ܡܙܡܘܪ̈ܐ 104 (ܩܕ)
104 (ܩܕ)
1ܒܲܪܸܟ݂ܝ، ܝܵܐ ܓܵܢܝܼ، ܠܡܵܪܝܵܐ،
ܡܵܪܝܵܐ ܐܲܠܵܗܝܼ ܓܘܼܪܵܐ ܝܘܸܬ ܪܵܒܵܐ،
ܙܲܗܝܘܼܬܵܐ ܘܣܸܩܠܵܐ ܠܒ݂ܝܼܫ ܠܘܼܟ݂.
2ܟܹܐ ܩܵܛܹܒ݂ ܒܲܗܪܵܐ ܐܲܝܟ݂ ܥܵܒܵܝܬܵܐ،
ܟܹܐ ܡܵܬܹܚ ܫܡܲܝܵܐ ܐܲܝܟ݂ ܣܸܬܪܵܐ.
3ܟܹܐ ܒܵܢܹܐ ܥܲܠ ܡ̈ܝܼܵܐ ܥܸܠܝܼܵܬܹ̈ܗ،
ܟܹܐ ܥܵܒܹܕ ܥܲܝܒ݂ܵܬܹ̈ܐ ܡܲܪܟܲܒ݂ܬܹܗ،
ܟܹܐ ܚܵܕܹܪ ܥܲܠ ܓܘܼܠܦܵܢܹ̈ܐ ܕܦܵܘܚܵܐ.
4ܟܹܐ ܥܵܒܹܕ ܡܲܠܲܐܟ݂ܘܼ̈ܗܝ ܦܵܘܚܹ̈ܐ،
ܡܫܲܡܫܵܢܘܼ̈ܗܝ ܢܘܼܪܵܐ ܠܵܗܝܵܢܵܐ.
5ܡܘܼܩܘܹܐ ܠܹܗ ܐܲܪܥܵܐ ܥܲܠ ܫܲܬܐܸܣܬܘܼܗ̇،
ܠܹܐ ܫܵܥܫܵܐ ܠܥܵܠܲܡ ܥܵܠܡܝܼܢ.
6ܒܬܗܘܿܡܵܐ ܐܲܝܟ݂ ܠܒ݂ܝܼܫܬܵܐ ܟܘܼܣܹܐ ܠܘܼܟ݂ ܐܸܠܘܼܗ̇،
ܥܲܠ ܛܘܼܪ̈ܵܢܹܐ ܟܠܹܐ ܠܗܘܿܢ ܡ̈ܝܼܵܐ.
7ܡ̣ܢ ܢܓ̰ܵܘܬܘܼܟ݂ ܥܪܝܼܩ ܠܗܘܿܢ،
ܡ̣ܢ ܩܵܠܵܐ ܕܪܲܥܡܘܼܟ݂ ܡܘܼܠܝܸܙ ܠܗܘܿܢ ܠܸܥܪܵܩܵܐ.
8ܐ݇ܣܝܼܩ ܠܗܘܿܢ ܛܘܼܪ̈ܵܢܹܐ، ܨܠܹܐ ܠܗܘܿܢ ܪ̈ܵܘܘܿܠܹܐ،
ܠܕܘܼܟܵܐ ܕܫܘܼܬܐܸܣ ܠܘܼܟ݂ ܐܸܠܲܝܗܝ.
9ܬܚܘܼܡܵܐ ܡܘܼܬܸܒ݂ ܠܘܼܟ݂ ܕܠܵܐ ܥܵܒ݂ܪܝܼ،
ܠܵܐ ܕܵܝܪܝܼ ܠܟܲܣܘܼܝܘܼܗ̇ ܐܲܪܥܵܐ.
10ܟܹܐ ܫܲܕܸܪ ܥܲܝܢܵܬܹ̈ܐ ܓܵܘ ܪ̈ܵܘܘܿܠܹܐ،
ܒܹܝܠ ܛܘܼܪ̈ܵܢܹܐ ܟܹܐ ܓ̰ܵܪܝܼ.
11ܟܹܐ ܡܲܫܬܝܼ ܠܟܠܲܝܗܝ ܗܲܝܘܵܢܹ̈ܐ ܕܕܸܫܬܵܐ،
ܚܡܵܪܹ̈ܐ ܕܒܲܪܝܼܵܐ ܟܹܐ ܡܲܬܪܝܼ ܨܲܗܘܲܝܗܝ.
12ܠܟܸܣ ܠܲܝܗܝ ܛܲܝܪܹ̈ܐ ܕܫܡܲܝܵܐ ܟܹܐ ܪܵܝܦܝܼ،
ܡ̣ܢ ܓܵܘܵܐ ܕܦܲܥܘܵܢܹ̈ܐ ܟܹܐ ܡܲܪܡܝܼ ܩܵܠܵܐ.
13ܟܹܐ ܡܲܫܬܹܐ ܛܘܼܪ̈ܵܢܹܐ ܡ̣ܢ ܥܸܠܝܼܵܬܹ̈ܗ،
ܡ̣ܢ ܛܥܘܼܢܝܵܬܹ̈ܐ ܕܦܘܼܠܚܵܢܘܼ̈ܟ݂ ܒܸܬ ܣܵܒ݂ܥܵܐ ܐܲܪܥܵܐ.
14ܟܹܐ ܡܲܓ̰ܝܸܢ ܓܸܠܵܐ ܩܵܐ ܪܸܣܩܵܐ،
ܘܝܲܪܩܵܐ ܩܵܐ ܡܲܦܠܲܚܬܵܐ ܕܒܲܪܢܵܫܵܐ،
ܘܠܦܲܠܘܼܛܹܐ ܬܘܼܪܣܵܝܵܐ ܡ̣ܢ ܐܲܪܥܵܐ،
15ܘܚܲܡܪܵܐ ܕܟܹܐ ܡܲܚܕܹܐ ܠܸܒܵܐ ܕܐ݇ܢܵܫܵܐ،
ܡܸܫܚܵܐ ܠܡܲܒܪܘܼܩܹܐ ܦܵܬܘܵܬܹ̈ܐ،
ܘܠܲܚܡܵܐ ܕܟܹܐ ܣܵܢܹܕ ܠܸܒܵܐ ܕܐ݇ܢܵܫܵܐ.
16ܟܹܐ ܣܵܒ݂ܥܝܼ ܐܝܼܠܵܢܹ̈ܐ ܕܡܵܪܝܵܐ،
ܐܲܪ̈ܙܹܐ ܕܠܸܒ݂ܢܵܢ ܕܢܨܝܼܒ݂ ܠܹܗ،
17ܕܬܵܡܵܐ ܛܲܝܪܹ̈ܐ ܟܹܐ ܬܲܪܨܝܼ ܩܸܢܵܬܹ̈ܐ،
ܠܲܩܠܵܩ ܒܲܝܬܘܼܗ̇ ܒܫܲܪ̈ܘܲܝܢܹܐ.
18ܛܘܼܪ̈ܵܢܹܐ ܪ̈ܵܡܹܐ ܩܵܐ ܕܲܝܨܹ̈ܐ،
ܩܵܝܹ̈ܐ ܣܸܬܵܪܵܐ ܠܝܲܪ̈ܒܘܼܥܹܐ.
19ܥܒ݂ܝܼܕ ܠܹܗ ܣܲܗܪܵܐ ܠܘܲܥܕܹ̈ܐ،
ܫܸܡܫܵܐ ܟܹܐ ܝܵܕܹܥ ܓܢܵܝܬܹܗ.
20ܟܹܐ ܡܲܬܒܸܬ ܚܸܫܟܵܐ ܘܟܹܐ ܗܵܘܹܐ ܠܲܝܠܹܐ،
ܒܓܵܘܹܗ ܟܹܐ ܚܵܕܪܝܼ ܗܲܝܘܵܢܹ̈ܐ ܕܡܲܝܫܵܐ.
21ܓܘܼܪ̈ܝܹܐ ܕܐܲܪ̈ܝܵܘܵܬܹܐ ܟܹܐ ܓܲܪܓܸܡܝܼ ܥܲܠ ܨܲܝܕܲܝܗܝ،
ܠܸܛܠܵܒܵܐ ܡ̣ܢ ܐܲܠܵܗܵܐ ܡܹܐܟ݂ܘܼܠܬܲܝܗܝ.
22ܒܙܪܵܩܵܐ ܕܫܸܡܫܵܐ ܟܹܐ ܓ̰ܵܡܥܝܼ،
ܘܓܵܘ ܒܹܝܬ ܡܲܥܡܪܲܝܗܝ ܟܹܐ ܕܵܡܟ݂ܝܼ.
23ܟܹܐ ܦܵܠܹܛ ܒܲܪܢܵܫܵܐ ܠܫܘܼܠܹܗ،
ܘܠܦܘܼܠܚܵܢܹܗ ܗܲܠ ܪܲܡܫܵܐ.
24ܟܡܵܐ ܪܵܒܵܐ ܝܢܵܐ ܥܒ݂ܵܕܘܼ̈ܟ݂، ܝܵܐ ܡܵܪܝܵܐ،
ܟܠܲܝܗܝ ܒܚܸܟ݂ܡܬܵܐ ܥܒ݂ܝܼܕ ܠܘܼܟ݂،
ܡܠܹܐ ܠܵܗ̇ ܐܲܪܥܵܐ ܡ̣ܢ ܥܘܼܬܪܘܼܟ݂.
25ܐܵܗܵܐ ܝܵܡܵܐ ܓܘܼܪܬܵܐ ܘܪܘܝܼܚܬܵܐ،
ܬܵܡܵܐ ܐܝܼܬ ܪ̈ܲܚܫܹܐ ܕܠܵܐ ܡܸܢܝܵܢܵܐ،
ܚܲܝܘܵܬܹ̈ܐ ܙܥܘܿܪܹ̈ܐ ܥܲܡ ܓܘܼܪܹ̈ܐ.
26ܬܵܡܵܐ ܓܵܡܝܼܹ̈ܐ ܟܹܐ ܚܵܕܪܝܼ،
ܘܠܹܘܝܵܬܵܢ ܕܒܪܹܐ ܠܘܼܟ݂ ܠܛܲܐܘܼܠܹܐ ܓܵܘܘܼܗ̇.
27ܟܠܲܝܗܝ ܐܸܠܘܼܟ݂ ܟܹܐ ܣܵܦܪܝܼ،
ܠܝܼܵܗ݇ܒ݂ܵܐ ܡܹܐܟ݂ܘܼܠܬܲܝܗܝ ܒܙܲܒ݂ܢܘܼܗ̇.
28ܟܹܐ ܝܵܗ݇ܒܹܬ ܐܸܠܲܝܗܝ، ܟܹܐ ܟܲܦܫܝܼ،
ܟܹܐ ܦܵܬܚܹܬ ܐܝܼܕܘܼܟ݂، ܟܹܐ ܣܵܒ݂ܥܝܼ ܒܛܵܒ݂ܬܵܐ.
29ܟܹܐ ܛܲܫܹܝܬ ܦܵܬܘܼܟ݂، ܟܹܐ ܦܵܝܫܝܼ ܫܓ݂ܝܼܫܹܐ،
ܟܹܐ ܫܵܩܠܹܬ ܪܘܼܚܲܝܗܝ، ܟܹܐ ܦܵܝܫܝܼ ܛܠܝܼܩܹܐ،
ܘܠܥܲܦܪܲܝܗܝ ܟܹܐ ܕܵܝܪܝܼ.
30ܟܹܐ ܫܲܕܪܸܬ ܪܘܼܚܘܼܟ݂، ܟܹܐ ܦܵܝܫܝܼ ܒܸܪܝܹܐ،
ܘܟܹܐ ܚܲܕܸܬܸܬ ܦܵܬܵܐ ܕܐܲܪܥܵܐ.
31ܗܵܘܹܐ ܚܸܩܪܵܐ ܕܡܵܪܝܵܐ ܠܥܵܠܲܡ،
ܚܵܕܹܐ ܡܵܪܝܵܐ ܒܦܘܼܠܚܵܢܘܼ̈ܗܝ.
32ܟܹܐ ܚܵܐܹܪ ܒܐܲܪܥܵܐ ܘܟܹܐ ܪܲܬܪܸܬܵܐ،
ܟܹܐ ܕܵܩܹܪ ܒܛܘܼܪ̈ܵܢܹܐ ܘܟܹܐ ܬܲܢܬܸܢܝܼ.
33ܒܸܬ ܫܲܒܚܸܢ ܠܡܵܪܝܵܐ ܒܚܲܝܝܼ̈،
ܒܸܬ ܙܵܡܪܹܢ ܠܐܲܠܵܗܝܼ ܟܡܵܐ ܕܝܼܘܸܢ.
34ܗܵܘܝܵܐ ܒܲܣܝܼܡܬܵܐ ܐܸܠܹܗ ܗܲܓܵܝܬܝܼ،
ܐܵܢܵܐ ܒܸܬ ܚܵܕܹܝܢ ܒܡܵܪܝܵܐ.
35ܬܵܝܡܝܼ ܚܲܛܵܝܹ̈ܐ ܡ̣ܢ ܦܵܬܵܐ ܕܐܲܪܥܵܐ،
ܘܪ̈ܲܫܝܼܥܹܐ ܐ݇ܚܹܪ݇ܢܵܐ ܠܵܐ ܗܵܘܝܼ.
ܒܲܪܸܟ݂ܝ، ܝܵܐ ܓܵܢܝܼ، ܠܡܵܪܝܵܐ.
ܗܲܠܸܠܘܼܝܵܐ.
Currently Selected:
ܡܙܡܘܪ̈ܐ 104 (ܩܕ): ABTAB
Highlight
Share
Copy
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation