ܟܗܢ̈ܐ 3
3
ܩܘܼܪܒܵܢܵܐ ܕܫܠܵܡܵܐ
1”ܘܐܸܢ ܐ݇ܢܵܫܵܐ ܡܲܩܪܸܒ݂ ܕܸܒ݂ܚܵܐ ܕܩܘܼܪܒܵܢܵܐ ܕܫܠܵܡܵܐ، ܐܸܢ ܡܲܩܪܸܒ݂ ܠܹܗ ܡ̣ܢ ܒܸܩܪܵܐ، ܐܘܼܪܙܵܐ ܝܲܢ ܢܸܩܒ݂ܵܐ، ܡܲܩܪܸܒ݂ ܠܹܗ ܕܠܵܐ ܠܲܟܵܐ ܩܵܕ݇ܡ ܡܵܪܝܵܐ. 2ܡܲܬܸܒ݂ ܐܝܼܕܹܗ ܥܲܠ ܪܹܫܵܐ ܕܕܸܒ݂ܚܹܗ ܘܦܵܪܹܡ ܠܹܗ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ، ܘܡܲܪܝܸܣܝܼ ܟܵܗܢܹ̈ܐ ܒܢܘܿܢܹ̈ܐ ܕܐܲܗܪܘܿܢ ܠܕܸܡܵܐ ܥܲܠ ܚܵܕܸܪ̈ܘܵܢܹܐ ܕܡܲܕܒܚܵܐ؛ 3ܡ̣ܢ ܕܸܒ݂ܚܵܐ ܕܩܘܼܪܒܵܢܵܐ ܕܫܠܵܡܵܐ ܡܲܩܪܸܒ݂ ܕܸܒ݂ܚܵܐ ܕܢܘܼܪܵܐ ܠܡܵܪܝܵܐ، ܬܲܪܒܵܐ ܕܟܹܐ ܟܲܣܹܐ ܠܗܲܕܵܡܹ̈ܐ ܓܵܘܵܝܹ̈ܐ، ܘܟܠ ܬܲܪܒܵܐ ܕܝܼܠܹܗ ܥܲܠ ܗܲܕܵܡܹ̈ܐ ܓܵܘܵܝܹ̈ܐ، 4ܘܬܲܪܬܹܝ ܟܸܠܝܵܬܹ̈ܐ ܘܟܠܹܗ ܬܲܪܒܵܐ ܕܝܼܠܹܗ ܥܲܠܲܝܗܝ ܘܥܲܠ ܦܘܼܫܬܹ̈ܐ، ܘܚܨܵܪ ܟܲܒ݂ܕܵܐ ܥܲܡ ܟܸܠܝܵܬܹ̈ܐ، ܫܵܩܹܠ ܠܗܘܿܢ، 5ܘܡܲܩܕܝܼ ܠܹܗ ܟܵܗܢܹ̈ܐ ܒܢܘܿܢܹ̈ܐ ܕܐܲܗܪܘܿܢ ܥܲܠ ܡܲܕܒܚܵܐ، ܥܲܠ ܕܸܒ݂ܚܵܐ ܡܘܼܩܕܵܐ ܕܝܼܠܹܗ ܒܪܹܫܵܐ ܕܩܲܝܣܹ̈ܐ ܕܥܲܠ ܢܘܼܪܵܐ؛ ܕܸܒ݂ܚܵܐ ܕܢܘܼܪܵܐ ܝܠܹܗ، ܪܹܝܚܵܐ ܒܲܣܝܼܡܵܐ ܠܡܵܪܝܵܐ.
6ܐܝܼܢܵܐ ܐܸܢ ܩܘܼܪܒܵܢܹܗ ܩܵܐ ܕܸܒ݂ܚܵܐ ܕܫܠܵܡܵܐ ܠܡܵܪܝܵܐ ܗܵܘܹܐ ܡ̣ܢ ܦܸܣܩܵܐ، ܡܲܩܪܸܒ݂ ܠܹܗ ܐܘܼܪܙܵܐ ܝܲܢ ܢܸܩܒ݂ܵܐ ܕܠܵܐ ܠܲܟܵܐ. 7ܐܸܢ ܡܲܩܪܸܒ݂ ܦܹܐܪܵܐ ܩܵܐ ܩܘܼܪܒܵܢܹܗ، ܡܲܩܪܸܒ݂ ܠܹܗ ܩܵܕ݇ܡ ܡܵܪܝܵܐ. 8ܘܡܲܬܸܒ݂ ܐܝܼܕܹܗ ܥܲܠ ܪܹܫܵܐ ܕܕܸܒ݂ܚܹܗ، ܘܦܵܪܹܡ ܠܹܗ ܩܵܕ݇ܡ ܡܲܫܟܲܢ ܘܲܥܕܵܐ. ܡܲܪܝܸܣܝܼ ܒܢܘܿܢܹ̈ܐ ܕܐܲܗܪܘܿܢ ܠܕܸܡܵܐ ܠܚܵܕܸܪ̈ܘܵܢܹܐ ܕܡܲܕܒܚܵܐ. 9ܡ̣ܢ ܕܸܒ݂ܚܵܐ ܕܩܘܼܪܒܵܢܵܐ ܕܫܠܵܡܵܐ، ܡܲܩܪܸܒ݂ ܕܸܒ݂ܚܵܐ ܕܢܘܼܪܵܐ ܠܡܵܪܝܵܐ ܬܲܪܒܹܗ، ܘܟܠܵܗ̇ ܐܹܠܝܼܬܵܐ ܢܵܫܹܛ ܠܵܗ̇ ܡ̣ܢ ܓܲܪܡܵܐ ܕܚܲܨܵܐ، ܘܬܲܪܒܵܐ ܕܟܲܣܹܐ ܠܗܲܕܵܡܹ̈ܐ ܓܵܘܵܝܹ̈ܐ، ܘܟܠܹܗ ܬܲܪܒܵܐ ܕܝܼܠܹܗ ܥܲܠ ܗܲܕܵܡܹ̈ܐ ܓܵܘܵܝܹ̈ܐ، 10ܘܠܬܲܪܬܹܝ ܟܸܠܝܵܬܹ̈ܐ ܘܬܲܪܒܵܐ ܕܥܲܠܲܝܗܝ ܘܕܥܲܠ ܦܘܼܫܬܹ̈ܐ، ܘܚܨܵܪ ܟܲܒ݂ܕܵܐ، ܕܫܵܩܹܠ ܥܲܡ ܟܸܠܝܵܬܹ̈ܐ. 11ܡܲܩܸܕ ܠܗܘܿܢ ܟܵܗܢܵܐ ܟܠ ܐܵܢܝܼ ܥܲܠ ܡܲܕܒܚܵܐ. ܠܲܚܡܵܐ ܕܕܸܒ݂ܚܵܐ ܝܠܹܗ ܒܢܘܼܪܵܐ ܠܡܵܪܝܵܐ.
12ܘܐܸܢ ܕܥܸܙܵܐ ܝܠܹܗ ܕܸܒ݂ܚܹܗ، ܡܲܩܪܸܒ݂ ܠܹܗ ܩܵܕ݇ܡ ܡܵܪܝܵܐ. 13ܡܲܬܸܒ݂ ܐܝܼܕܹܗ ܥܲܠ ܪܹܫܵܐ ܕܕܸܒ݂ܚܵܐ ܘܦܵܪܹܡ ܠܹܗ ܩܵܕ݇ܡ ܡܲܫܟܲܢ ܘܲܥܕܵܐ، ܘܡܲܪܝܸܣܝܼ ܒܢܘܿܢܹ̈ܐ ܕܐܲܗܪܘܿܢ ܠܕܸܡܵܐ ܥܲܠ ܚܵܕܸܪ̈ܘܵܢܹܐ ܕܡܲܕܒܚܵܐ. 14ܘܡܲܩܪܸܒ݂ ܡܸܢܹܗ ܩܘܼܪܒܵܢܵܐ، ܕܸܒ݂ܚܵܐ ܕܢܘܼܪܵܐ ܠܡܵܪܝܵܐ، ܬܲܪܒܵܐ ܕܟܹܐ ܟܲܣܹܐ ܠܗܲܕܵܡܹ̈ܐ ܓܵܘܵܝܹ̈ܐ ܘܟܠܹܗ ܬܲܪܒܵܐ ܕܝܼܠܹܗ ܥܲܠ ܗܲܕܵܡܹ̈ܐ ܓܵܘܵܝܹ̈ܐ، 15ܘܬܸܪܘܲܝܗܝ ܟܸܠܝܵܬܹ̈ܐ، ܘܬܲܪܒܵܐ ܕܝܼܠܹܗ ܥܲܠܲܝܗܝ ܘܥܲܠ ܦܘܼܫܬܹ̈ܐ، ܘܚܨܵܪ ܟܲܒ݂ܕܵܐ ܫܵܩܹܠ ܠܹܗ ܥܲܡ ܟܸܠܝܵܬܹ̈ܐ. 16ܡܲܩܸܕ ܠܗܘܿܢ ܟܵܗܢܵܐ ܥܲܠ ܡܲܕܒܚܵܐ. ܠܲܚܡܵܐ ܕܕܸܒ݂ܚܵܐ ܕܢܘܼܪܵܐ ܝܠܹܗ، ܪܹܝܚܵܐ ܒܲܣܝܼܡܵܐ. ܟܠܹܗ ܬܲܪܒܵܐ ܕܡܵܪܝܵܐ ܝܠܹܗ.
17ܩܵܢܘܿܢܵܐ ܕܥܵܠܲܡ ܝܠܹܗ ܠܕܵܘܪ̈ܵܘܟ݂ܘܿܢ ܒܟܠܹܗ ܡܲܥܡܪܵܘܟ݂ܘܿܢ: ܬܲܪܒܵܐ ܘܕܸܡܵܐ ܠܵܐ ܐܵܟ݂ܠܝܼܬܘܿܢ.“
Currently Selected:
ܟܗܢ̈ܐ 3: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
