ܟܗܢ̈ܐ 18
18
ܙܘܼܘܵܓܵܐ ܠܵܐ ܩܵܢܘܿܢܵܝܵܐ
1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܘܐ݇ܡܝܼܪܹܗ، 2”ܗܲܡܙܸܡ ܥܲܡ ܒܢܲܝ̈ ܝܼܣܪܵܝܹܠ، ܘܐ݇ܡܘܿܪ ܐܸܠܲܝܗܝ، ’ܐܵܢܵܐ ܝܘܸܢ ܡܵܪܝܵܐ ܐܲܠܵܗܵܘܟ݂ܘܿܢ. 3ܠܵܐ ܥܵܒ݂ܕܝܼܬܘܿܢ ܐܲܝܟ݂ ܕܟܹܐ ܥܵܒ݂ܕܝܼ ܐ݇ܢܵܫܹ̈ܐ ܒܐܲܪܥܵܐ ܕܡܸܨܪܹܝܢ، ܐܲܝܟܵܐ ܕܟܹܐ ܥܵܡܪܝܼܬܘܿܢ ܗ݇ܘܵܐ، ܘܠܵܐ ܥܵܒ݂ܕܝܼܬܘܿܢ ܐܲܝܟ݂ ܕܟܹܐ ܥܵܒ݂ܕܝܼ ܐ݇ܢܵܫܹ̈ܐ ܒܐܲܪܥܵܐ ܕܟܢܲܥܢ، ܐܲܝܟܵܐ ܕܐܵܢܵܐ ܠܲܒܘܼܠܵܘܟ݂ܘܿܢ ܝܘܸܢ. ܠܵܐ ܚܵܕܪܝܼܬܘܿܢ ܒܐܘܼܪ̈ܚܵܬܲܝܗܝ. 4ܫܵܠܡܝܼܬܘܿܢ ܠܕܝܼܘܵܢܝܼ̈ ܘܢܵܛܪܝܼܬܘܿܢ ܠܩܵܢܘܿܢܝܼ̈، ܘܚܵܕܪܝܼܬܘܿܢ ܒܝܼܲܝܗܝ. ܐܵܢܵܐ ܝܘܸܢ ܡܵܪܝܵܐ ܐܲܠܵܗܵܘܟ݂ܘܿܢ. 5ܢܵܛܪܝܼܬܘܿܢ ܠܗܘܿܢ ܩܵܢܘܿܢܝܼ̈ ܘܕܝܼܘܵܢܝܼ̈؛ ܘܐܸܢ ܥܵܒܹܕ ܠܗܘܿܢ ܐ݇ܢܵܫܵܐ، ܒܸܬ ܚܵܝܹܐ ܒܝܼܲܝܗܝ. ܐܵܢܵܐ ܝܘܸܢ ܡܵܪܝܵܐ.
6ܗܸܟ̃ ܚܲܕ ܠܵܐ ܩܲܪܒܸܢ ܚܸܙܡܹܗ ܕܩܘܼܪܒܵܐ ܓܲܠܘܼܝܘܼܗ̇ ܫܘܼܠܚܵܝܘܼܬܹܗ. ܐܵܢܵܐ ܝܘܸܢ ܡܵܪܝܵܐ. 7ܠܵܐ ܓܲܠܸܝܬ ܠܵܗ̇ ܫܘܼܠܚܵܝܘܼܬܵܐ ܕܒܵܒܘܼܟ݂ ܝܲܢ ܕܝܸܡܘܼܟ݂؛ ܝܸܡܘܼܟ݂ ܝܼܠܵܗ̇، ܠܵܐ ܓܵܠܹܝܬ ܠܫܘܼܠܚܵܝܘܼܬܘܼܗ̇. 8ܠܵܐ ܓܲܠܸܝܬ ܠܵܗ̇ ܫܘܼܠܚܵܝܘܼܬܵܐ ܕܒܲܟ݂ܬܵܐ ܕܒܵܒܘܼܟ݂، ܣܵܒܵܒ ܫܘܼܠܚܵܝܘܼܬܵܐ ܕܒܵܒܘܼܟ݂ ܝܼܠܵܗ̇. 9ܠܵܐ ܓܲܠܸܝܬ ܠܫܘܼܠܚܵܝܘܼܬܵܐ ܕܚܵܬܘܼܟ݂، ܐܸܢ ܕܝܼܠܵܗ̇ ܒܪܵܬܵܐ ܕܒܵܒܘܼܟ݂، ܝܲܢ ܒܪܵܬܵܐ ܕܝܸܡܘܼܟ݂، ܐܸܢ ܒܪܝܼܬܵܐ ܝܠܵܗ̇ ܓܵܘ ܒܲܝܬܵܐ ܝܲܢ ܠܒܲܕܲܪ ܡ̣ܢ ܒܲܝܬܵܐ. 10ܠܵܐ ܓܲܠܸܝܬ ܠܫܘܼܠܚܵܝܘܼܬܵܐ ܕܒܪܵܬܵܐ ܕܒܪܘܿܢܘܼܟ݂، ܝܲܢ ܕܒܪܵܬܵܐ ܕܒܪܵܬܘܼܟ݂، ܣܵܒܵܒ ܫܘܼܠܚܵܝܘܼܬܲܝܗܝ ܫܘܼܠܚܵܝܘܼܬܵܐ ܕܕܝܼܘܼܟ݂ ܝܼܠܵܗ̇. 11ܠܵܐ ܓܲܠܸܝܬ ܠܫܘܼܠܚܵܝܘܼܬܵܐ ܕܒܪܵܬܵܐ ܕܒܲܟ݂ܬܵܐ ܕܒܵܒܘܼܟ݂، ܕܝܼܠܵܗ̇ ܝ݇ܠܝܼܕܬܵܐ ܡ̣ܢ ܒܵܒܘܼܟ݂، ܣܵܒܵܒ ܚܵܬܘܼܟ݂ ܝܼܠܵܗ̇. 12ܠܵܐ ܓܲܠܸܝܬ ܠܫܘܼܠܚܵܝܘܼܬܵܐ ܕܚܵܬܵܐ ܕܒܵܒܘܼܟ݂؛ ܚܸܙܡܵܐ ܩܘܼܪܒܵܐ ܕܒܵܒܘܼܟ݂ ܝܼܠܵܗ̇. 13ܠܵܐ ܓܲܠܸܝܬ ܠܫܘܼܠܚܵܝܘܼܬܵܐ ܕܚܵܬܵܐ ܕܝܸܡܘܼܟ݂، ܣܵܒܵܒ ܚܸܙܡܵܐ ܩܘܼܪܒܵܐ ܕܝܸܡܘܼܟ݂ ܝܼܠܵܗ̇. 14ܠܵܐ ܓܲܠܸܝܬ ܠܫܘܼܠܚܵܝܘܼܬܵܐ ܕܐܲܚܘܿܢܵܐ ܕܒܵܒܘܼܟ݂؛ ܠܒܲܟ݂ܬܹܗ ܠܵܐ ܩܲܪܒܸܢܸܬ، ܒܲܟ݂ܬܵܐ ܕܡܲܥܡܘܿܢܘܼܟ݂ ܝܼܠܵܗ̇. 15ܠܵܐ ܓܲܠܸܝܬ ܠܫܘܼܠܚܵܝܘܼܬܵܐ ܕܟܲܠܬܘܼܟ݂؛ ܒܲܟ݂ܬܵܐ ܕܒܪܘܿܢܘܼܟ݂ ܝܼܠܵܗ̇. 16ܠܵܐ ܓܲܠܸܝܬ ܠܫܘܼܠܚܵܝܘܼܬܵܐ ܕܒܲܟ݂ܬܵܐ ܕܐܲܚܘܿܢܘܼܟ݂، ܣܵܒܵܒ ܫܘܼܠܚܵܝܘܼܬܵܐ ܕܐܲܚܘܿܢܘܼܟ݂ ܝܼܠܵܗ̇. 17ܠܵܐ ܓܲܠܸܝܬ ܠܫܘܼܠܚܵܝܘܼܬܵܐ ܕܚܕܵܐ ܒܲܟ݂ܬܵܐ ܥܲܡ ܒܪܵܬܘܼܗ̇؛ ܘܠܵܐ ܫܵܩܠܹܬ ܒܪܵܬܵܐ ܕܒܪܘܿܢܘܼܗ̇، ܝܲܢ ܒܪܵܬܵܐ ܕܒܪܵܬܘܼܗ̇ ܠܓܲܠܘܼܝܘܼܗ̇ ܫܘܼܠܚܵܝܘܼܬܘܼܗ̇؛ ܚܸܙܡܵܢܘܼ̈ܗ̇ ܕܩܘܼܪܒܵܐ ܝܢܵܐ؛ ܥܵܘܠܵܐ ܝܠܹܗ. 18ܠܵܐ ܫܵܩܠܹܬ ܚܵܬܵܐ ܕܒܲܟ݂ܬܘܼܟ݂ ܠܡܲܥܝܘܼܩܘܼܗ̇ ܟܲܕ ܓܲܠܘܼܝܹܐ ܫܘܼܠܚܵܝܘܼܬܘܼܗ̇ ܟܡܵܐ ܕܚܵܝܬܵܐ ܝܠܵܗ̇ ܒܲܟ݂ܬܘܼܟ݂.
ܫܲܗܘܲܬܝܵܬܹ̈ܐ ܠܵܐ ܩܵܢܘܿܢܵܝܹ̈ܐ
19”ܠܵܐ ܩܲܪܒܸܢܸܬ ܠܒܲܟ݂ܬܵܐ ܠܓܲܠܘܼܝܹܐ ܫܘܼܠܚܵܝܘܼܬܘܼܗ̇ ܟܲܕ ܝܼܠܵܗ̇ ܒܟܸܦ̮ܣܵܐ ܕܛܲܡܐܘܼܬܘܼܗ̇. 20ܘܠܵܐ ܕܵܡܟܹܬ ܥܲܡ ܒܲܟ݂ܬܵܐ ܕܫܒ݂ܵܒ݂ܘܼܟ݂، ܕܠܵܐ ܦܵܝܫܹܬ ܛܲܡܐܵܐ ܒܝܼܘܼܗ̇. 21ܘܠܵܐ ܡܲܩܪܸܒܸܬ ܡ̣ܢ ܒܢܘܿܢܘܼ̈ܟ݂ ܕܸܒ݂ܚܵܐ ܕܢܘܼܪܵܐ ܠܡܘܿܠܸܟ݂، ܘܫܵܚܡܹܬ ܫܸܡܵܐ ܕܐܲܠܵܗܘܼܟ݂؛ ܐܵܢܵܐ ܝܘܸܢ ܡܵܪܝܵܐ. 22ܘܠܵܐ ܕܵܡܟܹܬ ܥܲܡ ܐܘܼܪܙܵܐ ܐܲܝܟ݂ ܕܡܵܟ݂ܬܵܐ ܕܥܲܡ ܒܲܟ݂ܬܵܐ؛ ܛܲܡܐܘܼܬܵܐ ܝܠܵܗ̇. 23ܘܠܵܐ ܕܵܡܟܹܬ ܥܲܡ ܗܲܝܘܵܢ ܘܦܵܝܫܹܬ ܛܲܡܐܵܐ ܒܝܼܹܗ، ܘܒܲܟ݂ܬܵܐ ܠܵܐ ܓ̰ܲܪܒܵܐ ܠܸܕܡܵܟ݂ܵܐ ܥܲܡ ܗܲܝܘܵܢ؛ ܛܲܢܦܘܼܬܵܐ ܝܠܵܗ̇.
24ܠܵܐ ܥܵܒ݂ܕܝܼܬܘܿܢ ܓܵܢܵܘܟ݂ܘܿܢ ܛܲܡܐܹܐ ܒܗܸܟ̃ ܚܲܕ ܡ̣ܢ ܐܲܢܹܐ، ܣܵܒܵܒ ܒܐܲܢܹܐ ܥܒ݂ܝܼܕܵܐ ܠܗܘܿܢ ܓܵܢܲܝܗܝ ܛܲܡܐܹܐ ܐܸܡܘܵܬܹ̈ܐ ܕܟܲܡܘܼܪܲܝ ܝܘܸܢ ܡ̣ܢ ܩܵܕ݇ܡܵܘܟ݂ܘܿܢ. 25ܦܝܼܫ ܠܵܗ̇ ܛܲܡܐܹܐ ܐܲܪܥܵܐ، ܒܘܼܬ ܐܵܗܵܐ ܩܲܡ ܬܲܥܠܸܡܸܢܵܗ̇ ܒܘܼܬ ܥܵܘܠܘܼܗ̇، ܗܵܕܵܐ ܕܓܸܣܝܲܝ ܠܵܗ̇ ܥܵܡܪ̈ܵܢܘܼܗ̇. 26ܐܝܼܢܵܐ ܐܲܚܬܘܿܢ ܢܵܛܪܝܼܬܘܿܢ ܠܗܘܿܢ ܩܵܢܘܿܢܝܼ̈ ܘܕܝܼܘܵܢܝܼ̈؛ ܘܠܵܐ ܥܵܒ݂ܕܝܼܬܘܿܢ ܐܘܼܦ ܚܕܵܐ ܡ̣ܢ ܐܲܢܹܐ ܛܲܡܐܘܼܝܵܬܹ̈ܐ؛ ܠܵܐ ܒܲܪ ܐܲܬܪܵܐ ܘܠܵܐ ܢܘܼܟ݂ܪܵܝܵܐ ܕܒܸܥܡܵܪܵܐ ܝܠܹܗ ܓܵܘܵܘܟ݂ܘܿܢ؛ 27ܣܵܒܵܒ ܐ݇ܢܵܫܹ̈ܐ ܕܐܲܪܥܵܐ ܕܝܼܗ݇ܘܵܘ ܡ̣ܢ ܩܵܕ݇ܡ ܡܸܢܵܘܟ݂ܘܿܢ ܥܒ݂ܝܼܕ ܠܗܘܿܢ ܐܲܢܹܐ ܛܲܡܐܘܼܝܵܬܹ̈ܐ، ܒܘܼܬ ܐܵܗܵܐ ܦܝܼܫ ܠܵܗ̇ ܛܲܡܐܹܐ ܐܲܪܥܵܐ. 28ܐܝܼܢܵܐ ܐܲܚܬܘܿܢ ܠܵܐ ܥܵܒ݂ܕܝܼܬܘܿܢ ܠܵܗ̇ ܐܲܪܥܵܐ ܛܲܡܐܹܐ ܕܠܵܐ ܓܵܣܝܵܐ ܠܵܘܟ݂ܘܿܢ، ܐܲܝܟ݂ ܕܓܣܹܐ ܠܵܗ̇ ܠܥܲܡܡܹ̈ܐ ܕܝܼܗ݇ܘܵܘ ܡ̣ܢ ܩܵܕ݇ܡ ܡܸܢܵܘܟ݂ܘܿܢ. 29ܣܵܒܵܒ ܟܠ ܕܥܵܒܹܕ ܡ̣ܢ ܐܲܢܹܐ ܛܲܡܐܘܼܝܵܬܹ̈ܐ، ܒܸܬ ܦܵܐܹܫ ܩܛܝܼܥܵܐ ܡ̣ܢ ܓܵܘ ܥܲܡܵܐ. 30ܗܲܕܟ݂ܵܐ ܢܛܘܿܪܘܼܢ ܓܵܢܵܘܟ݂ܘܿܢ، ܘܠܵܐ ܥܵܒ݂ܕܝܼܬܘܿܢ ܗܸܟ̃ ܚܕܵܐ ܡ̣ܢ ܛܲܡܐܘܼܝܵܬܹ̈ܐ ܕܦܝܼܫ ܠܗܘܿܢ ܥܒ݂ܝܼܕܹܐ ܡ̣ܢ ܩܵܕ݇ܡ ܡܸܢܵܘܟ݂ܘܿܢ، ܘܠܵܐ ܟ̰ܲܦܠܸܢܝܼܬܘܿܢ ܓܵܢܵܘܟ݂ܘܿܢ ܒܝܼܲܝܗܝ؛ ܐܵܢܵܐ ܝܘܸܢ ܡܵܪܝܵܐ ܐܲܠܵܗܵܘܟ݂ܘܿܢ.“
Currently Selected:
ܟܗܢ̈ܐ 18: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
