ܟܗܢ̈ܐ 13
13
ܦܘܼܩܕܵܢܵܐ ܒܘܼܬ ܓܸܪܒ݂ܵܐ
1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ، ܘܐ݇ܡܝܼܪܹܗ، 2”ܐܸܢ ܐ݇ܢܵܫܵܐ ܚܵܙܹܐ ܙܝܘܼܪܵܐ ܥܲܠ ܓܸܠܕܹܗ، ܝܲܢ ܩܲܠܵܦܝܼܬܵܐ، ܝܲܢ ܚܲܕ ܠܲܟܵܐ ܡܲܒܪܸܩܵܢܵܐ، ܘܚܵܕܹܪ ܠܓܸܪܒ݂ܵܐ، ܗ̇ܝܓܵܗ ܦܵܐܹܫ ܡܘܼܐܬܝܵܐ ܠܟܸܣ ܐܲܗܪܘܿܢ ܟܵܗܢܵܐ ܝܲܢ ܠܟܸܣ ܚܲܕ ܡ̣ܢ ܒܢܘܿܢܘܼ̈ܗܝ ܟܵܗܢܹ̈ܐ، 3ܟܵܗܢܵܐ ܒܸܬ ܨܲܚܨܹܐ ܠܵܗ̇ ܕܘܼܟܵܐ ܕܡܲܪܥܵܐ ܥܲܠ ܓܸܠܕܵܐ، ܘܐܸܢ ܡܸܙܬܵܐ ܒܕܘܼܟܵܐ ܕܡܲܪܥܵܐ ܚܘܝܼܪܬܵܐ ܝܠܵܗ̇، ܘܐܸܢ ܕܘܼܟܵܐ ܕܡܲܪܥܵܐ ܒܘܼܫ ܥܲܡܘܼܩܬܵܐ ܝܠܵܗ̇ ܡ̣ܢ ܓܸܠܕܵܐ ܕܒܸܣܪܹܗ، ܡܲܪܥܵܐ ܕܓܸܪܒ݂ܵܐ ܝܠܹܗ؛ ܘܡ̣ܢ ܒܵܬ݇ܪ ܚܙܵܝܬܹܗ ܡܲܕܸܥ ܠܹܗ ܟܵܗܢܵܐ ܕܛܲܡܐܵܐ ܝܠܹܗ. 4ܐܝܼܢܵܐ ܐܸܢ ܕܘܼܟܵܐ ܕܡܲܪܥܵܐ ܥܲܠ ܓܸܠܕܵܐ ܚܘܵܪܬܵܐ ܝܠܵܗ̇، ܘܠܹܐ ܝܠܵܗ̇ ܒܘܼܫ ܥܲܡܘܼܩܬܵܐ ܡ̣ܢ ܓܸܠܕܵܐ، ܘܡܸܙܬܵܐ ܒܗ̇ܝ ܕܘܼܟܵܐ ܠܹܐ ܝܠܵܗ̇ ܦܝܼܫܬܵܐ ܚܘܵܪܬܵܐ، ܗ̇ܝܓܵܗ ܟܵܗܢܵܐ ܡܲܬܸܒ݂ ܠܹܗ ܗ̇ܘ ܐ݇ܢܵܫܵܐ ܒܢܲܦ̮ܫܹܗ ܫܲܒ݂ܥܵܐ ܝܵܘܡܵܢܹ̈ܐ؛ 5ܒܝܵܘܡܵܐ ܕܫܲܒ݂ܥܵܐ ܨܲܚܨܹܐ ܠܹܗ ܟܵܗܢܵܐ، ܘܐܸܢ ܡܲܪܥܵܐ ܟܸܠܝܵܐ ܝܠܹܗ ܘܠܹܐ ܝܠܹܗ ܦܪܝܼܣܵܐ ܥܲܠ ܓܸܠܕܵܐ، ܗ̇ܝܓܵܗ ܟܵܗܢܵܐ ܡܲܬܸܒ݂ ܠܹܗ ܗ̇ܘ ܐ݇ܢܵܫܵܐ ܒܢܲܦ̮ܫܹܗ ܩܵܐ ܫܲܒ݂ܥܵܐ ܝܵܘܡܵܢܹ̈ܐ ܐ݇ܚܹܪ̈݇ܢܹܐ؛ 6ܡܸܢܕܪܸܫ ܨܲܚܨܹܐ ܠܹܗ ܟܵܗܢܵܐ ܒܝܵܘܡܵܐ ܕܫܲܒ݂ܥܵܐ، ܘܐܸܢ ܡܲܪܥܵܐ ܒܸܒܣܵܡܵܐ ܝܠܹܗ، ܘܠܹܐ ܝܠܹܗ ܦܪܝܼܣܵܐ ܥܲܠ ܓܸܠܕܵܐ، ܡܲܕܸܥ ܠܹܗ ܟܵܗܢܵܐ ܕܕܸܟ݂ܝܵܐ ܝܠܹܗ، ܣܵܒܵܒ ܐܲܚܟ̰ܝܼ ܩܲܠܵܦܝܼܬܵܐ ܝܠܵܗ̇. ܡܵܣܹܐ ܗ̇ܘ ܐ݇ܢܵܫܵܐ ܓ̰ܘܼܠܘܼ̈ܗܝ، ܘܒܸܬ ܗܵܘܹܐ ܕܸܟ݂ܝܵܐ. 7ܐܝܼܢܵܐ ܐܸܢ ܩܲܠܵܦܝܼܬܵܐ ܦܵܪܣܵܐ ܥܲܠ ܓܸܠܕܵܐ ܡ̣ܢ ܒܵܬ݇ܪ ܕܐ݇ܢܵܫܵܐ ܡܘܼܚܙܝܼܘܼܗ̇ ܝܗ݇ܘܵܐ ܓܵܢܹܗ ܠܟܵܗܢܵܐ ܒܘܼܬ ܕܲܟ݂ܵܝܬܹܗ، ܗ̇ܝܓܵܗ ܡܸܢܕܪܸܫ ܦܵܐܹܫ ܚܸܙܝܵܐ ܒܝܲܕ ܟܵܗܢܵܐ. 8ܘܐܸܢ ܟܵܗܢܵܐ ܚܵܙܹܐ ܕܦܪܝܼܣܬܵܐ ܝܠܵܗ̇ ܩܲܠܵܦܝܼܬܵܐ ܥܲܠ ܓܸܠܕܵܐ، ܗ̇ܝܓܵܗ ܡܲܕܸܥ ܠܹܗ ܕܛܲܡܐܵܐ ܝܠܹܗ ܗ̇ܘ ܐ݇ܢܵܫܵܐ، ܣܵܒܵܒ ܓܸܪܒ݂ܵܐ ܝܠܹܗ.
9ܐܸܢ ܚܲܕ ܐ݇ܢܵܫܵܐ ܐܝܼܬ ܠܹܗ ܓܸܪܒ݂ܵܐ، ܦܵܐܹܫ ܡܘܼܐܬܝܵܐ ܠܟܸܣ ܟܵܗܢܵܐ، 10ܨܲܚܨܹܐ ܠܹܗ ܟܵܗܢܵܐ، ܘܐܸܢ ܐܝܼܬ ܙܝܘܼܪܵܐ ܚܘܵܪܵܐ ܥܲܠ ܓܸܠܕܹܗ، ܘܚܕܝܼܪܬܵܐ ܝܠܵܗ̇ ܡܸܙܬܹܗ ܚܘܵܪܬܵܐ، ܘܐܝܼܬ ܪܘܼܫܡܵܐ ܕܒܸܣܪܵܐ ܚܵܝܵܐ ܓܵܘ ܙܝܘܼܪܵܐ، 11ܐܵܗܵܐ ܓܸܪܒ݂ܵܐ ܥܲܬܝܼܩܵܐ ܝܠܹܗ ܥܲܠ ܓܸܠܕܵܐ؛ ܥܵܒܹܕ ܠܹܗ ܟܵܗܢܵܐ ܛܲܡܐܵܐ. ܠܵܐ ܡܲܬܸܒ݂ ܠܹܗ ܒܢܲܦ̮ܫܹܗ ܣܵܒܵܒ ܛܲܡܐܵܐ ܝܠܹܗ.
12ܐܸܢ ܦܵܪܹܣ ܓܸܪܒ݂ܵܐ ܓܵܘ ܓܸܠܕܵܐ ܗܵܕܵܐ ܕܟܲܣܹܐ ܠܹܗ ܟܠܹܗ ܦܲܓ݂ܪܵܐ ܕܡܲܪܥܵܢܵܐ ܡ̣ܢ ܪܹܫܵܐ ܗܲܠ ܐܲܩܠܵܐ، ܟܲܕ ܨܲܚܨܹܐ ܠܹܗ ܟܵܗܢܵܐ، 13ܘܚܵܙܹܐ ܕܓܸܪܒ݂ܵܐ ܡܘܼܟܣܵܐ ܝܠܹܗ ܠܟܠܹܗ ܒܸܣܪܹܗ، ܗ̇ܝܓܵܗ ܟܵܗܢܵܐ ܡܲܕܸܥ ܠܹܗ ܕܸܟ݂ܝܵܐ ܗ̇ܘ ܕܐܝܼܬ ܠܹܗ ܡܲܪܥܵܐ، ܣܵܒܵܒ ܟܠܹܗ ܚܕܝܼܪܵܐ ܝܠܹܗ ܠܚܘܵܪܵܐ، ܘܕܸܟ݂ܝܵܐ ܝܠܹܗ. 14ܐܝܼܢܵܐ ܐܸܢ ܕܲܪܒܵܐ ܚܲܕܬܵܐ ܡܲܒܝܸܢܵܐ ܥܲܠ ܗ̇ܘ ܕܝܼܗ݇ܘܵܐ ܡܪܝܼܥܵܐ، ܦܵܐܹܫ ܥܒ݂ܝܼܕܵܐ ܛܲܡܐܵܐ. 15ܨܲܚܨܹܐ ܟܵܗܢܵܐ ܕܲܪܒܵܐ ܚܲܕܬܵܐ، ܘܡܲܕܸܥ ܠܹܗ ܛܲܡܐܹܐ، ܣܵܒܵܒ ܕܲܪܒܵܐ ܚܲܕܬܵܐ ܓܸܪܒ݂ܵܐ ܝܠܵܗ̇، ܘܓܸܪܒ݂ܵܐ ܛܲܡܐܵܐ ܝܠܹܗ. 16ܐܝܼܢܵܐ ܐܸܢ ܕܵܝܪܵܐ ܕܲܪܒܵܐ ܡܸܢܕܪܸܫ، ܘܚܵܕܪܵܐ ܠܚܘܵܪܬܵܐ، ܗ̇ܝܓܵܗ ܕܵܐܹܪ ܡܲܪܥܵܢܵܐ ܡܸܢܕܪܸܫ ܠܟܸܣ ܟܵܗܢܵܐ، 17ܘܨܲܚܨܹܐ ܠܹܗ ܟܵܗܢܵܐ، ܘܚܵܙܹܐ ܐܸܢ ܡܲܪܥܵܐ ܚܕܝܼܪܵܐ ܝܠܹܗ ܠܚܘܵܪܵܐ، ܗ̇ܝܓܵܗ ܟܵܗܢܵܐ ܡܲܕܸܥ ܠܹܗ ܡܲܪܥܵܢܵܐ ܕܸܟ݂ܝܵܐ، ܣܵܒܵܒ ܕܸܟ݂ܝܵܐ ܝܠܹܗ.
18ܐܸܢ ܐ݇ܢܵܫܵܐ ܐܝܼܬ ܠܹܗ ܫܘܼܚܢܵܐ ܥܲܠ ܓܸܠܕܹܗ، ܘܗܵܘܹܐ ܒܸܒܣܵܡܵܐ، 19ܘܥܲܠ ܫܵܘܦܵܐ ܕܫܘܼܚܢܵܐ ܐܝܼܬ ܙܝܘܼܪܵܐ ܚܘܵܪܵܐ ܝܲܢ ܠܲܟܵܐ ܚܘܵܪܵܐ ܣܡܘܿܩܢܵܝܵܐ، ܗ̇ܘ ܐ݇ܢܵܫܵܐ ܐܵܙܹܠ ܠܟܸܣ ܟܵܗܢܵܐ ܕܦܵܐܹܫ ܨܘܼܚܨܝܼܵܐ. 20ܨܲܚܨܹܐ ܠܹܗ ܟܵܗܢܵܐ، ܘܐܸܢ ܚܵܙܹܐ ܕܡܲܪܥܵܐ ܒܘܼܫ ܥܲܡܘܼܩܵܐ ܝܠܹܗ ܡ̣ܢ ܓܸܠܕܵܐ، ܘܡܸܙܬܵܐ ܚܕܝܼܪܬܵܐ ܝܠܵܗ̇ ܠܚܘܵܪܬܵܐ، ܗ̇ܝܓܵܗ ܡܲܕܸܥ ܠܹܗ ܟܵܗܢܵܐ ܕܛܲܡܐܵܐ ܝܠܹܗ؛ ܡܲܪܥܵܐ ܕܓܸܪܒ݂ܵܐ ܝܠܹܗ، ܘܦܪܝܼܣܵܐ ܝܠܹܗ ܓܵܘ ܫܘܼܚܢܵܐ. 21ܐܝܼܢܵܐ ܐܸܢ ܚܵܙܹܐ ܟܵܗܢܵܐ ܕܠܲܝܬ ܒܝܼܘܼܗ̇ ܡܸܙܬܵܐ ܚܘܵܪܬܵܐ، ܘܕܲܪܒܵܐ ܠܹܐ ܝܠܵܗ̇ ܒܘܼܫ ܥܲܡܘܼܩܬܵܐ ܡ̣ܢ ܓܸܠܕܵܐ، ܘܪܲܢܓܘܼܗ̇ ܪ݇ܚܝܼܫܵܐ ܝܠܹܗ، ܗ̇ܝܓܵܗ ܡܲܬܸܒ݂ ܠܹܗ ܟܵܗܢܵܐ ܒܢܲܦ̮ܫܹܗ ܫܲܒ݂ܥܵܐ ܝܵܘܡܵܢܹ̈ܐ؛ 22ܐܸܢ ܦܪܝܼܣܬܵܐ ܝܠܵܗ̇ ܓܵܘ ܓܸܠܕܵܐ، ܗ̇ܝܓܵܗ ܟܵܗܢܵܐ ܥܵܒܹܕ ܠܹܗ ܛܲܡܐܵܐ، ܣܵܒܵܒ ܡܲܪܥܵܐ ܬܵܦܝܵܢܵܐ ܝܠܹܗ. 23ܐܝܼܢܵܐ ܐܸܢ ܠܹܐ ܝܠܵܗ̇ ܓܘܼܪܘܸܣܬܵܐ ܗ̇ܝ ܕܘܼܟܵܐ، ܘܡܲܪܥܵܐ ܠܹܐ ܝܠܹܗ ܦܪܝܼܣܵܐ، ܐܸܠܵܐ ܫܵܘܦܵܐ ܕܕܲܪܒܵܐ ܝܠܹܗ ܐܲܚܟ̰ܝܼ؛ ܟܵܗܢܵܐ ܡܲܕܸܥ ܠܹܗ ܕܕܸܟ݂ܝܵܐ ܝܠܹܗ.
24ܘܐܸܢ ܐܝܼܬ ܕܘܼܟܵܐ ܕܝ݇ܩܘܼܕܵܐ ܥܲܠ ܦܲܓ݂ܪܵܐ ܕܚܲܕ ܐ݇ܢܵܫܵܐ، ܘܫܲܚܠܸܦ ܪܲܢܓܵܐ ܕܗ̇ܝ ܕܘܼܟܵܐ، ܘܗܵܘܝܵܐ ܚܘܵܪܬܵܐ ܣܡܘܿܩܢܵܝܬܵܐ، ܝܲܢ ܚܘܵܪܬܵܐ، 25ܗ̇ܝܓܵܗ ܨܲܚܨܹܐ ܟܵܗܢܵܐ ܠܗ̇ܘ ܐ݇ܢܵܫܵܐ، ܐܸܢ ܡܸܙܬܵܐ ܕܓܵܘ ܕܲܪܒܵܐ ܚܕܝܼܪܬܵܐ ܝܠܵܗ̇ ܠܚܘܵܪܬܵܐ ܘܒܘܼܫ ܥܲܡܘܼܩܬܵܐ ܝܠܵܗ̇ ܡ̣ܢ ܓܸܠܕܵܐ، ܓܸܪܒ݂ܵܐ ܝܠܹܗ، ܘܦܪܝܼܣܵܐ ܝܠܹܗ ܓܵܘ ܕܘܼܟܵܐ ܕܝ݇ܩܘܼܕܵܐ؛ ܗ̇ܝܓܵܗ ܟܵܗܢܵܐ ܥܵܒܹܕ ܠܹܗ ܛܲܡܐܵܐ، ܒܗ̇ܝ ܕܡܲܪܥܵܐ ܕܓܸܪܒ݂ܵܐ ܝܠܹܗ. 26ܐܝܼܢܵܐ ܐܸܢ ܚܵܙܹܐ ܟܵܗܢܵܐ ܕܠܲܝܬ ܡܸܙܬܵܐ ܚܘܵܪܬܵܐ ܓܵܘ ܕܲܪܒܵܐ، ܘܠܹܐ ܝܠܵܗ̇ ܒܘܼܫ ܥܲܡܘܼܩܬܵܐ ܡ̣ܢ ܓܸܠܕܵܐ، ܘܪ݇ܚܝܼܫܵܐ ܝܠܹܗ ܪܲܢܓܘܼܗ̇، ܗ̇ܝܓܵܗ ܡܲܬܸܒ݂ ܠܹܗ ܟܵܗܢܵܐ ܗ̇ܘ ܐ݇ܢܵܫܵܐ ܒܢܲܦ̮ܫܹܗ ܫܲܒ݂ܥܵܐ ܝܵܘܡܵܢܹ̈ܐ. 27ܒܝܵܘܡܵܐ ܕܫܲܒ݂ܥܵܐ ܚܵܙܹܐ ܠܹܗ ܟܵܗܢܵܐ. ܐܸܢ ܒܸܦܪܵܣܵܐ ܝܠܹܗ ܡܲܪܥܵܐ ܓܵܘ ܓܸܠܕܵܐ، ܥܵܒܹܕ ܠܹܗ ܟܵܗܢܵܐ ܛܲܡܐܵܐ؛ ܡܲܪܥܵܐ ܕܓܸܪܒ݂ܵܐ ܝܠܹܗ. 28ܐܝܼܢܵܐ ܐܸܢ ܕܲܪܒܵܐ ܒܫܵܘܦܘܼܗ̇ ܝܠܵܗ̇، ܘܠܹܐ ܝܠܵܗ̇ ܦܪܝܼܣܬܵܐ ܓܵܘ ܓܸܠܕܵܐ، ܘܪ݇ܚܝܼܫܵܐ ܝܠܹܗ ܪܲܢܓܘܼܗ̇، ܙܝܘܼܪܵܐ ܕܝ݇ܩܘܼܕܵܐ ܝܠܹܗ. ܥܵܒܹܕ ܠܹܗ ܟܵܗܢܵܐ ܕܸܟ݂ܝܵܐ، ܣܵܒܵܒ ܫܵܘܦܵܐ ܕܝ݇ܩܘܼܕܵܐ ܝܠܹܗ.
29ܐܸܢ ܐܘܼܪܙܵܐ ܝܲܢ ܢܸܩܒ݂ܵܐ ܗܵܘܹܐ ܠܗܘܿܢ ܕܲܪܒܵܐ ܥܲܠ ܪܹܫܵܐ ܝܲܢ ܥܲܠ ܟ̰ܸܢܝܼܬܵܐ، 30ܨܲܚܨܹܐ ܠܵܗ̇ ܟܵܗܢܵܐ ܕܲܪܒܵܐ، ܐܸܢ ܚܵܙܹܐ ܕܒܘܼܫ ܥܲܡܘܼܩܬܵܐ ܝܠܵܗ̇ ܡ̣ܢ ܓܸܠܕܵܐ، ܘܐܝܼܬ ܓܵܘܘܼܗ̇ ܡܸܙܬܵܐ ܙܲܪܕܹܐ ܢܵܙܸܟ، ܥܵܒܹܕ ܠܹܗ ܟܵܗܢܵܐ ܛܲܡܐܵܐ، ܐܘܼܟ݂ܠܵܐ ܝܠܵܗ̇، ܓܸܪܒ݂ܵܐ ܕܪܹܫܵܐ ܝܲܢ ܕܟ̰ܸܢܝܼܬܵܐ 31ܐܝܼܢܵܐ ܟܲܕ ܨܲܚܨܹܐ ܟܵܗܢܵܐ ܠܕܲܪܒܵܐ ܘܚܵܙܹܐ ܕܠܹܐ ܝܠܵܗ̇ ܒܘܼܫ ܥܲܡܘܼܩܬܵܐ ܡ̣ܢ ܓܸܠܕܵܐ ܘܠܲܝܬ ܡܸܙܬܵܐ ܟܘܼܡܬܵܐ ܓܵܘܘܼܗ̇، ܗ̇ܝܓܵܗ ܡܲܬܸܒ݂ ܠܹܗ ܟܵܗܢܵܐ ܠܗ̇ܘ ܦܲܪܨܘܿܦܵܐ ܒܢܲܦ̮ܫܹܗ ܫܲܒ݂ܥܵܐ ܝܵܘܡܵܢܹ̈ܐ، 32ܒܝܵܘܡܵܐ ܕܫܲܒ݂ܥܵܐ ܨܲܚܨܹܐ ܠܹܗ ܟܵܗܢܵܐ ܡܲܪܥܵܐ، ܐܸܢ ܠܹܐ ܝܠܹܗ ܦܪܝܼܣܵܐ ܘܠܲܝܬ ܒܝܼܹܗ ܡܸܙܬܵܐ ܙܲܪܕܹܐ، ܘܕܲܪܒܵܐ ܠܹܐ ܝܠܵܗ̇ ܒܘܼܫ ܥܲܡܘܼܩܬܵܐ ܡ̣ܢ ܓܸܠܕܵܐ، 33ܗ̇ܝܓܵܗ ܡܲܪܥܵܢܵܐ ܓܵܪܹܥ ܟܠܵܗ̇ ܡܸܙܬܵܐ ܕܦܲܓ݂ܪܹܗ، ܫܒ݂ܘܿܩ ܡ̣ܢ ܡܸܙܬܵܐ ܕܕܘܼܟܵܐ ܕܐܘܼܟ݂ܠܵܐ، ܘܡܲܬܸܒ݂ ܠܹܗ ܟܵܗܢܵܐ ܒܢܲܦ̮ܫܹܗ ܫܲܒ݂ܥܵܐ ܝܵܘܡܵܢܹ̈ܐ. 34ܘܒܝܵܘܡܵܐ ܕܫܲܒ݂ܥܵܐ ܨܲܚܨܹܐ ܠܹܗ ܟܵܗܢܵܐ ܐܘܼܟ݂ܠܵܐ، ܐܸܢ ܠܹܐ ܝܠܹܗ ܦܪܝܼܣܵܐ ܡܲܪܥܵܐ ܓܵܘ ܓܸܠܕܵܐ، ܘܠܹܐ ܝܠܹܗ ܒܘܼܫ ܥܲܡܘܼܩܵܐ ܡ̣ܢ ܓܸܠܕܵܐ، ܗ̇ܝܓܵܗ ܥܵܒܹܕ ܠܹܗ ܟܵܗܢܵܐ ܕܸܟ݂ܝܵܐ؛ ܘܗ̇ܘ ܡܵܣܹܐ ܓ̰ܘܼܠܘܼ̈ܗܝ، ܘܒܸܬ ܗܵܘܹܐ ܕܸܟ݂ܝܵܐ. 35ܐܝܼܢܵܐ ܐܸܢ ܦܵܪܹܣ ܐܘܼܟ݂ܠܵܐ ܒܓܸܠܕܵܐ ܡ̣ܢ ܒܵܬ݇ܪ ܕܲܟ݂ܵܝܬܵܐ، 36ܗ̇ܝܓܵܗ ܡܸܢܕܪܸܫ ܨܲܚܨܹܐ ܠܹܗ ܟܵܗܢܵܐ، ܘܐܸܢ ܐܘܼܟ݂ܠܵܐ ܗܵܘܹܐ ܦܪܝܼܣܵܐ ܒܓܸܠܕܵܐ، ܠܹܐ ܝܠܵܗ̇ ܐܵܢܲܢܩܵܝܬܵܐ ܕܛܵܥܹܐ ܟܵܗܢܵܐ ܒܵܬ݇ܪ ܡܸܙܬܵܐ ܙܲܪܕܹܐ؛ ܗ̇ܘ ܦܲܪܨܘܿܦܵܐ ܛܲܡܐܵܐ ܝܠܹܗ. 37ܐܝܼܢܵܐ ܐܸܢ ܚܵܙܹܐ ܟܵܗܢܵܐ ܕܐܘܼܟ݂ܠܵܐ ܠܹܐ ܝܠܹܗ ܦܪܝܼܣܵܐ، ܘܡܸܙܬܵܐ ܟܘܼܡܬܵܐ ܡܘܼܓ̰ܝܸܢܬܵܐ ܝܠܵܗ̇ ܒܫܵܘܦܵܐ ܕܕܲܪܒܵܐ، ܗ̇ܝܓܵܗ ܡܲܪܥܵܐ ܒܣܝܼܡܵܐ ܝܠܹܗ، ܘܟܵܗܢܵܐ ܡܲܕܸܥ ܠܹܗ ܕܕܸܟ݂ܝܵܐ ܝܠܹܗ.
38ܐܸܢ ܐܘܼܪܙܵܐ ܝܲܢ ܢܸܩܒ݂ܵܐ ܗܵܘܹܐ ܠܹܗ ܠܲܟܹ̈ܐ ܚܘܵܪܹ̈ܐ ܡܲܒܪܸ̈ܩܵܢܹܐ ܥܲܠ ܓܸܠܕܹܗ، 39ܨܲܚܨܹܐ ܠܹܗ ܟܵܗܢܵܐ، ܘܐܸܢ ܠܲܟܹ̈ܐ ܕܥܲܠ ܓܸܠܕܵܐ ܕܦܲܓ݂ܪܵܐ ܚܘܵܪܹ̈ܐ ܝܢܵܐ ܪܲܢܓܲܝܗܝ ܪܝܼܩܵܐ، ܐܵܗܵܐ ܠܹܐ ܝܠܹܗ ܡܲܪܥܵܐ ܬܵܦܝܵܢܵܐ؛ ܗ̇ܘ ܦܲܪܨܘܿܦܵܐ ܕܸܟ݂ܝܵܐ ܝܠܹܗ.
40ܐܸܢ ܢܵܬܪܵܐ ܡܸܙܬܵܐ ܕܪܹܫܵܐ ܕܐ݇ܢܵܫܵܐ، ܓܒ݂ܝܼܚܵܐ ܝܠܹܗ، ܐܝܼܢܵܐ ܕܸܟ݂ܝܵܐ ܝܠܹܗ. 41ܐܸܢ ܡܸܙܬܵܐ ܡ̣ܢ ܩܵܕ݇ܡ ܪܹܫܹܗ ܘܡ̣ܢ ܕܸܦܢܵܬܹ̈ܗ ܢܬܝܼܪܬܵܐ ܝܠܵܗ̇، ܩܵܕ݇ܡ ܪܹܫܹܗ ܓܒ݂ܝܼܚܵܐ ܝܠܹܗ، ܐܝܼܢܵܐ ܕܸܟ݂ܝܵܐ ܝܠܹܗ. 42ܐܝܼܢܵܐ ܐܸܢ ܠܲܟܹ̈ܐ ܚܘܵܪܹ̈ܐ ܣܡܘܿܩܢܵܝܹ̈ܐ ܦܵܝܫܝܼ ܚܸܙܝܹܐ ܥܲܠ ܪܹܫܹܗ ܝܲܢ ܩܵܕ݇ܡ ܪܹܫܹܗ ܓܒ݂ܝܼܚܹܐ، ܓܸܪܒ݂ܵܐ ܝܠܹܗ ܒܸܦܪܵܣܵܐ ܥܲܠ ܪܹܫܹܗ ܓܒ݂ܝܼܚܵܐ ܝܲܢ ܥܲܠ ܩܵܕ݇ܡ ܪܹܫܹܗ ܓܒ݂ܝܼܚܵܐ. 43ܗ̇ܝܓܵܗ ܨܲܚܨܹܐ ܠܹܗ ܟܵܗܢܵܐ، ܘܐܸܢ ܚܵܙܹܐ ܕܲܪܒܵܐ ܣܡܘܿܩܢܵܝܬܵܐ ܚܘܵܪܬܵܐ ܕܥܲܠ ܪܹܫܹܗ ܓܒ݂ܝܼܚܵܐ ܝܲܢ ܥܲܠ ܩܵܕ݇ܡ ܪܹܫܹܗ ܓܒ݂ܝܼܚܵܐ ܕܒܸܕܡܵܝܵܐ ܝܠܵܗ̇ ܠܓܸܪܒ݂ܵܐ ܕܥܲܠ ܓܸܠܕܵܐ ܕܦܲܓ݂ܪܵܐ، 44ܓܸܪܒ݂ܵܢܵܐ ܝܠܹܗ ܗ̇ܘ ܐ݇ܢܵܫܵܐ ܘܛܲܡܐܵܐ ܝܠܹܗ؛ ܥܵܒܹܕ ܠܹܗ ܟܵܗܢܵܐ ܛܲܡܐܵܐ ܣܵܒܵܒ ܡܲܪܥܵܐ ܥܲܠ ܪܹܫܹܗ ܝܠܹܗ.
45ܟܠ ܕܐܝܼܬ ܠܹܗ ܓܸܪܒ݂ܵܐ ܠܵܒܹܫ ܓ̰ܘܼܠܹ̈ܐ ܦܪ̈ܝܼܛܹܐ، ܘܓܵܠܹܐ ܪܹܫܹܗ، ܘܡܲܟܸܣ ܠܹܗ ܦܘܼܡܹܗ، ܘܡܲܩܘܸܚ، ’ܛܲܡܐܵܐ، ܛܲܡܐܵܐ.‘ 46ܟܡܵܐ ܝܵܘܡܵܢܹ̈ܐ ܕܐܝܼܬ ܒܝܼܹܗ ܓܸܪܒ݂ܵܐ، ܛܲܡܐܵܐ ܝܠܹܗ؛ ܚܵܝܹܐ ܒܢܲܦ̮ܫܹܗ ܠܒܲܕܲܪ ܡ̣ܢ ܡܲܫܪܝܼܬܵܐ.
ܒܘܼܬ ܓ̰ܘܼܠܹ̈ܐ ܠܵܐ ܕܸܟ݂ܝܹ̈ܐ
47”ܠܒ݂ܝܼܫܬܵܐ ܕܐܝܼܬ ܥܲܠܘܼܗ̇ ܬܸܦܢܵܐ، ܐܸܢ ܡ̣ܢ ܥܲܡܪܵܐ ܝܠܵܗ̇ ܝܲܢ ܡ̣ܢ ܟܸܬܵܢܵܐ، 48ܐܸܢ ܓܕܝܼܠܬܵܐ ܝܠܵܗ̇ ܝܲܢ ܙܩܝܼܪܬܵܐ ܡ̣ܢ ܟܸܬܵܢܵܐ ܝܲܢ ܡ̣ܢ ܥܲܡܪܵܐ، ܐܸܢ ܡ̣ܢ ܓܸܠܕܵܐ ܝܠܵܗ̇ ܝܲܢ ܡ̣ܢ ܟܠ ܡܸܢܕܝܼ ܐ݇ܚܹܪ݇ܢܵܐ ܬܘܼܪܨܵܐ ܡ̣ܢ ܓܸܠܕܵܐ، 49ܐܸܢ ܠܲܟܵܐ ܡܝܼܠܵܢܵܐ ܝܲܢ ܣܡܘܿܩܢܵܝܵܐ ܗܵܘܹܐ ܥܲܠ ܠܒ݂ܝܼܫܬܵܐ ܕܓܸܠܕܵܐ، ܝܲܢ ܓ̰ܘܼܠܵܐ ܓܕܝܼܠܵܐ ܝܲܢ ܙܩܝܼܪܵܐ، ܝܲܢ ܠܟܠ ܡܸܢܕܝܼ ܬܘܼܪܨܵܐ ܡ̣ܢ ܓܸܠܕܵܐ؛ ܡܲܪܥܵܐ ܕܓܸܪܒ݂ܵܐ ܝܠܹܗ ܘܦܵܐܹܫ ܡܘܼܚܙܝܼܵܐ ܠܟܵܗܢܵܐ. 50ܡ̣ܢ ܒܵܬ݇ܪ ܕܚܵܙܹܐ ܠܹܗ ܟܵܗܢܵܐ، ܦܵܪܹܫ ܠܹܗ ܠܚܲܕ ܓܹܒܵܐ ܩܵܐ ܫܲܒ݂ܥܵܐ ܝܵܘܡܵܢܹ̈ܐ. 51ܡ̣ܢ ܒܵܬ݇ܪ ܫܲܒ݂ܥܵܐ ܝܵܘܡܵܢܹ̈ܐ ܨܲܚܨܹܐ ܠܹܗ ܟܵܗܢܵܐ. ܐܸܢ ܡܲܪܥܵܐ ܦܪܝܼܣܵܐ ܝܠܹܗ ܒܠܒ݂ܝܼܫܬܵܐ، ܝܲܢ ܒܓ̰ܘܼܠܵܐ ܓܕܝܼܠܵܐ ܝܲܢ ܙܩܝܼܪܵܐ، ܝܲܢ ܒܓܸܠܕܵܐ ܝܲܢ ܒܟܠ ܡܸܢܕܝܼ ܬܘܼܪܨܵܐ ܡ̣ܢ ܓܸܠܕܵܐ، ܡܲܪܥܵܐ ܕܓܸܪܒ݂ܵܐ ܝܠܹܗ، ܬܵܦܝܵܢܵܐ، ܘܛܲܡܐܵܐ ܝܠܹܗ. 52ܗ̇ܝܓܵܗ ܗ̇ܘ ܡܲܩܸܕ ܠܵܗ̇ ܠܒ݂ܝܼܫܬܵܐ، ܗܵܘܝܵܐ ܡ̣ܢ ܓ̰ܘܼܠܵܐ ܓܕܝܼܠܵܐ ܝܲܢ ܙܩܝܼܪܵܐ ܕܥܲܡܪܵܐ ܝܲܢ ܕܟܸܬܵܢܵܐ، ܝܲܢ ܡ̣ܢ ܓܸܠܕܵܐ، ܣܵܒܵܒ ܡܲܪܥܵܐ ܕܓܸܪܒ݂ܵܐ ܝܠܹܗ، ܬܵܦܝܵܢܵܐ، ܒܢܘܼܪܵܐ ܦܵܐܹܫ ܡܘܼܩܕܵܐ.
53ܐܝܼܢܵܐ ܐܸܢ ܚܵܙܹܐ ܟܵܗܢܵܐ ܕܡܲܪܥܵܐ ܠܹܐ ܝܠܹܗ ܦܪܝܼܣܵܐ ܒܠܒ݂ܝܼܫܬܵܐ، ܝܲܢ ܒܓ̰ܘܼܠܵܐ ܓܕܝܼܠܵܐ ܝܲܢ ܙܩܝܼܪܵܐ، ܝܲܢ ܒܟܠ ܡܸܢܕܝܼ ܬܘܼܪܨܵܐ ܡ̣ܢ ܓܸܠܕܵܐ، 54ܗ̇ܝܓܵܗ ܦܵܩܹܕ ܟܵܗܢܵܐ ܕܦܵܐܹܫ ܡܸܣܝܵܐ ܗ̇ܘ ܓ̰ܘܼܠܵܐ ܕܐܝܼܬ ܒܝܼܹܗ ܡܲܪܥܵܐ، ܘܡܲܬܸܒ݂ ܠܹܗ ܒܢܲܦ̮ܫܹܗ ܫܲܒ݂ܥܵܐ ܝܵܘܡܵܢܹ̈ܐ ܐ݇ܚܹܪ̈݇ܢܹܐ. 55ܘܡ̣ܢ ܒܵܬ݇ܪ ܕܦܝܼܫܵܐ ܝܠܹܗ ܡܸܣܝܵܐ، ܨܲܚܨܹܐ ܠܹܗ ܟܵܗܢܵܐ، ܘܐܸܢ ܡܲܪܥܵܐ ܠܹܐ ܝܠܹܗ ܫܘܼܚܠܸܦܹܗ ܪܲܢܓܹܗ، ܐܘܼܦ ܐܸܢ ܠܹܐ ܝܠܹܗ ܦܪܝܼܣܵܐ، ܛܲܡܐܵܐ ܝܠܹܗ. ܡܲܩܕܸܬ ܠܹܗ ܗ̇ܘ ܓ̰ܘܼܠܵܐ ܒܢܘܼܪܵܐ، ܐܸܢ ܠܲܟܵܐ ܕܓܸܪܒ݂ܵܐ ܠܩܵܕ݇ܡܵܐ ܝܠܹܗ ܝܲܢ ܠܒܵܬ݇ܪܵܐ. 56ܐܝܼܢܵܐ ܐܸܢ ܚܵܙܹܐ ܟܵܗܢܵܐ ܕܪܲܢܓ ܕܓ̰ܘܼܠܵܐ ܡܸܣܝܵܐ ܝܠܹܗ ܡ̣ܢ ܒܵܬ݇ܪ ܡܣܵܝܬܵܐ، ܦܵܪܹܛ ܠܵܗ̇ ܫܵܘܦܵܐ ܕܡܲܪܥܵܐ ܡ̣ܢ ܠܒ݂ܝܼܫܬܵܐ، ܝܲܢ ܡ̣ܢ ܓܸܠܕܵܐ، ܝܲܢ ܡ̣ܢ ܓ̰ܘܼܠܵܐ ܓܕܝܼܠܵܐ ܝܲܢ ܙܩܝܼܪܵܐ. 57ܐܝܼܢܵܐ ܐܸܢ ܡܸܢܕܪܸܫ ܦܵܐܹܫ ܚܸܙܝܵܐ ܡܲܪܥܵܐ ܒܠܒ݂ܝܼܫܬܵܐ، ܝܲܢ ܒܓ̰ܘܼܠܵܐ ܓܕܝܼܠܵܐ ܝܲܢ ܙܩܝܼܪܵܐ، ܝܲܢ ܒܟܠ ܡܸܢܕܝܼ ܬܘܼܪܨܵܐ ܡ̣ܢ ܓܸܠܕܵܐ، ܒܸܦܪܵܣܵܐ ܝܠܹܗ ܡܲܪܥܵܐ. ܡܲܩܕܸܬ ܠܹܗ ܒܢܘܼܪܵܐ ܗ̇ܘ ܡܸܢܕܝܼ ܕܐܝܼܬ ܒܝܼܹܗ ܡܲܪܥܵܐ. 58ܐܝܼܢܵܐ ܡ̣ܢ ܒܵܬ݇ܪ ܡܣܵܝܬܵܐ، ܐܸܢ ܡܲܪܥܵܐ ܡܸܣܝܵܐ ܝܠܹܗ ܡ̣ܢ ܠܒ݂ܝܼܫܬܵܐ، ܝܲܢ ܓ̰ܘܼܠܵܐ ܓܕܝܼܠܵܐ ܝܲܢ ܙܩܝܼܪܵܐ، ܝܲܢ ܡ̣ܢ ܟܠ ܡܸܢܕܝܼ ܕܝܼܠܹܗ ܬܘܼܪܨܵܐ ܡ̣ܢ ܓܸܠܕܵܐ، ܗ̇ܝܓܵܗ ܡܸܢܕܪܸܫ ܦܵܐܹܫ ܡܸܣܝܵܐ ܗ̇ܘ ܓ̰ܘܼܠܵܐ، ܘܒܸܬ ܦܵܐܹܫ ܕܸܟ݂ܝܵܐ. 59ܐܵܗܵܐ ܝܠܹܗ ܢܵܡܘܿܣܵܐ ܒܘܼܬ ܡܲܪܥܵܐ ܕܓܸܪܒ݂ܵܐ ܕܥܲܠ ܓ̰ܘܼܠܵܐ ܕܥܲܡܪܵܐ ܝܲܢ ܕܟܸܬܵܢ، ܝܲܢ ܕܫܸܬܝܵܐ، ܝܲܢ ܕܕܸܠܵܐ، ܝܲܢ ܕܟܠ ܡܵܐܢܵܐ ܕܓܸܠܕܵܐ، ܠܡܲܕܘܼܥܹܐ ܕܕܸܟ݂ܝܵܐ ܝܠܹܗ ܝܲܢ ܕܛܲܡܐܵܐ ܝܠܹܗ.
Currently Selected:
ܟܗܢ̈ܐ 13: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
