ܟܗܢ̈ܐ 2
2
ܕܸܒ݂ܚܵܐ ܕܕܲܚܠܵܐ
1”ܐܸܢ ܐ݇ܢܵܫܵܐ ܡܲܩܪܸܒ݂ ܕܸܒ݂ܚܵܐ ܠܡܵܪܝܵܐ، ܩܘܼܪܒܵܢܵܐ ܕܕܲܚܠܵܐ، ܗܵܘܹܐ ܩܘܼܪܒܵܢܹܗ ܩܲܡܚܵܐ ܢܚܝܼܠܵܐ، ܘܨܲܢܨܸܠ ܥܲܠܘܼܗܝ ܡܸܫܚܵܐ ܘܠܒ݂ܘܿܢ݇ܬܵܐ. 2ܡܲܝܬܹܐ ܠܹܗ ܠܟܸܣ ܟܵܗܢܹ̈ܐ، ܒܢܘܿܢܹ̈ܐ ܕܐܲܗܪܘܿܢ. ܡܵܠܹܐ ܠܵܗ̇ ܐܝܼܕܹܗ ܟܵܗܢܵܐ ܡ̣ܢ ܩܲܡܚܵܐ ܘܡܸܫܚܵܐ ܘܟܠܵܗ̇ ܠܒ݂ܘܿܢ݇ܬܵܐ، ܘܡܲܩܸܕ ܠܹܗ ܕܘܼܟ݂ܪܵܢܵܐ ܥܲܠ ܡܲܕܒܚܵܐ، ܕܸܒ݂ܚܵܐ ܕܢܘܼܪܵܐ، ܪܹܝܚܵܐ ܒܲܣܝܼܡܵܐ ܠܡܵܪܝܵܐ. 3ܘܡܸܢܕܝܼ ܕܙܵܐܹܕ ܡ̣ܢ ܩܘܼܪܒܵܢܵܐ ܕܕܲܚܠܵܐ ܗܵܘܹܐ ܩܵܐ ܐܲܗܪܘܿܢ ܘܒܢܘܿܢܘܼ̈ܗܝ؛ ܩܘܼܪܒܵܢܵܐ ܒܘܼܫ ܩܘܼܕܫܵܐ ܕܢܘܼܪܵܐ ܝܠܹܗ ܠܡܵܪܝܵܐ.
4ܘܟܲܕ ܡܲܩܪܸܒܸܬ ܩܘܼܪܒܵܢܵܐ ܕܕܲܚܠܵܐ ܝܸܦܝܵܐ ܓܵܘ ܬܲܢܘܼܪܵܐ، ܗܵܘܹܐ ܡ̣ܢ ܩܲܡܚܵܐ ܢܚܝܼܠܵܐ، ܓܸܪ̈ܕܲܝܹܐ ܠܵܐ ܚܡܝܼܥܹܐ ܓܒ݂ܝܼܠܹܐ ܒܡܸܫܚܵܐ، ܝܲܢ ܦܲܛܝܼܪܹ̈ܐ ܪ̈ܲܩܝܼܩܹܐ ܡܫܝܼܚܹܐ ܒܡܸܫܚܵܐ. 5ܘܐܸܢ ܡܲܩܪܸܒܸܬ ܩܘܼܪܒܵܢܵܐ ܕܕܲܚܠܵܐ ܒܘܼܫܠܵܐ ܓܵܘ ܬܵܘܵܐ، ܗܵܘܹܐ ܦܲܛܝܼܪܵܐ ܡ̣ܢ ܩܲܡܚܵܐ ܢܚܝܼܠܵܐ ܓܒ݂ܝܼܠܵܐ ܒܡܸܫܚܵܐ. 6ܥܵܒ݂ܕܹܬ ܠܹܗ ܩܸܛܥܵܛܹ̈ܐ ܙܥܘܿܪܹ̈ܐ ܘܨܲܢܨܸܠܸܬ ܥܲܠܘܼܗܝ ܡܸܫܚܵܐ، ܐܵܗܵܐ ܝܠܹܗ ܩܘܼܪܒܵܢܵܐ ܕܕܲܚܠܵܐ. 7ܘܐܸܢ ܩܘܼܪܒܵܢܵܐ ܕܕܲܚܠܵܐ ܗܵܘܹܐ ܒܘܼܫܠܵܐ ܓܵܘ ܩܘܼܣܲܪܬܵܐ، ܦܵܐܹܫ ܥܒ݂ܝܼܕܵܐ ܡ̣ܢ ܩܲܡܚܵܐ ܢܚܝܼܠܵܐ ܓܒ݂ܝܼܠܵܐ ܒܡܸܫܚܵܐ. 8ܩܘܼܪܒܵܢܵܐ ܕܕܲܚܠܵܐ ܕܦܝܼܫ ܠܹܗ ܥܒ݂ܝܼܕܵܐ ܡ̣ܢ ܐܲܢܹܐ ܡܸܢܕܝܼܵܢܹ̈ܐ ܡܲܝܬܸܝܬ ܠܹܗ ܠܡܵܪܝܵܐ ܘܡܲܩܪܸܒܸܬ ܠܹܗ ܠܟܸܣ ܟܵܗܢܵܐ، ܘܗ̇ܘ ܡܲܝܬܹܐ ܠܹܗ ܠܡܲܕܒܚܵܐ. 9ܘܫܵܩܹܠ ܟܵܗܢܵܐ ܚܲܕ ܣܵܗܡܵܐ ܡ̣ܢ ܩܘܼܪܒܵܢܵܐ ܕܕܲܚܠܵܐ ܩܵܐ ܕܘܼܟ݂ܪܵܢܵܐ، ܘܡܲܩܸܕ ܠܹܗ ܥܲܠ ܡܲܕܒܚܵܐ، ܕܸܒ݂ܚܵܐ ܕܢܘܼܪܵܐ ܝܠܹܗ، ܪܹܝܚܵܐ ܒܲܣܝܼܡܵܐ ܠܡܵܪܝܵܐ. 10ܘܡܸܢܕܝܼ ܕܙܵܐܹܕ ܡ̣ܢ ܩܘܼܪܒܵܢܵܐ ܕܕܲܚܠܵܐ ܗܵܘܹܐ ܩܵܐ ܐܲܗܪܘܿܢ ܘܒܢܘܿܢܘܼ̈ܗܝ. ܩܘܼܪܒܵܢܵܐ ܒܘܼܫ ܩܘܼܕܫܵܐ ܕܢܘܼܪܵܐ ܝܠܹܗ ܠܡܵܪܝܵܐ. 11ܟܠ ܩܘܼܪܒܵܢܵܐ ܕܕܲܚܠܵܐ ܕܡܲܩܪܸܒ݂ܝܼܬܘܿܢ ܠܡܵܪܝܵܐ ܠܵܐ ܦܵܐܹܫ ܥܒ݂ܝܼܕܵܐ ܒܚܡܝܼܪܵܐ، ܣܵܒܵܒ ܠܵܐ ܚܡܝܼܪܵܐ ܘܠܵܐ ܕܸܒ݂ܫܵܐ ܦܵܐܹܫ ܡܘܼܩܕܵܐ ܕܸܒ݂ܚܵܐ ܠܡܵܪܝܵܐ. 12ܡܲܩܪܸܒ݂ܝܼܬܘܿܢ ܠܹܗ ܠܩܘܼܪܒܵܢܵܐ ܕܪܹܫܝܼܬܵܐ ܠܡܵܪܝܵܐ، ܐܝܼܢܵܐ ܠܵܐ ܦܵܐܹܫ ܡܘܼܩܪܸܒ݂ܵܐ ܥܲܠ ܡܲܕܒܚܵܐ ܠܪܹܝܚܵܐ ܒܲܣܝܼܡܵܐ. 13ܟܠ ܩܘܼܪܒܵܢܵܐ ܕܕܲܚܠܵܐ ܕܡܲܩܪܸܒܸܬ ܠܹܗ ܦܵܐܹܫ ܡܘܼܡܠܸܚܵܐ ܒܡܸܠܚܵܐ؛ ܠܵܐ ܡܲܢܫܹܝܬ ܠܵܗ̇ ܡܸܠܚܵܐ ܕܘܲܥܕܵܐ ܠܐܲܠܵܗܘܼܟ݂ ܡ̣ܢ ܩܘܼܪܒܵܢܘܼܟ݂ ܕܕܲܚܠܵܐ؛ ܓܵܘ ܟܠܲܝܗܝ ܩܘܼܪ̈ܒܵܢܘܼܟ݂ ܕܵܪܹܝܬ ܡܸܠܚܵܐ.
14ܘܐܸܢ ܡܲܩܪܸܒܸܬ ܩܘܼܪܒܵܢܵܐ ܕܕܲܚܠܵܐ ܕܪܹܫܝܼܬܵܐ ܠܡܵܪܝܵܐ، ܡܲܩܪܸܒܸܬ ܠܹܗ ܦܪ̈ܝܼܟ݂ܵܬܹܐ، ܒܘܼܠܹ̈ܐ ܩܸܠܝܹ̈ܐ ܒܢܘܼܪܵܐ ܘܚܫܝܼܠܹ̈ܐ. 15ܨܲܢܨܸܠܸܬ ܥܲܠܘܼܗܝ ܡܸܫܚܵܐ ܘܡܲܬܒܸܬ ܥܲܠܘܼܗܝ ܠܒ݂ܘܿܢ݇ܬܵܐ؛ ܩܘܼܪܒܵܢܵܐ ܕܕܲܚܠܵܐ ܝܠܹܗ. 16ܘܡܲܩܸܕ ܟܵܗܢܵܐ ܚܲܕ ܣܵܗܡܵܐ ܡܸܢܹܗ ܩܵܐ ܕܘܼܟ݂ܪܵܢܵܐ، ܥܲܡ ܡܸܫܚܹܗ ܘܟܠܵܗ̇ ܠܒ݂ܘܿܢ݇ܬܹܗ. ܕܸܒ݂ܚܵܐ ܕܢܘܼܪܵܐ ܝܠܹܗ ܠܡܵܪܝܵܐ.
Currently Selected:
ܟܗܢ̈ܐ 2: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
