ܟܗܢ̈ܐ 7
7
ܕܸܒ݂ܚܵܐ ܕܓܢܵܗܵܐ
1”ܐܵܗܵܐ ܝܠܹܗ ܢܵܡܘܿܣܵܐ ܕܕܸܒ݂ܚܵܐ ܕܓܢܵܗܵܐ، ܕܝܼܠܹܗ ܩܕܘܿܫ ܩܘܼܕܫܹ̈ܐ. 2ܒܕܘܼܟܵܐ ܕܦܵܪܡܝܼ ܕܸܒ݂ܚܵܐ ܡܘܼܩܕܵܐ، ܬܵܡܵܐ ܦܵܪܡܝܼ ܐܘܼܦ ܕܸܒ݂ܚܵܐ ܕܓܢܵܗܵܐ، ܘܕܸܡܹܗ ܦܵܐܹܫ ܡܘܼܪܝܸܣܵܐ ܠܚܵܕܸܪ̈ܘܵܢܹܐ ܕܡܲܕܒܚܵܐ. 3ܗ̇ܝܓܵܗ ܡܲܩܪܸܒ݂ ܟܵܗܢܵܐ ܟܠܹܗ ܬܲܪܒܵܐ ܥܲܠ ܡܲܕܒܚܵܐ، ܬܲܪܒܵܐ ܕܐܹܠܝܼܬܵܐ ܘܬܲܪܒܵܐ ܕܟܹܐ ܟܲܣܹܐ ܠܗܲܕܵܡܹ̈ܐ ܓܵܘܵܝܹ̈ܐ، 4ܘܬܲܪܬܹܝ ܟܸܠܝܵܬܹ̈ܐ ܘܬܲܪܒܵܐ ܕܥܲܠܲܝܗܝ ܘܕܥܲܠ ܦܘܼܫܬܹ̈ܐ، ܘܚܨܵܪ ܟܲܒ݂ܕܵܐ ܥܲܡ ܟܸܠܝܵܬܹ̈ܐ ܫܵܩܹܠ ܠܗܘܿܢ. 5ܡܲܩܸܕ ܠܗܘܿܢ ܟܵܗܢܵܐ ܥܲܠ ܡܲܕܒܚܵܐ، ܕܸܒ݂ܚܵܐ ܕܢܘܼܪܵܐ ܠܡܵܪܝܵܐ. ܕܸܒ݂ܚܵܐ ܕܓܢܵܗܵܐ ܝܠܹܗ. 6ܟܠ ܐܘܼܪܙܵܐ ܡ̣ܢ ܒܲܝܬܵܐ ܕܟܵܗܢܹ̈ܐ ܡܵܨܹܐ ܐܵܟܹܠ ܡܸܢܹܗ، ܐܝܼܢܵܐ ܦܵܐܹܫ ܐ݇ܟ݂ܝܼܠܵܐ ܒܕܘܼܟܵܐ ܩܲܕܝܼܫܬܵܐ؛ ܩܕܘܿܫ ܩܘܼܕܫܹ̈ܐ ܝܠܹܗ. 7ܕܸܒ݂ܚܵܐ ܕܚܛܝܼܬܵܐ ܐܲܝܟ݂ ܕܸܒ݂ܚܵܐ ܕܓܢܵܗܵܐ ܝܠܹܗ؛ ܐܝܼܬ ܚܲܕ ܢܵܡܘܿܣܵܐ ܩܵܐ ܬܸܪܘܲܝܗܝ. ܒܸܣܪܵܐ ܗܵܘܹܐ ܩܵܐ ܟܵܗܢܵܐ ܕܥܵܒܹܕ ܚܘܼܣܵܝܵܐ ܒܝܼܹܗ. 8ܘܟܵܗܢܵܐ ܕܡܲܩܪܸܒ݂ ܕܸܒ݂ܚܵܐ ܡܘܼܩܕܵܐ ܡ̣ܢ ܓܹܒܵܐ ܕܚܲܕ ܐ݇ܢܵܫܵܐ، ܓܸܠܕܵܐ ܕܕܸܒ݂ܚܵܐ ܡܘܼܩܕܵܐ ܗܵܘܹܐ ܩܵܬܹܗ. 9ܐܘܼܦ ܟܠ ܕܸܒ݂ܚܵܐ ܕܕܲܚܠܵܐ ܕܦܵܐܹܫ ܝܸܦܝܵܐ ܓܵܘ ܬܲܢܘܼܪܵܐ، ܝܲܢ ܦܵܐܹܫ ܒܘܼܫܠܵܐ ܓܵܘ ܩܘܼܣܲܪܬܵܐ، ܝܲܢ ܓܵܘ ܬܵܘܵܐ، ܗܵܘܹܐ ܠܟܵܗܢܵܐ ܕܝܼܠܹܗ ܡܲܩܪܘܼܒܹܗ. 10ܘܟܠ ܕܸܒ݂ܚܵܐ ܕܕܲܚܠܵܐ ܓܒ݂ܝܼܠܵܐ ܒܡܸܫܚܵܐ ܝܲܢ ܒܵܪܘܿܙܵܐ، ܗܵܘܹܐ ܠܟܠܲܝܗܝ ܒܢܘܿܢܹ̈ܐ ܕܐܲܗܪܘܿܢ ܒܫܵܘܝܘܼܬܵܐ.
ܕܸܒ݂ܚܵܐ ܕܫܠܵܡܵܐ
11”ܘܐܵܗܵܐ ܝܠܹܗ ܢܵܡܘܿܣܵܐ ܒܘܼܬ ܕܸܒ݂ܚܵܐ ܕܩܘܼܪ̈ܒܵܢܹܐ ܕܫܠܵܡܵܐ، ܕܡܲܩܪܸܒ݂ ܐ݇ܢܵܫܵܐ ܠܡܵܪܝܵܐ. 12ܐܸܢ ܡܲܩܪܸܒ݂ ܠܹܗ ܒܘܼܬ ܫܵܟܲܪܬܵܐ، ܥܲܡ ܕܸܒ݂ܚܵܐ ܕܫܵܟܲܪܬܵܐ ܡܲܩܪܸܒ݂ ܓܸܪ̈ܕܲܝܹܐ ܦܲܛܝܼܪܹ̈ܐ ܓܒ݂ܝܼܠܹܐ ܒܡܸܫܚܵܐ، ܘܪ̈ܲܩܝܼܩܹܐ ܕܦܲܛܝܼܪܹ̈ܐ ܡܫܝܼܚܹܐ ܒܡܸܫܚܵܐ، ܘܠܲܚܡܵܐ ܓܒ݂ܝܼܠܵܐ ܡ̣ܢ ܢܫܝܼܦܵܐ ܡܙܝܼܓ݂ܵܐ ܒܡܸܫܚܵܐ. 13ܐܘܼܦ ܡܲܩܪܸܒ݂ ܓܸܪ̈ܕܲܝܹܐ ܕܠܲܚܡܵܐ ܚܡܝܼܥܵܐ ܥܲܡ ܕܸܒ݂ܚܵܐ ܕܫܠܵܡܵܐ ܠܫܵܟܲܪܬܵܐ. 14ܘܡ̣ܢ ܟܠ ܬܘܼܚܡܵܐ ܕܠܲܚܡܵܐ ܡܲܩܪܸܒ݂ ܚܲܕ ܩܘܼܪܒܵܢܵܐ ܠܡܵܪܝܵܐ. ܘܗ̇ܘ ܗܵܘܹܐ ܠܟܵܗܢܵܐ ܕܡܲܪܝܸܣ ܕܸܡܵܐ ܥܲܠ ܡܲܕܒܚܵܐ. 15ܒܸܣܪܵܐ ܕܕܸܒ݂ܚܵܐ ܕܩܘܼܪܒܵܢܵܐ ܕܫܠܵܡܵܐ ܕܫܵܟܲܪܬܵܐ ܦܵܐܹܫ ܐ݇ܟ݂ܝܼܠܵܐ ܒܝܵܘܡܵܐ ܕܡܲܩܪܲܒ݂ܬܹܗ. ܠܵܐ ܦܵܐܹܫ ܫܒ݂ܝܼܩܵܐ ܗܲܠ ܩܵܝܕܲܡܬܵܐ. 16ܐܝܼܢܵܐ ܐܸܢ ܢܸܕܪܵܐ ܝܠܹܗ، ܝܲܢ ܕܸܒ݂ܚܵܐ ܕܨܸܒ݂ܝܵܢܵܐ، ܦܵܐܹܫ ܐ݇ܟ݂ܝܼܠܵܐ ܒܝܵܘܡܵܐ ܕܡܲܩܪܸܒ݂ ܠܹܗ ܕܸܒ݂ܚܹܗ؛ ܘܐܸܢ ܙܵܐܹܕ ܡܸܢܕܝܼ ܡܸܢܹܗ، ܦܵܐܹܫ ܐ݇ܟ݂ܝܼܠܵܐ ܩܵܝܕܲܡܬܵܐ. 17ܐܝܼܢܵܐ ܐܸܢ ܙܵܐܹܕ ܒܸܣܪܵܐ ܡ̣ܢ ܕܸܒ݂ܚܵܐ ܗܲܠ ܝܵܘܡܵܐ ܕܬܠܵܬܵܐ، ܦܵܐܹܫ ܡܘܼܩܕܵܐ ܒܢܘܼܪܵܐ. 18ܐܸܢ ܦܵܐܹܫ ܐ݇ܟ݂ܝܼܠܵܐ ܡ̣ܢ ܒܸܣܪܵܐ ܕܕܸܒ݂ܚܵܐ ܕܫܠܵܡܵܐ ܒܝܵܘܡܵܐ ܕܬܠܵܬܵܐ، ܠܹܐ ܗܵܘܹܐ ܩܘܼܒܠܵܐ، ܘܠܹܐ ܦܵܐܹܫ ܚܘܼܫܒܸܢܵܐ ܠܡ̇ܢ ܕܡܘܼܩܪܸܒ݂ ܠܹܗ؛ ܛܲܡܐܘܼܬܵܐ ܒܸܬ ܗܵܘܹܐ، ܘܥܵܘܠܹܗ ܒܸܬ ܗܵܘܹܐ ܠܡ̇ܢ ܕܐܵܟܹܠ ܠܹܗ. 19ܒܸܣܪܵܐ ܕܕܵܩܹܪ ܒܡܸܢܕܝܼ ܛܲܡܐܵܐ، ܗ̇ܘ ܒܸܣܪܵܐ ܠܵܐ ܦܵܐܹܫ ܐ݇ܟ݂ܝܼܠܵܐ، ܐܸܠܵܐ ܦܵܐܹܫ ܡܘܼܩܕܵܐ ܒܢܘܼܪܵܐ. ܗ̇ܘ ܕܝܼܠܹܗ ܕܸܟ݂ܝܵܐ ܐܵܟܹܠ ܒܸܣܪܵܐ. 20ܐܝܼܢܵܐ ܐܸܢ ܚܲܕ ܐ݇ܢܵܫܵܐ ܠܵܐ ܕܸܟ݂ܝܵܐ ܐܵܟܹܠ ܡ̣ܢ ܒܸܣܪܵܐ ܕܕܸܒ݂ܚܵܐ ܕܫܠܵܡܵܐ ܕܝܼܠܹܗ ܕܡܵܪܝܵܐ، ܦܵܐܹܫ ܡܘܼܚܪܸܡܵܐ ܗ̇ܘ ܐ݇ܢܵܫܵܐ ܡ̣ܢ ܓܵܘ ܥܲܡܵܐ. 21ܘܐܸܢ ܐ݇ܢܵܫܵܐ ܕܵܩܹܪ ܒܡܸܢܕܝܼ ܛܲܡܐܵܐ، ܐܸܢ ܛܲܡܐܘܼܬܵܐ ܕܒܲܪܢܵܫܵܐ ܝܠܵܗ̇، ܝܲܢ ܕܗܲܝܘܵܢ ܛܲܡܐܵܐ، ܝܲܢ ܒܟܠ ܛܲܢܦܘܼܬܵܐ ܛܲܡܐܹܐ، ܘܐܵܟܹܠ ܡ̣ܢ ܒܸܣܪܵܐ ܕܕܸܒ݂ܚܵܐ ܕܫܠܵܡܵܐ ܕܝܼܠܹܗ ܕܡܵܪܝܵܐ، ܦܵܐܹܫ ܡܘܼܚܪܸܡܵܐ ܗ̇ܘ ܐ݇ܢܵܫܵܐ ܡ̣ܢ ܓܵܘ ܥܲܡܵܐ.“
ܩܵܢܘܿܢܹ̈ܐ ܒܘܼܬ ܐ݇ܟ݂ܵܠܬܵܐ ܕܬܲܪܒܵܐ ܘܕܸܡܵܐ
22ܗ̇ܝܓܵܗ ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، 23”ܗܲܡܙܸܡ ܥܲܡ ܒܢܲܝ̈ ܝܼܣܪܵܝܹܠ، ܒܹܐܡܵܪܵܐ، ’ܠܵܐ ܐܵܟ݂ܠܝܼܬܘܿܢ ܬܲܪܒܵܐ ܕܬܵܘܪܵܐ، ܝܲܢ ܕܥܸܪܒܵܐ، ܝܲܢ ܕܥܸܙܵܐ. 24ܬܲܪܒܵܐ ܕܗܲܝܘܵܢ ܡܝܼܬܵܐ، ܘܬܲܪܒܵܐ ܕܗܲܝܘܵܢ ܦܪܝܼܛܵܐ، ܡܲܦܠܸܚܝܼܬܘܿܢ ܠܹܗ ܩܵܐ ܫܘܼܠܹ̈ܐ ܦܪ̈ܝܼܫܹܐ، ܐܝܼܢܵܐ ܠܵܐ ܐܵܟ݂ܠܝܼܬܘܿܢ ܠܹܗ. 25ܣܵܒܵܒ ܟܠ ܐ݇ܢܵܫܵܐ ܕܐܵܟܹܠ ܡ̣ܢ ܬܲܪܒܵܐ ܕܗܲܝܘܵܢ ܕܦܝܼܫܵܐ ܝܠܹܗ ܡܘܼܩܪܸܒ݂ܵܐ ܕܸܒ݂ܚܵܐ ܕܢܘܼܪܵܐ ܠܡܵܪܝܵܐ، ܗ̇ܘ ܐ݇ܢܵܫܵܐ ܦܵܐܹܫ ܡܘܼܚܪܸܡܵܐ ܡ̣ܢ ܓܵܘ ܥܲܡܹܗ. 26ܘܠܵܐ ܐܵܟ݂ܠܝܼܬܘܿܢ ܕܸܡܵܐ ܕܦܵܪܲܚܬܵܐ ܘܠܵܐ ܕܸܡܵܐ ܕܩܸܢܝܵܢܵܐ ܒܟܠܹܗ ܡܲܥܡܪܵܘܟ݂ܘܿܢ. 27ܟܠ ܕܐܵܟܹܠ ܕܸܡܵܐ، ܦܵܐܹܫ ܡܘܼܚܪܸܡܵܐ ܗ̇ܘ ܐ݇ܢܵܫܵܐ ܡ̣ܢ ܓܵܘ ܥܲܡܹܗ.“
ܣܵܗܡܵܐ ܕܟܵܗܢܹ̈ܐ
28ܘܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܒܹܐܡܵܪܵܐ، 29”ܗܲܡܙܸܡ ܥܲܡ ܒܢܲܝ̈ ܝܼܣܪܵܝܹܠ، ܒܹܐܡܵܪܵܐ، ’ܗ̇ܘ ܕܡܲܩܪܸܒ݂ ܕܸܒ݂ܚܵܐ ܕܫܠܵܡܵܐ ܠܡܵܪܝܵܐ، ܡܲܩܪܸܒ݂ ܠܡܵܪܝܵܐ ܣܵܗܡܵܐ ܡܸܢܹܗ. 30ܒܐܝܼܕܵܬܹ̈ܗ ܡܲܝܬܹܐ ܠܹܗ ܕܸܒ݂ܚܵܐ ܕܢܘܼܪܵܐ ܠܡܵܪܝܵܐ؛ ܡܲܝܬܹܐ ܠܹܗ ܬܲܪܒܵܐ ܥܲܡ ܨܲܕܪܵܐ، ܘܡܲܪܸܡ ܠܹܗ ܨܲܕܪܵܐ ܩܵܕ݇ܡ ܡܵܪܝܵܐ. 31ܟܵܗܢܵܐ ܡܲܩܸܕ ܠܹܗ ܬܲܪܒܵܐ ܥܲܠ ܡܲܕܒܚܵܐ، ܐܝܼܢܵܐ ܨܲܕܪܵܐ ܦܵܐܹܫ ܩܵܐ ܐܲܗܪܘܿܢ ܘܩܵܐ ܒܢܘܿܢܘܼ̈ܗܝ. 32ܘܫܵܩܵܐ ܕܝܲܡܝܼܢܵܐ ܝܵܗ݇ܒܹܬ ܠܹܗ ܠܟܵܗܢܵܐ، ܐܲܝܟ݂ ܚܕܵܐ ܡܲܩܪܲܒ݂ܬܵܐ ܡ̣ܢ ܕܸܒ݂ܚܵܐ ܕܫܠܵܡܵܐ. 33ܡ̣ܢ ܒܢܘܿܢܹ̈ܐ ܕܐܲܗܪܘܿܢ، ܗ̇ܘ ܕܡܲܩܪܸܒ݂ ܕܸܡܵܐ ܕܕܸܒ݂ܚܵܐ ܕܫܠܵܡܵܐ ܘܬܲܪܒܵܐ، ܫܵܩܵܐ ܕܝܲܡܝܼܢܵܐ ܗܵܘܹܐ ܣܵܗܡܹܗ. 34ܣܵܒܵܒ ܨܲܕܪܵܐ ܕܦܝܼܫܵܐ ܝܠܹܗ ܡܘܼܪܡܵܐ ܩܵܕ݇ܡ ܡܵܪܝܵܐ، ܘܫܵܩܵܐ ܕܦܝܼܫܵܐ ܝܠܹܗ ܡܘܼܩܪܸܒ݂ܵܐ، ܫܩܝܼܠܲܝ ܝܘܸܢ ܡ̣ܢ ܒܢܲܝ̈ ܝܼܣܪܵܝܹܠ ܡ̣ܢ ܕܸܒ݂ܚܹ̈ܐ ܕܫܠܵܡܵܐ، ܘܝܘܼܗܒܲܝ ܝܘܸܢ ܠܐܲܗܪܘܿܢ ܟܵܗܢܵܐ ܘܠܒܢܘܿܢܘܼ̈ܗܝ؛ ܩܵܢܘܿܢܵܐ ܠܥܵܠܲܡ ܝܼܠܹܗ ܓܵܘ ܒܢܲܝ̈ ܝܼܣܪܵܝܹܠ.
35ܐܵܗܵܐ ܝܠܹܗ ܣܵܗܡܵܐ ܕܐܲܗܪܘܿܢ ܘܕܒܢܘܿܢܘܼ̈ܗܝ ܡ̣ܢ ܕܸܒ݂ܚܹ̈ܐ ܕܢܘܼܪܵܐ ܕܡܵܪܝܵܐ، ܒܝܵܘܡܵܐ ܕܦܵܝܫܝܼ ܣܝܼܡܹܐ ܠܸܥܒ݂ܵܕܵܐ ܟܵܗܢܘܼܬܵܐ ܠܡܵܪܝܵܐ، 36ܗ̇ܘ ܕܦܩܝܼܕ ܠܹܗ ܡܵܪܝܵܐ ܠܒܢܲܝ̈ ܝܼܣܪܵܝܹܠ ܕܝܵܗ݇ܒ݂ܝܼ ܠܗܘܿܢ ܒܝܵܘܡܵܐ ܕܡܫܝܼܚܲܝ ܠܹܗ ܟܵܗܢܹ̈ܐ. ܐܵܗܵܐ ܩܵܢܘܿܢܵܐ ܝܠܹܗ ܠܥܵܠܲܡ.‘“ 37ܐܵܗܵܐ ܢܵܡܘܿܣܵܐ ܒܘܼܬ ܕܸܒ݂ܚܵܐ ܡܘܼܩܕܵܐ ܝܠܹܗ، ܘܕܸܒ݂ܚܵܐ ܕܕܲܚܠܵܐ، ܘܕܸܒ݂ܚܵܐ ܕܚܛܝܼܬܵܐ، ܘܕܸܒ݂ܚܵܐ ܕܓܢܵܗܵܐ، ܘܕܸܒ݂ܚܹ̈ܐ ܕܣܝܵܡܬܵܐ، ܘܕܸܒ݂ܚܹ̈ܐ ܕܫܠܵܡܵܐ. 38ܐܲܢܹܐ ܦܘܼܩܕܵܢܹ̈ܐ ܝܘܼܗ݇ܒܲܝ ܠܹܗ ܡܵܪܝܵܐ ܠܡܘܼܫܹܐ ܒܛܘܼܪܵܐ ܕܣܝܼܢܲܝ، ܒܗ̇ܘ ܝܵܘܡܵܐ ܕܦܩܝܼܕ ܠܹܗ ܠܒܢܲܝ̈ ܝܼܣܪܵܝܹܠ ܕܡܲܩܪܸܒ݂ܝܼ ܕܸܒ݂ܚܲܝ̈ܗܝ ܠܡܵܪܝܵܐ ܓܵܘ ܒܲܪܝܼܵܐ ܕܣܝܼܢܲܝ.“
Currently Selected:
ܟܗܢ̈ܐ 7: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
