ܡܙܡܘܪ̈ܐ 107 (ܩܙ)
107 (ܩܙ)
ܣܸܦܪܵܐ ܚܡܝܼܫܵܝܵܐ
ܡܙܡܘܪ̈ܐ 107–150
1ܫܲܟܪܘܼܢ ܠܡܵܪܝܵܐ ܣܵܒܵܒ ܛܵܒ݂ܵܐ ܝܠܹܗ،
ܣܵܒܵܒ ܠܥܵܠܲܡ ܝܼܠܵܗ̇ ܫܵܦܵܩܲܬܹܗ.
2ܐܵܡܪܝܼ ܦܪ̈ܝܼܩܹܐ ܕܡܵܪܝܵܐ،
ܕܦܘܼܪܩܲܝ ܠܹܗ ܡ̣ܢ ܐܝܼܕܵܐ ܕܡܲܠܝܸܨܵܢܵܐ،
3ܘܡ̣ܢ ܐܲܪ̈ܥܵܬܹܐ ܓ̰ܘܼܡܥܲܝ ܠܹܗ،
ܡ̣ܢ ܡܲܕܢܚܵܐ ܘܡ̣ܢ ܡܲܥܪܒ݂ܵܐ،
ܡ̣ܢ ܓܲܪܒܝܵܐ ܘܡ̣ܢ ܬܲܝܡܢܵܐ.
4ܚܕܝܼܪܗܘܿܢ ܓܵܘ ܒܲܪܝܼܵܐ، ܒܐܘܼܪܚܵܐ ܚܵܪܵܒܵܐ،
ܠܵܐ ܡܘܼܫ݇ܟ̰ܸܚ ܠܗܘܿܢ ܡܕܝܼܢ݇ܬܵܐ ܕܥܡܵܪܵܐ.
5ܟܦܝܼܢܹ̈ܐ ܐܘܼܦ ܨܹܗܝܹ̈ܐ،
ܓܵܢܲܝܗܝ ܕܘܼܪܕܸܫ̃ ܠܵܗ̇ ܒܓܵܘܲܝܗܝ.
6ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܟܲܕ ܥܝܼܩ ܠܵܗ̇ ܐܸܠܲܝܗܝ،
ܘܡ̣ܢ ܐܘܼܠܨܵܢܲܝ̈ܗܝ ܦܘܼܨܝܲܝ ܠܹܗ.
7ܘܠܘܼܒܠܲܝ ܠܹܗ ܒܐܘܼܪܚܵܐ ܬܪܘܼܨܬܵܐ،
ܠܹܐܙܵܠܵܐ ܠܡܕܝܼܢ݇ܬܵܐ ܕܥܡܵܪܵܐ.
8ܫܲܟܪܝܼ ܠܡܵܪܝܵܐ ܒܘܼܬ ܫܵܦܵܩܲܬܹܗ،
ܘܒܘܼܬ ܕܘܼܡܵܪ̈ܘܼܗܝ ܠܒܢܲܝ̈ܢܵܫܵܐ.
9ܣܵܒܵܒ ܟܹܐ ܡܲܣܒܸܥ ܓܵܢܵܐ ܨܗܝܼܬܵܐ،
ܘܟܹܐ ܡܵܠܹܐ ܛܵܒ݂ܬܵܐ ܠܓܵܢܵܐ ܟܦܝܼܢܬܵܐ.
10ܐ݇ܚܹܪ̈݇ܢܹܐ ܝ݇ܬܝܼܒ݂ ܠܗܘܿܢ ܒܚܸܫܟܵܐ ܘܒܛܸܠܵܢܝܼܬܵܐ ܕܡܵܘܬܵܐ،
ܐܲܣܝܼܪܹ̈ܐ ܒܐܘܼܠܨܵܢܵܐ ܘܒܦܪܸ̈ܙܠܹܐ،
11ܣܵܒܵܒ ܥܒ݂ܝܼܕ ܠܗܘܿܢ ܡܵܪܘܿܕܘܼܬܵܐ ܥܲܠ ܗܹܡܸܙܡܵܢܹ̈ܐ ܕܐܲܠܵܗܵܐ،
ܘܡܸܠܟܵܐ ܕܥܸܠܵܝܵܐ ܡܘܼܣܠܹܐ ܠܗܘܿܢ.
12ܒܘܼܬ ܐܵܗܵܐ، ܡܘܼܟܸܦ ܠܹܗ ܒܥܲܡܠܵܐ ܠܸܒܲܝܗܝ،
ܬܘܼܪܩܸܠ ܠܗܘܿܢ ܘܠܲܝܬ ܗ݇ܘܵܐ ܗܲܝܸܪܵܢܵܐ.
13ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܟܲܕ ܥܝܼܩ ܠܵܗ̇ ܐܸܠܲܝܗܝ،
ܘܡ̣ܢ ܐܘܼܠܨܵܢܲܝ̈ܗܝ ܦܘܼܪܩܲܝ ܠܹܗ.
14ܦܘܼܠܛܲܝ ܠܹܗ ܡ̣ܢ ܚܸܫܟܵܐ ܘܛܸܠܵܢܝܼܬܵܐ ܕܡܵܘܬܵܐ،
ܘܩܛܝܼܥ ܠܹܗ ܐܸܣܘܼܪ̈ܲܝܗܝ.
15ܫܲܟܪܝܼ ܠܡܵܪܝܵܐ ܒܘܼܬ ܫܵܦܵܩܲܬܹܗ،
ܘܒܘܼܬ ܕܘܼܡܵܪ̈ܘܼܗܝ ܠܒܢܲܝ̈ܢܵܫܵܐ.
16ܣܵܒܵܒ ܬܒ݂ܝܼܪܹܗ ܬܲܪ̈ܥܵܢܹܐ ܕܢܚܵܫܵܐ،
ܘܢܣܝܼܪܹܗ ܕܵܒ݂ܪܹ̈ܐ ܕܦܪܸܙܠܵܐ.
17ܣܲܟ݂ܠܹ̈ܐ ܡ̣ܢ ܐܘܼܪܚܵܐ ܕܓܢܵܗܲܝܗܝ،
ܦܝܼܫ ܠܗܘܿܢ ܡܘܼܠܝܸܨܹܐ ܡ̣ܢ ܥܸܠܬܵܐ ܕܥܵܘܠܲܝܗܝ.
18ܡ̣ܢ ܟܠ ܡܹܐܟ݂ܘܼܠܬܵܐ ܓܘܼܢܓܸܙ ܠܵܗ̇ ܓܵܢܲܝܗܝ،
ܘܩܘܼܪܒܸܢܗܘܿܢ ܗܲܠ ܬܲܪ̈ܥܵܢܹܐ ܕܡܵܘܬܵܐ.
19ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܟܲܕ ܥܝܼܩ ܠܵܗ̇ ܐܸܠܲܝܗܝ،
ܘܡ̣ܢ ܐܘܼܠܨܵܢܲܝ̈ܗܝ ܦܘܼܪܩܲܝ ܠܹܗ.
20ܫܘܼܕܸܪܹܗ ܚܲܒܪܹܗ ܘܒܘܼܣܡܲܝ ܠܹܗ،
ܘܦܘܼܨܝܲܝ ܠܹܗ ܡ̣ܢ ܚܪ̈ܵܒܲܝܗܝ.
21ܫܲܟܪܝܼ ܠܡܵܪܝܵܐ ܒܘܼܬ ܫܵܦܵܩܲܬܹܗ،
ܘܒܘܼܬ ܕܘܼܡܵܪ̈ܘܼܗܝ ܠܒܢܲܝ̈ܢܵܫܵܐ.
22ܘܕܵܒ݂ܚܝܼ ܕܸܒ݂ܚܵܐ ܕܫܵܟܲܪܬܵܐ،
ܘܗܲܩܝܼ ܒܘܼܬ ܦܘܼܠܚܵܢܘܼ̈ܗܝ ܒܩܵܘܲܚܬܵܐ.
23ܨܵܠܝܵܢܹ̈ܐ ܕܝܵܡܵܐ ܒܓܵܡܝܼܹ̈ܐ،
ܬܲܓܵܪܹ̈ܐ ܒܡ̈ܝܼܵܐ ܪ̈ܘܝܼܚܹܐ.
24ܐܵܢܝܼ ܚܙܹܐ ܠܗܘܿܢ ܦܘܼܠܚܵܢܹ̈ܐ ܕܡܵܪܝܵܐ،
ܘܕܘܼܡܵܪ̈ܘܼܗܝ ܒܥܘܼܡܩܹ̈ܐ.
25ܐ݇ܡܝܼܪܹܗ ܘܡܘܼܩܸܡ ܠܹܗ ܦܵܘܚܵܐ ܕܥܲܠܥܵܠܵܐ،
ܘܦܝܼܫ ܠܗܘܿܢ ܡܘܼܪܡܹܐ ܠܲܦܹ̈ܐ ܕܝܵܡܵܐ.
26ܐ݇ܣܝܼܩ ܠܗܘܿܢ ܠܫܡܲܝܵܐ ܘܨܠܹܐ ܠܗܘܿܢ ܠܬܗܘܿܡܹ̈ܐ،
ܦܫܝܼܪܵܗ̇ ܓܵܢܲܝܗܝ ܒܣܸܪܝܘܼܬܵܐ.
27ܦܘܼܢܦܸܠ ܠܗܘܿܢ ܘܫܥܝܼܫ ܠܗܘܿܢ ܐܲܝܟ݂ ܪ̈ܵܘܵܝܹܐ،
ܘܟܠܵܗ̇ ܚܸܟ݂ܡܬܲܝܗܝ ܦܝܼܫ ܠܵܗ̇ ܒܠܝܼܥܬܵܐ.
28ܗ̇ܝܓܵܗ ܡܘܼܩܘܸܚ ܠܗܘܿܢ ܠܡܵܪܝܵܐ ܟܲܕ ܥܝܼܩ ܠܵܗ̇ ܐܸܠܲܝܗܝ،
ܘܡ̣ܢ ܐܘܼܠܨܵܢܲܝ̈ܗܝ ܩܲܡ ܦܲܠܸܛ ܠܗܘܿܢ.
29ܡܘܼܫܬܸܩ ܠܹܗ ܠܥܲܠܥܵܠܵܐ،
ܘܗܘܹܐ ܠܗܘܿܢ ܫܸܠܝܹܐ ܠܲܦܹ̈ܐ.
30ܘܚܕܹܐ ܠܗܘܿܢ ܟܲܕ ܫܬܝܼܩ ܠܵܗ̇،
ܘܡܕܘܼܒܪܲܝ ܠܹܗ ܠܠܡܹܐܢܵܐ ܕܨܸܒ݂ܝܵܢܲܝܗܝ.
31ܫܲܟܪܝܼ ܠܡܵܪܝܵܐ ܒܘܼܬ ܫܵܦܵܩܲܬܹܗ،
ܘܒܘܼܬ ܕܘܼܡܵܪ̈ܘܼܗܝ ܠܒܢܲܝ̈ܢܵܫܵܐ.
32ܘܡܲܪܡܝܼ ܠܹܗ ܒܟܸܢܫܵܐ ܕܥܲܡܵܐ،
ܘܓܵܘ ܡܵܘܬܒ݂ܵܐ ܕܚܘܵܪ̈ܕܸܩܢܹܐ ܚܵܩܪܝܼ ܠܹܗ.
33ܟܹܐ ܡܲܚܕܸܪ ܢܲܗܪ̈ܵܘܵܬܹܐ ܠܒܲܪܝܼܵܐ،
ܘܡܲܒܘܼܥܹ̈ܐ ܕܡ̈ܝܼܵܐ ܠܐܲܪܥܵܐ ܨܗܝܼܬܵܐ،
34ܘܐܲܪܥܵܐ ܕܛܥܘܼܢܝܵܬܹ̈ܐ ܠܐܲܪܥܵܐ ܡܸܠܚܵܢܬܵܐ،
ܡ̣ܢ ܥܸܠܬܵܐ ܕܒܝܼܫܘܼܬܵܐ ܕܝܵܬܒ݂ܵܢܹ̈ܐ ܕܓܵܘܘܼܗ̇.
35ܟܹܐ ܡܲܚܕܸܪ ܒܲܪܝܼܵܐ ܠܒܸܪ̈ܟܹܐ ܕܡ̈ܝܼܵܐ،
ܘܐܲܪܥܵܐ ܨܗܝܼܬܵܐ ܠܡܲܒܘܼܥܹ̈ܐ ܕܡ̈ܝܼܵܐ.
36ܘܟܹܐ ܡܲܬܸܒ݂ ܬܵܡܵܐ ܟܦܝܼܢܹ̈ܐ،
ܘܟܹܐ ܫܲܬܐܸܣܝܼ ܡܕܝܼܢ݇ܬܵܐ ܠܸܥܡܵܪܵܐ.
37ܘܟܹܐ ܙܵܪܥܝܼ ܚܲܩܠܵܢܹ̈ܐ ܘܢܵܨܒ݂ܝܼ ܟܲܪ̈ܡܵܢܹܐ،
ܘܫܵܩܠܝܼ ܛܥܘܼܢܝܵܬܹ̈ܐ ܦܸܪ̈ܝܹܐ.
38ܘܟܹܐ ܒܲܪܸܟ݂ ܠܗܘܿܢ ܘܟܹܐ ܙܵܝܕܝܼ ܪܵܒܵܐ،
ܘܪܸܣܩܲܝܗܝ ܠܹܐ ܡܲܒܨܸܪ.
39ܐܝܼܡܲܢ ܕܚܵܣܪܝܼ ܘܦܵܝܫܝܼ ܡܘܼܟܸܦܹܐ
ܡ̣ܢ ܛܠܘܼܡܝܵܐ، ܒܝܼܫܘܼܬܵܐ، ܘܚܲܫܵܐ،
40ܟܹܐ ܫܲܦܸܟ݂ ܡܲܣܠܵܝܬܵܐ ܥܲܠ ܢܲܨܝܼܚܹ̈ܐ،
ܘܟܹܐ ܡܲܚܠܸܛ ܠܵܗ̇ ܐܘܼܪܚܲܝܗܝ ܒܐܲܪܥܵܐ ܚܵܪܵܒܵܐ ܕܠܲܝܬ ܠܵܗ̇ ܦܠܵܛܵܐ.
41ܐܝܼܢܵܐ ܟܹܐ ܡܲܪܸܡ ܠܗܘܿܢ ܣܢܝܼܩܹ̈ܐ ܠܫܲܝܢܵܐ ܡ̣ܢ ܐܘܼܠܨܵܢܵܐ،
ܘܟܹܐ ܥܵܒܹܕ ܐܲܝܟ݂ ܦܸܣܩܵܐ ܫܲܪ̈ܒܵܬܲܝܗܝ.
42ܒܸܬ ܚܵܙܝܼ ܬܪ̈ܘܼܨܹܐ ܘܒܸܬ ܚܵܕܝܼ،
ܘܟܠ ܥܵܘܠܵܐ ܒܸܬ ܐܵܟ̰ܹܡ ܦܘܼܡܹܗ.
43ܡܵܢܝܼ ܝܠܹܗ ܚܲܟܝܼܡܵܐ؟ ܢܵܛܹܪ ܐܲܢܹܐ،
ܘܦܲܪܡܹܐ ܫܵܦܵܩܲܬ ܕܡܵܪܝܵܐ.
Currently Selected:
ܡܙܡܘܪ̈ܐ 107 (ܩܙ): ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation