ܟܗܢ̈ܐ 12
12
ܕܲܟ݂ܵܝܬܵܐ ܕܒܲܟ݂ܬܵܐ ܡ̣ܢ ܒܵܬ݇ܪ ܗܵܨܲܠܬܵܐ
1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ ܘܐ݇ܡܝܼܪܹܗ، 2”ܗܲܡܙܸܡ ܥܲܡ ܒܢܲܝ̈ ܝܼܣܪܵܝܹܠ، ܘܐ݇ܡܘܿܪ ܐܸܠܲܝܗܝ، ”ܟܠ ܒܲܟ݂ܬܵܐ ܒܵܛܢܵܐ ܘܗܲܨܠܵܐ ܐܘܼܪܙܵܐ، ܦܵܝܫܵܐ ܛܲܡܐܹܐ ܫܲܒ݂ܥܵܐ ܝܵܘܡܵܢܹ̈ܐ، ܗܲܪ ܐܲܝܟ݂ ܕܝܼܠܵܗ̇ ܛܲܡܐܹܐ ܒܥܕܵܢܵܐ ܕܟܸܦ̮ܣܘܼܗ̇. 3ܒܝܵܘܡܵܐ ܕܬܡܵܢܝܵܐ ܦܵܐܹܫ ܓܙܝܼܪܵܐ ܝܵܠܵܕ݇ܐ. 4ܘܣܵܦܪܵܐ ܒܲܟ݂ܬܵܐ ܬܠܵܬܝܼ ܘܬܠܵܬܵܐ ܝܵܘܡܵܢܹ̈ܐ ܗܲܠ ܥܕܵܢܵܐ ܕܦܵܝܫܵܐ ܕܟ݂ܝܼܬܵܐ ܡ̣ܢ ܕܸܡܵܐ ܕܗܵܨܲܠܬܵܐ. ܒܐܵܗܵܐ ܥܕܵܢܵܐ ܠܵܐ ܕܵܩܪܵܐ ܒܡܸܢܕܝܼ ܩܘܼܕܫܵܐ، ܘܠܵܐ ܕܥܵܒ݂ܪܵܐ ܓܵܘ ܡܲܩܕܫܵܐ، ܗܲܠ ܕܬܲܡܸܡܝܼ ܝܵܘܡܵܢܹ̈ܐ ܕܕܲܟ݂ܵܝܬܘܼܗ̇. 5ܐܝܼܢܵܐ ܐܸܢ ܗܲܨܠܵܐ ܒܪܵܬܵܐ، ܦܵܝܫܵܐ ܛܲܡܐܹܐ ܐܲܪܒܲܥܣܲܪ ܝܵܘܡܵܢܹ̈ܐ، ܗܲܪ ܐܲܝܟ݂ ܕܝܼܗ݇ܘܵܐ ܛܲܡܐܹܐ ܒܥܕܵܢܵܐ ܕܟܸܦ̮ܣܘܼܗ̇، ܘܣܵܦܪܵܐ ܐܸܫܬܝܼ ܘܐܸܫܬܵܐ ܝܵܘܡܵܢܹ̈ܐ ܗܲܠ ܕܦܵܝܫܵܐ ܕܘܼܟ݂ܝܼܬܵܐ ܡ̣ܢ ܕܸܡܵܐ ܕܗܵܨܲܠܬܵܐ.
6ܟܲܕ ܬܲܡܸܡܝܼ ܝܵܘܡܵܢܹ̈ܐ ܕܕܲܟ݂ܵܝܬܘܼܗ̇، ܡ̣ܢ ܒܪܘܿܢܵܐ ܝܲܢ ܒܪܵܬܵܐ، ܡܲܝܬܝܵܐ ܒܲܟ݂ܬܵܐ ܠܟܸܣ ܟܵܗܢܵܐ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ ܚܲܕ ܦܹܐܪܵܐ ܒܲܪ ܚܕܵܐ ܫܹܢ݇ܬܵܐ ܩܵܐ ܕܸܒ݂ܚܵܐ ܡܘܼܩܕܵܐ، ܘܙܲܥܝܵܐ ܕܝܵܘܢܵܐ ܝܲܢ ܓܘܼܪܓܘܼܡܵܐ ܩܵܐ ܕܸܒ݂ܚܵܐ ܕܚܛܝܼܬܵܐ. ܡܲܩܪܸܒ݂ܵܐ ܠܗܘܿܢ ܕܸܒ݂ܚܘܼ̈ܗ̇. 7ܘܟܵܗܢܵܐ ܡܲܩܪܸܒ݂ ܠܗܘܿܢ ܩܵܕ݇ܡ ܡܵܪܝܵܐ، ܘܥܵܒܹܕ ܚܘܼܣܵܝܵܐ ܐܸܠܘܼܗ̇، ܘܒܸܬ ܦܵܝܫܵܐ ܕܘܼܟ݂ܝܼܬܵܐ ܡ̣ܢ ܢܒ݂ܵܥܬܵܐ ܕܕܸܡܘܼܗ̇. ܐܵܗܵܐ ܝܠܹܗ ܢܵܡܘܿܣܵܐ ܩܵܐ ܗ̇ܝ ܕܗܲܨܠܵܐ ܒܪܘܿܢܵܐ ܝܲܢ ܒܪܵܬܵܐ. 8ܐܝܼܢܵܐ ܐܸܢ ܠܹܐ ܝܠܵܗ̇ ܒܡܨܵܝܬܘܼܗ̇ ܕܡܲܩܪܸܒ݂ܵܐ ܦܹܐܪܵܐ، ܡܲܝܬܝܵܐ ܬܲܪܬܹܝ ܓܘܼܪ̈ܓܘܼܡܹܐ، ܝܲܢ ܬܪܹܝ ܙܲܥܝܹ̈ܐ ܕܝܵܘܢܹ̈ܐ: ܚܲܕ ܩܵܐ ܕܸܒ݂ܚܵܐ ܡܘܼܩܕܵܐ، ܘܚܲܕ ܩܵܐ ܕܸܒ݂ܚܵܐ ܕܚܛܝܼܬܵܐ، ܘܥܵܒܹܕ ܚܘܼܣܵܝܵܐ ܐܸܠܘܼܗ̇ ܟܵܗܢܵܐ ܘܒܸܬ ܦܵܝܫܵܐ ܕܟ݂ܝܼܬܵܐ.“
Currently Selected:
ܟܗܢ̈ܐ 12: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
