1 CORINTIOS 6

Pleitos delante de jueces que no son creyentes

1Jicãarã mʉja mena macana ca-ñuuquẽtie mʉjaare na cá-áto ʉparã Jesúre ca-api nʉcʉbʉgoquẽnapʉre ca-quenoo rotiquetipe ãa. Jesucristore ca-apiʉjari poa macana macare ca-wada quenooboja rotipe ãa. 2¿Mʉja tʉgooña majiquẽetí? Caberopʉ Jesucristore ca-api nʉcʉbʉgorã Jesú mena ati yepa macanare ca-rotirã mani anigarã. To bairo ati yepa macanare ca-rotirã mani anigarã ĩirã yucʉ quenare apeye unieacãre mʉja roti majirã. 3Dio tʉ macana ángel maja quenare ca-rotirã mani anigarã. To bairo ca-rotiparã aniri ati yepa macaje quenare caroaro mʉja roti majirã. 4Ati yepa macaje cawatoa macaje mena ca-bai buicʉti tʉgooñarã ʉparã Jesúre ca-apiʉjaquẽnare na ca-quenoo rotiquetipe ãa. 5-6Aperã mʉja yarãre na quena Jesucristore ca-nʉcʉbʉgorã na ca-anibato quena ʉparã Diore ca-apiʉjaquẽnapʉre na mʉja quenoo rotinucuñupa. To bairo mʉja cá-átiere ca-bobo tʉgooñape anibajupa. Mʉja tʉpʉ macana Diore ca-apiʉjarã maca mʉja ca-bairije uniere mʉjaare ca-wada quenooboja majirã ãnama. To bairi na jetore buioya. ¿Nope ĩirã ʉparã Jesucristore ca-apiʉjaquẽnare mʉja ame wada canamurijere na mʉja buiotí? To bairo mʉja cá-átiere ca-bobo tʉgooñape nibapa.

7To bairo Jesúre ca-apiʉjarã ca-ani poa macana anibana quena mʉja ca-ame wada canamurije ñuuquẽe. Aperã rooro mʉjaare na cá-átie o mʉja yere na ca-emarije mʉja ca-nʉcaro maca aperãre mʉja ca-wadajãquẽto ñuuboyupa. 8Mʉja majuuna aperãre rooro mʉja áa, na quena mʉja mena macana Jesúre ca-apiʉjarã na ca-anibato quena. 9“Dio tʉpʉ aáquetigarãma caroorã,” mʉja ĩi maji tʉga. To bairi tʉgooña ma wijiaqueticõaña. Oco bairo cá-ána Dio tʉpʉ aáquetigarãma: Noo cá-áti epericarãcʉna, Dio ca-aniquẽna weericarãre cá-áti nʉcʉbʉgorã, na nʉmo ca-aniquẽco mena cá-áti eperã o na manapʉ ca-aniquẽcʉ mena cá-áti eperã, aperã caʉmʉa na majuuna o cãromia na majuuna rooro cá-áti eperã, Dio tʉpʉ aáquetigarãma. 10To bairona ca-jee rutirã apeyere ca-tʉjʉ ʉgoorã, ca-eti cumu pairã, aperãre ca-wada pairã, noo aperã yere ca-emarã, to bairije cá-ána una Dio tʉpʉ aáquetigarãma. 11Ca-jʉgoye mʉja quena jicãarã to bairo cá-ána mʉja ca-anibajupa. Yucʉacã Dio yarã mʉja ãa, cʉ̃ ca-wajoaricarã aniri. Ca-ʉgueri coje reericarãre bairona mʉja ca-baiyupa, caroorije mʉja cá-átajere Dio mʉjaare cʉ̃ ca-majirioro. Jesucristo jʉgori, to bairona Dio Espíritu Santo jʉgori, “Caroarã ãma, yʉ yarã ãma,” Dio cʉ̃ ca-ĩi tʉjʉrã mʉja ãa yucʉra mʉja quena.

La santidad del cuerpo

12Camaja jicãarã oco bairo ĩirãma: “Noo mani ca-booro mani áti maji. Ñee unie áti rotiquetaje maa.” To bairona ãa bairo pʉa. Judío maja na cá-áti rotiquetaje quena manire ĩiro mee bai. To bairo manire to ca-ĩiquetibato quena jicã wameri mani cá-ápata caroaro mani baiquetigarã. To bairi rooro mani baire ĩirã ti wame uno cá-átiquetipe ãa manire. Ti wamere mani áti jana majiquetiborã. To bairi jicã wame uno, “Átiquẽja,” Dio manire cʉ̃ ca-ĩiqueti wame to ca-anibato quena yʉ átiqueti majuucõa ti wame yʉ cá-átie jʉgori rooro yʉ ca-baiata. 13Oco bairo camaja na ca-ĩinucuri wamere cariape ĩima: Ʉgarique mani paropʉ ca-anipe ãa. Mani paro maca ʉgarique ca-anipa paʉ ãa. Dio maca tie ca-petiro átigʉmi. Mani paro manigaro. Ʉgarique quena manigaro. To bairo to ca-yajibato quena mani rupaʉ cá-áti epericarã cʉtipa rupaʉ me ãa. Jesucristo cʉ̃ ca-booro maca cá-átipa rupaʉ ãa. Cʉ̃na mani rupaʉ Ʉpaʉ ãmi. To bairi cʉ̃ ca-boorije macare cá-átipe ãa manire. 14To bairi cʉ̃ ca-tutuarije mena mani rupaʉre tunu catíogʉmi Dio mani ca-bai yajiro bero. Mani Ʉpaʉ Jesú rupaʉ cʉ̃ ca-tunu catíoricarore bairona manire átigʉmi Dio mani quenare.

15Mani rupaʉri Jesú ye ca-anie jeto ãa. To bairi Jesú yere emarãre bairo mʉja átiborã cãromio cá-áti epe wapatao mena ána. Dio yere emari ca-roo macare joorãre bairo mʉja átiborã. To bairo cá-átiqueticõape ãa. 16Meere mʉja maji tʉga. Dio ye queti ucarica pũuropʉ oco bairo ĩi ucarique ãa: “Ni ucʉ̃ cãromiore nee, cõ mena ãcʉ̃ pʉgarã anibana quena cʉ̃ nʉmo mena jicãʉre bairona ãma cʉ̃ nʉmo jãa,” ĩi ucarique ãa. To bairi ni ucʉ̃ ca-roo mena cá-áti epei pʉgarã anibana quena cõ mena jicãʉre bairona ãma cá-áti epeo jãa. 17Ni ucʉ̃ mani Ʉpaʉ Jesucristo mena macacʉ maca, cʉ̃re ca-apiʉjaʉ Jesucristo mena jicã rupaʉre bairona ãcʉmi.

18To bairi áti epericarã cʉtiqueti majuucõaña. Noa una cá-áti epericarãcʉna maca, na rupaʉri rooye tuurã áama. Apeye caroorije átaje maca mani rupaʉ macaje ca-rooye tuuquẽtie ãa. 19Caroaro mʉja majirã. Mani rupaʉ Dio Espíritu Santo cʉ̃ ca-anipa rupaʉ ãa, Dio wiire bairona. Manire ca-jooyupi Dio cʉ̃ Espíritu Santore, manipʉre ca-ãcʉ̃re. To bairi mani majuuna ca-rotiquetiparã mani ãa, Dio yarã aniri. Cʉ̃ maca manire ca-rotii ãmi. 20Cʉ̃ ca-wapayebojaricarã mani ãa cʉ̃ Macʉ jʉgori. To bairi cʉ̃ yarã, cʉ̃ ca-rotirã mani ãa, cʉ̃ ca-wapayericarã aniri. To bairi cʉ̃ ca-boorije macare cá-átipe ãa. Mani rupaʉ mena mani cá-átiere cʉ̃ ca-tʉjʉ wariñuurije jetore cá-átipe ãa. Mani yeri ca-tʉgooñarije quena cʉ̃ ca-tʉjʉ wariñuurije jetore ca-tʉgooñape ãa.

Currently Selected:

1 CORINTIOS 6: TAVNT2

Highlight

Copy

Compare