ܟܗܢ̈ܐ 8
8
ܣܝܵܡܐܝܼܕܵܐ ܕܟܵܗܢܹ̈ܐ
1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܘܐ݇ܡܝܼܪܹܗ، 2”ܫܩܘܿܠ ܠܐܲܗܪܘܿܢ ܘܠܒܢܘܿܢܘܼ̈ܗܝ، ܘܠܒ݂ܘܼܫܲܝ̈ܗܝ، ܘܡܸܫܚܵܐ ܕܡܫܵܚܬܵܐ، ܘܡܘܼܓ̰ܵܐ ܩܵܐ ܕܸܒ݂ܚܵܐ ܕܚܛܝܼܬܵܐ، ܘܬܪܹܝ ܒܲܪ̈ܥܵܢܹܐ، ܘܚܲܕ ܣܵܠܵܐ ܕܦܲܛܝܼܪܹ̈ܐ، 3ܘܓ̰ܲܡܸܥ ܠܹܗ ܟܠܹܗ ܟܸܢܫܵܐ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ.“ 4ܘܥܒ݂ܝܼܕ ܠܹܗ ܡܘܼܫܹܐ ܕܵܐܟ݂ܝܼ ܕܦܩܝܼܕ ܠܹܗ ܐܸܠܹܗ ܡܵܪܝܵܐ، ܘܓ̰ܘܼܡܸܥ ܠܹܗ ܟܠܹܗ ܟܸܢܫܵܐ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ.
5ܘܐ݇ܡܝܼܪܹܗ ܡܘܼܫܹܐ ܠܟܸܢܫܵܐ، ”ܐܵܗܵܐ ܝܠܹܗ ܡܸܢܕܝܼ ܕܦܩܝܼܕ ܠܹܗ ܡܵܪܝܵܐ ܕܦܵܐܹܫ ܥܒ݂ܝܼܕܵܐ.“ 6ܗ̇ܝܓܵܗ ܡܘܼܐܬܹܐ ܠܹܗ ܡܘܼܫܹܐ ܠܐܲܗܪܘܿܢ ܘܠܒܢܘܿܢܘܼ̈ܗܝ ܘܡܘܼܣܚܝܼܲܝ ܠܹܗ ܒܡ̈ܝܼܵܐ. 7ܡܘܼܠܒܸܫ ܠܹܗ ܐܸܠܹܗ ܨܘܼܕܪܵܐ، ܘܐ݇ܣܝܼܪܹܗ ܒܚܲܨܹܗ ܚܘܼܪܵܪܵܐ، ܘܕܪܹܐ ܠܹܗ ܥܲܠܘܼܗܝ ܥܵܒܵܝܬܵܐ، ܘܡܘܼܬܸܒ݂ ܠܹܗ ܥܲܠܘܼܗܝ ܐܸܦܘܿܕܵܐ، ܘܚܠܝܼܨ ܠܹܗ ܒܙܘܼܢܵܪܵܐ ܠܩܝܼܛܵܐ ܕܐܸܦܘܿܕܵܐ ܘܟܬܝܼܪܵܐ ܠܹܗ ܒܝܼܹܗ. 8ܗ̇ܝܓܵܗ ܡܘܼܬܸܒ݂ ܠܹܗ ܥܲܠܘܼܗܝ ܒܪܵܬ݇ ܨܲܕܪܵܐ، ܘܓܵܘ ܒܪܵܬ݇ ܨܲܕܪܵܐ ܡܘܼܬܸܒ݂ ܠܹܗ ܐܘܼܪܝܼܡ ܘܬܘܼܡܝܼܡ.#8:8 ܟܹܐܦܹ̈ܐ ܡܘܼܬܒܹ̈ܐ ܒܐܸܦܘܿܕܵܐ (ܫܸܪܝܵܢܵܐ، ܓܲܝܸܡܟ̰ܵܪܵܐ) ܕܟܵܗܢܵܐ ܥܸܠܵܝܵܐ ܕܸܪܝܹܐ ܦܸܫܟܹ̈ܐ ܠܝܼܕܵܥܵܐ ܩܛܵܥܬܵܐ ܕܐܲܠܵܗܵܐ 9ܗ̇ܝܓܵܗ ܡܘܼܬܸܒ݂ ܠܹܗ ܟܪܵܟ݂ܬܵܐ ܥܲܠ ܪܹܫܹܗ، ܘܡܘܼܬܸܒ݂ ܠܹܗ ܥܲܠ ܟܪܵܟ݂ܬܵܐ ܩܵܕ݇ܡ ܩܸܨܹܗ ܦܵܪܘܿܫܬܵܐ ܕܕܲܗܒ݂ܵܐ، ܟܠܝܼܠܵܐ ܕܩܘܼܕܫܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ.
10ܗ̇ܝܓܵܗ ܫܩܝܼܠ ܠܹܗ ܡܘܼܫܹܐ ܡܸܫܚܵܐ ܕܡܫܵܚܬܵܐ، ܘܡܫܝܼܚ ܠܹܗ ܠܡܲܫܟܢܵܐ ܘܠܟܠ ܡܸܢܕܝܼ ܕܓܵܘܹܗ، ܘܩܘܼܕܫܲܝ ܠܹܗ. 11ܡܘܼܪܝܸܣ ܠܹܗ ܡܸܢܹܗ ܥܲܠ ܡܲܕܒܚܵܐ ܫܒܲܥ ܓܵܗܹ̈ܐ، ܘܡܫܝܼܚ ܠܹܗ ܠܡܲܕܒܚܵܐ ܘܠܟܠܲܝܗܝ ܡܵܐܢܘܼ̈ܗܝ، ܘܠܡܵܐܢܵܐ ܕܚܵܠܲܠܬܵܐ ܘܠܟܲܢܹܗ، ܠܩܲܕܘܼܫܲܝ، 12ܘܨܘܼܢܨܸܠ ܠܹܗ ܡ̣ܢ ܡܸܫܚܵܐ ܥܲܠ ܪܹܫܵܐ ܕܐܲܗܪܘܿܢ، ܘܡܫܝܼܚ ܠܹܗ ܠܩܲܕܘܼܫܹܗ. 13ܗ̇ܝܓܵܗ ܩܘܼܪܒܸܢܹܗ ܡܘܼܫܹܐ ܠܒܢܘܿܢܹ̈ܐ ܕܐܲܗܪܘܿܢ، ܘܡܘܼܠܒܸܫܲܝ ܠܹܗ ܨܘܼܕܪ̈ܵܬܹܐ، ܘܟܪܝܼܟ݂ ܠܹܗ ܚܘܼܪܵܪܹ̈ܐ ܒܚܲܨܲܝ̈ܗܝ، ܘܡܘܼܬܸܒ݂ ܠܹܗ ܟܘܿܣܝܼܵܬܹ̈ܐ ܒܪܹܫܲܝܗܝ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ.
14ܗ̇ܝܓܵܗ ܡܘܼܐܬܹܐ ܠܹܗ ܠܡܘܼܓ̰ܵܐ ܕܕܸܒ݂ܚܵܐ ܕܚܛܝܼܬܵܐ، ܘܡܘܼܬܸܒ݂ ܠܗܘܿܢ ܐܲܗܪܘܿܢ ܘܒܢܘܿܢܘܼ̈ܗܝ ܐܝܼܕܵܬܲܝ̈ܗܝ ܥܲܠ ܪܹܫܹܗ، 15ܘܦܪܝܼܡ ܠܹܗ ܡܘܼܫܹܐ ܠܡܘܼܓ̰ܵܐ، ܘܫܩܝܼܠ ܠܹܗ ܡ̣ܢ ܕܸܡܵܐ ܒܨܸܒܥܹܗ، ܘܡܘܼܬܸܒ݂ ܠܹܗ ܥܲܠ ܩܵܪ̈݇ܢܵܢܹܐ ܕܡܲܕܒܚܵܐ ܒܚܵܕܸܪ̈ܘܵܢܹܐ؛ ܕܘܼܟܹܐ ܠܹܗ ܠܡܲܕܒܚܵܐ، ܘܕܪܹܐ ܠܹܗ ܡ̣ܢ ܕܸܡܵܐ ܥܲܠ ܒܸܢܝܲܬ ܕܡܲܕܒܚܵܐ، ܘܩܘܼܕܸܫ ܠܹܗ ܕܦܵܐܹܫ ܥܒ݂ܝܼܕܵܐ ܚܘܼܣܵܝܵܐ ܥܲܠܘܼܗܝ. 16ܫܩܝܼܠ ܠܹܗ ܡܘܼܫܹܐ ܐܘܼܦ ܟܠܹܗ ܬܲܪܒܵܐ ܕܥܲܠ ܗܲܕܵܡܹ̈ܐ ܓܵܘܵܝܹ̈ܐ، ܘܠܚܨܵܪ ܟܲܒ݂ܕܵܐ، ܘܠܬܲܪܬܹܝ ܟܸܠܝܵܬܹ̈ܐ ܘܠܬܲܪ̈ܒܲܝܗܝ، ܘܡܘܼܩܕܲܝ ܠܹܗ ܥܲܠ ܡܲܕܒܚܵܐ. 17ܐܝܼܢܵܐ ܡܘܼܓ̰ܵܐ، ܥܲܡ ܓܸܠܕܹܗ ܘܒܸܣܪܹܗ ܘܦܸܪܬܹܗ ܡܘܼܩܕܲܝ ܠܹܗ ܒܢܘܼܪܵܐ ܠܒܲܕܲܪ ܡ̣ܢ ܡܲܫܪܝܼܬܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ.
18ܗ̇ܝܓܵܗ ܡܘܼܐܬܹܐ ܠܹܗ ܡܘܼܫܹܐ ܠܒܲܪܥܵܢܵܐ ܕܕܸܒ݂ܚܵܐ ܡܘܼܩܕܵܐ، ܘܡܘܼܬܸܒ݂ ܠܗܘܿܢ ܐܲܗܪܘܿܢ ܘܒܢܘܿܢܘܼ̈ܗܝ ܐܝܼܕܵܬܲܝ̈ܗܝ ܥܲܠ ܪܹܫܵܐ ܕܒܲܪܥܵܢܹܗ، 19ܘܦܪܝܼܡ ܠܹܗ ܡܘܼܫܹܐ ܐܸܠܹܗ، ܘܡܘܼܪܝܸܣ ܠܹܗ ܕܸܡܵܐ ܠܚܵܕܸܪ̈ܘܵܢܹܐ ܕܡܲܕܒܚܵܐ. 20ܩܘܼܛܩܸܛ ܠܹܗ ܒܲܪܥܵܢܵܐ، ܘܡܘܼܩܸܕ ܠܹܗ ܠܪܹܫܵܐ ܘܠܩܸܛܥܵܛܹ̈ܐ ܘܠܬܲܪܒܵܐ. 21ܚܘܼܠܸܠ ܠܹܗ ܠܗܲܕܵܡܹ̈ܐ ܓܵܘܵܝܹ̈ܐ ܘܠܫܵܩܵܢܹ̈ܐ ܒܡ̈ܝܼܵܐ، ܗ̇ܝܓܵܗ ܡܘܼܩܸܕ ܠܹܗ ܠܟܠܹܗ ܒܲܪܥܵܢܵܐ ܥܲܠ ܡܲܕܒܚܵܐ، ܕܸܒ݂ܚܵܐ ܡܘܼܩܕܵܐ، ܪܹܝܚܵܐ ܒܲܣܝܼܡܵܐ، ܕܸܒ݂ܚܵܐ ܕܢܘܼܪܵܐ ܠܡܵܪܝܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ.
22ܗ̇ܝܓܵܗ ܡܘܼܩܪܸܒ݂ ܠܹܗ ܠܒܲܪܥܵܢܵܐ ܐ݇ܚܹܪ݇ܢܵܐ، ܒܲܪܥܵܢܵܐ ܕܣܝܵܡܐܝܼܕܵܐ؛ ܘܡܘܼܬܸܒ݂ ܠܗܘܿܢ ܐܲܗܪܘܿܢ ܘܒܢܘܿܢܘܼ̈ܗܝ ܐܝܼܕܵܬܲܝ̈ܗܝ ܥܲܠ ܪܹܫܵܐ ܕܒܲܪܥܵܢܵܐ، 23ܦܪܝܼܡ ܠܹܗ ܡܘܼܫܹܐ ܠܒܲܪܥܵܢܵܐ، ܘܫܩܝܼܠ ܠܹܗ ܡ̣ܢ ܕܸܡܵܐ ܘܡܘܼܬܸܒ݂ ܠܹܗ ܥܲܠ ܡܲܪܙܵܐ ܕܢܵܬܵܐ ܕܝܲܡܝܼܢܵܐ ܕܐܲܗܪܘܿܢ، ܘܥܲܠ ܩܘܼܟ̰ܵܐ ܕܐܝܼܕܹܗ ܕܝܲܡܝܼܢܵܐ، ܘܥܲܠ ܩܘܼܟ̰ܵܐ ܕܐܲܩܠܹܗ ܕܝܲܡܝܼܢܵܐ. 24ܘܡܘܼܐܬܲܝ ܠܹܗ ܐܘܼܦ ܒܢܘܿܢܹ̈ܐ ܕܐܲܗܪܘܿܢ، ܘܡܘܼܬܸܒ݂ ܠܹܗ ܡ̣ܢ ܕܸܡܵܐ ܥܲܠ ܡܲܪܙܵܐ ܕܢܵܬܲܝܗܝ ܕܝܲܡܝܼܢܵܐ، ܘܥܲܠ ܩܘܼܟ̰ܵܐ ܕܐܝܼܕܲܝܗܝ ܕܝܲܡܝܼܢܵܐ، ܘܥܲܠ ܩܘܼܟ̰ܵܐ ܕܐܲܩܠܲܝܗܝ ܕܝܲܡܝܼܢܵܐ، ܘܡܘܼܪܝܸܣ ܠܹܗ ܠܕܸܡܵܐ ܠܚܵܕܸܪ̈ܘܵܢܹܐ ܕܡܲܕܒܚܵܐ. 25ܘܫܩܝܼܠ ܠܹܗ ܠܬܲܪܒܵܐ ܘܠܐܹܠܝܼܬܵܐ، ܘܠܟܠܹܗ ܬܲܪܒܵܐ ܕܥܲܠ ܗܲܕܵܡܹ̈ܐ ܓܵܘܵܝܹ̈ܐ، ܘܠܚܨܵܪ ܟܲܒ݂ܕܵܐ، ܘܠܬܲܪܬܹܝ ܟܸܠܝܵܬܹ̈ܐ ܘܠܬܲܪ̈ܒܲܝܗܝ، ܘܠܫܵܩܵܐ ܕܝܲܡܝܼܢܵܐ. 26ܘܡ̣ܢ ܣܵܠܵܐ ܕܦܲܛܝܼܪܹ̈ܐ ܕܝܼܗ݇ܘܵܐ ܩܵܕ݇ܡ ܡܵܪܝܵܐ ܫܩܝܼܠ ܠܹܗ ܚܕܵܐ ܓܸܪܕܲܝܵܐ، ܘܚܲܕ ܠܲܚܡܵܐ ܡܸܫܚܵܢܵܐ، ܘܚܲܕ ܪܲܩܝܼܩܵܐ، ܘܡܘܼܬܒܲܝ ܠܹܗ ܥܲܠ ܬܲܪܒܵܐ ܘܥܲܠ ܫܵܩܵܐ ܕܝܲܡܝܼܢܵܐ. 27ܡܘܼܬܒܲܝ ܠܹܗ ܟܠܲܝܗܝ ܒܐܝܼܕܹ̈ܐ ܕܐܲܗܪܘܿܢ ܘܒܢܘܿܢܘܼ̈ܗܝ، ܘܡܘܼܩܪܸܒܲܝ ܠܹܗ ܐܸܠܲܝܗܝ ܒܡܲܫܥܲܫܬܲܝܗܝ ܩܵܕ݇ܡ ܡܵܪܝܵܐ. 28ܗ̇ܝܓܵܗ ܫܩܝܼܠܲܝ ܠܹܗ ܡܘܼܫܹܐ ܡ̣ܢ ܐܝܼܕܵܬܲܝ̈ܗܝ، ܘܡܘܼܩܕܲܝ ܠܹܗ ܥܲܠ ܡܲܕܒܚܵܐ، ܥܲܠ ܕܸܒ݂ܚܵܐ ܡܘܼܩܕܵܐ. ܕܸܒ݂ܚܵܐ ܕܣܝܵܡܐܝܼܕܵܐ ܝܗ݇ܘܵܘ، ܪܹܝܚܵܐ ܒܲܣܝܼܡܵܐ، ܕܸܒ݂ܚܵܐ ܕܢܘܼܪܵܐ ܠܡܵܪܝܵܐ. 29ܫܩܝܼܠ ܠܹܗ ܡܘܼܫܹܐ ܐܘܼܦ ܠܨܲܕܪܵܐ ܕܒܲܪܥܵܢܵܐ ܘܡܘܼܪܸܡ ܠܹܗ ܩܵܕ݇ܡ ܡܵܪܝܵܐ. ܐܵܗܵܐ ܒܲܪܥܵܢܵܐ ܕܣܝܵܡܬܵܐ ܣܵܗܡܵܐ ܕܡܘܼܫܹܐ ܝܗ݇ܘܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܐܸܠܹܗ.
30ܗ̇ܝܓܵܗ ܫܩܝܼܠ ܠܹܗ ܡܘܼܫܹܐ ܡ̣ܢ ܡܸܫܚܵܐ ܕܡܫܵܚܬܵܐ ܘܡ̣ܢ ܕܸܡܵܐ ܕܥܲܠ ܡܲܕܒܚܵܐ، ܘܡܘܼܪܝܸܣ ܠܗܘܿܢ ܥܲܠ ܐܲܗܪܘܿܢ ܘܥܲܠ ܠܒ݂ܝܼܫܬܹܗ، ܥܲܠ ܒܢܘܿܢܘܼ̈ܗܝ، ܘܥܲܠ ܠܒ݂ܝܼܫܝܵܬܹ̈ܐ ܕܒܢܘܿܢܘܼ̈ܗܝ ܥܲܡܹܗ؛ ܘܩܘܼܕܸܫ ܠܹܗ ܠܐܲܗܪܘܿܢ ܘܠܒ݂ܝܼܫܬܹܗ ܘܠܒܢܘܿܢܘܼ̈ܗܝ، ܘܠܒ݂ܝܼܫܝܵܬܹ̈ܐ ܕܒܢܘܿܢܘܼ̈ܗܝ ܥܲܡܹܗ. 31ܘܐ݇ܡܝܼܪܹܗ ܠܐܲܗܪܘܿܢ ܘܠܒܢܘܿܢܘܼ̈ܗܝ، ”ܒܲܫܠܘܼܢ ܠܹܗ ܒܸܣܪܵܐ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ، ܘܬܵܡܵܐ ܐܵܟ݂ܠܝܼܬܘܿܢ ܠܹܗ، ܥܲܡ ܠܲܚܡܵܐ ܕܓܵܘ ܣܵܠܵܐ ܕܝܼܠܹܗ ܕܸܒ݂ܚܵܐ ܕܣܝܵܡܐܝܼܕܵܐ، ܕܵܐܟ݂ܝܼ ܕܦܩܝܼܕ ܠܝܼ، ܒܹܐܡܵܪܵܐ، ’ܐܲܗܪܘܿܢ ܘܒܢܘܿܢܘܼ̈ܗܝ ܒܸܬ ܐܵܟ݂ܠܝܼ ܠܹܗ.‘ 32ܘܡܸܢܕܝܼ ܕܙܵܐܹܕ ܡ̣ܢ ܒܸܣܪܵܐ ܘܠܲܚܡܵܐ، ܒܢܘܼܪܵܐ ܦܵܐܹܫ ܡܘܼܩܕܵܐ. 33ܘܡ̣ܢ ܬܲܪܥܵܐ ܕܡܲܫܟܲܢ ܘܲܥܕܵܐ ܠܵܐ ܦܵܠܛܝܼܬܘܿܢ ܗܲܠ ܫܲܒ݂ܥܵܐ ܝܵܘܡܵܢܹ̈ܐ، ܗܲܠ ܕܬܲܡܸܡܝܼ ܝܵܘܡܵܢܹ̈ܐ ܕܣܝܵܡܐܝܼܕܵܘܟ݂ܘܿܢ، ܣܵܒܵܒ ܒܸܬ ܫܵܩܠܵܐ ܫܲܒ݂ܥܵܐ ܝܵܘܡܵܢܹ̈ܐ ܕܦܵܝܫܝܼܬܘܿܢ ܣܝܼܡܹܐ. 34ܡܸܢܕܝܼ ܕܦܝܼܫ ܠܹܗ ܥܒ݂ܝܼܕܵܐ ܐܸܕܝܘܿܡ، ܦܘܼܩܕܵܢܵܐ ܝܠܹܗ ܡ̣ܢ ܡܵܪܝܵܐ ܠܸܥܒ݂ܵܕܵܐ ܚܘܼܣܵܝܵܐ ܐܸܠܵܘܟ݂ܘܿܢ. 35ܘܝܵܬܒ݂ܝܼܬܘܿܢ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ ܒܝܵܘܡܵܐ ܘܒܠܲܝܠܹܐ ܗܲܠ ܫܲܒ݂ܥܵܐ ܝܵܘܡܵܢܹ̈ܐ، ܘܥܵܒ݂ܕܝܼܬܘܿܢ ܒܨܸܒ݂ܝܵܢܵܐ ܕܡܵܪܝܵܐ ܕܠܵܐ ܡܵܝܬܝܼܬܘܿܢ، ܣܵܒܵܒ ܗܲܕܟ݂ܵܐ ܦܝܼܫ ܠܝܼ ܦܩܝܼܕܵܐ.“ 36ܗܲܕܟ݂ܵܐ ܥܒ݂ܝܼܕ ܠܗܘܿܢ ܐܲܗܪܘܿܢ ܘܒܢܘܿܢܘܼ̈ܗܝ ܟܠ ܡܸܢܕܝܼ ܕܦܩܝܼܕ ܠܹܗ ܡܵܪܝܵܐ ܒܝܲܕ ܡܘܼܫܹܐ.
Currently Selected:
ܟܗܢ̈ܐ 8: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
