ܟܗܢ̈ܐ 10
10
ܚܛܝܼܬܵܐ ܕܢܵܕܵܒ݂ ܘܐܲܒ݂ܝܼܗܘܿ
1ܫܩܝܼܠ ܠܗܘܿܢ ܢܵܕܵܒ݂ ܘܐܲܒ݂ܝܼܗܘܿ، ܒܢܘܿܢܹ̈ܐ ܕܐܲܗܪܘܿܢ، ܟܠ ܚܲܕ ܦܝܼܪܡܹܗ، ܘܡܘܼܬܸܒ݂ ܠܗܘܿܢ ܓܵܘܹܗ ܢܘܼܪܵܐ، ܘܡܘܼܬܸܒ݂ ܠܗܘܿܢ ܥܲܠܘܼܗܝ ܒܸܣܡܵܐ، ܘܡܘܼܩܪܸܒ݂ ܠܗܘܿܢ ܩܵܕ݇ܡ ܡܵܪܝܵܐ ܢܘܼܪܵܐ ܢܘܼܟ݂ܪܵܝܵܐ، ܕܠܵܐ ܦܩܝܼܕܲܝ ܠܹܗ ܠܡܲܩܪܘܼܒܹܐ. 2ܘܦܠܝܼܛ ܠܹܗ ܢܘܼܪܵܐ ܡ̣ܢ ܩܵܕ݇ܡ ܡܵܪܝܵܐ، ܘܐ݇ܟ݂ܝܼܠܲܝ ܠܹܗ، ܘܡܝܼܬ ܠܗܘܿܢ ܬܵܡܵܐ ܩܵܕ݇ܡ ܡܵܪܝܵܐ. 3ܗ̇ܝܓܵܗ ܐ݇ܡܝܼܪܹܗ ܡܘܼܫܹܐ ܠܐܲܗܪܘܿܢ، ”ܐܵܗܵܐ ܝܠܹܗ ܡܸܢܕܝܼ ܕܐ݇ܡܝܼܪܹܗ ܡܵܪܝܵܐ، ܕܒܸܬ ܦܵܝܫܹܢ ܩܘܼܕܫܵܐ ܒܐܵܢܝܼ ܕܩܲܪܒܸܢܝܼ ܐܸܠܝܼ، ܘܒܸܬ ܦܵܝܫܹܢ ܫܘܼܒܚܵܐ ܩܵܕ݇ܡ ܟܠܹܗ ܥܲܡܵܐ.“ ܘܫܬܝܼܩ ܠܹܗ ܐܲܗܪܘܿܢ.
4ܘܩܪܹܐ ܠܹܗ ܡܘܼܫܹܐ ܠܡܝܼܫܵܐܹܝܠ ܘܠܐܹܠܨܵܦܲܢ، ܒܢܘܿܢܹ̈ܐ ܕܥܘܼܙܝܼܐܹܝܠ، ܡܲܥܡܘܿܢܵܐ ܕܐܲܗܪܘܿܢ، ܘܐ݇ܡܝܼܪܹܗ ܐܸܠܲܝܗܝ، ”ܬܹܝܡܘܼܢ ܘܫܩܘܿܠܘܼܢ ܠܢܵܘܸܓܹ̈ܐ ܕܡܲܥܡܘܿܢܵܘܟ݂ܘܿܢ ܡ̣ܢ ܩܵܕ݇ܡ ܡܲܩܕܫܵܐ، ܘܦܲܠܛܘܼܢ ܠܗܘܿܢ ܠܒܲܕܲܪ ܡ̣ܢ ܡܲܫܪܝܼܬܵܐ.“ 5ܐ݇ܬܹܐ ܠܗܘܿܢ ܦܘܼܠܛܲܝ ܠܗܘܿܢ ܥܲܡ ܨܘܼܕܪ̈ܵܬܲܝܗܝ ܠܒܲܕܲܪ ܡ̣ܢ ܡܲܫܪܝܼܬܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܘܼܫܹܐ. 6ܘܐ݇ܡܝܼܪܹܗ ܡܘܼܫܹܐ ܠܐܲܗܪܘܿܢ ܘܠܒܢܘܿܢܘܼ̈ܗܝ، ܐܹܠܝܼܥܵܙܲܪ ܘܐܝܼܬܵܡܵܪ، ”ܠܵܐ ܡܲܪܝܸܟ݂ܝܼܬܘܿܢ ܟܵܘܣܵܘܟ݂ܘܿܢ ܘܠܵܐ ܟ̰ܲܢܟ̰ܸܪܝܼܬܘܿܢ ܓ̰ܘܼܠܵܘ̈ܟ݂ܘܿܢ، ܕܠܵܐ ܡܵܝܬܝܼܬܘܿܢ، ܘܕܠܵܐ ܟܵܪܹܒ ܡܵܪܝܵܐ ܥܲܠ ܟܠܲܝܗܝ ܒܢܲܝ̈ ܝܼܣܪܵܝܹܠ. ܐܝܼܢܵܐ ܚܸܙܡܵܢܵܘ̈ܟ݂ܘܿܢ ܘܟܠܲܝܗܝ ܒܢܲܝ̈ ܝܼܣܪܵܝܹܠ ܫܒ݂ܘܿܩ ܒܵܟ݂ܝܼ ܥܲܠ ܐܵܢܝܼ ܕܡܵܪܝܵܐ ܡܘܼܩܕܲܝ ܠܹܗ ܒܢܘܼܪܵܐ. 7ܘܡ̣ܢ ܬܲܪܥܵܐ ܕܡܲܫܟܲܢ ܘܲܥܕܵܐ ܠܵܐ ܦܵܠܛܝܼܬܘܿܢ، ܕܠܵܐ ܡܵܝܬܝܼܬܘܿܢ، ܣܵܒܵܒ ܡܸܫܚܵܐ ܕܡܫܵܚܬܵܐ ܕܡܵܪܝܵܐ ܥܲܠܵܘܟ݂ܘܿܢ ܝܼܠܹܗ.“ ܘܥܒ݂ܝܼܕ ܠܗܘܿܢ ܐܲܝܟ݂ ܚܲܒܪܵܐ ܕܡܘܼܫܹܐ.
ܒܘܼܬ ܕܘܼܒܵܪܹ̈ܐ ܕܟܵܗܢܹ̈ܐ
8ܘܗܘܼܡܙܸܡ ܠܹܗ ܡܵܪܝܵܐ ܥܲܡ ܐܲܗܪܘܿܢ، ܒܹܐܡܵܪܵܐ، 9”ܟܲܕ ܥܵܒ݂ܪܝܼܬܘܿܢ ܠܡܲܫܟܲܢ ܘܲܥܕܵܐ ܚܲܡܪܵܐ ܘܫܲܟ݂ܪܵܐ ܠܵܐ ܫܵܬܹܝܬܘܿܢ، ܐܲܢ݇ܬ ܘܒܢܘܿܢܘܼ̈ܟ݂، ܕܠܵܐ ܡܵܝܬܝܼܬܘܿܢ. ܐܵܗܵܐ ܩܵܢܘܿܢܵܐ ܝܠܹܗ ܐܸܠܵܘܟ݂ܘܿܢ ܠܥܵܠܲܡ ܒܬܵܘܠܕܵܬܹ̈ܐ ܕܐܵܬܝܼ؛ 10ܕܡܲܬܸܒ݂ ܦܘܼܪܫܘܼܢܝܵܐ ܒܹܝܠ ܩܘܼܕܫܵܐ ܘܒܹܝܠ ܫܚܝܼܡܵܐ، ܘܒܹܝܠ ܛܲܡܐܵܐ ܘܒܹܝܠ ܕܸܟ݂ܝܵܐ؛ 11ܘܕܡܲܠܦܸܬ ܠܒܢܲܝ̈ ܝܼܣܪܵܝܹܠ ܟܠܲܝܗܝ ܩܵܢܘܿܢܹ̈ܐ ܕܗܘܼܡܙܸܡܲܝ ܠܹܗ ܡܵܪܝܵܐ ܥܲܡܲܝܗܝ ܒܝܲܕ ܡܘܼܫܹܐ.“
ܩܵܢܘܿܢܵܐ ܒܘܼܬ ܡܹܐܟ݂ܘܼܠܬܵܐ ܩܘܼܕܸܫܬܵܐ
12ܗܘܼܡܙܸܡ ܠܹܗ ܡܘܼܫܹܐ ܥܲܡ ܐܲܗܪܘܿܢ، ܘܥܲܡ ܐܹܠܝܼܥܵܙܲܪ ܘܐܝܼܬܵܡܵܪ، ܒܢܘܿܢܘܼ̈ܗܝ ܕܝܼܗ݇ܘܵܐ ܒܸܦܝܵܫܵܐ، ܒܹܐܡܵܪܵܐ، ”ܫܩܘܿܠܘܼܢ ܕܸܒ݂ܚܵܐ ܕܕܲܚܠܵܐ ܕܝܼܠܹܗ ܦܝܼܫܵܐ ܡ̣ܢ ܕܸܒ݂ܚܹ̈ܐ ܕܢܘܼܪܵܐ ܕܡܵܪܝܵܐ، ܘܐ݇ܟ݂ܘܿܠܘܼܢ ܠܹܗ ܦܲܛܝܼܪܹ̈ܐ ܒܕܸܦܢܵܐ ܕܡܲܕܒܚܵܐ، ܣܵܒܵܒ ܩܕܘܿܫ ܩܘܼܕܫܹ̈ܐ ܝܠܹܗ. 13ܐܵܟ݂ܠܝܼܬܘܿܢ ܠܹܗ ܒܕܘܼܟܵܐ ܩܲܕܝܼܫܬܵܐ، ܣܵܒܵܒ ܣܵܗܡܘܼܟ݂ ܝܼܠܹܗ ܘܣܵܗܡܵܐ ܕܒܢܘܿܢܘܼ̈ܟ݂ ܡ̣ܢ ܕܸܒ݂ܚܵܐ ܕܢܘܼܪܵܐ ܕܡܵܪܝܵܐ، ܣܵܒܵܒ ܗܲܕܟ݂ܵܐ ܦܝܼܫ ܠܝܼ ܦܩܝܼܕܵܐ. 14ܐܝܼܢܵܐ ܨܲܕܪܵܐ ܕܕܸܒ݂ܚܵܐ ܕܦܝܼܫܵܐ ܝܗ݇ܘܵܐ ܡܘܼܪܡܵܐ، ܘܫܵܩܵܐ ܕܦܝܼܫܵܐ ܝܗ݇ܘܵܐ ܡܘܼܩܪܸܒ݂ܵܐ، ܐܵܟ݂ܠܝܼܬܘܿܢ ܠܗܘܿܢ ܒܕܘܼܟܵܐ ܕܟ݂ܝܼܬܵܐ، ܐܲܢ݇ܬ ܘܒܢܘܿܢܘܼ̈ܟ݂ ܘܠܒܢܵܬܘܼ̈ܟ݂ ܥܲܡܘܼܟ݂، ܣܵܒܵܒ ܣܵܗܡܘܼܟ݂ ܘܣܵܗܡܵܐ ܕܒܢܘܿܢܘܼ̈ܟ݂ ܦܝܼܫܹܐ ܝܢܵܐ ܝܘܼܗ݇ܒܹܐ ܡ̣ܢ ܕܸܒ݂ܚܵܐ ܕܫܠܵܡܵܐ ܕܒܢܲܝ̈ ܝܼܣܪܵܝܹܠ. 15ܫܵܩܵܐ ܕܦܝܼܫ ܠܹܗ ܡܘܼܩܪܸܒ݂ܵܐ ܘܨܲܕܪܵܐ ܕܦܝܼܫ ܠܹܗ ܡܘܼܪܡܵܐ، ܦܵܝܫܝܼ ܡܘܼܪܡܹܐ ܩܵܕ݇ܡ ܡܵܪܝܵܐ ܥܲܡ ܬܲܪ̈ܒܹܐ ܕܕܸܒ݂ܚܹ̈ܐ ܕܢܘܼܪܵܐ، ܣܵܒܵܒ ܐܸܠܘܼܟ݂ ܘܠܒܢܘܿܢܘܼ̈ܟ݂ ܦܝܼܫܹܐ ܝܢܵܐ ܝܘܼܗ݇ܒܹܐ؛ ܘܐܵܗܵܐ ܩܵܢܘܿܢܵܐ ܝܠܹܗ ܠܥܵܠܲܡ، ܐܲܝܟ݂ ܕܦܩܝܼܕ ܠܹܗ ܡܵܪܝܵܐ.“
16ܘܒܘܼܩܸܪܹܗ ܡܘܼܫܹܐ ܒܘܼܬ ܓܸܙܟܵܐ ܕܕܸܒ݂ܚܵܐ ܕܚܛܝܼܬܵܐ، ܘܝ݇ܕܝܼܥ ܠܹܗ ܕܦܝܼܫܵܐ ܝܗ݇ܘܵܐ ܡܘܼܩܕܵܐ. ܟܪܝܼܒ ܠܹܗ ܥܲܠ ܐܹܠܝܼܥܵܙܲܪ ܘܐܝܼܬܵܡܵܪ، ܒܢܘܿܢܹ̈ܐ ܕܐܲܗܪܘܿܢ ܕܝܼܗ݇ܘܵܘ ܒܸܦܝܵܫܵܐ، ܘܐ݇ܡܝܼܪܹܗ، 17”ܩܵܡܘܿܕܝܼ ܠܵܐ ܐ݇ܟ݂ܝܼܠ ܠܵܘܟ݂ܘܿܢ ܕܸܒ݂ܚܵܐ ܕܚܛܝܼܬܵܐ ܒܕܘܼܟܵܐ ܩܲܕܝܼܫܬܵܐ؟ ܣܵܒܵܒ ܩܕܘܿܫ ܩܘܼܕܫܹ̈ܐ ܝܠܹܗ، ܘܦܝܼܫܵܐ ܝܗ݇ܘܵܐ ܝܘܼܗ݇ܒ݂ܵܐ ܐܸܠܵܘܟ݂ܘܿܢ ܕܛܵܥܢܝܼܬܘܿܢ ܗ݇ܘܵܘ ܥܵܘܠܵܐ ܕܟܸܢܫܵܐ، ܘܥܵܒ݂ܕܝܼܬܘܿܢ ܗ݇ܘܵܘ ܚܘܼܣܵܝܵܐ ܐܸܠܲܝܗܝ ܩܵܕ݇ܡ ܡܵܪܝܵܐ. 18ܟܲܕ ܕܸܡܹܗ ܠܹܐ ܝܗ݇ܘܵܐ ܦܝܼܫܵܐ ܡܘܼܐܬܝܵܐ ܠܵܓܵܘܵܐ ܓܵܘ ܡܲܩܕܫܵܐ، ܘܵܠܹܐ ܝܠܵܗ̇ ܕܐܵܟ݂ܠܝܼܬܘܿܢ ܗ݇ܘܵܘ ܠܹܗ ܒܸܣܪܹܗ ܓܵܘ ܡܲܩܕܫܵܐ، ܕܵܐܟ݂ܝܼ ܕܦܩܝܼܕ ܠܝܼ.“ 19ܐ݇ܡܝܼܪܹܗ ܐܲܗܪܘܿܢ ܠܡܘܼܫܹܐ، ”ܗܵܐ ܐܸܕܝܘܿܡ ܝܵܘܡܵܐ ܡܘܼܩܪܸܒ݂ ܠܗܘܿܢ ܕܸܒ݂ܚܲܝܗܝ ܕܚܛܝܼܬܵܐ ܘܕܸܒ݂ܚܲܝܗܝ ܡܘܼܩܕܵܐ ܩܵܕ݇ܡ ܡܵܪܝܵܐ. ܒܟܠܹܗ ܐܵܗܵܐ، ܐܲܢܹܐ ܡܸܢܕܝܼܵܢܹ̈ܐ ܩܘܼܘܸܡ ܠܗܘܿܢ ܐܸܠܝܼ، ܐܸܢ ܐܵܟ݂ܠܹܢ ܗ݇ܘܵܐ ܕܸܒ݂ܚܵܐ ܕܚܛܝܼܬܵܐ ܐܸܕܝܘܿܡ ܝܵܘܡܵܐ، ܒܸܬ ܫܵܦܪܵܐ ܗ݇ܘܵܐ ܒܥܲܝܢܹ̈ܐ ܕܡܵܪܝܵܐ؟“ 20ܟܲܕ ܫܡܝܼܥ ܠܹܗ ܡܘܼܫܹܐ ܐܵܗܵܐ، ܫܦܝܼܪܵܗ̇ ܒܥܲܝܢܘܼ̈ܗܝ.
Currently Selected:
ܟܗܢ̈ܐ 10: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
