ܟܗܢ̈ܐ 15
15
ܒܘܼܬ ܓ̰ܪ̈ܵܝܵܬܹܐ ܕܦܲܓ݂ܪܵܐ
1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ ܘܥܲܡ ܐܲܗܪܘܿܢ، ܒܹܐܡܵܪܵܐ، 2”ܗܲܡܙܸܡܘܼܢ ܥܲܡ ܒܢܲܝ̈ ܝܼܣܪܵܝܹܠ، ܘܐ݇ܡܘܿܪܘܼܢ ܐܸܠܲܝܗܝ، ’ܟܠ ܐ݇ܢܵܫܵܐ ܕܗܵܘܹܐ ܠܹܗ ܓ̰ܪܵܝܬܵܐ ܡ̣ܢ ܦܲܓ݂ܪܹܗ، ܛܲܡܐܹܐ ܝܠܵܗ̇ ܗ̇ܝ ܓ̰ܪܵܝܬܵܐ. 3ܘܐܵܗܵܐ ܝܠܵܗ̇ ܛܲܡܐܘܼܬܹܗ ܒܘܼܬ ܓ̰ܪܵܝܬܹܗ: ܐܸܢ ܦܲܓ݂ܪܹܗ ܡܲܓ̰ܪܘܼܝܹܐ ܝܠܹܗ ܝܲܢ ܟܸܠܝܵܐ ܝܠܹܗ ܡ̣ܢ ܓ̰ܪܵܝܬܵܐ، ܛܲܡܐܘܼܬܵܐ ܝܠܵܗ̇. 4ܟܠ ܫܘܝܼܬܵܐ ܕܕܵܡܹܟ݂ ܥܲܠܘܼܗ̇ ܗ̇ܘ ܕܐܝܼܬ ܒܝܼܹܗ ܓ̰ܪܵܝܬܵܐ ܒܸܬ ܦܵܝܫܵܐ ܛܲܡܐܹܐ. ܘܟܠ ܡܸܢܕܝܼ ܕܝܵܬܹܒ݂ ܥܲܠܘܼܗܝ ܒܸܬ ܦܵܐܹܫ ܛܲܡܐܵܐ. 5ܘܟܠ ܕܕܵܩܹܪ ܒܫܘܝܼܬܹܗ، ܡܵܣܹܐ ܓ̰ܘܼܠܘܼ̈ܗܝ ܘܣܵܚܹܐ ܒܡ̈ܝܼܵܐ، ܘܒܸܬ ܗܵܘܹܐ ܛܲܡܐܵܐ ܗܲܠ ܪܲܡܫܵܐ. 6ܘܟܠ ܕܝܵܬܹܒ݂ ܥܲܠ ܡܸܢܕܝܼ ܕܝ݇ܬܝܼܒ݂ܵܐ ܝܗ݇ܘܵܐ ܥܲܠܘܼܗܝ ܗ̇ܘ ܕܐܝܼܬ ܒܝܼܹܗ ܓ̰ܪܵܝܬܵܐ، ܡܵܣܹܐ ܓ̰ܘܼܠܘܼ̈ܗܝ ܘܣܵܚܹܐ ܒܡ̈ܝܼܵܐ، ܘܦܵܐܹܫ ܛܲܡܐܵܐ ܗܲܠ ܪܲܡܫܵܐ. 7ܘܗ̇ܘ ܕܕܵܩܹܪ ܒܦܲܓ݂ܪܵܐ ܕܡ̇ܢ ܕܐܝܼܬ ܠܹܗ ܓ̰ܪܵܝܬܵܐ، ܡܵܣܹܐ ܓ̰ܘܼܠܘܼ̈ܗܝ ܘܣܵܚܹܐ ܒܡ̈ܝܼܵܐ، ܘܦܵܐܹܫ ܛܲܡܐܵܐ ܗܲܠ ܪܲܡܫܵܐ. 8ܐܸܢ ܗ̇ܘ ܕܐܝܼܬ ܠܹܗ ܓ̰ܪܵܝܬܵܐ ܪܵܐܹܩ ܥܲܠ ܚܲܕ ܕܝܼܠܹܗ ܕܸܟ݂ܝܵܐ، ܡܵܣܹܐ ܓ̰ܘܼܠܘܼ̈ܗܝ، ܘܣܵܚܹܐ ܒܡ̈ܝܼܵܐ، ܘܗܵܘܹܐ ܛܲܡܐܵܐ ܗܲܠ ܪܲܡܫܵܐ. 9ܘܟܠ ܡܸܢܕܝܼ ܪܵܟܹܒ݂ ܥܲܠܘܼܗܝ ܗ̇ܘ ܕܐܝܼܬ ܠܹܗ ܓ̰ܪܵܝܬܵܐ ܒܸܬ ܗܵܘܹܐ ܛܲܡܐܵܐ. 10ܘܟܠ ܕܕܵܩܹܪ ܒܡܸܢܕܝܼ ܕܝܼܗ݇ܘܵܐ ܬܚܘܿܬ ܗ̇ܘ ܕܐܝܼܬ ܠܹܗ ܓ̰ܪܵܝܬܵܐ ܒܸܬ ܗܵܘܹܐ ܛܲܡܐܵܐ ܗܲܠ ܪܲܡܫܵܐ؛ ܘܟܠ ܕܛܵܥܹܢ ܗܲܕܟ݂ܵܐ ܡܸܢܕܝܼ ܡܵܣܹܐ ܓ̰ܘܼܠܘܼ̈ܗܝ ܘܣܵܚܹܐ ܒܡ̈ܝܼܵܐ، ܘܦܵܐܹܫ ܛܲܡܐܵܐ ܗܲܠ ܪܲܡܫܵܐ. 11ܘܐܸܢ ܕܵܩܹܪ ܒܚܲܕ ܐ݇ܢܵܫܵܐ ܗ̇ܘ ܕܐܝܼܬ ܒܝܼܹܗ ܓ̰ܪܵܝܬܵܐ ܟܲܕ ܠܵܐ ܚܘܼܠܸܠܵܐ ܐܝܼܕܵܬܹ̈ܗ ܒܡ̈ܝܼܵܐ، ܗ̇ܘ ܐ݇ܢܵܫܵܐ ܡܵܣܹܐ ܓ̰ܘܼܠܘܼ̈ܗܝ ܘܣܵܚܹܐ ܒܡ̈ܝܼܵܐ، ܘܦܵܐܹܫ ܛܲܡܐܵܐ ܗܲܠ ܪܲܡܫܵܐ. 12ܐܝܼܢܵܐ ܡܵܐܢܵܐ ܕܦܲܚܵܪܵܐ ܕܕܵܩܹܪ ܒܝܼܹܗ ܗ̇ܘ ܕܐܝܼܬ ܠܹܗ ܓ̰ܪܵܝܬܵܐ ܦܵܐܹܫ ܬܒ݂ܝܼܪܵܐ، ܘܟܠ ܡܵܐܢܵܐ ܕܩܲܝܣܵܐ ܦܵܐܹܫ ܚܘܼܠܸܠܵܐ ܒܡ̈ܝܼܵܐ.
13ܟܲܕ ܦܵܐܹܫ ܕܸܟ݂ܝܵܐ ܗ̇ܘ ܕܐܝܼܬ ܓ̰ܪܵܝܬܵܐ ܒܝܼܹܗ، ܡܵܢܹܐ ܠܓܵܢܹܗ ܫܲܒ݂ܥܵܐ ܝܵܘܡܵܢܹ̈ܐ ܩܵܐ ܕܲܟ݂ܵܝܬܹܗ؛ ܒܵܬ݇ܪ ܗܵܕܵܐ ܡܵܣܹܐ ܓ̰ܘܼܠܘܼ̈ܗܝ ܘܚܲܠܸܠ ܦܲܓ݂ܪܹܗ ܒܡ̈ܝܼܵܐ ܓ̰ܵܪ̈ܝܵܢܹܐ، ܘܗܵܘܹܐ ܕܸܟ݂ܝܵܐ. 14ܒܝܵܘܡܵܐ ܕܬܡܵܢܝܵܐ ܫܵܩܹܠ ܬܲܪܬܹܝ ܓܘܼܪ̈ܓܘܼܡܹܐ، ܝܲܢ ܬܪܹܝ ܙܲܥܝܹ̈ܐ ܕܝܵܘܢܹ̈ܐ، ܘܐܵܬܹܐ ܠܟܸܣ ܡܵܪܝܵܐ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ، ܘܝܲܗ݇ܒܸܠ ܠܗܘܿܢ ܠܟܵܗܢܵܐ؛ 15ܡܲܩܪܸܒ݂ ܠܗܘܿܢ ܟܵܗܢܵܐ، ܚܲܕ ܩܵܐ ܕܸܒ݂ܚܵܐ ܕܚܛܝܼܬܵܐ، ܘܗ̇ܘ ܐ݇ܚܹܪ݇ܢܵܐ ܩܵܐ ܕܸܒ݂ܚܵܐ ܡܘܼܩܕܵܐ؛ ܒܗܲܕܟ݂ܵܐ ܒܸܬ ܥܵܒܹܕ ܚܘܼܣܵܝܵܐ ܐܸܠܹܗ ܟܵܗܢܵܐ ܩܵܕ݇ܡ ܡܵܪܝܵܐ ܒܘܼܬ ܓ̰ܪܵܝܬܹܗ.
16ܐܸܢ ܐ݇ܢܵܫܵܐ ܦܵܠܹܛ ܡܸܢܹܗ ܒܲܪܙܲܪܥܵܐ، ܚܲܠܸܠ ܟܠܹܗ ܦܲܓ݂ܪܹܗ ܒܡ̈ܝܼܵܐ، ܘܦܵܐܹܫ ܛܲܡܐܵܐ ܗܲܠ ܪܲܡܫܵܐ. 17ܘܟܠ ܓ̰ܘܼܠܵܐ ܝܲܢ ܟܠ ܓܸܠܕܵܐ ܕܬܵܦܹܟ݂ ܥܲܠܘܼܗܝ ܒܲܪܙܲܪܥܵܐ، ܦܵܐܹܫ ܚܘܼܠܸܠܵܐ ܒܡ̈ܝܼܵܐ، ܘܗܵܘܹܐ ܛܲܡܐܵܐ ܗܲܠ ܪܲܡܫܵܐ. 18ܐܸܢ ܐ݇ܢܵܫܵܐ ܕܵܡܹܟ݂ ܥܲܡ ܒܲܟ݂ܬܵܐ ܘܐܵܙܹܠ ܡܸܢܹܗ ܒܲܪܙܲܪܥܵܐ، ܣܵܚܝܼ ܬܸܪܘܲܝܗܝ ܒܡ̈ܝܼܵܐ ܘܗܵܘܝܼ ܛܲܡܐܹܐ ܗܲܠ ܪܲܡܫܵܐ.
19ܐܸܢ ܒܲܟ݂ܬܵܐ ܐܵܙܹܠ ܡܸܢܘܼܗ̇ ܕܸܡܵܐ ܒܥܕܵܢܵܐ ܕܟܸܦ̮ܣܘܼܗ̇، ܛܲܡܐܹܐ ܝܠܵܗ̇ ܩܵܐ ܫܲܒ݂ܥܵܐ ܝܵܘܡܵܢܹ̈ܐ، ܘܟܠ ܕܕܵܩܹܪ ܒܝܼܘܼܗ̇ ܒܸܬ ܗܵܘܹܐ ܛܲܡܐܵܐ ܗܲܠ ܪܲܡܫܵܐ. 20ܟܠ ܡܸܢܕܝܼ ܕܵܡܟ݂ܵܐ ܥܲܠܘܼܗܝ ܒܡܸܬܚܵܐ ܕܟܸܦ̮ܣܘܼܗ̇، ܗܵܘܹܐ ܛܲܡܐܵܐ، ܘܟܠ ܡܸܢܕܝܼ ܕܝܵܬܒ݂ܵܐ ܥܲܠܘܼܗܝ ܗܵܘܹܐ ܛܲܡܐܵܐ. 21ܟܠ ܕܕܵܩܹܪ ܒܫܘܝܼܬܘܼܗ̇، ܡܵܣܹܐ ܓ̰ܘܼܠܘܼ̈ܗܝ ܘܣܵܚܹܐ ܒܡ̈ܝܼܵܐ ܘܗܵܘܹܐ ܛܲܡܐܵܐ ܗܲܠ ܪܲܡܫܵܐ. 22ܘܡ̇ܢ ܕܕܵܩܹܪ ܒܟܠ ܡܸܢܕܝܼ ܕܝܵܬܒ݂ܵܐ ܥܲܠܘܼܗܝ، ܡܵܣܹܐ ܓ̰ܘܼܠܘܼ̈ܗܝ ܘܣܵܚܹܐ ܒܡ̈ܝܼܵܐ، ܘܗܵܘܹܐ ܛܲܡܐܵܐ ܗܲܠ ܪܲܡܫܵܐ. 23ܟܠ ܕܕܵܩܹܪ ܒܡܸܢܕܝܼ ܕܝܵܬܒ݂ܵܐ ܥܲܠܘܼܗܝ، ܐܸܢ ܫܘܝܼܬܵܐ ܝܠܵܗ̇ ܝܲܢ ܡܸܢܕܝܼ ܐ݇ܚܹܪ݇ܢܵܐ، ܒܸܬ ܗܵܘܹܐ ܛܲܡܐܵܐ ܗܲܠ ܪܲܡܫܵܐ. 24ܐܸܢ ܐ݇ܢܵܫܵܐ ܕܵܡܹܟ݂ ܥܲܡܘܼܗ̇ ܟܲܕ ܗ̇ܝ ܒܟܸܦ̮ܣܘܼܗ̇، ܦܵܐܹܫ ܛܲܡܐܵܐ ܫܲܒ݂ܥܵܐ ܝܵܘܡܵܢܹ̈ܐ، ܘܟܠ ܫܘܝܼܬܵܐ ܕܕܵܡܹܟ݂ ܥܲܠܘܼܗ̇ ܒܸܬ ܦܵܝܫܵܐ ܛܲܡܐܹܐ.
25ܐܸܢ ܓ̰ܵܪܹܐ ܕܸܡܵܐ ܡ̣ܢ ܒܲܟ݂ܬܵܐ ܩܵܐ ܪܵܒܵܐ ܝܵܘܡܵܢܹ̈ܐ، ܠܵܐ ܒܥܕܵܢܵܐ ܕܟܸܦ̮ܣܘܼܗ̇، ܝܲܢ ܓ̰ܵܪܹܐ ܕܸܡܘܼܗ̇ ܒܘܼܫ ܙܵܘܕܵܐ ܡ̣ܢ ܝܵܘܡܵܢܹ̈ܐ ܕܟܸܦ̮ܣܘܼܗ̇، ܛܲܡܐܹܐ ܝܠܵܗ̇ ܟܡܵܐ ܕܗܵܘܹܐ ܒܸܓ̰ܪܵܝܵܐ ܕܸܡܵܐ ܡܸܢܘܼܗ̇. 26ܘܟܠ ܫܘܝܼܬܵܐ ܕܕܵܡܟ݂ܵܐ ܥܲܠܘܼܗ̇ ܛܲܡܐܹܐ ܝܠܵܗ̇ ܐܲܝܟ݂ ܫܘܝܼܬܵܐ ܕܡܸܬܚܵܐ ܕܟܸܦ̮ܣܘܼܗ̇، ܘܟܠ ܡܸܢܕܝܼ ܕܝܵܬܒ݂ܵܐ ܥܲܠܘܼܗܝ ܒܐܵܗܵܐ ܡܸܬܚܵܐ ܒܸܬ ܗܵܘܹܐ ܛܲܡܐܵܐ، ܗܲܪ ܐܲܝܟ݂ ܡܸܬܚܵܐ ܕܟܸܦ̮ܣܘܼܗ̇. 27ܘܟܠ ܕܕܵܩܹܪ ܒܝܼܲܝܗܝ ܒܸܬ ܦܵܐܹܫ ܛܲܡܐܵܐ؛ ܡܵܣܹܐ ܓ̰ܘܼܠܘܼ̈ܗܝ ܘܣܵܚܹܐ ܒܡ̈ܝܼܵܐ، ܘܗܵܘܹܐ ܛܲܡܐܵܐ ܗܲܠ ܪܲܡܫܵܐ. 28ܐܸܢ ܕܟ݂ܝܼܬܵܐ ܝܠܵܗ̇ ܡ̣ܢ ܓ̰ܪܵܝܬܘܼܗ̇، ܡܵܢܝܵܐ ܫܲܒ݂ܥܵܐ ܝܵܘܡܵܢܹ̈ܐ ܩܵܐ ܓܵܢܘܼܗ̇، ܘܡ̣ܢ ܒܵܬ݇ܪ ܗܵܕܵܐ ܦܵܝܫܵܐ ܕܟ݂ܝܼܬܵܐ. 29ܘܒܝܵܘܡܵܐ ܕܬܡܵܢܝܵܐ ܫܵܩܠܵܐ ܬܲܪܬܹܝ ܓܘܼܪ̈ܓܘܼܡܹܐ، ܝܲܢ ܬܪܹܝ ܙܲܥܝܹ̈ܐ ܕܝܵܘܢܵܐ، ܘܡܲܝܬܝܵܐ ܠܗܘܿܢ ܠܟܸܣ ܟܵܗܢܵܐ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ. 30ܡܲܩܪܸܒ݂ ܟܵܗܢܵܐ ܚܲܕ ܩܵܐ ܕܸܒ݂ܚܵܐ ܕܚܛܝܼܬܵܐ، ܘܗ̇ܘ ܐ݇ܚܹܪ݇ܢܵܐ ܩܵܐ ܕܸܒ݂ܚܵܐ ܡܘܼܩܕܵܐ؛ ܒܗܲܕܟ݂ܵܐ ܒܸܬ ܥܵܒܹܕ ܚܘܼܣܵܝܵܐ ܐܸܠܘܼܗ̇ ܟܵܗܢܵܐ ܩܵܕ݇ܡ ܡܵܪܝܵܐ ܒܘܼܬ ܓ̰ܪܵܝܬܵܐ ܕܛܲܡܐܘܼܬܘܼܗ̇.
31ܗܲܕܟ݂ܵܐ ܦܵܪܫܝܼܬܘܿܢ ܠܒܢܲܝ̈ ܝܼܣܪܵܝܹܠ ܡ̣ܢ ܛܲܡܐܘܼܬܲܝܗܝ، ܕܠܵܐ ܡܵܝܬܝܼ ܒܛܲܡܐܘܼܬܲܝܗܝ ܠܟ̰ܲܦܠܘܼܢܹܐ ܠܡܲܫܟܢܝܼ ܕܝܼܠܹܗ ܒܹܝܬ݇ ܦܲܠܓܲܝܗܝ. 32ܐܵܗܵܐ ܝܠܹܗ ܢܵܡܘܿܣܵܐ ܒܘܼܬ ܗ̇ܘ ܕܐܝܼܬ ܠܹܗ ܓ̰ܪܵܝܬܵܐ، ܘܒܘܼܬ ܗ̇ܘ ܕܦܵܠܹܛ ܡܸܢܹܗ ܒܲܪܙܲܪܥܵܐ ܘܦܵܐܹܫ ܛܲܡܐܵܐ ܒܝܼܹܗ؛ 33ܘܒܘܼܬ ܒܲܟ݂ܬܵܐ ܕܝܼܠܵܗ̇ ܒܟܸܦ̮ܣܘܼܗ̇، ܘܡ̇ܢ ܕܐܝܼܬ ܠܹܗ ܓ̰ܪܵܝܬܵܐ، ܐܘܼܪܙܵܐ ܝܲܢ ܢܸܩܒ݂ܵܐ، ܘܒܘܼܬ ܐ݇ܢܵܫܵܐ ܕܕܵܡܹܟ݂ ܥܲܡ ܒܲܟ݂ܬܵܐ ܕܝܼܠܵܗ̇ ܒܟܸܦ̮ܣܘܼܗ̇.“
Currently Selected:
ܟܗܢ̈ܐ 15: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
