ܡܙܡܘܪ̈ܐ 108 (ܩܚ)
108 (ܩܚ)
ܙܡܵܪܬܵܐ. ܡܲܙܡܘܿܪܵܐ ܕܕܵܘܝܼܕ.
1ܡܘܼܩܘܝܼܵܐ ܝܠܹܗ ܠܸܒܝܼ، ܝܵܐ ܐܲܠܵܗܵܐ،
ܒܸܬ ܫܲܒܚܸܢ ܘܒܸܬ ܙܵܡܪܹܢ ܒܟܠܵܗ̇ ܓܵܢܝܼ.
2ܪܥܘܿܫܝ ܩܝܼܬܵܪܵܐ ܘܟܸܢܵܪܵܐ،
ܒܸܬ ܡܲܪܥܸܫܸܢ ܠܨܲܦܪܵܐ.
3ܒܸܬ ܫܲܟܪܸܢ ܐܸܠܘܼܟ݂ ܓܵܘ ܥܲܡܡܹ̈ܐ، ܝܵܐ ܡܵܪܝܵܐ،
ܘܒܸܬ ܙܵܡܪܹܢ ܐܸܠܘܼܟ݂ ܓܵܘ ܐܸܡܘܵܬܹ̈ܐ.
4ܣܵܒܵܒ ܓܘܼܪܬܵܐ ܝܠܵܗ̇ ܫܵܦܵܩܲܬܘܼܟ݂ ܥܸܠܸܠ ܡ̣ܢ ܫܡܲܝܵܐ،
ܘܗܲܠ ܪܩܝܼܥܵܐ ܡܗܘܼܡܢܘܼܬܘܼܟ݂.
5ܪܘܼܡ ܥܸܠܸܠ ܡ̣ܢ ܫܡܲܝܵܐ، ܝܵܐ ܐܲܠܵܗܵܐ،
ܘܥܲܠ ܟܠܵܗ̇ ܐܲܪܥܵܐ ܐܝܼܩܵܪܘܼܟ݂.
6ܩܵܐ ܕܦܵܨܝܼ ܡܘܼܚܸܒܘܼ̈ܟ݂،
ܦܲܪܸܩ ܒܝܲܡܝܼܢܘܼܟ݂ ܘܓ̰ܲܘܸܒ ܠܝܼ.
7ܐܲܠܵܗܵܐ ܗܘܼܡܙܸܡ ܠܹܗ ܒܩܘܼܕܫܹܗ، ”ܒܸܬ ܦܵܨܚܹܢ،
ܒܸܬ ܦܲܠܥܸܢ ܠܫܟܹܝܡ، ܘܪܵܘܘܿܠܵܐ ܕܣܵܟܘܼܬ ܒܸܬ ܟܵܝܠܹܢ.
8”ܕܝܼܝܼ ܝܠܹܗ ܓܸܠܥܵܕ، ܕܝܼܝܼ ܝܠܹܗ ܡܢܲܫܹܐ،
ܐܲܦܪܹܝܡ ܣܲܢܘܲܪܬܵܐ ܕܪܹܫܝܼ،
ܝܼܗܘܼܕܵܐ ܚܘܼܛܪܝܼ.
9ܡܘܼܐܵܒ݂ ܡܲܪܸܓܠܵܐ ܕܚܵܠܲܠܬܝܼ،
ܥܲܠ ܐܲܕܘܿܡ ܒܸܬ ܪܲܦܹܝܢ ܨܵܘܸܠܬܝܼ،
ܥܲܠ ܦܠܸܫܬ ܒܸܬ ܡܲܩܘܸܚܸܢ.“
10ܡܵܢܝܼ ܒܸܬ ܠܲܒܸܠ ܠܝܼ ܠܡܕܝܼܢ݇ܬܵܐ ܡܘܼܩܘܝܼܬܵܐ؟
ܡܵܢܝܼ ܒܸܬ ܡܗܲܕܹܐ ܠܝܼ ܗܲܠ ܐܲܕܘܿܡ؟
11ܗܵܐ، ܠܹܐ ܝܘܸܬ ܡܘܼܚܦܸܠܵܐ ܐܸܠܲܢ، ܝܵܐ ܐܲܠܵܗܵܐ؟
ܘܠܹܐ ܦܵܠܛܹܬ ܥܲܡ ܚܲܝܠܵܘܵܬܲܢ̈، ܝܵܐ ܐܲܠܵܗܵܐ؟
12ܗܲܒ݂݇ܠ ܠܲܢ ܗܵܝܲܪܬܵܐ ܡ̣ܢ ܕܸܫܡܸܢ،
ܣܵܒܵܒ ܣܪܝܼܩܘܼܬܵܐ ܝܠܵܗ̇ ܦܵܪܲܩܬܵܐ ܕܒܲܪܢܵܫܵܐ.
13ܒܐܲܠܵܗܵܐ ܒܸܬ ܥܵܒ݂ܕܲܚ ܓܲܢ݇ܒܵܪܘܼܬܵܐ،
ܘܗ̇ܘ ܒܸܬ ܕܲܫܕܸܫ ܠܕܸܫܡܸܢܲܢ̈.
Currently Selected:
ܡܙܡܘܪ̈ܐ 108 (ܩܚ): ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation