʉbʉgorã mʉja mena na ca-anie jʉgori caroaro mʉja manapʉare na átigʉmi Dio. To bairona caʉmʉa quenare Jesúre ca-apiʉjarã mʉja nʉmoa ca-apiʉjaquẽna maca mʉja mena na ca-anie jʉgori caroaro na átigʉmi Dio mʉja nʉmoare. Caroaro nare cʉ̃ cá-átiquẽpata mʉja punaa quenare cʉ̃ yarã punaare bairona tʉjʉquetiboʉmi Dio. To bairi mʉja bapa Jesúre ca-apiʉjagaquẽna na ca-anibato quena mʉja punaare, “Yʉ yarã punaa ãma,” na ĩi tʉjʉʉmi Dio. 15Noo Jesucristore ca-nʉcʉbʉgoquẽna maca na nʉmoare reegarãma, o cãromia maca na manapʉare reegarãma Jesúre na ca-apiʉjarije jʉgori. Jicãʉ caʉmʉ ucʉ̃ cʉ̃ ca-ocabʉtirije mena cʉ̃re cõ cá-aáweoquẽto áti majiquẽcʉmi. To bairi amequẽrique to manicõato ĩi, “Mʉ ca-booro baiya,” cõre cʉ̃ ĩato. Ame quẽrique mena mani ca-aniquẽto boomi Dio. 16To bairi mʉjaa Jesúre ca-apiʉjaquẽnare ca-bapacʉna caroaro átiri mʉja bapare na ca-apiʉjaro, Dio nare cʉ̃ ca-popiyeyebopere cʉ̃ ca-netooro mʉja átiborã. “Apiʉjagarãma,” o “Apiʉjaquetigarãma,” caroaro ĩi majiña maa.

17Mʉjaare Dio cʉ̃ ca-cũricarore bairona ca-baipe ãa mʉja ca-ano cõo. To bairona yʉ áti roti Jesúre ca-api nʉcʉbʉgori poari macanare to canacã paʉ macanare. 18To bairi jicãʉ judío maja na cá-átie circuncisión cá-átacʉ ãcʉ̃pʉ Dio cʉ̃re cʉ̃ ca-bejeriquere ca-api nʉcʉbʉgoʉ ucʉ̃ ãcʉmi. To bairi judío maja yere cʉ̃ cá-áti aniere cʉ̃ rocaqueticõato. Apeĩ maca judío maja na cá-átiere cá-átiquetacʉ ãcʉ̃pʉ Dio cʉ̃re cʉ̃ ca-bejeriquere ca-api nʉcʉbʉgoʉ ucʉ̃ circuncisión cʉ̃ áti rotiqueticõato. 19Circuncisión mani cá-átie o circuncisión mani cá-átiquẽtie quena wapa maa. Ca-ani majuuri wame me ãa tie. Dio cʉ̃ ca-boorije mani cá-áto maca ca-ani majuuri wame ãa. 20To canacãʉna mʉjaare Dio cʉ̃ ca-bejero, cʉ̃re mʉja ca-api nʉcʉbʉgori paʉ mʉja ca-ãnatore bairona ca-anicõape ãa mʉjaare. 21Jicãarã aperãre ca-paa cotebojarãre cʉ̃ yarã ca-aniparãre mʉja ca-bejeyupi Dio. Tiere tʉgooñaqueticõaña mʉjaa. Ape paʉ mʉjaare ca-rotirã to cõona mʉja buuborãma. To bairo mʉjaare na ca-buuro ñuubʉjaboro. 22Aperãre ca-paabojarã anibana quena Jesú yarã mʉja ãa, cʉ̃ ca-netooricarã aniri. To bairi aperã maca aperãre ca-paa cotebojarã aniquetibana quena, Jesúre ca-paa cotebojarã mʉja ãa, Jesú cʉ̃ ca-netooricarã aniri. 23Yucʉacã Jesucristo yarã mʉja ãa, mʉja quena, caroorije mʉja cá-átie cʉ̃ ca-bai yaji wapayebojaricarã aniri. To bairi cʉ̃ ca-boorije macare cá-átipe ãa. Noo camaja maca Dio cʉ̃ ca-boorijere mʉjaare cá-áti rotiquẽna unare apiʉjaqueticõaña. 24Yʉ yarã, to canacãʉna mʉjaare Dio cʉ̃ ca-bejero cʉ̃re mʉja ca-api nʉcʉbʉgo jʉgorica paʉpʉ mʉja ca-ãnatore bairona anicõaña.

25Ca-nʉmo mana, ca-manapʉ manare mani Ʉpaʉ Dio maca ape wame yʉ buio rotiquẽemi mʉjaare cʉ̃ cá-áti rotipa wamere. Yʉ majuuna yʉ ca-tʉgooñari wamere mʉjaare yʉ buiogʉ. Yʉ ca-tʉgooñari wamere mʉja nʉcʉbʉgo majirã, cʉ̃ yaʉre cʉ̃ ca-cũuñupi Dio Pablore, cʉ̃ bopaco tʉjʉri ĩirã. 26Oco bairo yʉ tʉgooña: Yucʉ rʉmʉri ca-ano capee popiye tamuorique ãa manire Jesúre ca-apiʉjarãre. Netobʉjaro popiye ãa nʉmo cʉtiata. To bairi ca-nʉmo mana to bairona ca-nʉmo mana ca-anicõaparã ãma, yʉ ĩi tʉgooña. 27Noo ca-nʉmo cʉtiipʉ ca-ãcʉ̃ ucʉ̃ cõre cõ rocaqueticõaña. Noo ca-nʉmo mácʉ ucʉ̃ nʉmo cʉtigʉ macaquẽja cãromiore. 28To bairo yʉ ca-ĩrije to ca-anibato quena, mʉja ca-nʉmoa bʉgaata caroorije ána mee mʉja áa. Cãromia quena na ca-manapʉ cʉpata caroorije ána mee áama. Ca-nʉmocʉna, ca-manapʉcʉna maca netobʉjaro popiye tamuoma yucʉ rʉmʉri ca-ano. Tie jʉgori mʉja cãromio ca-nequẽto, mʉja ca-manapʉ cʉtiquẽto ñuubʉja yʉ ĩi.

29Yʉ yarã, oco bairo mʉjaare yʉ ĩi tunu: Yucʉacã capee popiye cʉtaje ãa manire Jesúre ca-apiʉjarãre. Ati yepapʉ mani ca-ani rʉmʉri peticoagaro. To bairi yucʉacã ca-nʉmocʉna ca-nʉmo manare bairona ca-aniparã ãma, Dio cʉ̃ ca-boorije tutuaro áticõa anigarã. 30-31Ati yepa nipetiro yucʉacã ca-anie yoaro mee petigaro. To bairi yucʉacã mani ca-tʉgooñarique pairije, ati yepapʉ ãnaa mani ca-ani wariñuurije, nipetiro ati yepa macaje mani ca-cʉgorije quena peticoagaro. To bairi cawatoa macaje ãa. To bairi apeye uniere ca-wapaye cʉgorã ca-cʉgoquẽnare bairona ca-aniparã ãma, apeye uniere maiquẽnana.

32Apeye uniere mʉja ca-tʉgooñarique paiquetipere yʉ boo. To bairi ca-nʉmo mácʉ ucʉ̃ mani Ʉpaʉ Jesú yere tʉgooña ʉjaʉmi. Jesucristo cʉ̃ ca-boorijere tutuaro mena áti majiimi ca-nʉmo mácʉ ucʉ̃. 33Ca-nʉmocʉcʉ ucʉ̃ maca ati yepa macaje macare tʉgooña ʉjaʉmi, yʉ nʉmo cõ cʉgo ani wariñuato ĩi. 34To bairona ãa cãromia quena. Ca-manapʉ máco ũcõ mani Ʉpaʉ Dio yere seeto tʉgooña ʉjaomo. Dio cʉ̃ ca-boorije jetore átiganucumo. Cõ ca-tʉgooñarijepʉ quenare cʉ̃ ca-boorije jetore tʉgooñanucumo. Dio yao jeto anicõamo. Ca-manapʉcʉco ũcõ maca ati yepa macajere tʉgooña ʉjaomo, yʉ manapʉ cʉ̃ ani wariñuato ĩo.

35Caroaro mʉjaare to baiato ĩi to bairije yʉ ĩi uca joo. Caroaro nʉcʉbʉgorique mena na anicõato, mʉjaare yʉ ĩi. Apeye uniere tʉgooñarique paiquẽnana mani Ʉpaʉ Dio caroaro cʉ̃ ca-boorijere na áticõato ĩi, mʉjaare yʉ ĩi uca joo. Mʉja matagʉ mee to bairijere mʉjaare yʉ ĩi uca joo.

36Ape wame tunu: Jicãʉ ucʉ̃ cʉ̃ maco cabʉcʉo cõ ca-ano tʉjʉʉ, “Ca-manapʉ cʉtipao ãmo,” cʉ̃ ca-ĩi tʉgooñaata cõ manapʉ cʉticõato. Caroorije me ãa cõ ca-manapʉcʉto. 37Apeĩ maca, “Yʉ maco ca-manapʉ cʉtiquetipao ãmo,” ca-ĩi ucʉ̃ maca cʉ̃ ca-boori wame átigʉ oco bairo ĩimi: “Yʉ maco ca-manapʉ cʉtiquetipao ãmo.” To bairi ñuubʉja caʉmʉre cõre cʉ̃ ca-jooquẽto quenare. 38To bairi cʉ̃ macore, “Manapʉ cʉtiya,” ca-ĩi ucʉ̃ caroaro ácʉmi. Apeĩ cʉ̃ macore ca-manapʉcʉti rotiquẽcʉ maca netobʉjaro caroaro ácʉmi.

39Jicão ca-manapʉcʉco ũcõ cõ manapʉ cʉ̃ ca-catíri rʉmʉri cõo cʉ̃ mena cõ anicõato. Cʉ̃ ca-riaro bero apeĩ tunu noo ca-boʉ cõ ca-manapʉcʉto ñuubʉja. Jesucristore ca-apiʉjaʉ ucʉ̃ jetore ca-manapʉ cʉtipe ãa paro. 40Manapʉ cʉtinemoquẽco maca netobʉjaro wariñuubomo, yʉ ĩi tʉgooña. Dio Espíritu Santo to bairo yʉ ca-tʉgooñaro ácʉmi, yʉ ĩi maji.

Currently Selected:

1 CORINTIOS 7: TAVNT2

Highlight

Copy

Compare