ܡܙܡܘܪ̈ܐ 105 (ܩܗ)
105 (ܩܗ)
1ܫܲܟܪܘܼܢ ܠܡܵܪܝܵܐ، ܩܪܹܝܡܘܼܢ ܒܫܸܡܹܗ،
ܡܲܕܸܥܡܘܼܢ ܓܵܘ ܥܲܡܡܹ̈ܐ ܥܒ݂ܵܕܘܼ̈ܗܝ.
2ܫܲܒܚܘܼܢ ܐܸܠܹܗ، ܙܡܘܿܪܘܼܢ ܐܸܠܹܗ،
ܗܲܓܹܝܡܘܼܢ ܟܠܲܝܗܝ ܕܘܼܡܵܪ̈ܘܼܗܝ.
3ܫܲܒܚܘܼܢ ܒܫܸܡܵܐ ܕܩܘܼܕܫܹܗ،
ܚܵܕܹܐ ܠܸܒܵܐ ܕܛܵܥܝܵܢܹ̈ܐ ܠܡܵܪܝܵܐ.
4ܒܥܹܝܡܘܼܢ ܠܡܵܪܝܵܐ ܘܠܥܘܼܫܢܹܗ،
ܛܥܹܝܡܘܼܢ ܠܦܵܬܹܗ ܐܲܡܝܼܢܵܐܝܼܬ.
5ܕܟ݂ܘܿܪܘܼܢ ܕܘܼܡܵܪ̈ܘܼܗܝ ܕܥܒ݂ܝܼܕ ܠܹܗ،
ܢܝܼܫܲܢܩܘܼ̈ܗܝ ܘܕܝܼܘܵܢܹ̈ܐ ܕܦܘܼܡܹܗ.
6ܝܵܐ ܙܲܪܥܵܐ ܕܐܲܒ݂ܪܵܗܵܡ ܪܹܓܹܗ،
ܝܵܐ ܒܢܲܝ̈ ܝܲܥܩܘܿܒ݂ ܓܘܼܒܝܘܼ̈ܗܝ.
7ܗ̇ܘ ܝܼܠܹܗ ܡܵܪܝܵܐ ܐܲܠܵܗܲܢ،
ܒܟܠܲܝܗܝ ܐܲܪܥܵܐ ܕܝܼܘܵܢܘܼ̈ܗܝ.
8ܕܟ݂ܝܼܪܹܗ ܠܥܵܠܲܡ ܘܲܥܕܹܗ،
ܚܲܒܪܵܐ ܕܦܩܝܼܕ ܠܹܗ ܠܐܲܠܦܵܐ ܕܵܘܪܹ̈ܐ،
9ܘܲܥܕܵܐ ܕܩܛܝܼܥ ܠܹܗ ܥܲܡ ܐܲܒ݂ܪܵܗܵܡ،
ܘܡܵܘܡܝܼܬܹܗ ܠܐܝܼܣܚܵܩ،
10ܘܡܘܼܩܘܹܐ ܠܹܗ ܘܲܥܕܹܗ ܠܝܲܥܩܘܿܒ݂ ܠܩܵܢܘܿܢܵܐ،
ܠܝܼܣܪܵܝܹܠ ܘܲܥܕܵܐ ܕܥܵܠܲܡ،
11ܒܹܐܡܵܪܵܐ، ”ܐܸܠܘܼܟ݂ ܒܸܬ ܝܵܗ݇ܒܹܢ ܐܲܪܥܵܐ ܕܟܢܲܥܢ،
ܣܵܗܡܵܐ ܕܝܵܪܬܘܼܬܵܘܟ݂ܘܿܢ.“
12ܟܲܕ ܝܼܗ݇ܘܵܘ ܒܵܨܘܿܪܹ̈ܐ ܒܡܸܢܝܵܢܵܐ،
ܪܵܒܵܐ ܒܵܨܘܿܪܹ̈ܐ، ܘܡܵܫܵܚܲܛܹ̈ܐ ܓܵܘܘܼܗ̇،
13ܗܘܹܐ ܠܗܘܿܢ ܒܸܚܕܵܪܵܐ ܡ̣ܢ ܐܘܼܡܬܵܐ ܠܐܘܼܡܬܵܐ،
ܡ̣ܢ ܡܲܠܟܘܼܬܵܐ ܠܥܲܡܵܐ ܐ݇ܚܹܪ݇ܢܵܐ.
14ܠܵܐ ܫܒ݂ܝܼܩ ܠܹܗ ܕܐ݇ܢܵܫܵܐ ܕܛܵܠܹܡ ܥܲܠܲܝܗܝ،
ܘܡܘܼܢܟܸܣ ܠܹܗ ܡܲܠܟܹ̈ܐ ܒܘܼܬ ܕܝܼܲܝܗܝ.
15ܐ݇ܡܝܼܪܹܗ، ”ܠܵܐ ܕܵܩܪܝܼܬܘܿܢ ܒܡܫܝܼܚܝܼ̈،
ܘܠܢܒ݂ܝܼܝܼ̈ ܠܵܐ ܥܵܒ݂ܕܝܼܬܘܿܢ ܒܝܼܫܬܵܐ.“
16ܘܩܪܹܐ ܠܹܗ ܟܸܦܢܵܐ ܥܲܠ ܐܲܪܥܵܐ،
ܟܠ ܕܵܘܪܵܢܵܐ ܕܠܲܚܡܵܐ ܬܒ݂ܝܼܪܹܗ.
17ܫܘܼܕܸܪܹܗ ܩܵܕ݇ܡܲܝܗܝ ܐ݇ܢܵܫܵܐ،
ܠܪܹܓܘܼܬܵܐ ܦܝܼܫ ܠܹܗ ܙܘܼܒܢܵܐ ܝܵܘܣܸܦ.
18ܡܘܼܠܝܸܨ ܠܗܘܿܢ ܠܐܲܩܠܵܬܹ̈ܗ ܒܩܵܘܕܹ̈ܐ،
ܒܬܵܘܩܵܐ ܕܦܪܸܙܠܵܐ ܥܒ݂ܝܼܪܹܗ ܩܕܵܠܹܗ.
19ܗܲܠ ܙܲܒ݂ܢܵܐ ܕܦܝܼܫ ܠܹܗ ܬܘܼܡܸܡܵܐ ܚܲܒܪܹܗ،
ܡܹܐܡܪܵܐ ܕܡܵܪܝܵܐ ܩܲܡ ܨܲܪܸܦ ܠܹܗ.
20ܫܘܼܕܸܪܹܗ ܡܲܠܟܵܐ ܘܩܲܡ ܫܵܪܹܐ ܠܹܗ،
ܫܲܠܝܼܛܵܐ ܕܥܲܡܡܹ̈ܐ ܩܲܡ ܥܵܒܹܕ ܠܹܗ ܚܹܐܪܵܐ.
21ܩܲܡ ܡܲܬܸܒ݂ ܠܹܗ ܡܵܪܵܐ ܠܒܲܝܬܹܗ،
ܘܫܲܠܝܼܛܵܐ ܥܲܠ ܟܠܹܗ ܥܘܼܬܪܹܗ،
22ܠܹܐܣܵܪܵܐ ܓܘܼܪ̈ܵܢܘܼܗܝ ܒܨܸܒ݂ܝܵܢܹܗ،
ܘܠܚܘܵܪ̈ܕܸܩܢܘܼܗܝ ܡܲܠܸܦ ܚܸܟ݂ܡܬܵܐ.
23ܥܒ݂ܝܼܪܹܗ ܝܼܣܪܵܝܹܠ ܠܡܸܨܪܹܝܢ،
ܘܝܲܥܩܘܿܒ݂ ܡܘܼܫܚܸܛ ܠܹܗ ܒܐܲܪܥܵܐ ܕܚܵܡ.
24ܘܡܘܼܦܪܹܐ ܠܹܗ ܠܥܲܡܹܗ ܪܵܒܵܐ،
ܘܩܲܡ ܥܵܒܹܕ ܠܹܗ ܒܘܼܫ ܥܲܫܝܼܢܵܐ ܡ̣ܢ ܕܸܫܡܸܢܘܼ̈ܗܝ.
25ܡܘܼܕܸܪܹܗ ܠܸܒܲܝܗܝ ܠܸܣܢܵܝܵܐ ܠܥܲܡܹܗ،
ܠܸܥܒ݂ܵܕܵܐ ܦܸܠܡܵܐ ܒܪܹ̈ܓܵܘܵܬܹܗ.
26ܫܘܼܕܸܪܹܗ ܠܡܘܼܫܹܐ ܪܹܓܹܗ،
ܘܠܐܲܗܪܘܿܢ ܕܓܘܼܒܹܐ ܠܹܗ.
27ܐܵܢܝܼ ܥܒ݂ܝܼܕ ܠܗܘܿܢ ܓܵܘܲܝܗܝ ܫܘܼܠܹ̈ܐ ܕܢܝܼܫܲܢܩܘܼ̈ܗܝ،
ܘܕܘܼܡܵܪܹ̈ܐ ܒܐܲܪܥܵܐ ܕܚܵܡ.
28ܫܘܼܕܸܪܹܗ ܚܸܫܟܵܐ ܘܚܘܼܫܟܸܢܵܐ ܠܹܗ،
ܘܠܵܐ ܥܒ݂ܝܼܕ ܠܗܘܿܢ ܡܵܪܘܿܕܘܼܬܵܐ ܥܲܠ ܗܹܡܸܙܡܵܢܘܼ̈ܗܝ.
29ܡܘܼܚܕܸܪܹܗ ܡܝܼܲܝ̈ܗܝ ܠܕܸܡܵܐ،
ܘܡܘܼܡܝܸܬ ܠܹܗ ܠܢܘܼܢܲܝ̈ܗܝ.
30ܡܠܹܐ ܠܵܗ̇ ܐܲܪܥܵܐ ܦܸܩܵܩܹ̈ܐ،
ܐܘܼܦ ܓܵܘ ܬܵܘܵܢܹ̈ܐ ܕܡܲܠܟܲܝ̈ܗܝ.
31ܐ݇ܡܝܼܪܹܗ ܘܐ݇ܬܹܐ ܠܵܗ̇ ܕܸܒܘܼܪܬܵܐ،
ܘܩܲܠܡܵܐ ܓܵܘ ܟܠܹܗ ܬܚܘܼܡܲܝܗܝ.
32ܥܒ݂ܝܼܕ ܠܹܗ ܡܸܛܪ̈ܵܬܲܝܗܝ ܒܲܪܕܵܐ،
ܘܢܘܼܪܵܐ ܠܵܗܝܵܢܵܐ ܒܐܲܪܥܵܐ،
33ܘܡܚܹܐ ܠܹܗ ܓܸܦܝܵܬܲܝ̈ܗܝ ܘܬܹܐܢܲܝ̈ܗܝ،
ܘܬܒ݂ܝܼܪܹܗ ܐܝܼܠܵܢܹ̈ܐ ܕܬܚܘܼܡܲܝܗܝ.
34ܐ݇ܡܝܼܪܹܗ ܘܐ݇ܬܹܐ ܠܹܗ ܩܲܡܨܵܐ،
ܘܙܵܚܠܵܐ ܒܠܵܐ ܡܸܢܝܵܢܵܐ،
35ܘܐ݇ܟ݂ܝܼܠ ܠܹܗ ܟܠ ܓܸܠܵܐ ܒܐܲܪܥܲܝܗܝ،
ܘܐ݇ܟ݂ܝܼܠ ܠܹܗ ܛܥܘܼܢܝܵܬܹ̈ܐ ܕܐܲܪܥܲܝܗܝ.
36ܡܚܹܐ ܠܹܗ ܟܠ ܒܘܼܟ݂ܪܵܐ ܒܐܲܪܥܲܝܗܝ،
ܪܹܫܝܼܬܵܐ ܕܟܠܹܗ ܥܘܼܫܢܲܝܗܝ.
37ܗ̇ܝܓܵܗ ܦܘܼܠܸܛ ܠܹܗ ܠܥܲܡܹܗ ܒܣܹܐܡܵܐ ܘܒܕܲܗܒ݂ܵܐ،
ܘܠܲܝܬ ܗ݇ܘܵܐ ܒܫܲܒ݂ܛܘܼ̈ܗܝ ܬܲܪܩܸܠܵܢܵܐ.
38ܚܕܹܐ ܠܵܗ̇ ܡܸܨܪܹܝܢ ܒܦܠܵܛܬܲܝܗܝ،
ܣܵܒܵܒ ܢܦܝܼܠ ܠܵܗ̇ ܙܕܘܼܥܬܲܝܗܝ ܥܲܠܲܝܗܝ.
39ܦܪܝܼܣ ܠܹܗ ܥܢܵܢܵܐ ܠܟܲܣܵܝܬܵܐ،
ܘܢܘܼܪܵܐ ܠܒܲܗܪܘܼܢܹܐ ܒܠܲܝܠܹܐ.
40ܛܠܝܼܒ ܠܗܘܿܢ ܘܡܘܼܐܬܹܐ ܠܹܗ ܩܘܼܦܫܝܼܢܹ̈ܐ،
ܘܒܠܲܚܡܵܐ ܕܫܡܲܝܵܐ ܡܘܼܣܒܸܥܲܝ ܠܹܗ.
41ܦܬܝܼܚ ܠܹܗ ܐܝܼܨܵܪܵܐ ܘܓ̰ܪܹܐ ܠܗܘܿܢ ܡ̈ܝܼܵܐ،
ܐ݇ܙܝܼܠ ܠܗܘܿܢ ܐܲܝܟ݂ ܢܲܗܪܵܐ ܒܐܲܪ̈ܥܵܬܹܐ ܨܹܗܝܹ̈ܐ.
42ܣܵܒܵܒ ܕܟ݂ܝܼܪܹܗ ܠܚܲܒܪܵܐ ܕܩܘܼܕܫܹܗ
ܠܐܲܒ݂ܪܵܗܵܡ ܪܹܓܹܗ،
43ܦܘܼܠܸܛ ܠܹܗ ܠܥܲܡܹܗ ܒܚܲܕܘܼܬܵܐ،
ܠܓܘܼܒܝܘܼ̈ܗܝ ܒܩܵܘܲܚܬܵܐ.
44ܘܝܘܼܗ݇ܒܸܠ ܠܹܗ ܐܸܠܲܝܗܝ ܐܲܪ̈ܥܵܬܹܐ ܕܐܸܡܘܵܬܹ̈ܐ،
ܘܥܲܡܠܵܐ ܕܥܲܡܡܹ̈ܐ ܝ݇ܪܝܼܬ ܠܗܘܿܢ،
45ܩܵܐ ܕܢܵܛܪܝܼ ܩܵܢܘܿܢܘܼ̈ܗܝ،
ܘܚܲܡܝܼ ܢܵܡܘܿܣܹܗ. ܗܲܠܸܠܘܼܝܵܐ.
Currently Selected:
ܡܙܡܘܪ̈ܐ 105 (ܩܗ): ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation