ܟܗܢ̈ܐ 5
5
ܚܛܝܼܬܵܐ ܘܦܘܼܚܵܠܵܐ ܕܚܛܝܼܬܵܐ
1”ܐܸܢ ܚܲܕ ܦܵܐܹܫ ܩܸܪܝܵܐ ܕܝܲܗ݇ܒܸܠ ܣܵܗܕܘܼܬܵܐ ܒܘܼܬ ܡܸܢܕܝܼ ܕܚܙܹܐ ܠܹܗ ܝܲܢ ܕܫܡܝܼܥ ܠܹܗ، ܘܡܲܚܦܸܠ ܠܝܼܵܗ݇ܒ݂ܵܐ ܣܵܗܕܘܼܬܵܐ، ܒܸܬ ܦܵܐܹܫ ܚܘܼܫܒܸܢܵܐ ܡܵܪܹܐ ܓܢܵܗܵܐ. 2ܝܲܢ ܐܸܢ ܐ݇ܢܵܫܵܐ ܕܵܩܹܪ ܒܡܸܢܕܝܼ ܛܲܡܐܵܐ، ܗܵܘܹܐ ܫܠܲܕܵܐ ܕܗܲܝܘܵܢ ܛܲܡܐܵܐ، ܝܲܢ ܫܠܲܕܵܐ ܕܩܸܢܝܵܢܵܐ ܛܲܡܐܵܐ، ܝܲܢ ܫܠܲܕܵܐ ܕܪܸܓ̰ܒܵܐ ܛܲܡܐܵܐ، ܐܵܦܸܢ ܕܗ̇ܘ ܠܵܐ ܝܵܕܹܥ، ܒܸܬ ܦܵܐܹܫ ܚܘܼܫܒܸܢܵܐ ܛܲܡܐܵܐ ܘܡܵܪܹܐ ܓܢܵܗܵܐ. 3ܝܲܢ ܐܸܢ ܕܵܩܹܪ ܒܛܲܡܐܘܼܬܵܐ ܕܒܲܪܢܵܫܵܐ، ܟܠ ܛܲܡܐܘܼܬܵܐ ܕܗܵܘܝܵܐ، ܐܘܼܦ ܐܸܢ ܕܝܼܠܵܗ̇ ܛܫܝܼܬܵܐ ܡܸܢܹܗ، ܟܲܕ ܝܵܕܹܥ ܒܸܬ ܦܵܐܹܫ ܡܵܪܹܐ ܓܢܵܗܵܐ. 4ܝܲܢ ܐܸܢ ܚܲܕ ܝܵܡܹܐ ܬܚܘܿܬ ܣܸܦܘܵܬܹ̈ܗ ܒܠܵܐ ܬܲܚܡܲܢܬܵܐ ܠܸܥܒ݂ܵܕܵܐ ܡܸܢܕܝܼ ܒܝܼܫܬܵܐ ܝܲܢ ܛܵܒ݂ܬܵܐ، ܡܵܪܹܐ ܓܢܵܗܵܐ ܝܠܹܗ، ܐܘܼܦ ܕܐܸܢ ܠܹܐ ܝܵܕܹܥ ܗ݇ܘܵܐ ܡܘܿܕܝܼ ܝܗ݇ܘܵܐ ܒܸܥܒ݂ܵܕܵܐ. 5ܟܲܕ ܗܵܘܹܐ ܡܵܪܹܐ ܓܢܵܗܵܐ ܒܚܲܕ ܡ̣ܢ ܐܲܢܹܐ ܚܛܝܼܵܬܹ̈ܐ، ܡܵܘܕܹܐ ܒܚܛܝܼܬܹܗ، 6ܘܡܲܝܬܹܐ ܕܸܒ݂ܚܵܐ ܕܓܢܵܗܵܐ ܠܡܵܪܝܵܐ ܒܘܼܬ ܚܛܝܼܬܵܐ ܕܥܒ݂ܝܼܕ ܠܹܗ، ܚܕܵܐ ܦܹܐܪܝܼܬܵܐ ܡ̣ܢ ܦܸܣܩܵܐ ܝܲܢ ܓܸܙܸܟܬܵܐ ܕܥܸܙܹ̈ܐ، ܐܲܝܟ݂ ܩܘܼܪܒܵܢܵܐ ܕܚܛܝܼܬܵܐ، ܘܥܵܒܹܕ ܟܵܗܢܵܐ ܚܘܼܣܵܝܵܐ ܐܸܠܹܗ ܡ̣ܢ ܚܛܝܼܬܹܗ.
7ܐܝܼܢܵܐ ܐܸܢ ܐܝܼܕܹܗ ܠܵܐ ܡܵܛܝܵܐ ܠܡܲܩܪܘܼܒܹܐ ܥܸܪܒܵܐ، ܡܲܝܬܹܐ ܕܸܒ݂ܚܵܐ ܒܘܼܬ ܚܛܝܼܬܵܐ ܕܥܒ݂ܝܼܕ ܠܹܗ، ܬܪܹܝ ܓܘܼܪ̈ܓܘܼܡܹܐ ܝܲܢ ܬܪܹܝ ܙܲܥܝܹ̈ܐ ܕܝܵܘܢܵܐ ܠܡܵܪܝܵܐ؛ ܚܲܕ ܩܵܐ ܕܸܒ݂ܚܵܐ ܕܚܛܝܼܬܵܐ، ܘܗ̇ܘ ܐ݇ܚܹܪ݇ܢܵܐ ܩܵܐ ܕܸܒ݂ܚܵܐ ܡܘܼܩܕܵܐ. 8ܡܲܝܬܹܐ ܠܗܘܿܢ ܠܟܸܣ ܟܵܗܢܵܐ، ܕܡܲܩܪܸܒ݂ ܩܵܕ݇ܡܵܝܬܵܐ ܠܗ̇ܘ ܕܝܼܠܹܗ ܕܸܒ݂ܚܵܐ ܩܵܐ ܚܛܝܼܬܵܐ. ܒܸܬ ܦܵܪܹܡ ܠܹܗ ܪܹܫܹܗ، ܐܝܼܢܵܐ ܠܵܐ ܩܵܛܹܥ ܠܹܗ ܒܚܕܵܐ ܓܵܗܵܐ ܡ̣ܢ ܩܕܵܠܹܗ، 9ܘܡܲܪܝܸܣ ܡ̣ܢ ܕܸܡܵܐ ܕܕܸܒ݂ܚܵܐ ܕܚܛܝܼܬܵܐ ܥܲܠ ܓܘܼܕܵܐ ܕܡܲܕܒܚܵܐ، ܘܦܵܝܫܵܢܵܐ ܕܕܸܡܵܐ ܦܵܐܹܫ ܨܘܼܢܨܸܠܵܐ ܥܲܠ ܒܸܢܝܲܬ ܕܡܲܕܒܚܵܐ، ܕܸܒ݂ܚܵܐ ܕܚܛܝܼܬܵܐ ܝܠܹܗ. 10ܗ̇ܝܓܵܗ ܗ̇ܘ ܕܬܪܹܝ ܥܵܒܹܕ ܠܹܗ ܕܸܒ݂ܚܵܐ ܡܘܼܩܕܵܐ ܐܲܝܟ݂ ܕܝܼܠܹܗ ܕܝܼܘܵܢ، ܡܲܩܪܸܒ݂ ܚܘܼܣܵܝܵܐ ܒܘܼܬ ܚܛܝܼܬܹܗ، ܘܒܸܬ ܦܵܐܹܫ ܦܘܼܚܠܵܐ.
11ܐܝܼܢܵܐ ܐܸܢ ܠܵܐ ܡܵܨܹܐ ܡܲܝܬܹܐ ܬܪܹܝ ܓܘܼܪ̈ܓܘܼܡܹܐ ܝܲܢ ܬܪܹܝ ܙܲܥܝܹ̈ܐ ܕܝܵܘܢܵܐ، ܗ̇ܝܓܵܗ ܡܲܝܬܹܐ ܕܸܒ݂ܚܵܐ ܩܵܐ ܚܛܝܼܬܹܗ ܚܲܕ ܥܣܝܼܪܵܝܵܐ ܕܐܹܦܵܐ ܩܲܡܚܵܐ ܪܲܩܝܼܩܵܐ ܩܵܐ ܕܸܒ݂ܚܵܐ ܕܚܛܝܼܬܵܐ. ܠܵܐ ܚܵܒܹܛ ܓܵܘܹܗ ܡܸܫܚܵܐ ܘܠܵܐ ܠܒ݂ܘܿܢ݇ܬܵܐ، ܣܵܒܵܒ ܕܸܒ݂ܚܵܐ ܕܚܛܝܼܬܵܐ ܝܠܹܗ. 12ܡܲܝܬܹܐ ܠܹܗ ܠܟܸܣ ܟܵܗܢܵܐ، ܘܟܵܗܢܵܐ ܫܵܩܹܠ ܚܲܕ ܩܛܝܼܪܵܐ ܡܸܢܹܗ ܩܵܐ ܕܘܼܟ݂ܪܵܢܵܐ، ܘܡܲܩܸܕ ܠܹܗ ܥܲܠ ܡܲܕܒܚܵܐ، ܥܲܠ ܕܸܒ݂ܚܵܐ ܕܢܘܼܪܵܐ ܠܡܵܪܝܵܐ. ܕܸܒ݂ܚܵܐ ܕܚܛܝܼܬܵܐ ܝܠܹܗ. 13ܘܥܵܒܹܕ ܚܘܼܣܵܝܵܐ ܐܸܠܹܗ ܟܵܗܢܵܐ ܒܘܼܬ ܚܛܝܼܬܹܗ ܕܥܒ݂ܝܼܕ ܠܹܗ ܒܚܲܕ ܡ̣ܢ ܐܲܢܹܐ ܚܛܝܼܵܬܹ̈ܐ، ܘܒܸܬ ܦܵܐܹܫ ܦܘܼܚܠܵܐ. ܦܵܝܫܵܢܵܐ ܗܵܘܹܐ ܩܵܐ ܟܵܗܢܵܐ ܐܲܝܟ݂ ܩܘܼܪܒܵܢܵܐ ܕܕܲܚܠܵܐ.“
ܕܸܒ݂ܚܵܐ ܒܘܼܬ ܓܢܵܗܵܐ ܕܚܲܛܵܝܵܐ
14ܘܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ ܘܐ݇ܡܝܼܪܹܗ، 15”ܟܠ ܐ݇ܢܵܫܵܐ ܕܚܵܛܹܐ ܒܚܸܠܛܵܐ ܒܚܲܕ ܡ̣ܢ ܡܸܢܕܝܼܵܢܹ̈ܐ ܩܘܼܕܫܹ̈ܐ ܕܡܵܪܝܵܐ، ܡܲܩܪܸܒ݂ ܕܸܒ݂ܚܵܐ ܕܓܢܵܗܵܐ ܠܡܵܪܝܵܐ، ܒܲܪܥܵܢܵܐ ܕܠܵܐ ܠܲܟܵܐ ܡ̣ܢ ܥܸܪ̈ܒܹܐ، ܒܛܝܼܡܵܐ ܠܚܝܼܡܵܐ ܕܣܹܐܡܵܐ، ܒܡܲܬܩܵܠܹ̈ܐ ܕܣܹܐܡܵܐ ܕܡܲܩܕܫܵܐ؛ ܩܘܼܪܒܵܢܵܐ ܕܓܢܵܗܵܐ ܝܠܹܗ. 16ܐܘܼܦ ܦܵܪܹܥ ܒܘܼܬ ܚܛܝܼܬܵܐ ܕܥܒ݂ܝܼܕ ܠܹܗ ܒܡܸܢܕܝܼܵܢܹ̈ܐ ܩܘܼܕܫܹ̈ܐ، ܘܡܲܙܝܸܕ ܥܲܠܘܼܗܝ ܚܲܕ ܚܡܝܼܫܵܝܵܐ ܕܛܝܼܡܹܗ، ܘܝܲܗ݇ܒܸܠ ܠܹܗ ܠܟܵܗܢܵܐ، ܘܟܵܗܢܵܐ ܥܵܒܹܕ ܚܘܼܣܵܝܵܐ ܐܸܠܹܗ ܒܝܲܕ ܒܲܪܥܵܢܵܐ ܕܝܼܠܹܗ ܕܸܒ݂ܚܵܐ ܕܓܢܵܗܵܐ، ܘܒܸܬ ܦܵܐܹܫ ܦܘܼܚܠܵܐ.
17ܐܸܢ ܚܲܕ ܠܵܐ ܒܝ݇ܕܲܥܬܵܐ ܫܵܡܹܛ ܚܲܕ ܡ̣ܢ ܦܘܼܩܕܵܢܹ̈ܐ ܕܡܵܪܝܵܐ، ܐܲܝܢܝܼ ܕܠܵܐ ܦܵܝܫܝܼ ܫܡܝܼܛܹܐ، ܡܵܪܹܐ ܓܢܵܗܵܐ ܝܠܹܗ، ܘܒܸܬ ܛܵܥܹܢ ܥܵܘܠܹܗ. 18ܡܲܝܬܹܐ ܗ̇ܘ ܠܟܸܣ ܟܵܗܢܵܐ ܚܲܕ ܒܲܪܥܵܢܵܐ ܕܠܵܐ ܠܲܟܵܐ ܡ̣ܢ ܥܸܪ̈ܒܹܐ، ܐܲܝܟ݂ ܛܝܼܡܵܐ ܠܚܝܼܡܵܐ ܩܵܐ ܕܸܒ݂ܚܵܐ ܕܓܢܵܗܵܐ. ܗܲܕܟ݂ܵܐ ܒܸܬ ܥܵܒܹܕ ܚܘܼܣܵܝܵܐ ܐܸܠܹܗ ܟܵܗܢܵܐ ܡ̣ܢ ܚܛܝܼܬܵܐ ܕܚܛܹܐ ܠܹܗ ܒܠܵܐ ܝ݇ܕܲܥܬܵܐ، ܘܒܸܬ ܦܵܐܹܫ ܦܘܼܚܠܵܐ. 19ܕܸܒ݂ܚܵܐ ܕܓܢܵܗܵܐ ܝܠܹܗ. ܡܵܪܹܐ ܓܢܵܗܵܐ ܝܠܹܗ ܩܵܕ݇ܡ ܡܵܪܝܵܐ.“
Currently Selected:
ܟܗܢ̈ܐ 5: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
