ܟܗܢ̈ܐ 6
6
ܕܸܒ݂ܚܵܐ ܒܘܼܬ ܓܢܵܗܵܐ
1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ ܘܐ݇ܡܝܼܪܹܗ، 2”ܐܸܢ ܚܲܕ ܥܵܒܹܕ ܓܢܵܗܵܐ ܩܵܕ݇ܡ ܡܵܪܝܵܐ ܒܝܲܕ ܕܲܓܵܠܬܵܐ ܠܫܒ݂ܵܒܹܗ ܒܘܼܬ ܗܲܝܡܵܢܬܵܐ ܕܦܝܼܫܬܵܐ ܝܗ݇ܘܵܐ ܣܘܼܦܝܼܬܵܐ ܒܝܼܹܗ، ܘܐܵܡܹܪ ܕܦܝܼܫܬܵܐ ܝܠܵܗ̇ ܓܢܝܼܒ݂ܬܵܐ ܝܲܢ ܘܛܠܝܼܩܬܵܐ، ܝܲܢ ܥܲܠܕܹܐ ܠܫܒ݂ܵܒܹܗ، 3ܝܲܢ ܗܵܘܹܐ ܡܘܼܫ݇ܟ̰ܚܵܐ ܡܸܢܕܝܼ ܛܠܝܼܩܵܐ، ܐܝܼܢܵܐ ܕܲܓܸܠ ܒܘܼܬ ܕܝܼܹܗ ܬܚܘܿܬ ܡܵܘܡܝܼܬܵܐ؛ ܝܲܢ ܚܵܛܹܐ ܒܟܠ ܡܸܢܕܝܼ ܠܐ݇ܢܵܫܹ̈ܐ ܥܵܒ݂ܕܝܼ ܚܛܝܼܬܵܐ ܒܝܼܲܝܗܝ، 4ܐܸܢ ܗܲܕܟ݂ܵܐ ܥܵܒܹܕ ܚܛܝܼܬܵܐ، ܡܲܕܸܪ ܡܸܢܕܝܼ ܕܝܼܗ݇ܘܵܐ ܓܢܝܼܒܹܗ ܝܲܢ ܟ̰ܠܝܼܓ̰ܹܗ، ܝܲܢ ܗܵܘܝܵܐ ܗܲܝܡܵܢܬܵܐ ܣܘܼܦܝܼܬܵܐ ܒܝܼܹܗ، ܝܲܢ ܡܸܢܕܝܼ ܛܠܝܼܩܵܐ ܕܦܝܼܫܵܐ ܝܠܹܗ ܡܫ݇ܟ̰ܝܼܚܵܐ، 5ܝܲܢ ܡܸܢܕܝܼ ܕܫܩܝܼܠܵܐ ܝܗ݇ܘܵܐ ܒܕܘܼܓܠܵܐ ܬܚܘܿܬ ܡܵܘܡܝܼܬܵܐ. ܡܲܕܸܪܹܗ ܒܡܸܠܝܘܼܬܹܗ، ܘܡܲܙܝܸܕ ܥܲܠܘܼܗܝ ܚܲܕ ܚܡܝܼܫܵܝܵܐ ܘܡܲܕܸܪܹܗ ܠܡܵܪܹܗ، ܒܝܵܘܡܵܐ ܕܡܲܩܪܸܒ݂ ܕܸܒ݂ܚܵܐ ܕܚܛܝܼܬܵܐ. 6ܗ̇ܝܓܵܗ ܡܲܝܬܹܐ ܠܟܸܣ ܟܵܗܢܵܐ ܕܸܒ݂ܚܵܐ ܕܓܢܵܗܵܐ ܠܡܵܪܝܵܐ، ܒܲܪܥܵܢܵܐ ܕܠܵܐ ܠܲܟܵܐ ܡ̣ܢ ܦܸܣܩܵܐ، ܒܛܝܼܡܵܐ ܠܚܝܼܡܵܐ ܠܕܸܒ݂ܚܵܐ ܕܓܢܵܗܵܐ؛ 7ܘܥܵܒܹܕ ܚܘܼܣܵܝܵܐ ܐܸܠܹܗ ܟܵܗܢܵܐ ܩܵܕ݇ܡ ܡܵܪܝܵܐ، ܘܒܸܬ ܦܵܐܹܫ ܦܘܼܚܠܵܐ ܡ̣ܢ ܟܠ ܡܸܢܕܝܼ ܕܥܵܒܹܕ ܘܗܵܘܹܐ ܡܵܪܹܐ ܓܢܵܗܵܐ ܒܝܼܹܗ.“
ܕܸܒ݂ܚܵܐ ܡܘܼܩܕܵܐ
8ܘܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܒܹܐܡܵܪܵܐ، 9”ܦܲܩܸܕ ܠܐܲܗܪܘܿܢ ܘܠܒܢܘܿܢܘܼ̈ܗܝ، ܘܐ݇ܡܘܿܪ ܐܸܠܲܝܗܝ، ܐܵܗܵܐ ܝܠܹܗ ܢܵܡܘܿܣܵܐ ܕܕܸܒ݂ܚܵܐ ܡܘܼܩܕܵܐ: ܕܸܒ݂ܚܵܐ ܗܵܘܹܐ ܡܘܼܬܒ݂ܵܐ ܥܲܠ ܡܲܕܒܚܵܐ ܟܠܹܗ ܠܲܝܠܹܐ ܗܲܠ ܨܲܦܪܵܐ، ܘܢܘܼܪܵܐ ܕܥܲܠ ܡܲܕܒܚܵܐ ܗܵܘܹܐ ܒܸܠܗܵܝܵܐ ܥܲܠܘܼܗܝ. 10ܠܵܒܹܫ ܟܵܗܢܵܐ ܠܒ݂ܝܼܫܬܹܗ ܕܟܸܬܵܢܵܐ، ܘܬܘܼܢܒܵܢܹ̈ܐ ܕܟܸܬܵܢܵܐ، ܘܫܵܩܹܠ ܠܹܗ ܩܸܛܡܵܐ ܕܕܸܒ݂ܚܵܐ ܕܡܘܼܩܕܵܐ ܝܠܹܗ ܢܘܼܪܵܐ ܥܲܠ ܡܲܕܒܚܵܐ، ܘܡܲܬܸܒ݂ ܠܹܗ ܥܲܠ ܚܲܕ ܓܹܒܵܐ ܕܡܲܕܒܚܵܐ. 11ܗ̇ܝܓܵܗ ܫܲܠܸܚ ܠܵܗ̇ ܠܒ݂ܝܼܫܬܹܗ، ܘܠܵܒܹܫ ܓ̰ܘܼܠܹ̈ܐ ܐ݇ܚܹܪ̈݇ܢܹܐ، ܘܦܲܠܸܛ ܠܹܗ ܩܸܛܡܵܐ ܠܒܲܕܲܪ ܡ̣ܢ ܡܲܫܪܝܼܬܵܐ ܠܕܘܼܟܵܐ ܕܟ݂ܝܼܬܵܐ. 12ܘܢܘܼܪܵܐ ܕܥܲܠ ܡܲܕܒܚܵܐ ܗܵܘܹܐ ܒܸܠܗܵܝܵܐ ܐܲܡܝܼܢܵܐܝܼܬ، ܠܵܐ ܐܵܟ̰ܹܡ. ܘܡܲܬܸܒ݂ ܥܲܠܘܼܗܝ ܟܵܗܢܵܐ ܩܲܝܣܹ̈ܐ ܟܠ ܨܲܦܪܵܐ، ܘܡܲܪܝܸܙ ܥܲܠܘܼܗܝ ܕܸܒ݂ܚܵܐ ܡܘܼܩܕܵܐ، ܘܡܲܩܸܕ ܥܲܠܘܼܗܝ ܬܲܪܒܵܐ ܕܕܸܒ݂ܚܵܐ ܕܫܠܵܡܵܐ. 13ܢܘܼܪܵܐ ܗܵܘܹܐ ܐܲܡܝܼܢܵܐܝܼܬ ܒܸܠܗܵܝܵܐ ܥܲܠ ܡܲܕܒܚܵܐ؛ ܠܵܐ ܟ̰ܵܡܹܥ.
ܕܸܒ݂ܚܵܐ ܕܕܲܚܠܵܐ
14”ܐܵܗܵܐ ܝܠܹܗ ܢܵܡܘܿܣܵܐ ܕܕܸܒ݂ܚܵܐ ܕܕܲܚܠܵܐ: ܡܲܩܪܸܒ݂ܝܼ ܠܹܗ ܠܡܵܪܝܵܐ ܒܢܘܿܢܹ̈ܐ ܕܐܲܗܪܘܿܢ، ܩܵܕ݇ܡ ܡܲܕܒܚܵܐ. 15ܘܫܵܩܹܠ ܚܲܕ ܡܸܢܲܝܗܝ ܚܲܕ ܩܛܝܼܪܵܐ ܡ̣ܢ ܩܲܡܚܵܐ ܪܲܩܝܼܩܵܐ ܕܕܲܚܠܵܐ، ܘܡ̣ܢ ܡܸܫܚܵܐ ܘܟܠܵܗ̇ ܠܒ݂ܘܿܢ݇ܬܵܐ ܕܝܼܠܵܗ̇ ܥܲܠ ܩܘܼܪܒܵܢܵܐ ܕܕܲܚܠܵܐ، ܘܡܲܩܸܕ ܠܗܘܿܢ ܥܲܠ ܡܲܕܒܚܵܐ، ܪܹܝܚܵܐ ܒܲܣܝܼܡܵܐ، ܕܘܼܟ݂ܪܵܢܵܐ ܠܡܵܪܝܵܐ. 16ܘܡܸܢܕܝܼ ܕܙܵܐܹܕ ܐܵܟ݂ܠܝܼ ܠܹܗ ܐܲܗܪܘܿܢ ܘܒܢܘܿܢܘܼ̈ܗܝ. ܦܲܛܝܼܪܹ̈ܐ ܐܵܟ݂ܠܝܼ ܠܹܗ، ܒܕܘܼܟܵܐ ܩܲܕܝܼܫܬܵܐ ܓܵܘ ܕܵܪܬܵܐ ܕܡܲܫܟܲܢ ܘܲܥܕܵܐ ܐܵܟ݂ܠܝܼ ܠܹܗ. 17ܠܵܐ ܦܵܐܹܫ ܝܸܦܝܵܐ ܒܚܡܝܼܪܵܐ. ܐܵܢܵܐ ܝܘܼܗ݇ܒܹܗ ܝܘܸܢ ܐܸܠܲܝܗܝ ܐܲܝܟ݂ ܣܵܗܡܲܝܗܝ ܡ̣ܢ ܕܸܒ݂ܚܹ̈ܐ ܥܒ݂ܝܼܕܹܐ ܒܢܘܼܪܵܐ. ܩܕܘܿܫ ܩܘܼܕܫܹ̈ܐ ܝܠܹܗ، ܐܲܝܟ݂ ܕܸܒ݂ܚܵܐ ܕܚܛܝܼܬܵܐ ܘܐܲܝܟ݂ ܕܸܒ݂ܚܵܐ ܕܓܢܵܗܵܐ. 18ܟܠ ܐܘܼܪܙܵܐ ܡ̣ܢ ܒܢܲܝ̈ ܐܲܗܪܘܿܢ ܡܵܨܹܐ ܐܵܟܹܠ ܡܸܢܹܗ. ܩܵܢܘܿܢܵܐ ܥܵܠܡܝܼܢܵܝܵܐ ܝܠܹܗ ܠܬܵܘܠܕܵܬܵܘ̈ܟ݂ܘܿܢ، ܡ̣ܢ ܕܸܒ݂ܚܹ̈ܐ ܡܘܼܩܪܸ̈ܒܹܐ ܒܝܲܕ ܢܘܼܪܵܐ ܠܡܵܪܝܵܐ. ܟܠ ܡ̇ܢ ܕܕܵܩܹܪ ܒܝܼܹܗ ܒܸܬ ܦܵܐܹܫ ܩܘܼܕܫܵܐ.“
ܕܸܒ݂ܚܵܐ ܩܵܐ ܩܵܕܲܫܬܵܐ ܕܟܵܗܢܵܐ
19ܘܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، 20”ܐܵܗܵܐ ܝܠܹܗ ܕܸܒ݂ܚܵܐ ܕܡܲܩܪܸܒ݂ܝܼ ܠܹܗ ܐܲܗܪܘܿܢ ܘܒܢܘܿܢܘܼ̈ܗܝ ܠܡܵܪܝܵܐ ܒܝܵܘܡܵܐ ܕܗ̇ܘ ܦܵܐܹܫ ܡܫܝܼܚܵܐ ܐܲܝܟ݂ ܕܸܒ݂ܚܵܐ ܥܝܵܕܵܝܵܐ: ܚܲܕ ܥܣܝܼܪܵܝܵܐ ܕܐܹܦܵܐ ܩܲܡܚܵܐ ܢܚܝܼܠܵܐ، ܦܲܠܓܹܗ ܒܨܲܦܪܵܐ ܘܦܲܠܓܹܗ ܒܪܲܡܫܵܐ. 21ܒܲܫܠܸܬ ܠܹܗ ܒܡܸܫܚܵܐ ܓܵܘ ܬܵܘܵܐ. ܓܵܒ݂ܠܹܬ ܠܹܗ ܨܦܵܝܝܼ ܒܥܘܼܕܵܠܹ̈ܐ، ܘܥܵܒ݂ܕܹܬ ܠܹܗ ܩܸܛܥܵܛܹ̈ܐ، ܘܡܲܩܪܸܒܸܬ ܠܹܗ ܪܹܝܚܵܐ ܒܲܣܝܼܡܵܐ ܠܡܵܪܝܵܐ. 22ܘܟܵܗܢܵܐ ܡ̣ܢ ܒܢܘܿܢܹ̈ܐ ܕܐܲܗܪܘܿܢ ܕܝܼܠܹܗ ܡܫܝܼܚܵܐ ܠܸܫܩܵܠܵܐ ܫܵܘܦܹܗ ܡܲܩܪܸܒ݂ ܠܹܗ ܠܡܵܪܝܵܐ ܐܲܝܟ݂ ܩܵܢܘܿܢܵܐ ܥܵܠܡܝܼܢܵܝܵܐ. ܟܠܹܗ ܦܵܐܹܫ ܡܘܼܩܕܵܐ. 23ܟܠ ܕܸܒ݂ܚܵܐ ܕܕܲܚܠܵܐ ܕܟܵܗܢܵܐ ܦܵܐܹܫ ܟܠܹܗ ܡܘܼܩܕܵܐ؛ ܠܵܐ ܦܵܐܹܫ ܐ݇ܟ݂ܝܼܠܵܐ.“
ܕܸܒ݂ܚܵܐ ܕܚܛܝܼܬܵܐ
24ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ ܘܐ݇ܡܝܼܪܹܗ، 25”ܗܲܡܙܸܡ ܥܲܡ ܐܲܗܪܘܿܢ ܘܥܲܡ ܒܢܘܿܢܘܼ̈ܗܝ ܘܐ݇ܡܘܿܪ ܐܸܠܲܝܗܝ، ’ܐܵܗܵܐ ܝܠܹܗ ܢܵܡܘܿܣܵܐ ܕܕܸܒ݂ܚܵܐ ܕܚܛܝܼܬܵܐ: ܒܕܘܼܟܵܐ ܕܦܵܐܹܫ ܦܪܝܼܡܵܐ ܕܸܒ݂ܚܵܐ ܡܘܼܩܕܵܐ، ܬܵܡܵܐ ܦܵܐܹܫ ܦܪܝܼܡܵܐ ܐܘܼܦ ܕܸܒ݂ܚܵܐ ܕܚܛܝܼܬܵܐ ܩܵܕ݇ܡ ܡܵܪܝܵܐ. ܩܕܘܿܫ ܩܘܼܕܫܹ̈ܐ ܝܠܹܗ ܗ̇ܘ. 26ܟܵܗܢܵܐ ܕܡܲܩܪܸܒ݂ ܠܹܗ ܕܸܒ݂ܚܵܐ ܕܚܛܝܼܬܵܐ ܐܵܟܹܠ ܠܹܗ. ܦܵܐܹܫ ܐ݇ܟ݂ܝܼܠܵܐ ܒܕܘܼܟܵܐ ܩܲܕܝܼܫܬܵܐ، ܓܵܘ ܕܵܪܬܵܐ ܕܡܲܫܟܲܢ ܘܲܥܕܵܐ. 27ܟܠ ܕܕܵܩܹܪ ܒܒܸܣܪܹܗ ܒܸܬ ܦܵܐܹܫ ܩܘܼܕܫܵܐ؛ ܘܐܸܢ ܡ̣ܢ ܕܸܡܹܗ ܢܵܕܹܐ ܥܲܠ ܠܒ݂ܝܼܫܬܵܐ، ܚܲܠܸܠܸܬ ܠܵܗ̇ ܒܕܘܼܟܵܐ ܩܲܕܝܼܫܬܵܐ. 28ܡܵܐܢܵܐ ܕܦܲܚܵܪܵܐ ܕܦܝܼܫܵܐ ܝܠܹܗ ܒܘܼܫܠܵܐ ܓܵܘܹܗ ܦܵܐܹܫ ܬܒ݂ܝܼܪܵܐ. ܐܸܢ ܓܵܘ ܡܵܐܢܵܐ ܕܢܚܵܫܵܐ ܗܵܘܹܐ ܒܘܼܫܠܵܐ، ܦܵܐܹܫ ܡܪܝܼܩܵܐ ܘܚܘܼܠܸܠܵܐ ܒܡ̈ܝܼܵܐ. 29ܟܠ ܐܘܼܪܙܵܐ ܡ̣ܢ ܒܲܝܬܵܐ ܕܟܵܗܢܹ̈ܐ ܡܵܨܹܐ ܐܵܟܹܠ ܡܸܢܹܗ؛ ܩܕܘܿܫ ܩܘܼܕܫܹ̈ܐ ܝܠܹܗ. 30ܐܝܼܢܵܐ ܟܠ ܕܸܒ݂ܚܵܐ ܕܚܛܝܼܬܵܐ ܕܕܸܡܹܗ ܦܝܼܫܵܐ ܝܠܹܗ ܡܘܼܐܬܝܵܐ ܓܵܘ ܡܲܫܟܲܢ ܘܲܥܕܵܐ ܠܸܥܒ݂ܵܕܵܐ ܚܘܼܣܵܝܵܐ ܓܵܘ ܡܲܩܕܫܵܐ، ܠܵܐ ܦܵܐܹܫ ܐ݇ܟ݂ܝܼܠܵܐ؛ ܒܢܘܼܪܵܐ ܦܵܐܹܫ ܡܘܼܩܕܵܐ.
Currently Selected:
ܟܗܢ̈ܐ 6: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
