ܟܗܢ̈ܐ 14
14
ܕܲܟ݂ܵܝܬܵܐ ܕܓܸܪܒ݂ܵܢܵܐ
1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܘܐ݇ܡܝܼܪܹܗ، 2”ܐܵܗܵܐ ܗܵܘܹܐ ܢܵܡܘܿܣܵܐ ܕܓܸܪܒ݂ܵܢܵܐ ܒܝܵܘܡܵܐ ܕܦܵܐܹܫ ܕܸܟ݂ܝܵܐ. ܦܵܐܹܫ ܡܘܼܐܬܝܵܐ ܠܟܸܣ ܟܵܗܢܵܐ، 3ܘܦܵܠܹܛ ܟܵܗܢܵܐ ܠܒܲܕܲܪ ܡ̣ܢ ܡܲܫܪܝܼܬܵܐ، ܘܨܲܚܨܹܐ ܠܹܗ، ܕܐܸܢ ܕܒܣܝܼܡ ܠܹܗ ܡܲܪܥܵܢܵܐ ܡ̣ܢ ܓܸܪܒ݂ܵܐ. 4ܗ̇ܝܓܵܗ ܦܵܩܹܕ ܟܵܗܢܵܐ ܕܡܲܝܬܝܼ ܩܵܐ ܕܗ̇ܘ ܕܝܼܠܹܗ ܦܝܵܫܵܐ ܕܘܼܟ݂ܝܵܐ، ܬܪܹܝ ܛܲܝܪܹ̈ܐ ܚܵܝܹ̈ܐ ܕܸܟ݂ܝܹ̈ܐ، ܘܩܲܝܣܵܐ ܕܐܲܪܙܵܐ، ܩܸܪܡܝܼܙ، ܘܙܘܿܦܵܐ. 5ܦܵܩܹܕ ܟܵܗܢܵܐ ܕܚܲܕ ܡ̣ܢ ܛܲܝܪܹ̈ܐ ܦܵܐܹܫ ܦܪܝܼܡܵܐ ܓܵܘ ܡܵܐܢܵܐ ܕܦܲܚܵܪܵܐ، ܥܲܠ ܡ̈ܝܼܵܐ ܓ̰ܵܪ̈ܝܵܢܹܐ. 6ܘܫܵܩܹܠ ܠܛܲܝܪܵܐ ܚܵܝܵܐ، ܥܲܡ ܩܲܝܣܵܐ ܕܐܲܪܙܵܐ، ܘܩܸܪܡܝܼܙ، ܘܙܘܿܦܵܐ، ܘܛܵܡܹܫ ܠܗܘܿܢ ܓܵܘ ܕܸܡܵܐ ܕܗ̇ܘ ܛܲܝܪܵܐ ܕܦܝܼܫܵܐ ܝܗ݇ܘܵܐ ܦܪܝܼܡܵܐ ܥܲܠ ܡ̈ܝܼܵܐ ܓ̰ܵܪ̈ܝܵܢܹܐ. 7ܡܲܪܝܸܣ ܟܵܗܢܵܐ ܫܒܲܥ ܓܵܗܹ̈ܐ ܥܲܠ ܕܗ̇ܘ ܕܦܵܐܹܫ ܕܸܟ݂ܝܵܐ ܡ̣ܢ ܓܸܪܒ݂ܵܐ، ܘܡܲܕܸܥ ܠܹܗ ܕܸܟ݂ܝܵܐ، ܘܛܲܝܪܵܐ ܚܵܝܵܐ ܪܲܦܹܐ ܠܹܗ ܕܐܵܙܹܠ ܓܵܘ ܕܸܫܬܵܐ. 8ܗ̇ܘ ܕܦܝܼܫ ܠܹܗ ܕܸܟ݂ܝܵܐ ܡܵܣܹܐ ܓ̰ܘܼܠܘܼ̈ܗܝ، ܘܓܵܪܹܥ ܟܵܘܣܹܗ، ܘܣܵܚܹܐ ܒܡ̈ܝܼܵܐ، ܘܒܸܬ ܗܵܘܹܐ ܕܸܟ݂ܝܵܐ. ܡ̣ܢ ܒܵܬ݇ܪ ܗܵܕܵܐ، ܐܵܬܹܐ ܠܒܲܕܲܪ ܡ̣ܢ ܡܲܫܪܝܼܬܵܐ، ܘܝܵܬܹܒ݂ ܓܵܘ ܡܲܫܟܢܹܗ ܩܵܐ ܫܲܒ݂ܥܵܐ ܝܵܘܡܵܢܹ̈ܐ. 9ܒܝܵܘܡܵܐ ܕܫܲܒ݂ܥܵܐ، ܓܵܪܹܥ ܠܵܗ̇ ܟܠܵܗ̇ ܡܸܙܬܵܐ ܕܪܹܫܹܗ، ܘܕܸܩܢܹܗ، ܘܓܒ݂ܝܼܢܘܼ̈ܗܝ، ܘܟܠܵܗ̇ ܡܸܙܬܹܗ. ܡܵܣܹܐ ܓ̰ܘܼܠܘܼ̈ܗܝ ܘܚܲܠܸܠ ܦܲܓ݂ܪܹܗ ܒܡ̈ܝܼܵܐ، ܘܒܸܬ ܗܵܘܹܐ ܕܸܟ݂ܝܵܐ.
10ܘܒܝܵܘܡܵܐ ܕܬܡܵܢܝܵܐ ܫܵܩܹܠ ܬܪܹܝ ܦܹܐܪܹ̈ܐ ܕܠܵܐ ܠܲܟܵܐ، ܘܚܕܵܐ ܦܹܐܪܝܼܬܵܐ ܒܲܪ݇ܬ ܚܕܵܐ ܫܹܢ݇ܬܵܐ ܕܠܵܐ ܠܲܟܵܐ، ܘܬܠܵܬܵܐ ܥܸܣܪ̈ܘܿܢܹܐ ܕܐܹܦܵܐ ܕܩܲܡܚܵܐ ܢܚܝܼܠܵܐ ܓܒ݂ܝܼܠܵܐ ܒܡܸܫܚܵܐ، ܘܚܲܕ ܠܘܿܓܵܐ ܕܡܸܫܚܵܐ. 11ܘܟܵܗܢܵܐ ܕܒܸܥܒ݂ܵܕܵܐ ܝܠܹܗ ܚܸܠܡܲܬ ܡܲܟܠܹܐ ܠܗ̇ܘ ܐ݇ܢܵܫܵܐ ܕܦܵܐܹܫ ܕܸܟ݂ܝܵܐ ܥܲܡ ܕܐܲܢܹܐ ܕܸܒ݂ܚܹ̈ܐ ܩܵܕ݇ܡ ܡܵܪܝܵܐ، ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ. 12ܘܫܵܩܹܠ ܟܵܗܢܵܐ ܚܲܕ ܡ̣ܢ ܦܹܐܪܹ̈ܐ، ܘܡܲܩܪܸܒ݂ ܠܹܗ ܕܸܒ݂ܚܵܐ ܕܓܢܵܗܵܐ ܥܲܡ ܠܘܿܓܵܐ ܕܡܸܫܚܵܐ، ܘܡܲܪܸܡ ܠܗܘܿܢ ܩܵܕ݇ܡ ܡܵܪܝܵܐ؛ 13ܘܦܵܪܹܡ ܠܹܗ ܦܹܐܪܵܐ ܒܕܘܼܟܵܐ ܕܦܵܪܡܝܼ ܕܸܒ݂ܚܵܐ ܕܚܛܝܼܬܵܐ ܘܕܸܒ݂ܚܵܐ ܡܘܼܩܕܵܐ، ܒܕܘܼܟܵܐ ܩܲܕܝܼܫܬܵܐ. ܐܲܝܟ݂ ܕܝܼܠܹܗ ܕܸܒ݂ܚܵܐ ܕܚܛܝܼܬܵܐ، ܐܘܼܦ ܕܸܒ݂ܚܵܐ ܕܓܢܵܗܵܐ ܣܵܗܡܵܐ ܕܟܵܗܢܵܐ ܝܠܹܗ؛ ܩܕܘܿܫ ܩܘܼܕܫܹ̈ܐ ܝܠܹܗ. 14ܘܫܵܩܹܠ ܟܵܗܢܵܐ ܡ̣ܢ ܕܸܡܵܐ ܕܕܸܒ݂ܚܵܐ ܕܓܢܵܗܵܐ، ܘܡܲܬܸܒ݂ ܠܹܗ ܥܲܠ ܡܲܪܙܵܐ ܕܢܵܬܵܐ ܕܝܲܡܝܼܢܵܐ ܕܗ̇ܘ ܐ݇ܢܵܫܵܐ ܕܒܸܦܝܵܫܵܐ ܝܠܹܗ ܕܸܟ݂ܝܵܐ، ܘܥܲܠ ܩܘܼܟ̰ܵܐ ܕܐܝܼܕܹܗ ܕܝܲܡܝܼܢܵܐ، ܘܥܲܠ ܩܘܼܟ̰ܵܐ ܕܐܲܩܠܹܗ ܕܝܲܡܝܼܢܵܐ. 15ܫܵܩܹܠ ܟܵܗܢܵܐ ܡ̣ܢ ܠܘܿܓܵܐ ܕܡܸܫܚܵܐ ܘܕܵܪܹܐ ܠܹܗ ܓܵܘ ܐܝܼܕܹܗ ܕܣܸܡܵܠܵܐ، 16ܘܛܵܡܹܫ ܟܵܗܢܵܐ ܨܸܒܥܹܗ ܕܝܲܡܝܼܢܵܐ ܓܵܘ ܡܸܫܚܵܐ ܕܝܼܠܹܗ ܓܵܘ ܐܝܼܕܹܗ ܕܣܸܡܵܠܵܐ، ܘܡܲܪܝܸܣ ܡ̣ܢ ܡܸܫܚܵܐ ܒܨܸܒܥܹܗ ܫܒܲܥ ܓܵܗܹ̈ܐ ܩܵܕ݇ܡ ܡܵܪܝܵܐ. 17ܘܡ̣ܢ ܡܸܫܚܵܐ ܕܦܵܐܹܫ ܓܵܘ ܐܝܼܕܹܗ، ܡܲܬܸܒ݂ ܟܵܗܢܵܐ ܥܲܠ ܡܲܪܙܵܐ ܕܢܵܬܵܐ ܕܝܲܡܝܼܢܵܐ ܕܗ̇ܘ ܐ݇ܢܵܫܵܐ ܕܦܝܵܫܵܐ ܝܠܹܗ ܕܸܟ݂ܝܵܐ، ܘܥܲܠ ܩܘܼܟ̰ܵܐ ܕܐܝܼܕܹܗ ܕܝܲܡܝܼܢܵܐ، ܘܥܲܠ ܩܘܼܟ̰ܵܐ ܕܐܲܩܠܹܗ ܕܝܲܡܝܼܢܵܐ، ܫܒ݂ܘܿܩ ܡ̣ܢ ܕܸܡܵܐ ܕܕܸܒ݂ܚܵܐ ܕܓܢܵܗܵܐ. 18ܘܡܸܢܕܝܼ ܕܙܵܐܹܕ ܡ̣ܢ ܡܸܫܚܵܐ ܕܓܵܘ ܐܝܼܕܵܐ ܕܟܵܗܢܵܐ، ܡܲܬܸܒ݂ ܠܹܗ ܥܲܠ ܪܹܫܵܐ ܕܗ̇ܘ ܐ݇ܢܵܫܵܐ ܕܒܸܦܝܵܫܵܐ ܝܠܹܗ ܕܸܟ݂ܝܵܐ، ܘܥܵܒܹܕ ܚܘܼܣܵܝܵܐ ܥܲܠܘܼܗܝ ܟܵܗܢܵܐ ܩܵܕ݇ܡ ܡܵܪܝܵܐ. 19ܗ̇ܝܓܵܗ ܡܲܩܪܸܒ݂ ܟܵܗܢܵܐ ܕܸܒ݂ܚܵܐ ܕܚܛܝܼܬܵܐ، ܘܥܵܒܹܕ ܚܘܼܣܵܝܵܐ ܥܲܠ ܕܗ̇ܘ ܐ݇ܢܵܫܵܐ ܕܦܵܐܹܫ ܕܸܟ݂ܝܵܐ ܡ̣ܢ ܛܲܡܐܘܼܬܹܗ. ܡ̣ܢ ܒܵܬ݇ܪ ܗܵܕܵܐ ܦܵܪܹܡ ܠܕܸܒ݂ܚܵܐ ܡܘܼܩܕܵܐ. 20ܘܡܲܐܣܸܩ ܟܵܗܢܵܐ ܠܕܸܒ݂ܚܵܐ ܡܘܼܩܕܵܐ ܘܠܕܸܒ݂ܚܵܐ ܕܕܲܚܠܵܐ ܥܲܠ ܡܲܕܒܚܵܐ، ܘܥܵܒܹܕ ܟܵܗܢܵܐ ܚܘܼܣܵܝܵܐ ܥܲܠܘܼܗܝ، ܘܒܸܬ ܗܵܘܹܐ ܕܸܟ݂ܝܵܐ. 21ܘܐܸܢ ܡܸܣܟܹܢܵܐ ܝܠܹܗ ܘܠܹܐ ܡܵܨܹܐ ܡܲܩܪܸܒ݂ ܬܪܹܝ ܦܹܐܪܹ̈ܐ، ܫܵܩܹܠ ܚܲܕ ܦܹܐܪܵܐ ܩܵܐ ܕܸܒ݂ܚܵܐ ܕܓܢܵܗܵܐ ܠܸܥܒ݂ܵܕܵܐ ܚܘܼܣܵܝܵܐ ܐܸܠܹܗ، ܘܚܲܕ ܥܸܣܪܘܿܢܵܐ ܕܩܲܡܚܵܐ ܢܚܝܼܠܵܐ ܓܒ݂ܝܼܠܵܐ ܒܡܸܫܚܵܐ ܩܵܐ ܕܸܒ݂ܚܵܐ ܕܕܲܚܠܵܐ، ܘܚܲܕ ܠܘܿܓܵܐ ܕܡܸܫܚܵܐ؛ 22ܝܲܢ ܬܲܪܬܹܝ ܓܘܼܪ̈ܓܘܼܡܹܐ، ܝܲܢ ܬܪܹܝ ܙܲܥܝܹ̈ܐ ܕܝܵܘܢܹ̈ܐ، ܐܲܝܟ݂ ܡܨܵܝܬܹܗ، ܚܲܕ ܡܸܢܲܝܗܝ ܒܸܬ ܗܵܘܹܐ ܩܵܐ ܕܸܒ݂ܚܵܐ ܕܚܛܝܼܬܵܐ، ܘܗ̇ܘ ܐ݇ܚܹܪ݇ܢܵܐ ܩܵܐ ܕܸܒ݂ܚܵܐ ܡܘܼܩܕܵܐ. 23ܡܲܝܬܹܐ ܠܗܘܿܢ ܒܝܵܘܡܵܐ ܕܬܡܵܢܝܵܐ ܠܟܸܣ ܟܵܗܢܵܐ ܩܵܐ ܕܲܟ݂ܵܝܬܹܗ، ܠܬܲܪܥܵܐ ܕܡܲܫܟܲܢ ܘܲܥܕܵܐ ܩܵܕ݇ܡ ܡܵܪܝܵܐ؛ 24ܘܫܵܩܹܠ ܟܵܗܢܵܐ ܠܦܹܐܪܵܐ ܕܕܸܒ݂ܚܵܐ ܕܓܢܵܗܵܐ ܘܠܠܘܿܓܵܐ ܕܡܸܫܚܵܐ، ܘܡܲܪܸܡ ܠܗܘܿܢ ܟܵܗܢܵܐ ܩܘܼܪܒܵܢܵܐ ܩܵܕ݇ܡ ܡܵܪܝܵܐ. 25ܘܦܵܪܹܡ ܠܹܗ ܦܹܐܪܵܐ ܕܕܸܒ݂ܚܵܐ ܕܓܢܵܗܵܐ، ܘܫܵܩܹܠ ܟܵܗܢܵܐ ܡ̣ܢ ܕܸܡܵܐ ܕܕܸܒ݂ܚܵܐ، ܘܡܲܬܸܒ݂ ܥܲܠ ܡܲܪܙܵܐ ܕܢܵܬܵܐ ܕܝܲܡܝܼܢܵܐ ܕܗ̇ܘ ܕܝܼܠܹܗ ܦܝܵܫܵܐ ܕܸܟ݂ܝܵܐ، ܘܥܲܠ ܩܘܼܟ̰ܵܐ ܕܐܝܼܕܹܗ ܕܝܲܡܝܼܢܵܐ، ܘܥܲܠ ܩܘܼܟ̰ܵܐ ܕܐܲܩܠܹܗ ܕܝܲܡܝܼܢܵܐ. 26ܘܕܵܪܹܐ ܟܵܗܢܵܐ ܡ̣ܢ ܡܸܫܚܵܐ ܓܵܘ ܐܝܼܕܹܗ ܕܣܸܡܵܠܵܐ ܕܓܵܢܹܗ؛ 27ܘܡܲܪܝܸܣ ܟܵܗܢܵܐ ܒܨܸܒܥܹܗ ܕܝܲܡܝܼܢܵܐ ܡ̣ܢ ܡܸܫܚܵܐ ܕܓܵܘ ܐܝܼܕܹܗ ܕܣܸܡܵܠܵܐ ܫܒܲܥ ܓܵܗܹ̈ܐ ܩܵܕ݇ܡ ܡܵܪܝܵܐ؛ 28ܘܡܲܬܸܒ݂ ܟܵܗܢܵܐ ܡ̣ܢ ܡܸܫܚܵܐ ܕܓܵܘ ܐܝܼܕܹܗ ܥܲܠ ܡܲܪܙܵܐ ܕܢܵܬܵܐ ܕܝܲܡܝܼܢܵܐ ܕܗ̇ܘ ܕܦܵܐܹܫ ܕܸܟ݂ܝܵܐ، ܘܥܲܠ ܩܘܼܟ̰ܵܐ ܕܐܝܼܕܹܗ ܕܝܲܡܝܼܢܵܐ، ܘܥܲܠ ܩܘܼܟ̰ܵܐ ܕܐܲܩܠܹܗ ܕܝܲܡܝܼܢܵܐ، ܥܲܠ ܕܘܼܟܵܐ ܕܦܝܼܫܵܐ ܝܗ݇ܘܵܐ ܡܘܼܬܒ݂ܵܐ ܕܸܡܵܐ ܕܕܸܒ݂ܚܵܐ ܕܓܢܵܗܵܐ؛ 29ܘܡܸܢܕܝܼ ܕܙܵܐܹܕ ܡ̣ܢ ܡܸܫܚܵܐ ܕܓܵܘ ܐܝܼܕܵܐ ܕܟܵܗܢܵܐ، ܡܲܬܸܒ݂ ܠܹܗ ܥܲܠ ܪܹܫܵܐ ܕܗ̇ܘ ܕܦܵܐܹܫ ܕܸܟ݂ܝܵܐ، ܠܸܥܒ݂ܵܕܵܐ ܚܘܼܣܵܝܵܐ ܐܸܠܹܗ ܩܵܕ݇ܡ ܡܵܪܝܵܐ. 30ܗ̇ܝܓܵܗ ܡܲܩܪܸܒ݂ ܟܵܗܢܵܐ ܓܘܼܪ̈ܓܘܼܡܹܐ ܝܲܢ ܙܲܥܝܹ̈ܐ ܕܝܵܘܢܵܐ، ܡ̣ܢ ܐܲܝܢܝܼ ܕܡܵܨܹܐ ܗ̇ܘ ܐ݇ܢܵܫܵܐ ܡܲܝܬܹܐ. 31ܚܲܕ ܩܵܐ ܕܸܒ݂ܚܵܐ ܕܚܛܝܼܬܵܐ، ܘܗ̇ܘ ܐ݇ܚܹܪ݇ܢܵܐ ܩܵܐ ܕܸܒ݂ܚܵܐ ܡܘܼܩܕܵܐ ܥܲܡ ܕܸܒ݂ܚܵܐ ܕܕܲܚܠܵܐ، ܘܥܵܒܹܕ ܟܵܗܢܵܐ ܚܘܼܣܵܝܵܐ ܩܵܕ݇ܡ ܡܵܪܝܵܐ ܠܗ̇ܘ ܕܦܝܵܫܵܐ ܝܠܹܗ ܕܘܼܟ݂ܝܵܐ. 32ܐܵܗܵܐ ܝܠܹܗ ܢܵܡܘܿܣܵܐ ܒܘܼܬ ܗ̇ܘ ܕܐܝܼܬ ܒܝܼܹܗ ܡܲܪܥܵܐ ܕܓܸܪܒ݂ܵܐ، ܘܠܹܐ ܡܵܨܹܐ ܡܲܝܬܹܐ ܕܸܒ݂ܚܵܐ ܩܵܐ ܕܲܟ݂ܵܝܬܹܗ.“
ܒܘܼܬ ܕܲܟ݂ܵܝܬܵܐ ܕܒܲܝܬܵܐ ܓܸܪܒ݂ܵܢܵܐ
33ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ ܘܥܲܡ ܐܲܗܪܘܿܢ، ܘܐ݇ܡܝܼܪܹܗ، 34”ܟܲܕ ܥܵܒ݂ܪܝܼܬܘܿܢ ܠܐܲܪܥܵܐ ܕܟܢܲܥܢ، ܗ̇ܝ ܕܐܵܢܵܐ ܒܝܼܵܗ݇ܒ݂ܘܼܗ̇ ܝܘܸܢ ܐܸܠܵܘܟ݂ܘܿܢ ܠܝܵܪܬܘܼܬܵܐ، ܘܡܲܬܒܸܢ ܡܚܘܿܬܵܐ ܕܓܸܪܒ݂ܵܐ ܠܚܲܕ ܒܲܝܬܵܐ ܒܐܲܪܥܵܐ ܕܝܵܪܬܘܼܬܵܘܟ݂ܘܿܢ، 35ܐܵܙܹܠ ܡܵܪܵܐ ܕܒܲܝܬܵܐ ܠܟܸܣ ܟܵܗܢܵܐ ܘܐܵܡܹܪ ܐܸܠܹܗ ܕܐܝܼܬ ܢܝܼܫܲܢܩܵܐ ܕܡܲܪܥܵܐ ܦܝܼܫܵܐ ܚܸܙܝܵܐ ܓܵܘ ܒܲܝܬܝܼ. 36ܗ̇ܝܓܵܗ ܦܵܩܹܕ ܟܵܗܢܵܐ ܕܦܵܐܹܫ ܣܘܼܦܩܵܐ ܒܲܝܬܵܐ ܡ̣ܢ ܩܵܕ݇ܡ ܕܐܵܙܹܠ ܘܨܲܚܨܹܐ ܠܡܲܪܥܵܐ، ܕܠܵܐ ܗܵܘܝܵܐ ܕܦܵܐܹܫ ܥܒ݂ܝܼܕܵܐ ܛܲܡܐܵܐ ܟܠ ܡܸܢܕܝܼ ܕܓܵܘܹܗ، ܗ̇ܝܓܵܗ ܐܵܙܹܠ ܟܵܗܢܵܐ ܘܨܲܚܨܹܐ ܠܒܲܝܬܵܐ، 37ܘܐܸܢ ܡܲܪܥܵܐ ܓܵܘ ܓܘܼܕܵܢܹ̈ܐ ܕܒܲܝܬܵܐ ܝܠܹܗ، ܘܐܝܼܬ ܥܲܠܲܝܗܝ ܚܸܪ̈ܛܹܐ ܡܝܼܠܵܢܹ̈ܐ ܝܲܢ ܣܡܘܿܩܢܵܝܹ̈ܐ، ܕܒܚܙܵܝܬܵܐ ܒܘܼܫ ܥܲܡܘܼܩܹ̈ܐ ܝܢܵܐ ܡ̣ܢ ܦܵܬܵܐ ܕܓܘܼܕܵܢܹ̈ܐ، 38ܗ̇ܝܓܵܗ ܦܵܠܹܛ ܟܵܗܢܵܐ ܡ̣ܢ ܬܲܪܥܵܐ ܕܒܲܝܬܵܐ ܘܕܵܒܹܪܹܗ ܫܲܒ݂ܥܵܐ ܝܵܘܡܵܢܹ̈ܐ. 39ܕܵܐܹܪ ܟܵܗܢܵܐ ܒܝܵܘܡܵܐ ܕܫܲܒ݂ܥܵܐ ܘܚܵܙܹܐ ܠܹܗ، ܐܸܢ ܡܲܪܥܵܐ ܦܪܝܼܣܵܐ ܝܠܹܗ ܒܓܘܼܕܵܢܹ̈ܐ ܕܒܲܝܬܵܐ، 40ܗ̇ܝܓܵܗ ܦܵܩܹܕ ܟܵܗܢܵܐ ܕܣܵܬܪܝܼ ܠܟܹܐܦܹ̈ܐ ܕܐܝܼܬ ܒܝܼܲܝܗܝ ܡܚܘܿܬܵܐ ܘܪܲܦܝܼ ܠܗܘܿܢ ܠܒܲܕܲܪ ܡ̣ܢ ܡܕܝܼܢ݇ܬܵܐ، ܒܕܘܼܟܵܐ ܛܲܡܐܹܐ؛ 41ܘܡܲܓܪܸܕ ܠܗܘܿܢ ܓܘܼܕܵܢܹ̈ܐ ܕܒܲܝܬܵܐ ܡ̣ܢ ܠܓܵܘܵܐ ܒܚܵܕܸܪ̈ܘܵܢܹܐ، ܘܪܲܦܝܼ ܠܥܲܦܪܵܐ ܕܓܪܝܼܕ ܠܗܘܿܢ ܠܒܲܕܲܪ ܡ̣ܢ ܡܕܝܼܢ݇ܬܵܐ، ܒܕܘܼܟܵܐ ܛܲܡܐܹܐ؛ 42ܘܫܵܩܠܝܼ ܟܹܐܦܹ̈ܐ ܐ݇ܚܹܪ̈݇ܢܹܐ، ܘܡܲܬܒ݂ܝܼ ܒܫܵܘܦܵܐ ܕܐܵܢܝܼ ܩܲܕ݇ܡܵܝܹ̈ܐ، ܘܫܵܩܹܠ ܓܒ݂ܝܼܠܬܵܐ ܐ݇ܚܹܪ݇ܬܵܐ ܘܡܲܟ̰ܪܸܥ ܠܒܲܝܬܵܐ.
43ܘܐܸܢ ܡܸܢܕܪܸܫ ܕܵܐܹܪ ܡܲܪܥܵܐ ܠܒܲܝܬܵܐ ܡ̣ܢ ܒܵܬ݇ܪ ܕܫܩܝܼܠܲܝ ܝܗ݇ܘܵܐ ܟܹܐܦܹ̈ܐ، ܘܓܪܝܼܕܹܗ ܝܗ݇ܘܵܐ ܒܲܝܬܵܐ، ܘܡܘܼܟ̰ܪܸܥܹܗ ܝܗ݇ܘܵܐ، 44ܗ̇ܝܓܵܗ ܐܵܬܹܐ ܟܵܗܢܵܐ ܘܚܵܙܹܐ ܠܹܗ، ܐܸܢ ܦܪܝܼܣܬܵܐ ܝܠܵܗ̇ ܡܚܘܿܬܵܐ ܒܒܲܝܬܵܐ، ܡܲܪܥܵܐ ܣܸܪܝܵܐ ܐܝܼܬ ܓܵܘ ܒܲܝܬܵܐ، ܛܲܡܐܵܐ ܝܠܹܗ. 45ܦܵܐܹܫ ܬܠܝܼܚܵܐ ܗ̇ܘ ܒܲܝܬܵܐ، ܟܹܐܦܘܼ̈ܗܝ، ܩܲܝܣܘܼ̈ܗܝ، ܘܟܠܹܗ ܥܲܦܪܹܗ؛ ܘܦܵܝܫܝܼ ܦܘܼܠܛܹܐ ܠܒܲܕܲܪ ܡ̣ܢ ܡܕܝܼܢ݇ܬܵܐ، ܘܪܘܼܦܝܹܐ ܒܕܘܼܟܵܐ ܛܲܡܐܹܐ. 46ܟܠ ܕܥܵܒܹܪ ܓܵܘ ܗ̇ܘ ܒܲܝܬܵܐ ܒܐܵܢܝܼ ܝܵܘܡܵܢܹ̈ܐ ܕܝܼܠܹܗ ܕܒ݂ܝܼܪܵܐ، ܒܸܬ ܦܵܐܹܫ ܛܲܡܐܵܐ ܗܲܠ ܪܲܡܫܵܐ. 47ܟܠ ܕܕܵܡܹܟ݂ ܓܵܘ ܗ̇ܘ ܒܲܝܬܵܐ، ܡܵܣܹܐ ܓ̰ܘܼܠܘܼ̈ܗܝ؛ ܘܗ̇ܘ ܕܐܵܟܹܠ ܓܵܘܹܗ، ܡܵܣܹܐ ܓ̰ܘܼܠܘܼ̈ܗܝ.
48ܐܝܼܢܵܐ ܟܲܕ ܐܵܬܹܐ ܟܵܗܢܵܐ ܘܨܲܚܨܹܐ ܠܒܲܝܬܵܐ ܘܚܵܙܹܐ ܕܡܚܘܿܬܵܐ ܠܹܐ ܝܠܵܗ̇ ܦܪܝܼܣܬܵܐ ܓܵܘܹܗ، ܡ̣ܢ ܒܵܬ݇ܪ ܕܦܝܼܫܵܐ ܝܗ݇ܘܵܐ ܡܘܼܟ̰ܪܸܥܵܐ، ܗ̇ܝܓܵܗ ܟܵܗܢܵܐ ܥܵܒܹܕ ܠܹܗ ܒܲܝܬܵܐ ܕܸܟ݂ܝܵܐ ܣܵܒܵܒ ܒܣܝܼܡܵܐ ܝܠܹܗ ܡܲܪܥܵܐ. 49ܘܩܵܐ ܕܲܟ݂ܵܝܬܵܐ ܕܒܲܝܬܵܐ، ܫܵܩܹܠ ܟܵܗܢܵܐ ܬܪܹܝ ܛܲܝܪܹ̈ܐ، ܩܲܝܣܵܐ ܕܐܲܪܙܵܐ، ܩܸܪܡܝܼܙ، ܘܙܘܿܦܵܐ، 50ܘܦܵܪܹܡ ܚܲܕ ܡ̣ܢ ܛܲܝܪܹ̈ܐ ܓܵܘ ܡܵܐܢܵܐ ܕܦܲܚܵܪܵܐ، ܥܲܠ ܡ̈ܝܼܵܐ ܓ̰ܵܪ̈ܝܵܢܹܐ، 51ܘܫܵܩܹܠ ܠܩܲܝܣܵܐ ܕܐܲܪܙܵܐ، ܠܙܘܿܦܵܐ، ܠܩܸܪܡܝܼܙ، ܘܠܛܲܝܪܵܐ ܚܵܝܵܐ، ܘܛܵܡܹܫ ܠܗܘܿܢ ܓܵܘ ܕܸܡܵܐ ܕܛܲܝܪܵܐ ܦܪܝܼܡܵܐ، ܘܓܵܘ ܡ̈ܝܼܵܐ ܓ̰ܵܪ̈ܝܵܢܹܐ، ܘܡܲܪܝܸܣ ܠܒܲܝܬܵܐ ܫܒܲܥ ܓܵܗܹ̈ܐ. 52ܗܲܕܟ݂ܵܐ ܕܲܟܹܐ ܠܹܗ ܒܲܝܬܵܐ ܒܕܸܡܵܐ ܕܛܲܝܪܵܐ، ܒܡ̈ܝܼܵܐ ܓ̰ܵܪ̈ܝܵܢܹܐ، ܒܛܲܝܪܵܐ ܚܵܝܵܐ، ܒܩܲܝܣܵܐ ܕܐܲܪܙܵܐ، ܒܙܘܿܦܵܐ، ܘܒܩܸܪܡܝܼܙ، 53ܘܪܲܦܹܐ ܠܹܗ ܛܲܝܪܵܐ ܚܵܝܵܐ ܠܒܲܕܲܪ ܡ̣ܢ ܡܕܝܼܢ݇ܬܵܐ، ܓܵܘ ܕܸܫܬܵܐ؛ ܘܥܵܒܹܕ ܚܘܼܣܵܝܵܐ ܠܒܲܝܬܵܐ، ܘܒܸܬ ܗܵܘܹܐ ܕܸܟ݂ܝܵܐ.
54ܐܵܗܵܐ ܝܠܹܗ ܢܵܡܘܿܣܵܐ ܩܵܐ ܟܠ ܡܚܘܿܬܵܐ ܕܓܸܪܒ݂ܵܐ، ܘܩܵܐ ܨܘܼܨܵܐ، 55ܘܩܵܐ ܡܲܪܥܵܐ ܕܓܸܪܒ݂ܵܐ ܓܵܘ ܓ̰ܘܼܠܵܐ ܘܓܵܘ ܒܲܝܬܵܐ، 56ܩܵܐ ܙܝܘܼܪܵܐ، ܩܵܐ ܩܲܠܵܦܝܼܬܵܐ، ܘܩܵܐ ܠܲܟܵܐ ܡܲܒܪܸܩܵܢܵܐ، 57ܠܡܲܠܘܼܦܹܐ ܐܝܼܡܲܢ ܚܲܕ ܡܸܢܕܝܼ ܛܲܡܐܵܐ ܝܠܹܗ ܘܐܝܼܡܲܢ ܕܸܟ݂ܝܵܐ. ܐܵܗܵܐ ܝܠܹܗ ܢܵܡܘܿܣܵܐ ܕܓܸܪܒ݂ܵܐ.“
Currently Selected:
ܟܗܢ̈ܐ 14: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
