1 CORINTIOS 5

Se juzga un caso de inmoralidad

1Jicãʉ mʉja mena macacʉ caroorije majuu cʉ̃ cá-átie jã queti apinucu, “Cʉ̃ pacʉ nʉmorena áti epericocʉmi,” jã ĩi buioma. Aperã Diore ca-majiquẽna anibana quena ti wame unore átiquetinucuma. Ñuuqueti majuucõa. 2To bairi mʉja mena macacʉ rooro cʉ̃ cá-átibato quena, “Aperã netoro caroaro cá-ána mani ãa,” mʉja ĩi tʉgooñanucu. To bairo cʉ̃ cá-átiere tʉgooña jʉtiritiri cʉ̃re mʉja ca-buupe anibajupa. To bairo cá-átacʉre mʉja mena ca-neñapo rotiquetipe anibajupa. 3Mʉja tʉpʉ aniquetibacʉ quena seeto mʉjaare yʉ tʉgooñanucu. To bairi mʉja mena ca-ãcʉ̃re bairona rooro cá-ácʉre cʉ̃ ca-popiyeyepe ãa, yʉ ĩi tʉgooña. 4Neñapoya mani Ʉpaʉ Jesucristore ca-apiʉjarã jeto. Neñapori Pablo mani mena neñapomi ca-ĩirãre bairona cariape ája. Jesucristo quena cʉ̃ ca-tutuarije mena mʉja mena anigʉmi. 5To bairo cá-ácʉre cʉ̃ buu rocacõaña, Sataná cʉ̃ rupaʉre noo cʉ̃ ca-booro cʉ̃ áti rocacõato ĩirã. To bairi caroorije cʉ̃ cá-átiere janagʉmi. Cʉ̃ yeri maca Jesucristo cʉ̃ cá-atí paʉpʉ catígʉmi.

6Mʉjaa, “Aperã netoro caroaro cá-ána jã ãa,” mʉja ca-ĩi tʉgooñarije ñuuquẽe. Pan átigarã levadura na ca-ĩrijere õcoacã ajurãma, ti bʉrʉa to wauato ĩirã. Tieacã na ca-ajuro bero ti bʉrʉa nipetiro wauacoato. Tie ca-bairore bairona jicãʉ camajocʉ roorije cʉ̃ cá-ápata camaja átiga peticoanama. 7To bairi caroorije cʉ̃ cá-átiere bairo aperã mani mena macana átirema ĩirã cʉ̃ buuya. To bairo ána pascua boje rʉmʉ ca-ano pan levadura na ca-ĩrijere ca-ajuya maniere bairona mʉja anigarã. Caroaro cá-ána jeto mʉja anigarã. Jesucristo ca-jĩa ecooyupi caroorije mani cá-átie wapa. Pascua ca-ano oveja na ca-jĩaʉre bairo ca-jĩa ecooyupi. 8To bairi pascua macaje pan levadura ca-ajuya manie, ca-wauaquẽtiere ca-ʉgarãre bairona caroorije mana ca-anipe ãa. Cariapena caroaro cá-ána jeto ca-anipe ãa. “Caroaro cá-ána mani ãa,” ca-ĩitorã maca ca-aniquetipe ãa.

9Ca-jʉgoye yʉ ca-uca jʉgorica pũuropʉ, “Cá-áti epericarãcʉna mena na bapa cʉtiqueticõaña,” yʉ ca-ĩi uca joowʉ. 10To bairo mʉja ĩi uca joʉ Diore ca-majiquẽna na tʉpʉ aáqueti majuucõaña ĩi mee yʉ ca-ĩiwʉ. Noo ca-booro cá-ána ati yepapʉ capaarã ãma cá-áti epericarã cʉti pairã, ca-jee ruti pairã, aperã yere ca-tʉjʉ ʉgoo pairã, Dio ca-aniquẽna weericarãrena cá-áti nʉcʉbʉgo pairã. To bairo ca-bairã tʉpʉre cá-aáqueti majuucõarã mʉja ca-ãmata ati yepapʉ mʉja ca-butipe aniboro. 11Oco bairo maca mʉjaare yʉ ca-ĩiwʉ ca-jʉgoye mʉjaare queti uca joʉ: Nii, “Yʉ quena Jesucristore ca-api nʉcʉbʉgoʉ yʉ ãa,” ĩibacʉ quena cá-áti eperico cʉgoʉ ucʉ̃ mena bapa cʉtiqueticõaña. Aperã yere ca-tʉjʉ ʉgoo paii, Dio ca-aniquẽnare cá-áti nʉcʉbʉgoʉ, aperãre ca-wada paii, ca-eti cumu paii, ca-jee ruti paii, to bairo ca-ãcʉ̃ anibacʉ quena, “Diore ca-api nʉcʉbʉgoʉ yʉ ãa,” ca-ĩitoʉ ucʉ̃ mena bapa cʉtiqueticõaña, yʉ ca-ĩi queti uca joowʉ. 12-13To bairi mʉja Jesúre ca-apiʉjarã mʉja mena macacʉ jicãʉ rooro cʉ̃ cá-átiere caroaro cʉ̃ tʉjʉ cõoñaña. To bairo tʉjʉ cõoñari rooro cá-ácʉre caroaro cʉ̃ tʉjʉ majiri cʉ̃ buuya, mʉjaare yʉ ĩi. Aperã Jesucristore ca-api nʉcʉbʉgoquẽna macare rooro na cá-átiere dope bairo na yʉ tʉjʉ cõoña majiquẽe. Dio maca na cá-átiere tʉjʉ cõoñari na popiyeyegʉmi.

Currently Selected:

1 CORINTIOS 5: TAVNT2

Highlight

Copy

Compare