ܟܗܢ̈ܐ 16
16
ܝܵܘܡܵܐ ܕܚܘܼܣܵܝܵܐ
1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ ܡ̣ܢ ܒܵܬ݇ܪ ܡܵܘܬܵܐ ܕܬܪܹܝ ܒܢܘܿܢܹ̈ܐ ܕܐܲܗܪܘܿܢ، ܟܲܕ ܡܘܼܩܪܸܒ݂ ܠܗܘܿܢ ܢܘܼܪܵܐ ܢܘܼܟ݂ܪܵܝܵܐ ܩܵܕ݇ܡ ܡܵܪܝܵܐ ܘܡܝܼܬ ܠܗܘܿܢ. 2ܘܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، ”ܗܲܡܙܸܡ ܥܲܡ ܐܲܗܪܘܿܢ ܐܲܚܘܿܢܘܼܟ݂ ܕܠܵܐ ܥܵܒܹܪ ܒܟܠ ܥܕܵܢܵܐ ܠܡܲܩܕܫܵܐ ܠܒܵܬ݇ܪ ܡ̣ܢ ܣܸܬܪܵܐ، ܩܵܕ݇ܡ ܟܘܼܪܣܝܵܐ ܕܚܘܼܣܵܝܵܐ ܕܝܼܠܹܗ ܥܲܠ ܩܹܒ݂ܘܼܬܵܐ، ܕܠܵܐ ܡܵܐܹܬ، ܣܵܒܵܒ ܒܸܬ ܦܵܝܫܹܢ ܚܸܙܝܵܐ ܓܵܘ ܥܢܵܢܵܐ ܥܲܠ ܟܘܼܪܣܝܵܐ ܕܚܘܼܣܵܝܵܐ. 3ܐܝܼܢܵܐ ܗܲܕܟ݂ܵܐ ܥܵܒܹܪ ܐܲܗܪܘܿܢ ܠܡܲܩܕܫܵܐ: ܡܲܝܬܹܐ ܚܲܕ ܡܘܼܓ̰ܵܐ ܩܵܐ ܕܸܒ݂ܚܵܐ ܕܚܛܝܼܬܵܐ، ܘܚܲܕ ܒܲܪܥܵܢܵܐ ܩܵܐ ܕܸܒ݂ܚܵܐ ܡܘܼܩܕܵܐ. 4ܠܵܒܹܫ ܨܘܼܕܪܵܐ ܕܟܸܬܵܢܵܐ ܩܘܼܕܸܫܬܵܐ، ܘܬܘܼܢܒܵܢܵܐ ܕܟܸܬܵܢܵܐ ܗܵܘܹܐ ܥܲܠ ܦܲܓ݂ܪܹܗ، ܘܒܚܲܨܵܐ ܕܟܸܬܵܢܵܐ ܦܵܐܹܫ ܚܠܝܼܨܵܐ، ܘܡܲܬܸܒ݂ ܥܲܠ ܪܹܫܹܗ ܟܪܵܟ݂ܬܵܐ ܕܟܸܬܵܢܵܐ؛ ܐܲܢܹܐ ܓ̰ܘܼܠܹ̈ܐ ܩܘܼܕܫܹ̈ܐ ܝܢܵܐ، ܘܠܵܒܹܫ ܠܗܘܿܢ ܡ̣ܢ ܒܵܬ݇ܪ ܕܚܲܠܸܠ ܦܲܓ݂ܪܹܗ ܒܡ̈ܝܼܵܐ. 5ܡ̣ܢ ܓ̰ܵܡܵܥܲܬ ܕܒܢܲܝ̈ ܝܼܣܪܵܝܹܠ ܫܵܩܹܠ ܬܪܹܝ ܓܸܙܟܹ̈ܐ ܕܥܸܙܹ̈ܐ ܩܵܐ ܕܸܒ݂ܚܵܐ ܕܚܛܝܼܬܵܐ، ܘܚܲܕ ܒܲܪܥܵܢܵܐ ܩܵܐ ܕܸܒ݂ܚܵܐ ܡܘܼܩܕܵܐ. 6ܡܲܩܪܸܒ݂ ܐܲܗܪܘܿܢ ܠܡܘܼܓ̰ܵܐ ܕܕܸܒ݂ܚܵܐ ܕܚܛܝܼܬܵܐ ܒܘܼܬ ܓܵܢܹܗ، ܘܥܵܒܹܕ ܚܘܼܣܵܝܵܐ ܒܘܼܬ ܓܵܢܹܗ ܘܒܘܼܬ ܒܲܝܬܹܗ. 7ܗ̇ܝܓܵܗ ܫܵܩܹܠ ܠܬܸܪܘܲܝܗܝ ܓܸܙܟܹ̈ܐ، ܘܡܲܟܠܹܐ ܠܗܘܿܢ ܩܵܕ݇ܡ ܡܵܪܝܵܐ، ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ؛ 8ܘܕܵܪܹܐ ܐܲܗܪܘܿܢ ܦܸܫܟܵܐ ܥܲܠ ܬܸܪܘܲܝܗܝ ܓܸܙܟܹ̈ܐ، ܚܲܕ ܦܸܫܟܵܐ ܠܡܵܪܝܵܐ، ܘܚܲܕ ܦܸܫܟܵܐ ܠܥܲܙܵܐܙܹܝܠ. 9ܘܡܲܩܪܸܒ݂ ܠܓܸܙܟܵܐ ܕܢܦܝܼܠ ܠܹܗ ܥܲܠܘܼܗܝ ܦܸܫܟܵܐ ܕܡܵܪܝܵܐ، ܘܥܵܒܹܕ ܠܹܗ ܕܸܒ݂ܚܵܐ ܕܚܛܝܼܬܵܐ. 10ܐܝܼܢܵܐ ܓܸܙܟܵܐ ܕܢܦܝܼܠ ܠܹܗ ܥܲܠܘܼܗܝ ܦܸܫܟܵܐ ܕܥܲܙܵܐܙܹܝܠ ܦܵܐܹܫ ܡܘܼܩܪܸܒ݂ܵܐ ܚܵܝܵܐ ܠܡܵܪܝܵܐ ܠܸܥܒ݂ܵܕܵܐ ܚܘܼܣܵܝܵܐ ܥܲܠܘܼܗܝ، ܘܫܲܕܸܪܹܗ ܠܥܲܙܵܐܙܹܝܠ ܓܵܘ ܒܲܪܝܼܵܐ.
11”ܗ̇ܝܓܵܗ ܡܲܩܪܸܒ݂ ܐܲܗܪܘܿܢ ܡܘܼܓ̰ܵܐ ܕܕܸܒ݂ܚܵܐ ܕܚܛܝܼܬܵܐ ܒܘܼܬ ܓܵܢܹܗ، ܘܥܵܒܹܕ ܚܘܼܣܵܝܵܐ ܒܘܼܬ ܓܵܢܹܗ ܘܒܘܼܬ ܒܲܝܬܹܗ، ܘܦܵܪܹܡ ܠܹܗ ܡܘܼܓ̰ܵܐ ܕܕܸܒ݂ܚܵܐ ܕܚܛܝܼܬܵܐ ܒܘܼܬ ܓܵܢܹܗ. 12ܫܵܩܹܠ ܚܲܕ ܦܝܼܪܡܵܐ ܡܸܠܝܵܐ ܓܘܼܡܪܹ̈ܐ ܕܢܘܼܪܵܐ ܡܥܲܠ ܡܲܕܒܚܵܐ ܡ̣ܢ ܩܵܕ݇ܡ ܡܵܪܝܵܐ، ܘܡܵܠܹܐ ܐܝܼܕܵܬܹ̈ܗ ܒܸܣܡܵܐ ܪܹܝܚܵܢܵܐ ܕܘܼܩܕܸܩܵܐ، ܘܡܲܥܒܸܪܗܘܿܢ ܠܓܵܘܵܐ ܒܵܬ݇ܪ ܣܸܬܪܵܐ. 13ܘܡܲܬܸܒ݂ ܠܒܸܣܡܵܐ ܥܲܠ ܢܘܼܪܵܐ ܩܵܕ݇ܡ ܡܵܪܝܵܐ، ܕܟܲܣܝܵܐ ܥܢܵܢܵܐ ܕܒܸܣܡܵܐ ܠܟܘܼܪܣܝܵܐ ܕܚܘܼܣܵܝܵܐ، ܕܝܼܠܹܗ ܥܲܠ ܣܵܗܕܘܼܬܵܐ، ܕܠܵܐ ܡܵܐܹܬ. 14ܘܫܵܩܹܠ ܡ̣ܢ ܕܸܡܵܐ ܕܡܘܼܓ̰ܵܐ ܘܡܲܪܝܸܣ ܒܨܸܒܥܹܗ ܠܓܹܒܵܐ ܕܡܲܕܢܚܵܐ ܕܟܘܼܪܣܝܵܐ ܕܚܘܼܣܵܝܵܐ، ܘܠܩܵܕ݇ܡܵܐ ܕܟܘܼܪܣܝܵܐ ܕܚܘܼܣܵܝܵܐ ܡܲܪܝܸܣ ܕܸܡܵܐ ܒܨܸܒܥܹܗ ܫܒܲܥ ܓܵܗܹ̈ܐ؛ 15ܗ̇ܝܓܵܗ ܦܵܪܹܡ ܠܓܸܙܟܵܐ ܕܕܸܒ݂ܚܵܐ ܕܚܛܝܼܬܵܐ ܒܘܼܬ ܥܲܡܵܐ، ܘܡܲܥܒܸܪ ܠܕܸܡܹܗ ܠܓܵܘܵܐ ܒܵܬ݇ܪ ܣܸܬܪܵܐ، ܘܥܵܒܹܕ ܒܕܸܡܹܗ ܐܲܝܟ݂ ܕܥܒ݂ܝܼܕ ܠܹܗ ܒܕܸܡܵܐ ܕܡܘܼܓ̰ܵܐ، ܡܲܪܝܸܣ ܠܹܗ ܥܲܠ ܟܘܼܪܣܝܵܐ ܕܚܘܼܣܵܝܵܐ ܘܠܩܵܕ݇ܡܵܐ ܕܟܘܼܪܣܝܵܐ ܕܚܘܼܣܵܝܵܐ؛ 16ܗܲܕܟ݂ܵܐ ܥܵܒܹܕ ܚܘܼܣܵܝܵܐ ܥܲܠ ܡܲܩܕܫܵܐ ܒܘܼܬ ܛܲܡܐܘܼܬܵܐ ܕܒܢܲܝ̈ ܝܼܣܪܵܝܹܠ، ܘܒܘܼܬ ܓܢܵܗܲܝ̈ܗܝ ܘܒܘܼܬ ܟܠܲܝܗܝ ܚܛܝܼܵܬܲܝ̈ܗܝ. ܗܲܕܟ݂ܵܐ ܥܵܒܹܕ ܠܡܲܫܟܲܢ ܘܲܥܕܵܐ ܕܝܼܠܹܗ ܒܹܝܬ݇ ܦܲܠܓܲܝܗܝ، ܒܘܼܬ ܛܲܡܐܘܼܬܵܐ ܕܒܢܲܝ̈ ܝܼܣܪܵܝܹܠ. 17ܠܵܐ ܗܵܘܹܐ ܐ݇ܢܵܫܵܐ ܓܵܘ ܡܲܫܟܲܢ ܘܲܥܕܵܐ ܟܲܕ ܥܵܒܹܪ ܐܲܗܪܘܿܢ ܠܸܥܒ݂ܵܕܵܐ ܚܘܼܣܵܝܵܐ ܓܵܘ ܡܲܩܕܫܵܐ ܗܲܠ ܕܦܵܠܹܛ، ܕܗܵܘܹܐ ܥܒ݂ܝܼܕܵܐ ܚܘܼܣܵܝܵܐ ܒܘܼܬ ܓܵܢܹܗ، ܒܘܼܬ ܒܲܝܬܹܗ، ܘܒܘܼܬ ܟܠܹܗ ܟܸܢܫܵܐ ܕܒܢܲܝ̈ ܝܼܣܪܵܝܹܠ. 18ܗ̇ܝܓܵܗ ܦܵܠܹܛ ܠܟܸܣ ܡܲܕܒܚܵܐ ܕܝܼܠܹܗ ܩܵܕ݇ܡ ܡܵܪܝܵܐ ܘܥܵܒܹܕ ܚܘܼܣܵܝܵܐ ܥܲܠܘܼܗܝ. ܫܵܩܹܠ ܡ̣ܢ ܕܸܡܵܐ ܕܡܘܼܓ̰ܵܐ ܘܡ̣ܢ ܕܸܡܵܐ ܕܓܸܙܟܵܐ ܘܡܲܬܸܒ݂ ܥܲܠ ܩܵܪ̈݇ܢܵܢܹܐ ܕܡܲܕܒܚܵܐ ܡ̣ܢ ܟܠ ܓܹܒܵܐ. 19ܡܲܪܝܸܣ ܥܲܠܘܼܗܝ ܡ̣ܢ ܕܸܡܵܐ ܒܨܸܒܥܹܗ ܫܲܒ݂ܥܵܐ ܓܵܗܹ̈ܐ، ܘܕܲܟܹܐ ܠܹܗ، ܘܩܲܕܸܫ ܠܹܗ ܡ̣ܢ ܛܲܡܐܘܼܬܵܐ ܕܒܢܲܝ̈ ܝܼܣܪܵܝܹܠ.
20ܟܲܕ ܦܵܪܹܩ ܐܲܗܪܘܿܢ ܡ̣ܢ ܠܸܥܒ݂ܵܕܵܐ ܚܘܼܣܵܝܵܐ ܠܡܲܩܕܫܵܐ ܘܠܡܲܫܟܲܢ ܘܲܥܕܵܐ ܘܠܡܲܕܒܚܵܐ، ܡܲܩܪܸܒ݂ ܠܓܸܙܟܵܐ ܚܵܝܵܐ، 21ܘܡܲܬܸܒ݂ ܬܸܪܘܲܝܗܝ ܐܝܼܕܵܬܹ̈ܗ ܥܲܠ ܪܹܫܵܐ ܕܓܸܙܟܵܐ ܚܵܝܵܐ، ܘܡܵܘܕܹܐ ܥܲܠ ܪܹܫܹܗ ܟܠܲܝܗܝ ܥܵܘܠܹ̈ܐ ܕܒܢܲܝ̈ ܝܼܣܪܵܝܹܠ، ܟܠܲܝܗܝ ܓܢܵܗܲܝ̈ܗܝ، ܟܠܲܝܗܝ ܚܛܝܼܵܬܲܝ̈ܗܝ، ܘܡܲܬܸܒ݂ ܠܗܘܿܢ ܥܲܠ ܪܹܫܵܐ ܕܓܸܙܟܵܐ، ܘܫܲܕܸܪܹܗ ܠܒܲܪܝܼܵܐ ܒܝܲܕ ܚܲܕ ܐ݇ܢܵܫܵܐ ܓܘܼܒܝܵܐ ܠܐܵܗܵܐ ܫܘܼܠܵܐ. 22ܓܸܙܟܵܐ ܛܵܥܹܢ ܥܲܠܘܼܗܝ ܟܠܹܗ ܥܵܘܠܵܐ ܕܒܢܲܝ̈ ܝܼܣܪܵܝܹܠ ܒܐܲܪܥܵܐ ܡܘܼܫܲܡܸܪ، ܘܦܵܐܹܫ ܪܘܼܦܝܵܐ ܓܵܘ ܒܲܪܝܼܵܐ.
23ܗ̇ܝܓܵܗ ܥܵܒܹܪ ܐܲܗܪܘܿܢ ܠܡܲܫܟܲܢ ܘܲܥܕܵܐ ܘܫܲܠܸܚ ܓ̰ܘܼܠܘܼ̈ܗܝ ܕܟܸܬܵܢܵܐ ܕܠܒ݂ܝܼܫܵܐ ܝܗ݇ܘܵܐ ܟܲܕ ܥܒ݂ܝܼܪܹܗ ܠܡܲܩܕܫܵܐ، ܘܫܵܒܹܩ ܠܗܘܿܢ ܬܵܡܵܐ؛ 24ܚܲܠܸܠ ܦܲܓ݂ܪܹܗ ܒܡ̈ܝܼܵܐ ܒܕܘܼܟܵܐ ܩܲܕܝܼܫܬܵܐ، ܘܠܵܒܹܫ ܓ̰ܘܼܠܘܼ̈ܗܝ، ܘܦܵܠܹܛ ܘܡܲܩܪܸܒ݂ ܕܸܒ݂ܚܵܐ ܡܘܼܩܕܵܐ ܒܘܼܬ ܓܵܢܹܗ، ܘܕܸܒ݂ܚܵܐ ܡܘܼܩܕܵܐ ܒܘܼܬ ܥܲܡܵܐ، ܘܥܵܒܹܕ ܚܘܼܣܵܝܵܐ ܒܘܼܬ ܓܵܢܹܗ ܘܒܘܼܬ ܥܲܡܵܐ. 25ܘܠܬܲܪܒܵܐ ܕܕܸܒ݂ܚܵܐ ܕܚܛܝܼܬܵܐ ܡܲܩܸܕ ܥܲܠ ܡܲܕܒܚܵܐ.
26ܘܗ̇ܘ ܕܪܘܼܦܹܐ ܠܹܗ ܠܓܸܙܟܵܐ ܕܥܲܙܵܐܙܹܝܠ ܡܵܣܹܐ ܓ̰ܘܼܠܘܼ̈ܗܝ ܘܚܲܠܸܠ ܦܲܓ݂ܪܹܗ ܒܡ̈ܝܼܵܐ، ܘܒܵܬ݇ܪ ܗܵܕܵܐ ܥܵܒܹܪ ܠܡܲܫܪܝܼܬܵܐ. 27ܐܝܼܢܵܐ ܡܘܼܓ̰ܵܐ ܕܕܸܒ݂ܚܵܐ ܕܚܛܝܼܬܵܐ، ܘܓܸܙܟܵܐ ܕܕܸܒ݂ܚܵܐ ܕܚܛܝܼܬܵܐ ܕܦܝܼܫ ܠܹܗ ܡܘܼܐܬܝܵܐ ܕܸܡܲܝܗܝ ܠܸܥܒ݂ܵܕܵܐ ܚܘܼܣܵܝܵܐ ܓܵܘ ܡܲܩܕܫܵܐ، ܦܲܠܸܛ ܠܗܘܿܢ ܠܒܲܕܲܪ ܡ̣ܢ ܡܲܫܪܝܼܬܵܐ. ܓܸܠܕܲܝܗܝ، ܘܒܸܣܪܲܝܗܝ ܘܦܸܪܬܲܝܗܝ ܦܵܝܫܝܼ ܡܘܼܩܕܹܐ ܒܢܘܼܪܵܐ. 28ܗ̇ܘ ܕܡܲܩܸܕ ܠܗܘܿܢ ܡܵܣܹܐ ܓ̰ܘܼܠܘܼ̈ܗܝ ܘܚܲܠܸܠ ܦܲܓ݂ܪܹܗ ܒܡ̈ܝܼܵܐ، ܘܡ̣ܢ ܒܵܬ݇ܪ ܗܵܕܵܐ ܥܵܒܹܪ ܠܡܲܫܪܝܼܬܵܐ.
29ܗܵܘܹܐ ܐܸܠܵܘܟ݂ܘܿܢ ܩܵܢܘܿܢܵܐ ܠܥܵܠܲܡ: ܒܝܲܪܚܵܐ ܕܫܲܒ݂ܥܵܐ، ܥܸܣܪܵܐ ܒܝܼܹܗ، ܡܲܥܝܸܩܝܼܬܘܿܢ ܠܢܲܦ̮ܫܵܘ̈ܟ݂ܘܿܢ ܘܠܵܐ ܥܵܒ݂ܕܝܼܬܘܿܢ ܗܸܟ̃ ܦܘܼܠܚܵܢܵܐ ܒܗ̇ܘ ܝܵܘܡܵܐ، ܠܵܐ ܗ̇ܘ ܕܝܼܠܹܗ ܡ̣ܢ ܒܢܲܝ̈ ܝܼܣܪܵܝܹܠ، ܘܠܵܐ ܟܠ ܡܵܫܵܚܲܛ ܕܝܼܠܹܗ ܒܸܚܵܝܵܐ ܓܵܘܵܘܟ݂ܘܿܢ، 30ܣܵܒܵܒ ܒܐܵܗܵܐ ܝܵܘܡܵܐ ܚܘܼܣܵܝܵܐ ܒܸܬ ܦܵܐܹܫ ܥܒ݂ܝܼܕܵܐ ܐܸܠܵܘܟ݂ܘܿܢ، ܕܦܵܝܫܝܼܬܘܿܢ ܕܸܟ݂ܝܹܐ ܡ̣ܢ ܟܠܲܝܗܝ ܚܛܝܼܵܬܵܘ̈ܟ݂ܘܿܢ ܩܵܕ݇ܡ ܡܵܪܝܵܐ. 31ܗ̇ܘ ܝܵܘܡܵܐ ܕܫܲܒܬܵܐ ܒܸܬ ܗܵܘܹܐ ܐܸܠܵܘܟ݂ܘܿܢ ܝܵܘܡܵܐ ܕܡܲܢܝܲܚܬܵܐ، ܘܡܲܥܝܸܩܝܼܬܘܿܢ ܠܢܲܦ̮ܫܵܘ̈ܟ݂ܘܿܢ. ܐܵܗܵܐ ܩܵܢܘܿܢܵܐ ܝܠܹܗ ܠܥܵܠܲܡ. 32ܥܵܒܹܕ ܚܘܼܣܵܝܵܐ ܟܵܗܢܵܐ ܕܝܼܠܹܗ ܦܝܼܫܵܐ ܡܫܝܼܚܵܐ ܘܩܘܼܕܫܵܐ ܠܸܥܒ݂ܵܕܵܐ ܟܵܗܢܘܼܬܵܐ ܒܫܵܘܦܵܐ ܕܒܵܒܘܼܗܝ ܐܲܗܪܘܿܢ، ܠܵܒܹܫ ܓ̰ܘܼܠܹ̈ܐ ܕܟܸܬܵܢܵܐ، ܓ̰ܘܼܠܹ̈ܐ ܩܘܼܕܫܹ̈ܐ. 33ܘܥܵܒܹܕ ܚܘܼܣܵܝܵܐ ܠܡܲܩܕܫܵܐ ܩܲܕܝܼܫܵܐ، ܘܠܡܲܫܟܲܢ ܘܲܥܕܵܐ، ܘܠܡܲܕܒܚܵܐ، ܘܠܟܵܗܢܹ̈ܐ، ܘܠܟܠܹܗ ܟܸܢܫܵܐ. 34ܗܵܘܹܐ ܐܵܗܵܐ ܐܸܠܵܘܟ݂ܘܿܢ ܩܵܢܘܿܢܵܐ ܠܥܵܠܲܡ، ܕܚܕܵܐ ܓܵܗܵܐ ܒܫܹܢ݇ܬܵܐ ܥܵܒ݂ܕܝܼܬܘܿܢ ܚܘܼܣܵܝܵܐ ܠܒܢܲܝ̈ ܝܼܣܪܵܝܹܠ ܡ̣ܢ ܟܠܲܝܗܝ ܚܛܝܼܵܬܲܝ̈ܗܝ.“ ܘܥܒ݂ܝܼܕ ܠܹܗ ܡܘܼܫܹܐ ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܐܸܠܹܗ.
Currently Selected:
ܟܗܢ̈ܐ 16: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
