1 CORINTIOS 4

El trabajo de los apóstoles

1“Jesucristo cʉ̃ cá-áti rotirijere cá-ána ãma,” jãare ca-ĩi tʉgooñape ãa. “Dio ye queti, ca-jʉgoye camajare cʉ̃ ca-majioquetajere ca-buiorã ãma,” jãare ca-ĩi tʉgooñape ãa. 2Jicãʉ paabojari majocʉ cʉ̃ ʉpaʉ cʉ̃ cá-áti rotirore bairona caroaro cá-átipaʉ ãmi. To bairo caroaro cʉ̃ cá-áto cʉ̃ ʉpaʉ maca caroaro cʉ̃ tʉjʉ wariñuugʉmi. 3To bairi Dio yere yʉ cá-átiere, “Caroaro áami,” o “Caroaro átiquẽemi Pablo,” yʉre mʉja ca-ĩata quena yʉ tʉgooñaquẽe. O ʉparã una to bairo yʉre na ca-ĩi tʉjʉata quena yʉ tʉgooñaquẽe. Yʉ majuu quena, “Caroaro yʉ áa,” o “Caroaro yʉ átiquẽe Dio yʉre cʉ̃ cá-áti rotirijere,” yʉ ĩiquẽe. 4“Dio yʉre cʉ̃ cá-áti rotirijere caroaro yʉ átiquẽe,” ĩi tʉgooñaquetibacʉ quena, “Caroaʉ, ca-bui mácʉ yʉ ãa,” yʉ ĩi majiquẽe. Mani Ʉpaʉ Jesucristo jeto, “Caroaro áami,” o “Caroaro átiquẽemi,” yʉre ca-ĩi tʉjʉ majii ãmi. 5Aperã na cá-átiere, “Caroaro átiquẽema,” na ca-ĩiquetiparã mani ãa Jesucristo cʉ̃ ca-tunu atíparo jʉgoye. Tunu ejaʉpʉ camaja nipetirã na cá-átajere iñoogʉmi aperãre. Yajioro na cá-átibataje quenare iñoogʉmi mani Ʉpaʉ Jesú. Camaja “Oco bairo jã átigarã,” na ca-ĩi tʉgooñabatie quenare iñoogʉmi. To cõopʉ camaja na ca-ano cõo caroaro na cá-átaje tʉjʉri, “Caroaro mʉja cá-ápʉ́,” na ĩigʉmi Dio.

6Yʉ yarã, caroaro mʉjaare buioʉ atiere mʉjaare yʉ ĩi. Apolo, yʉ, jã ye macaje menare mʉjaare yʉ buio majio. Jã cá-átiere tʉjʉrã Dio ye queti ucarica pũuripʉ tirʉmʉpʉ macana na ca-ĩi ucaricarore bairo mʉja áti majigarã. Ape wame ti pũuripʉ ca-ĩi ucaqueti wame macare mʉja átiquetigarã. To bairi, “Jãare ca-buioʉ maca ca-maji netoʉ ãmi mʉjaare ca-buioricʉ netoro,” mʉja ĩi nʉcʉbʉgo uwioquetigarã. 7Aperã netoro ca-ani majuurã mʉja aniquẽe. Nipetirije Dio yere mʉja ca-majiri wame cõo mʉjaare Dio cʉ̃ ca-majiorique jeto ãa. To bairi, “Jã majuuna jã ca-majiwʉ,” ĩi tʉgooñaqueticõaña mʉjaa.

8Oco bairo mʉja tʉgooña: “Nipetiro Dio yere jã maji peticõa. Ñee unie jã rʉjaquẽe. Caroaro ca-ãna jã ãa,” mʉja ĩi tʉgooña mʉja tʉpʉ jã ca-aniquẽtopʉ. Caʉparãre bairo ca-tʉgooñarã mʉja anibapa. Jã macare cawatoa ca-ãnare bairo jãare mʉja tʉjʉ reecõa. Dio yere ca-majirã majuu mʉja ca-ãmata ñuu netoboro. Jã quena mʉja mena ca-majirã jã aninemoborã. 9Aperã Jesú ye quetire Dio cʉ̃ ca-buio roti jooricarã rʉgaro majuu ca-ãna Dio cʉ̃ ca-cũricarã jã ãa, yʉ tʉgooña. Aperã caroorije na cá-átie wapa na ca-jĩaparãre bairo jã ãa. Aperã jã tʉjʉ joonucuma, dope bairo jã ca-baipere tʉjʉgarã. Ángel maja camaja quena to bairona jã tʉjʉnucuma, dope bairo popiye jã ca-bainemopere tʉjʉgarã. 10Jesucristo ye quetire jã ca-buio teñarije jʉgori ati yepa macana, “Ca-tʉgooña majiquẽna ãma,” jã ĩinucuma. Mʉja maca, “Jesucristo ye quetire jã maji peocõa,” ca-ĩirã mʉja anicõa. Cá-áti ocabʉtiquẽna jã ãa jãa. Mʉja maca, “Ca-ocabʉtirã majuu jã ãa jãa,” mʉja ĩi. Camaja to bairona jã tʉjʉ reecõanucuma. Mʉja macare caroaro nʉcʉbʉgonucuma. 11Nemoopʉre ca-popiye cʉtana aniri ato cõo quenare to bairona jã popiye cʉtinucu. Ca-ñigo tamuorã, ca-etigarã, ca-juti mana jã bainucu. Aperã rooro jã átinucuma. Ca-wiiri mana jã anicõa. 12Seeto jã paa popiye cʉtinucu. Camaja jãare tutinucuma. Jãare na ca-tutiro quena, “Caroaro mʉjaare to baiato,” nare jã ĩi yʉʉnucu. Jã nʉcanucu rooro jãare na cá-átinucurijere. 13Naa rooro jã wada painucuma. Jãare na ca-ĩrije to ca-anibato quena caroaro nare jã buio quenooganucubapa. Ati yepa macana na ca-booquẽtie na ca-rerijere bairona jã tʉjʉ reenucuma. Nemoopʉna to bairo na cá-áti jʉgoricarã rooro jã átinucuma yucʉ quenare.

14Na bobo apiato ĩi mee to bairije mʉjaare yʉ ĩi buio jã ca-popiye cʉtinucurijere. Mʉjaare maii, to bairo caroaro mʉjaare yʉ queti buiocõa, yʉ punaare bairo ca-ãna mʉja ca-ano maca. Caroa macare na tʉgooñaato ĩi mʉjaare yʉ ĩi buio. 15Capaarã majuu diez mil canacãʉ Jesucristo ye quetire mʉjaare ca-buiorã mʉja cʉgoborã. Capaarã majuu mʉjaare ca-buiorã na ca-anibato quena jicãʉna yʉ ãa mʉjaare ca-buio jʉgoricʉ. Yʉna yʉ ãa mʉja pacʉre bairo ca-ãcʉ̃, Jesucristo ye quetire mʉjaare ca-buio jʉgoricʉ. 16To bairi yʉ punaare bairo ca-ãna mʉja ca-ano yʉ cá-átinucurore bairo mʉja cá-áto seeto yʉ boo.

17To bairo mʉja cá-átipere boojãʉ Timoteore mʉja tʉpʉ cʉ̃ yʉ cá-aá roti tʉgawʉ. Yʉ ca-maii, yʉ macʉre bairo ca-ãcʉ̃ ãmi. Yʉ cá-átore bairona caroaro átinucumi Dio yere. Jesucristore cʉ̃ nʉcʉbʉgoʉ yʉ cá-áti aniere mʉja buionemogʉmi. Jesucristore ca-apiʉjarã nipetiropʉ na ca-anopʉ yʉ ca-buionucurore bairo mʉja buionemogʉmi Timoteo. 18Jicãarã mʉja mena macana, “Jã majuuna mʉjaare ca-jʉgo aniparã jã ãa, ca-maji netorã aniri,” ĩima, Pablo mani tʉpʉ tʉjʉ atíquẽcʉmi ĩi tʉgooñari. 19Yʉ maca, “Nemoona na tʉpʉ yʉ aágʉ Dio cʉ̃ ca-booata,” yʉ ĩi tʉgooña. Topʉ aácʉ to bairo ca-bairãre na yʉ tʉjʉgʉ. Noa, “¿Dio cʉ̃ ca-tutuarije mena cʉ̃ ca-boorijere na áatí? O ¿To bairona ĩitorã na áatí?” na yʉ ĩi tʉjʉgʉ. 20“Dio cʉ̃ ca-boorijere cá-ána jã ãa,” mani ca-ĩiro wapa maa. Cʉ̃ ca-boorijere cʉ̃ ca-tutuarije mena mani cá-áto maca boomi Dio. 21¿Topʉ ejaʉ dope bairo mʉjaare yʉ cá-áto mʉja bootí? ¿Ñuuquẽto mʉja cá-áto yʉ ca-tutiro mʉja bootí? ¿O caroaro ca-ãna mʉja ca-ano maca mairique mena caroaro mʉjaare yʉ ca-buioro mʉja bootí?

Currently Selected:

1 CORINTIOS 4: TAVNT2

Highlight

Copy

Compare