ܟܗܢ̈ܐ 17
17
ܒܘܼܬ ܕܸܡܵܐ ܕܚܲܝܘܵܬܹ̈ܐ
1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܘܐ݇ܡܝܼܪܹܗ، 2”ܗܲܡܙܸܡ ܥܲܡ ܐܲܗܪܘܿܢ ܘܥܲܡ ܒܢܘܿܢܘܼ̈ܗܝ، ܘܥܲܡ ܟܠܲܝܗܝ ܒܢܲܝ̈ ܝܼܣܪܵܝܹܠ، ܘܐ݇ܡܘܿܪ ܐܸܠܲܝܗܝ، ’ܗܲܕܟ݂ܵܐ ܦܩܝܼܕܵܐ ܝܠܹܗ ܡܵܪܝܵܐ، 3ܟܠ ܐ݇ܢܵܫܵܐ ܡ̣ܢ ܒܢܲܝ̈ ܝܼܣܪܵܝܹܠ ܕܦܵܪܹܡ ܬܵܘܪܵܐ، ܝܲܢ ܥܸܪܒܵܐ، ܝܲܢ ܥܸܙܵܐ، ܓܵܘ ܡܲܫܪܝܼܬܵܐ ܝܲܢ ܠܒܲܕܲܪ ܡ̣ܢ ܡܲܫܪܝܼܬܵܐ، 4ܘܠܵܐ ܡܲܝܬܹܐ ܠܹܗ ܠܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ ܠܡܲܩܪܘܼܒܹܐ ܕܸܒ݂ܚܵܐ ܠܡܵܪܝܵܐ ܩܵܕ݇ܡ ܡܲܫܟܢܵܐ ܕܡܵܪܝܵܐ، ܕܸܡܵܐ ܦܵܐܹܫ ܚܘܼܫܒܸܢܵܐ ܠܗ̇ܘ ܐ݇ܢܵܫܵܐ، ܣܵܒܵܒ ܬܘܼܦܟ݂ܵܐ ܝܠܹܗ ܕܸܡܵܐ؛ ܦܵܐܹܫ ܩܛܝܼܥܵܐ ܗ̇ܘ ܐ݇ܢܵܫܵܐ ܡ̣ܢ ܓܵܘ ܥܲܡܹܗ. 5ܐܵܗܵܐ ܝܠܹܗ ܕܕܸܒ݂ܚܲܝ̈ܗܝ ܕܟܹܐ ܦܵܪܡܝܼ ܠܗܘܿܢ ܒܢܲܝ̈ ܝܼܣܪܵܝܹܠ ܠܡܵܪܝܵܐ ܓܵܘ ܕܸܫܬܵܐ ܦܬܘܼܚܬܵܐ، ܡܲܝܬܝܼ ܠܗܘܿܢ ܠܟܸܣ ܟܵܗܢܵܐ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ، ܘܕܵܒ݂ܚܝܼ ܠܗܘܿܢ ܕܸܒ݂ܚܹ̈ܐ ܕܫܠܵܡܵܐ ܠܡܵܪܝܵܐ؛ 6ܘܡܲܪܝܸܣ ܟܵܗܢܵܐ ܠܕܸܡܵܐ ܥܲܠ ܡܲܕܒܚܵܐ ܕܡܵܪܝܵܐ، ܒܬܲܪܥܵܐ ܕܡܲܫܟܲܢ ܘܲܥܕܵܐ، ܘܬܲܪܒܵܐ ܡܲܩܸܕ ܠܹܗ ܪܹܝܚܵܐ ܒܲܣܝܼܡܵܐ ܠܡܵܪܝܵܐ. 7ܘܐ݇ܚܹܪ݇ܢܵܐ ܠܵܐ ܕܵܒ݂ܚܝܼ ܕܸܒ݂ܚܹ̈ܐ ܠܫܹܐܕܹ̈ܐ، ܐܲܝܢܝܼ ܕܒܸܙܢܵܝܵܐ ܝܢܵܐ ܒܵܬ݇ܪܲܝܗܝ. ܐܵܗܵܐ ܩܵܢܘܿܢܵܐ ܝܠܹܗ ܐܸܠܲܝܗܝ ܠܥܵܠܲܡ، ܡ̣ܢ ܕܵܘܪܵܐ ܠܕܵܘܪܵܐ.‘“
ܕܲܠܩܘܼܒ݂ܠ ܕܐ݇ܟ݂ܵܠܬܵܐ ܕܕܸܡܵܐ
8ܐ݇ܡܘܿܪ ܐܸܠܲܝܗܝ، ”ܐܸܢ ܚܲܕ ܡ̣ܢ ܒܢܲܝ̈ ܝܼܣܪܵܝܹܠ، ܝܲܢ ܚܲܕ ܢܘܼܟ݂ܪܵܝܵܐ ܕܝܼܠܹܗ ܒܸܚܵܝܵܐ ܓܵܘܵܘܟ݂ܘܿܢ، ܕܵܒܹܚ ܩܘܼܪܒܵܢܵܐ ܡܘܼܩܕܵܐ ܝܲܢ ܕܸܒ݂ܚܵܐ، 9ܘܠܵܐ ܡܲܝܬܹܐ ܠܹܗ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ ܕܡܲܩܪܸܒ݂ ܠܹܗ ܠܡܵܪܝܵܐ، ܗ̇ܘ ܐ݇ܢܵܫܵܐ ܦܵܐܹܫ ܩܛܝܼܥܵܐ ܡ̣ܢ ܓܵܘ ܥܲܡܹܗ.
10ܘܐܸܢ ܚܲܕ ܡ̣ܢ ܒܢܲܝ̈ ܝܼܣܪܵܝܹܠ، ܝܲܢ ܚܲܕ ܡ̣ܢ ܢܘܼܟ݂ܪ̈ܵܝܹܐ ܕܝܼܢܵܐ ܒܸܚܵܝܵܐ ܓܵܘܵܘܟ݂ܘܿܢ ܐܵܟܹܠ ܕܸܡܵܐ، ܒܸܬ ܡܲܬܒܸܢ ܟܵܪܒܝܼ ܕܲܠܩܘܼܒ݂ܠܹܗ، ܘܒܸܬ ܩܵܛܥܹܢܹܗ ܡ̣ܢ ܓܵܘ ܥܲܡܹܗ. 11ܣܵܒܵܒ ܚܲܝܹ̈ܐ ܕܓܵܢܵܐ ܓܵܘ ܕܸܡܵܐ ܝܢܵܐ؛ ܘܝܘܼܗ݇ܒܹܗ ܝܘܸܢ ܕܸܡܵܐ ܐܸܠܵܘܟ݂ܘܿܢ ܕܥܵܒ݂ܕܝܼܬܘܿܢ ܚܘܼܣܵܝܵܐ ܒܘܼܬ ܚܛܝܼܵܬܵܘ̈ܟ݂ܘܿܢ؛ ܣܵܒܵܒ ܕܸܡܵܐ ܝܠܹܗ ܕܟܹܐ ܥܵܒܹܕ ܚܘܼܣܵܝܵܐ ܠܓܵܢܵܐ. 12ܒܘܼܬ ܐܵܗܵܐ ܐ݇ܡܝܼܪܝܼ ܠܒܢܲܝ̈ ܝܼܣܪܵܝܹܠ، ܕܐܘܼܦ ܚܲܕ ܡܸܢܵܘܟ݂ܘܿܢ ܠܵܐ ܐܵܟܹܠ ܕܸܡܵܐ، ܘܠܵܐ ܐܘܼܦ ܚܲܕ ܢܘܼܟ݂ܪܵܝܵܐ ܕܝܼܠܹܗ ܒܸܚܵܝܵܐ ܓܵܘܵܘܟ݂ܘܿܢ ܐܵܟܹܠ ܕܸܡܵܐ.
13ܘܐܸܢ ܚܲܕ ܡ̣ܢ ܒܢܲܝ̈ ܝܼܣܪܵܝܹܠ، ܝܲܢ ܚܲܕ ܢܘܼܟ݂ܪܵܝܵܐ ܕܝܼܠܹܗ ܒܸܚܵܝܵܐ ܓܵܘܵܘܟ݂ܘܿܢ ܨܵܐܹܕ ܚܲܕ ܗܲܝܘܵܢ ܝܲܢ ܛܲܝܪܵܐ ܠܹܐܟ݂ܵܠܵܐ، ܡܲܨܦܹܐ ܠܹܗ ܕܸܡܹܗ، ܘܟܲܣܹܐ ܠܹܗ ܒܥܲܦܪܵܐ. 14ܣܵܒܵܒ ܚܲܝܘܼܬܵܐ ܕܟܠ ܓܵܢܵܐ ܒܕܸܡܵܐ ܝܠܵܗ̇. ܒܘܼܬ ܐܵܗܵܐ ܐ݇ܡܝܼܪܝܼ ܠܒܢܲܝ̈ ܝܼܣܪܵܝܹܠ، ’ܠܵܐ ܐܵܟ݂ܠܝܼܬܘܿܢ ܕܸܡܵܐ ܕܗܸܟ̃ ܗܲܝܘܵܢ، ܣܵܒܵܒ ܚܲܝܘܼܬܵܐ ܕܟܠ ܓܵܢܵܐ ܒܕܸܡܵܐ ܝܠܵܗ̇. ܟܠ ܕܐܵܟܹܠ ܠܹܗ ܦܵܐܹܫ ܩܛܝܼܥܵܐ.‘
15ܟܠ ܕܐܵܟܹܠ ܡ̣ܢ ܦܲܓ݂ܪܵܐ ܕܗܲܝܘܵܢ ܡܝܼܬܵܐ ܒܓܵܢܹܗ، ܝܲܢ ܦܪܝܼܛܵܐ ܒܚܲܕ ܗܲܝܘܵܢ ܐ݇ܚܹܪ݇ܢܵܐ، ܐܸܢ ܒܪܘܿܢܵܐ ܕܐܲܬܪܵܐ ܝܠܹܗ ܝܲܢ ܢܘܼܟ݂ܪܵܝܵܐ، ܡܵܣܹܐ ܓ̰ܘܼܠܘܼ̈ܗܝ ܘܣܵܚܹܐ ܒܡ̈ܝܼܵܐ، ܘܦܵܐܹܫ ܛܲܡܐܵܐ ܗܲܠ ܪܲܡܫܵܐ؛ ܡ̣ܢ ܒܵܬ݇ܪ ܗܵܕܵܐ ܗܵܘܹܐ ܕܸܟ݂ܝܵܐ. 16ܐܝܼܢܵܐ ܐܸܢ ܠܵܐ ܡܵܣܹܐ ܓ̰ܘܼܠܘܼ̈ܗܝ ܘܚܲܠܸܠ ܦܲܓ݂ܪܹܗ، ܛܵܥܹܢ ܥܵܘܠܹܗ.“
Currently Selected:
ܟܗܢ̈ܐ 17: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
