ܟܗܢ̈ܐ 1
1
ܕܸܒ݂ܚܵܐ ܡܘܼܩܕܵܐ
1ܘܩܪܹܐ ܠܹܗ ܡܵܪܝܵܐ ܠܡܘܼܫܹܐ، ܘܗܘܼܡܙܸܡ ܠܹܗ ܥܲܡܹܗ ܡ̣ܢ ܡܲܫܟܲܢ ܘܲܥܕܵܐ، ܘܐ݇ܡܝܼܪܹܗ، 2”ܗܲܡܙܸܡ ܥܲܡ ܒܢܲܝ̈ ܝܼܣܪܵܝܹܠ، ܘܐ݇ܡܘܿܪ ܐܸܠܲܝܗܝ، ’ܟܠ ܐ݇ܢܵܫܵܐ ܡܸܢܵܘܟ݂ܘܿܢ ܟܲܕ ܡܲܩܪܸܒ݂ ܩܘܼܪܒܵܢܵܐ ܠܡܵܪܝܵܐ، ܡܲܩܪܸܒ݂ ܠܹܗ ܡ̣ܢ ܒܸܩܪܵܐ ܝܲܢ ܡ̣ܢ ܦܸܣܩܵܐ ܕܥܸܪ̈ܒܹܐ. 3ܐܸܢ ܕܸܒ݂ܚܵܐ ܡܘܼܩܕܵܐ ܗܵܘܹܐ ܩܘܼܪܒܵܢܹܗ ܕܡܲܩܪܘܼܒܹܐ ܝܠܹܗ ܡ̣ܢ ܒܸܩܪܵܐ، ܡܲܩܪܸܒ݂ ܡܘܼܓ̰ܵܐ ܕܠܵܐ ܠܲܟܵܐ، ܘܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ ܡܲܩܪܸܒ݂ ܠܹܗ، ܕܦܵܐܹܫ ܩܘܼܒܠܵܐ ܩܵܕ݇ܡ ܡܵܪܝܵܐ. 4ܡܲܬܸܒ݂ ܐܝܼܕܹܗ ܥܲܠ ܪܹܫܵܐ ܕܕܸܒ݂ܚܵܐ ܡܘܼܩܕܵܐ، ܘܒܸܬ ܦܵܐܹܫ ܩܘܼܒܠܵܐ ܡܸܢܹܗ ܐܲܝܟ݂ ܚܘܼܣܵܝܵܐ ܐܸܠܹܗ. 5ܘܦܵܪܹܡ ܠܹܗ ܡܘܼܓ̰ܵܐ ܩܵܕ݇ܡ ܡܵܪܝܵܐ، ܘܒܢܘܿܢܹ̈ܐ ܕܐܲܗܪܘܿܢ، ܟܵܗܢܹ̈ܐ، ܡܲܝܬܝܼ ܠܕܸܡܵܐ ܘܡܲܪܝܸܣܝܼ ܠܹܗ ܥܲܠ ܚܵܕܸܪ̈ܘܵܢܹܐ ܕܡܲܕܒܚܵܐ، ܕܝܼܠܹܗ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ. 6ܢܵܫܹܛ ܠܹܗ ܕܸܒ݂ܚܵܐ ܡܘܼܩܕܵܐ ܘܩܲܛܩܸܛ ܠܹܗ، 7ܘܥܵܒ݂ܕܝܼ ܒܢܘܿܢܹ̈ܐ ܕܐܲܗܪܘܿܢ ܟܵܗܢܹ̈ܐ ܢܘܼܪܵܐ، ܘܚܵܪܙܝܼ ܩܲܝܣܹ̈ܐ ܥܲܠ ܢܘܼܪܵܐ؛ 8ܘܚܵܪܙܝܼ ܒܢܘܿܢܹ̈ܐ ܕܐܲܗܪܘܿܢ، ܟܵܗܢܹ̈ܐ، ܠܩܸܛܥܵܛܹ̈ܐ، ܠܪܹܫܵܐ، ܘܠܬܲܪܒܵܐ ܥܲܠ ܩܲܝܣܹ̈ܐ ܕܝܼܢܵܐ ܥܲܠ ܢܘܼܪܵܐ، ܥܲܠ ܡܲܕܒܚܵܐ؛ 9ܐܝܼܢܵܐ ܗܲܕܵܡܘܼ̈ܗܝ ܓܵܘܵܝܹ̈ܐ ܘܫܵܩܵܢܘܼ̈ܗܝ ܚܲܠܸܠ ܠܗܘܿܢ ܡܲܩܪܸܒ݂ܵܢܵܐ ܒܡ̈ܝܼܵܐ، ܗ̇ܝܓܵܗ ܡܲܩܸܕ ܟܵܗܢܵܐ ܟܠܹܗ ܕܸܒ݂ܚܵܐ ܥܲܠ ܡܲܕܒܚܵܐ، ܕܸܒ݂ܚܵܐ ܡܘܼܩܕܵܐ، ܕܸܒ݂ܚܵܐ ܕܢܘܼܪܵܐ، ܪܹܝܚܵܐ ܒܲܣܝܼܡܵܐ ܠܡܵܪܝܵܐ.
10ܘܐܸܢ ܡ̣ܢ ܦܸܣܩܵܐ ܗܵܘܹܐ ܩܘܼܪܒܵܢܹܗ، ܠܕܸܒ݂ܚܵܐ ܡܘܼܩܕܵܐ، ܡ̣ܢ ܥܸܪ̈ܒܹܐ ܝܲܢ ܡ̣ܢ ܥܸܙܹ̈ܐ، ܕܸܟ݂ܪܵܐ ܕܠܵܐ ܠܲܟܵܐ ܡܲܩܪܸܒ݂ ܠܹܗ. 11ܘܦܵܪܹܡ ܠܹܗ ܥܲܠ ܓܹܒܵܐ ܕܓܲܪܒܝܵܐ ܡ̣ܢ ܡܲܕܒܚܵܐ ܩܵܕ݇ܡ ܡܵܪܝܵܐ، ܘܒܢܘܿܢܹ̈ܐ ܕܐܲܗܪܘܿܢ، ܟܵܗܢܹ̈ܐ، ܡܲܪܝܸܣܝܼ ܕܸܡܹܗ ܥܲܠ ܚܵܕܸܪ̈ܘܵܢܹܐ ܕܡܲܕܒܚܵܐ، 12ܘܩܲܛܩܸܛ ܠܹܗ ܠܩܸܛܥܵܛܹ̈ܐ، ܘܪܹܫܹܗ، ܘܬܲܪܒܹܗ، ܘܚܵܪܹܙ ܠܗܘܿܢ ܟܵܗܢܵܐ ܥܲܠ ܩܲܝܣܹ̈ܐ ܕܝܼܢܵܐ ܥܲܠ ܢܘܼܪܵܐ ܕܥܲܠ ܡܲܕܒܚܵܐ. 13ܘܗܲܕܵܡܘܼ̈ܗܝ ܓܵܘܵܝܹ̈ܐ ܘܫܵܩܵܢܘܼ̈ܗܝ ܚܲܠܸܠ ܠܗܘܿܢ ܟܵܗܢܵܐ ܒܡ̈ܝܼܵܐ، ܘܡܲܩܪܸܒ݂ ܠܹܗ ܟܠܹܗ، ܘܡܲܩܸܕ ܠܹܗ ܥܲܠ ܡܲܕܒܚܵܐ ܕܸܒ݂ܚܵܐ ܡܘܼܩܕܵܐ. ܕܸܒ݂ܚܵܐ ܕܢܘܼܪܵܐ ܝܠܹܗ، ܪܹܝܚܵܐ ܒܲܣܝܼܡܵܐ ܠܡܵܪܝܵܐ.
14ܐܸܢ ܡ̣ܢ ܦܵܪܲܚܬܵܐ ܝܠܹܗ ܕܸܒ݂ܚܵܐ ܡܘܼܩܕܵܐ ܠܡܵܪܝܵܐ، ܗ̇ܝܓܵܗ ܡܲܩܪܸܒ݂ ܡ̣ܢ ܓܘܼܪ̈ܓܘܼܡܹܐ، ܝܲܢ ܡ̣ܢ ܙܲܥܝܹ̈ܐ ܕܝܵܘܢܵܐ. 15ܡܲܝܬܹܐ ܠܹܗ ܟܵܗܢܵܐ ܠܡܲܕܒܚܵܐ ܘܩܵܛܹܥ ܠܹܗ ܪܹܫܹܗ ܘܡܲܩܸܕ ܠܹܗ ܥܲܠ ܡܲܕܒܚܵܐ، ܘܕܸܡܹܗ ܦܵܐܹܫ ܨܘܼܢܨܸܠܵܐ ܥܲܠ ܓܘܼܕܵܐ ܕܡܲܕܒܚܵܐ. 16ܘܫܵܩܹܠ ܟܵܗܢܵܐ ܦܸܣܘܼܪܬܹܗ ܥܲܡ ܡܲܥܝܘܼ̈ܗܝ، ܘܪܲܦܹܐ ܠܗܘܿܢ ܕܸܦܢܵܐ ܕܡܲܕܒܚܵܐ ܠܵܡܲܕܢܚܵܐ، ܒܕܘܼܟܵܐ ܕܩܸܛܡܵܐ. 17ܟ̰ܵܠܹܦ ܠܗܘܿܢ ܓܘܼܠܦܵܢܘܼ̈ܗܝ ܐܝܼܢܵܐ ܠܵܐ ܩܲܛܩܸܛ ܠܹܗ ܟܠܹܗ. ܡܲܩܸܕ ܠܹܗ ܟܵܗܢܵܐ ܥܲܠ ܡܲܕܒܚܵܐ، ܥܲܠ ܩܲܝܣܹ̈ܐ ܕܝܼܢܵܐ ܥܲܠ ܢܘܼܪܵܐ؛ ܕܸܒ݂ܚܵܐ ܡܘܼܩܕܵܐ ܝܠܹܗ، ܕܸܒ݂ܚܵܐ ܕܢܘܼܪܵܐ، ܪܹܝܚܵܐ ܒܲܣܝܼܡܵܐ ܠܡܵܪܝܵܐ.
Currently Selected:
ܟܗܢ̈ܐ 1: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
