ܟܗܢ̈ܐ 9
9
ܟܵܗܢܹ̈ܐ ܫܲܪܘܼܝܹܐ ܒܦܘܼܠܚܵܢܲܝܗܝ
1ܗܘܹܐ ܠܵܗ̇ ܒܝܵܘܡܵܐ ܕܬܡܵܢܝܵܐ، ܩܪܹܐ ܠܹܗ ܡܘܼܫܹܐ ܠܐܲܗܪܘܿܢ، ܘܠܒܢܘܿܢܘܼ̈ܗܝ، ܘܠܚܘܵܪ̈ܕܸܩܢܹܐ ܕܝܼܣܪܵܝܹܠ؛ 2ܘܐ݇ܡܝܼܪܹܗ ܠܐܲܗܪܘܿܢ، ”ܫܩܘܿܠ ܠܘܼܟ݂ ܡܘܼܓ̰ܵܐ ܒܲܪ ܒܲܩܪܵܐ ܩܵܐ ܕܸܒ݂ܚܵܐ ܕܚܛܝܼܬܵܐ، ܘܒܲܪܥܵܢܵܐ ܩܵܐ ܕܸܒ݂ܚܵܐ ܡܘܼܩܕܵܐ، ܬܸܪܘܲܝܗܝ ܕܠܵܐ ܠܲܟܵܐ، ܘܡܲܩܪܸܒ݂ ܠܗܘܿܢ ܩܵܕ݇ܡ ܡܵܪܝܵܐ. 3ܘܐ݇ܡܘܿܪ ܠܒܢܲܝ̈ ܝܼܣܪܵܝܹܠ، ܫܩܘܿܠܘܼܢ ܓܸܙܟܵܐ ܕܥܸܙܵܐ ܩܵܐ ܕܸܒ݂ܚܵܐ ܕܚܛܝܼܬܵܐ، ܘܚܲܕ ܡܘܼܓ̰ܵܐ ܘܚܲܕ ܦܹܐܪܵܐ، ܬܸܪܘܲܝܗܝ ܒܲܪ ܚܕܵܐ ܫܹܢ݇ܬܵܐ، ܕܠܵܐ ܠܲܟܵܐ، ܩܵܐ ܕܸܒ݂ܚܵܐ ܡܘܼܩܕܵܐ، 4ܘܬܵܘܪܵܐ ܘܒܲܪܥܵܢܵܐ ܩܵܐ ܕܸܒ݂ܚܵܐ ܕܫܠܵܡܵܐ ܕܦܵܝܫܝܼ ܡܘܼܩܪܸܒܹܐ ܠܡܵܪܝܵܐ، ܘܕܸܒ݂ܚܵܐ ܕܕܲܚܠܵܐ ܓܒ݂ܝܼܠܵܐ ܒܡܸܫܚܵܐ، ܣܵܒܵܒ ܐܸܕܝܘܿܡ ܝܵܘܡܵܐ ܒܸܬ ܦܵܐܹܫ ܚܸܙܝܵܐ ܡܵܪܝܵܐ ܐܸܠܵܘܟ݂ܘܿܢ.“ 5ܡܘܼܐܬܹܐ ܠܗܘܿܢ ܐܵܢܝܼ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ ܟܠ ܡܸܢܕܝܼ ܕܦܩܝܼܕ ܠܹܗ ܡܘܼܫܹܐ، ܘܐ݇ܬܹܐ ܠܗܘܿܢ ܟܠܹܗ ܟܸܢܫܵܐ ܘܟܠܹܐ ܠܗܘܿܢ ܩܵܕ݇ܡ ܡܵܪܝܵܐ. 6ܐ݇ܡܝܼܪܹܗ ܡܘܼܫܹܐ، ”ܐܵܗܵܐ ܝܠܹܗ ܡܸܢܕܝܼ ܕܦܩܝܼܕ ܠܹܗ ܡܵܪܝܵܐ ܕܥܵܒ݂ܕܝܼܬܘܿܢ، ܕܦܵܐܹܫ ܚܸܙܝܵܐ ܫܘܼܒ݂ܚܵܐ ܕܡܵܪܝܵܐ ܐܸܠܵܘܟ݂ܘܿܢ.“ 7ܗ̇ܝܓܵܗ ܐ݇ܡܝܼܪܹܗ ܡܘܼܫܹܐ ܠܐܲܗܪܘܿܢ، ”ܩܲܪܒܸܢ ܠܡܲܕܒܚܵܐ، ܘܡܲܩܪܸܒ݂ ܕܸܒ݂ܚܘܼܟ݂ ܕܚܛܝܼܬܵܐ ܘܕܸܒ݂ܚܘܼܟ݂ ܡܘܼܩܕܵܐ، ܕܥܵܒ݂ܕܹܬ ܚܘܼܣܵܝܵܐ ܒܘܼܬ ܓܵܢܘܼܟ݂ ܘܒܘܼܬ ܥܲܡܵܐ. ܗ̇ܝܓܵܗ ܡܲܩܪܸܒ݂ ܕܸܒ݂ܚܵܐ ܒܘܼܬ ܥܲܡܵܐ ܕܥܵܒ݂ܕܹܬ ܚܘܼܣܵܝܵܐ ܐܸܠܲܝܗܝ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ.“
8ܘܩܘܼܪܒܸܢܹܗ ܐܲܗܪܘܿܢ ܠܡܲܕܒܚܵܐ، ܘܦܪܝܼܡ ܠܹܗ ܡܘܼܓ̰ܵܐ، ܕܸܒ݂ܚܵܐ ܕܚܛܝܼܬܵܐ ܒܘܼܬ ܓܵܢܹܗ. 9ܘܡܘܼܩܪܸܒ݂ ܠܗܘܿܢ ܒܢܘܿܢܹ̈ܐ ܕܐܲܗܪܘܿܢ ܠܕܸܡܵܐ ܠܟܸܣ ܠܹܗ، ܘܛܡܝܼܫ ܠܹܗ ܨܸܒܥܹܗ ܓܵܘ ܕܸܡܵܐ، ܘܡܘܼܬܸܒ݂ ܠܹܗ ܥܲܠ ܩܵܪ̈݇ܢܵܢܹܐ ܕܡܲܕܒܚܵܐ، ܘܣܵܗܡܵܐ ܦܝܼܫܵܐ ܕܕܸܡܵܐ ܫܘܼܦܸܟ݂ ܠܹܗ ܥܲܠ ܒܸܢܝܲܬ ܕܡܲܕܒܚܵܐ. 10ܬܲܪܒܵܐ ܘܟܸܠܝܵܬܹ̈ܐ ܘܠܚܨܵܪ ܟܲܒ݂ܕܵܐ ܡ̣ܢ ܕܸܒ݂ܚܵܐ ܕܚܛܝܼܬܵܐ ܡܘܼܩܕܲܝ ܠܹܗ ܥܲܠ ܡܲܕܒܚܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ. 11ܘܒܸܣܪܵܐ ܘܓܸܠܕܵܐ ܡܘܼܩܕܲܝ ܠܹܗ ܒܢܘܼܪܵܐ ܠܒܲܕܲܪ ܡ̣ܢ ܡܲܫܪܝܼܬܵܐ. 12ܦܪܝܼܡ ܠܹܗ ܠܕܸܒ݂ܚܵܐ ܡܘܼܩܕܵܐ؛ ܒܢܘܿܢܘܼ̈ܗܝ ܡܘܼܐܬܹܐ ܠܗܘܿܢ ܠܕܸܡܵܐ ܠܟܸܣ ܠܹܗ. ܫܩܝܼܠ ܠܹܗ ܕܸܡܵܐ ܘܡܘܼܪܝܸܣ ܠܹܗ ܠܚܵܕܸܪ̈ܘܵܢܹܐ ܕܡܲܕܒܚܵܐ. 13ܠܕܸܒ݂ܚܵܐ ܡܘܼܩܕܵܐ ܡܘܼܐܬܹܐ ܠܗܘܿܢ ܠܟܸܣ ܠܹܗ ܩܸܛܥܵܐ ܒܩܸܛܥܵܐ، ܥܲܡ ܪܹܫܵܐ، ܘܡܘܼܩܕܲܝ ܠܹܗ ܥܲܠ ܡܲܕܒܚܵܐ. 14ܚܘܼܠܸܠ ܠܹܗ ܠܗܲܕܵܡܹ̈ܐ ܓܵܘܵܝܹ̈ܐ ܘܠܫܵܩܵܢܹ̈ܐ، ܘܡܘܼܩܕܲܝ ܠܹܗ ܥܲܡ ܕܸܒ݂ܚܵܐ ܡܘܼܩܕܵܐ ܥܲܠ ܡܲܕܒܚܵܐ.
15ܗ̇ܝܓܵܗ ܡܘܼܩܪܸܒ݂ ܠܹܗ ܕܸܒ݂ܚܵܐ ܕܥܲܡܵܐ. ܫܩܝܼܠ ܠܹܗ ܠܓܸܙܟܵܐ ܕܕܸܒ݂ܚܵܐ ܕܚܛܝܼܬܵܐ ܕܝܼܗ݇ܘܵܐ ܡ̣ܢ ܓܹܒܵܐ ܕܥܲܡܵܐ؛ ܦܪܝܼܡ ܠܹܗ ܘܡܘܼܩܪܸܒ݂ ܠܹܗ ܐܸܠܹܗ ܕܸܒ݂ܚܵܐ ܕܚܛܝܼܬܵܐ، ܐܲܝܟ݂ ܕܗ̇ܘ ܩܵܕ݇ܡܵܝܵܐ. 16ܡܘܼܐܬܹܐ ܠܹܗ ܐܘܼܦ ܕܸܒ݂ܚܵܐ ܡܘܼܩܕܵܐ، ܘܡܘܼܩܪܸܒ݂ ܠܹܗ ܐܲܝܟ݂ ܦܘܼܩܕܵܢܵܐ. 17ܗ̇ܝܓܵܗ ܡܘܼܐܬܹܐ ܠܹܗ ܕܸܒ݂ܚܵܐ ܕܕܲܚܠܵܐ، ܡܸܠܝܵܐ ܠܹܗ ܐܝܼܕܹܗ ܡܸܢܹܗ ܘܡܘܼܩܸܕ ܠܹܗ ܥܲܠ ܡܲܕܒܚܵܐ، ܫܒ݂ܘܿܩ ܡ̣ܢ ܕܸܒ݂ܚܵܐ ܡܘܼܩܕܵܐ ܕܨܲܦܪܵܐ، 18ܘܦܪܝܼܡ ܠܹܗ ܬܵܘܪܵܐ ܘܒܲܪܥܵܢܵܐ ܕܕܸܒ݂ܚܵܐ ܕܫܠܵܡܵܐ ܒܘܼܬ ܥܲܡܵܐ؛ ܘܡܘܼܐܬܹܐ ܠܗܘܿܢ ܒܢܘܿܢܹ̈ܐ ܕܐܲܗܪܘܿܢ ܠܕܸܡܵܐ ܠܟܸܣ ܠܹܗ، ܘܗ̇ܘ ܡܘܼܪܝܸܣ ܠܹܗ ܠܚܵܕܸܪ̈ܘܵܢܹܐ ܕܡܲܕܒܚܵܐ. 19ܐܝܼܢܵܐ ܬܲܪ̈ܒܹܐ ܡ̣ܢ ܬܵܘܪܵܐ ܘܡ̣ܢ ܒܲܪܥܵܢܵܐ، ܐܹܠܝܼܬܵܐ، ܘܩܪܵܡܵܐ، ܘܟܸܠܝܵܬܹ̈ܐ، ܘܚܨܵܪ ܟܲܒ݂ܕܵܐ، 20ܡܘܼܬܒܲܝ ܠܗܘܿܢ ܥܲܠ ܨܲܕܪܹ̈ܐ، ܘܡܘܼܩܕܲܝ ܠܹܗ ܥܲܠ ܡܲܕܒܚܵܐ. 21ܨܲܕܪܹ̈ܐ ܘܫܵܩܵܐ ܕܝܲܡܝܼܢܵܐ ܡܘܼܪܡܲܝ ܠܹܗ ܐܲܗܪܘܿܢ ܩܵܕ݇ܡ ܡܵܪܝܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܘܼܫܹܐ. 22ܘܡܘܼܪܡܲܝ ܠܹܗ ܐܲܗܪܘܿܢ ܐܝܼܕܘܼ̈ܗܝ ܠܓܹܒܵܐ ܕܥܲܡܵܐ ܘܒܘܼܪܸܟ݂ ܠܹܗ، ܘܨܠܹܐ ܠܹܗ ܡ̣ܢ ܡܲܕܒܚܵܐ ܡ̣ܢ ܒܵܬ݇ܪ ܕܡܘܼܩܪܸܒ݂ ܠܹܗ ܕܸܒ݂ܚܵܐ ܕܚܛܝܼܬܵܐ، ܘܕܸܒ݂ܚܵܐ ܡܘܼܩܕܵܐ، ܘܕܸܒ݂ܚܵܐ ܕܫܠܵܡܵܐ.
ܢܘܼܪܵܐ ܒܸܫܪܵܝܵܐ ܥܲܠ ܡܲܕܒܚܵܐ
23ܥܒ݂ܝܼܪܗܘܿܢ ܡܘܼܫܹܐ ܘܐܲܗܪܘܿܢ ܠܡܲܫܟܲܢ ܘܲܥܕܵܐ؛ ܘܟܲܕ ܦܠܝܼܛ ܠܗܘܿܢ، ܒܘܼܪܸܟ݂ ܠܗܘܿܢ ܠܥܲܡܵܐ، ܘܦܝܼܫ ܠܹܗ ܚܸܙܝܵܐ ܫܘܼܒ݂ܚܵܐ ܕܡܵܪܝܵܐ ܠܟܠܹܗ ܥܲܡܵܐ. 24ܘܦܠܝܼܛ ܠܹܗ ܢܘܼܪܵܐ ܡ̣ܢ ܩܵܕ݇ܡ ܡܵܪܝܵܐ، ܘܐ݇ܟ݂ܝܼܠ ܠܹܗ ܠܕܸܒ݂ܚܵܐ ܡܘܼܩܕܵܐ ܘܠܬܲܪ̈ܒܹܐ ܥܲܠ ܡܲܕܒܚܵܐ. ܘܟܲܕ ܚܙܹܐ ܠܗܘܿܢ ܟܠܹܗ ܟܸܢܫܵܐ، ܡܘܼܩܘܸܚ ܠܗܘܿܢ، ܘܢܦܝܼܠ ܠܗܘܿܢ ܥܲܠ ܦܵܬܘܵܬܲܝ̈ܗܝ.
Currently Selected:
ܟܗܢ̈ܐ 9: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
