ܟܗܢ̈ܐ 11
11
ܚܲܝܘܵܬܹ̈ܐ ܕܸܟ݂ܝܹ̈ܐ ܘܛܲܡ̈ܐܹܐ
1ܗܘܼܡܙܸܡ ܠܹܗ ܡܵܪܝܵܐ ܥܲܡ ܡܘܼܫܹܐ ܘܥܲܡ ܐܲܗܪܘܿܢ، ܘܐ݇ܡܝܼܪܹܗ ܐܸܠܲܝܗܝ، 2”ܐ݇ܡܘܿܪܘܼܢ ܠܒܢܲܝ̈ ܝܼܣܪܵܝܹܠ، ”ܡ̣ܢ ܓܵܘ ܚܲܝܘܵܬܹ̈ܐ ܕܥܲܠ ܐܲܪܥܵܐ ܐܲܢܹܐ ܝܢܵܐ ܐܵܢܝܼ ܕܐܵܟ݂ܠܝܼܬܘܿܢ. 3ܟܠ ܕܝܼܠܵܗ̇ ܣܸܡܘܼܗ̇ ܨܪܝܼܬܵܐ، ܗ̇ܝ ܕܝܼܢܵܐ ܦܠܝܼܥܹܐ ܣܸܡܵܬܘܼ̈ܗ̇، ܘܟܹܐ ܦܲܫܪܵܐ، ܐܵܟ݂ܠܝܼܬܘܿܢ ܠܵܗ̇. 4ܐܝܼܢܵܐ ܐܝܼܬ ܚܲܝܘܵܬܹ̈ܐ ܕܐܲܚܟ̰ܝܼ ܟܹܐ ܦܲܫܪܝܼ ܝܲܢ ܕܐܲܚܟ̰ܝܼ ܣܸܡܵܬܲܝ̈ܗܝ ܦܠܝܼܥܹܐ ܝܢܵܐ، ܠܵܐ ܐܵܟ݂ܠܝܼܬܘܿܢ ܡܸܢܲܝܗܝ: ܓܘܼܡܠܵܐ، ܗ̇ܝ ܕܟܹܐ ܦܲܫܪܵܐ ܐܝܼܢܵܐ ܣܸܡܘܼܗ̇ ܠܹܐ ܝܠܵܗ̇ ܨܪܝܼܬܵܐ، ܛܲܡܐܵܐ ܝܠܵܗ̇ ܐܸܠܵܘܟ݂ܘܿܢ. 5ܝܲܪܒܘܼܥ، ܕܟܹܐ ܦܲܫܸܪ ܐܝܼܢܵܐ ܣܸܡܹܗ ܠܹܐ ܝܠܵܗ̇ ܨܪܝܼܬܵܐ، ܛܲܡܐܵܐ ܝܠܹܗ ܐܸܠܵܘܟ݂ܘܿܢ. 6ܘܟܸܪܘܝܼܫ، ܕܟܹܐ ܦܲܫܪܵܐ، ܐܝܼܢܵܐ ܣܸܡܘܼܗ̇ ܠܹܐ ܝܠܵܗ̇ ܨܪܝܼܬܵܐ؛ ܛܲܡܐܵܐ ܝܠܵܗ̇ ܐܸܠܵܘܟ݂ܘܿܢ. 7ܘܚܙܘܼܪܵܐ، ܕܨܪܝܼܬܵܐ ܝܠܵܗ̇ ܣܸܡܹܗ ܘܦܠܝܼܥܬܵܐ ܝܠܵܗ̇ ܦܠܵܥܵܐ، ܐܝܼܢܵܐ ܠܹܐ ܦܲܫܸܪ، ܛܲܡܐܵܐ ܝܠܹܗ ܐܸܠܵܘܟ݂ܘܿܢ. 8ܠܵܐ ܐܵܟ݂ܠܝܼܬܘܿܢ ܡ̣ܢ ܒܸܣܪܲܝܗܝ، ܘܠܵܐ ܕܵܩܪܝܼܬܘܿܢ ܒܫܠܲܕܲܝܗܝ، ܛܲܡܐܹ̈ܐ ܝܢܵܐ ܐܸܠܵܘܟ݂ܘܿܢ.
9ܡ̣ܢ ܚܲܝܘܵܬܹ̈ܐ ܕܓܵܘ ܡ̈ܝܼܵܐ، ܐܲܢܹܐ ܐܵܟ݂ܠܝܼܬܘܿܢ: ܟܠ ܕܐܝܼܬ ܠܹܗ ܓܘܼܠܦܵܢܹ̈ܐ ܘܩܲܠܦܹ̈ܐ، ܐܸܢ ܗܵܘܝܼ ܓܵܘ ܝܵܡܵܬܹ̈ܐ ܝܲܢ ܓܵܘ ܢܲܗܪ̈ܵܘܵܬܹܐ، ܡܸܢܲܝܗܝ ܐܵܟ݂ܠܝܼܬܘܿܢ. 10ܐܝܼܢܵܐ ܟܠ ܒܝܵܡܵܬܹ̈ܐ ܝܲܢ ܒܢܲܗܪ̈ܵܘܵܬܹܐ ܕܠܲܝܬ ܠܹܗ ܓܘܼܠܦܵܢܹ̈ܐ ܘܩܲܠܦܹ̈ܐ، ܡ̣ܢ ܟܠ ܪܸܓ̰ܒܵܐ ܕܡ̈ܝܼܵܐ ܘܡ̣ܢ ܓܵܢܵܐ ܚܵܝܬܵܐ ܕܐܝܼܬ ܓܵܘ ܡ̈ܝܼܵܐ، ܛܲܡܐܘܼܬܵܐ ܝܠܵܗ̇ ܐܸܠܵܘܟ݂ܘܿܢ؛ 11ܣܵܒܵܒ ܝܼܢܵܐ ܛܲܡ̈ܐܹܐ ܐܸܠܵܘܟ݂ܘܿܢ، ܡ̣ܢ ܒܸܣܪܲܝܗܝ ܠܵܐ ܐܵܟ݂ܠܝܼܬܘܿܢ، ܘܫܠܲܕܲܝܗܝ ܚܲܫܒܸܢܝܼܬܘܿܢ ܠܵܗ̇ ܛܲܡܐܹܐ. 12ܟܠ ܕܠܲܝܬ ܠܹܗ ܓܘܼܠܦܵܢܹ̈ܐ ܘܩܲܠܦܹ̈ܐ ܓܵܘ ܡ̈ܝܼܵܐ، ܛܲܡܐܵܐ ܝܠܹܗ ܐܸܠܵܘܟ݂ܘܿܢ.
13ܘܐܲܢܹܐ ܝܢܵܐ ܛܲܝܪܹ̈ܐ ܕܠܵܐ ܦܵܝܫܝܼ ܐ݇ܟ݂ܝܼܠܹܐ، ܘܛܲܡ̈ܐܹܐ ܝܢܵܐ: ܢܸܫܪܵܐ، ܘܦܹܪܸܣ، ܘܢܸܫܪܵܐ ܕܝܵܡܵܐ، 14ܘܕܲܝܬܵܐ، ܘܒܵܙܵܐ ܘܟܠܹܗ ܓܸܢܣܹܗ، 15ܘܥܘܼܪܒ݂ܵܐ ܘܟܠܹܗ ܓܸܢܣܹܗ، 16ܘܢܲܥܡܵܐ، ܘܒܘܼܡܵܐ، ܘܓ̰ܵܠܹܐ ܢܘܼܢܹ̈ܐ، ܘܢܸܨܵܐ ܘܟܠܹܗ ܓܸܢܣܹܗ، 17ܘܩܘܼܦܬܵܐ، ܘܫܵܠܵܟ، ܘܝܲܢܫܘܼܦ، 18ܘܬܸܢܫܹܡܸܬ، ܘܩܵܩܵܐ، ܘܪܵܚܵܡ، 19ܠܲܓܠܲܓ، ܘܐܲܢܦܵܐ ܘܓܸܢܣܹܗ، ܘܗܘܼܕܗܘܼܕ، ܘܦܵܪܚܵܐ ܠܲܝܠܹܐ.
20ܟܠ ܪܲܚܫܵܐ ܦܵܪܘܿܚܵܐ ܕܚܵܕܹܪ ܥܲܠ ܐܲܪܒܲܥ ܐܲܩܠܹ̈ܐ، ܛܲܡܐܹܐ ܝܠܹܗ ܐܸܠܵܘܟ݂ܘܿܢ. 21ܐܝܼܢܵܐ ܐܲܢܹܐ ܐܵܟ݂ܠܝܼܬܘܿܢ ܡ̣ܢ ܪܲܚܫܵܐ ܦܵܪܘܿܚܵܐ ܕܚܵܕܹܪ ܥܲܠ ܐܲܪܒܥܵܐ ܐܲܩܠܹ̈ܐ: ܟܠ ܕܐܝܼܬ ܠܹܗ ܫܵܩܵܢܹ̈ܐ ܛܵܥܘܿܦܹ̈ܐ ܥܸܠܸܠ ܡ̣ܢ ܐܲܩܠܘܼ̈ܗܝ ܕܢܵܕܹܐ ܒܝܼܲܝܗܝ ܥܲܠ ܐܲܪܥܵܐ. 22ܡܸܢܲܝܗܝ ܐܲܢܹܐ ܐܵܟ݂ܠܝܼܬܘܿܢ؛ ܩܲܡܨܵܐ ܘܓܸܢܣܹܗ، ܣܲܠܥܵܡ ܘܓܸܢܣܹܗ، ܚܲܪܓܘܼܠ ܘܓܸܢܣܹܗ، ܘܚܵܓ݂ܵܒ݂ ܘܓܸܢܣܹܗ. 23ܟܠ ܪܲܚܫܵܐ ܦܵܪܘܿܚܵܐ ܕܐܝܼܬ ܠܹܗ ܐܲܪܒܲܥ ܐܲܩܠܹ̈ܐ ܛܲܡܐܵܐ ܝܠܹܗ ܐܸܠܵܘܟ݂ܘܿܢ.
24ܘܒܐܲܢܹܐ ܚܲܝܘܵܬܹ̈ܐ ܒܸܬ ܦܵܝܫܝܼܬܘܿܢ ܛܲܡ̈ܐܹܐ؛ ܟܠ ܕܕܵܩܹܪ ܒܫܠܲܕܲܝܗܝ ܒܸܬ ܦܵܐܹܫ ܛܲܡܐܵܐ ܗܲܠ ܪܲܡܫܵܐ. 25ܟܠ ܕܛܵܥܹܢ ܫܠܲܕܲܝܗܝ، ܡܵܣܹܐ ܠܗܘܿܢ ܓ̰ܘܼܠܘܼ̈ܗܝ، ܘܦܵܐܹܫ ܛܲܡܐܵܐ ܗܲܠ ܪܲܡܫܵܐ. 26ܟܠ ܚܲܝܘܬܵܐ ܕܨܪܝܼܬܵܐ ܝܠܵܗ̇ ܣܸܡܘܼܗ̇، ܐܝܼܢܵܐ ܠܹܐ ܝܠܵܗ̇ ܦܠܝܼܥܬܵܐ، ܘܠܹܐ ܦܲܫܪܵܐ ܡܹܐܟ݂ܘܼܠܬܘܼܗ̇، ܛܲܡܐܵܐ ܝܠܵܗ̇ ܐܸܠܵܘܟ݂ܘܿܢ؛ ܘܟܠ ܕܕܵܩܹܪ ܒܝܼܘܼܗ̇ ܒܸܬ ܦܵܐܹܫ ܛܲܡܐܵܐ. 27ܟܠ ܚܲܝܘܬܵܐ ܕܚܵܕܪܵܐ ܥܲܠ ܟܲܦܘܼ̈ܗ̇، ܡ̣ܢ ܐܵܢܝܼ ܕܐܝܼܬ ܠܗܘܿܢ ܐܲܪܒܲܥ ܐܲܩܠܹ̈ܐ، ܛܲܡܐܵܐ ܝܠܵܗ̇ ܐܸܠܵܘܟ݂ܘܿܢ؛ ܘܟܠ ܡ̇ܢ ܕܕܵܩܹܪ ܒܫܠܲܕܘܼܗ̇ ܒܸܬ ܗܵܘܹܐ ܛܲܡܐܵܐ ܗܲܠ ܪܲܡܫܵܐ. 28ܘܗ̇ܘ ܕܛܵܥܹܢ ܫܠܲܕܲܝܗܝ، ܡܵܣܹܐ ܓ̰ܘܼܠܘܼ̈ܗܝ، ܘܒܸܬ ܗܵܘܹܐ ܛܲܡܐܵܐ ܗܲܠ ܪܲܡܫܵܐ. ܐܲܢܹܐ ܛܲܡ̈ܐܹܐ ܝܢܵܐ ܐܸܠܵܘܟ݂ܘܿܢ.
29ܘܐܲܢܹܐ ܕܪܸ̈ܓ̰ܒܹܐ ܕܚܵܕܪܝܼ ܥܲܠ ܐܲܪܥܵܐ ܕܛܲܡ̈ܐܹܐ ܝܢܵܐ ܐܸܠܵܘܟ݂ܘܿܢ: ܚܸܠܕܵܐ، ܥܵܩܘܿܒܪܵܐ، ܚܲܪܕܵܢܵܐ ܘܓܸܢܣܹܗ. 30ܐܵܡܲܩܬܵܐ، ܨܪܘܼܪܝܼܬܵܐ، ܡܵܙܘܿܙܬܵܐ، ܚܲܠܵܙܘܿܢܵܐ، ܝܲܕܝܵܕܵܐ. 31ܐܲܢܹܐ ܛܲܡ̈ܐܹܐ ܝܢܵܐ ܐܸܠܵܘܟ݂ܘܿܢ ܓܵܘ ܟܠܲܝܗܝ ܪ̈ܲܚܫܹܐ. ܟܠ ܕܕܵܩܹܪ ܒܝܼܲܝܗܝ ܟܲܕ ܗܵܘܝܼ ܡܝܼܬܹ̈ܐ، ܒܸܬ ܦܵܐܹܫ ܛܲܡܐܵܐ ܗܲܠ ܪܲܡܫܵܐ. 32ܘܐܸܢ ܚܲܕ ܡ̣ܢ ܐܲܢܹܐ ܚܲܝܘܵܬܹ̈ܐ ܡܝܼܬܹ̈ܐ ܢܵܦܠܵܐ ܥܲܠ ܡܸܢܕܝܼ، ܗ̇ܘ ܡܸܢܕܝܼ ܒܸܬ ܦܵܐܹܫ ܛܲܡܐܵܐ، ܐܸܢ ܡܵܐܢܵܐ ܕܩܲܝܣܵܐ ܝܠܹܗ، ܝܲܢ ܠܒ݂ܝܼܫܬܵܐ ܝܠܹܗ، ܝܲܢ ܓܸܠܕܵܐ ܝܠܹܗ، ܝܲܢ ܣܲܩܵܐ ܝܠܹܗ، ܟܠ ܡܵܐܢܵܐ ܕܦܝܼܫܵܐ ܝܠܹܗ ܡܘܼܦܠܸܚܵܐ ܠܟܠ ܫܘܼܠܵܐ، ܦܵܐܹܫ ܡܘܼܬܒ݂ܵܐ ܓܵܘ ܡ̈ܝܼܵܐ، ܘܦܵܐܹܫ ܛܲܡܐܵܐ ܗܲܠ ܪܲܡܫܵܐ، ܡ̣ܢ ܒܵܬ݇ܪ ܗܵܕܵܐ ܒܸܬ ܦܵܐܹܫ ܕܸܟ݂ܝܵܐ. 33ܘܐܸܢ ܚܲܕ ܡܸܢܲܝܗܝ ܢܵܦܠܵܐ ܓܵܘ ܡܵܐܢܵܐ ܕܦܲܚܵܪܵܐ ܕܐܝܼܬ ܡܸܢܕܝܼ ܓܵܘܹܗ، ܗ̇ܘ ܡܸܢܕܝܼ ܒܸܬ ܦܵܐܹܫ ܛܲܡܐܹܐ ܘܡܵܐܢܵܐ ܦܵܐܹܫ ܫܡܝܼܛܵܐ. 34ܘܐܸܢ ܡ̈ܝܼܵܐ ܕܦܝܼܫܹܐ ܝܗ݇ܘܵܘ ܡܘܼܦܠܸܚܹܐ ܩܵܐ ܕܲܟ݂ܵܝܬܵܐ ܕܡܵܐܢܵܐ ܕܵܩܪܝܼ ܒܡܹܐܟ݂ܘܼܠܬܵܐ، ܗ̇ܝ ܡܹܐܟ݂ܘܼܠܬܵܐ ܒܸܬ ܦܵܝܫܵܐ ܛܲܡܐܹܐ، ܘܐܸܢ ܐܝܼܬ ܫܬܵܝܬܵܐ ܓܵܘ ܡܵܐܢܵܐ ܛܲܡܐܵܐ، ܗ̇ܝ ܫܬܵܝܬܵܐ ܒܸܬ ܦܵܝܫܵܐ ܛܲܡܐܹܐ. 35ܘܐܸܢ ܫܠܲܕܵܐ ܕܚܕܵܐ ܡ̣ܢ ܐܲܢܹܐ ܚܲܝܘܵܬܹ̈ܐ ܢܵܦܠܵܐ ܥܲܠ ܚܲܕ ܡܸܢܕܝܼ، ܒܸܬ ܗܵܘܹܐ ܛܲܡܐܵܐ. ܐܸܢ ܬܲܢܘܼܪܵܐ ܝܠܹܗ ܝܲܢ ܟܵܢܘܼܢܵܐ، ܦܵܝܫܝܼ ܬܠܝܼܚܹܐ. ܛܲܡ̈ܐܹܐ ܝܢܵܐ ܘܛܲܡ̈ܐܹܐ ܒܸܬ ܗܵܘܝܼ ܐܸܠܵܘܟ݂ܘܿܢ. 36ܐܲܚܟ̰ܝܼ ܥܲܝܢܵܐ ܝܲܢ ܓܘܼܒܵܐ ܕܡ̈ܝܼܵܐ ܕܓ̰ܵܡܥܝܼ ܓܵܘܲܝܗܝ ܒܸܬ ܗܵܘܝܼ ܕܸܟ݂ܝܹܐ، ܐܘܼܦ ܐܸܢ ܗ̇ܘ ܕܕܵܩܹܪ ܒܫܠܲܕܵܐ ܒܸܬ ܗܵܘܹܐ ܛܲܡܐܵܐ. 37ܐܸܢ ܫܠܲܕܵܐ ܢܵܦܠܵܐ ܥܲܠ ܒܲܪܙܲܪܥܵܐ ܕܦܵܐܹܫ ܙܪܝܼܥܵܐ، ܒܲܪܙܲܪܥܵܐ ܕܸܟ݂ܝܵܐ ܝܠܹܗ. 38ܐܝܼܢܵܐ ܐܸܢ ܒܲܪܙܲܪܥܵܐ ܬܲܠܝܼܠܵܐ ܝܠܹܗ، ܘܢܵܦܠܵܐ ܫܠܲܕܵܐ ܥܲܠܘܼܗܝ، ܒܸܬ ܦܵܐܹܫ ܛܲܡܐܵܐ ܐܸܠܵܘܟ݂ܘܿܢ.
39ܐܸܢ ܚܲܝܘܬܵܐ ܕܒܦܣܵܣܵܐ ܐܸܠܵܘܟ݂ܘܿܢ ܠܹܐܟ݂ܵܠܵܐ ܡܵܝܬܵܐ، ܟܠ ܕܕܵܩܹܪ ܒܫܠܲܕܘܼܗ̇ ܒܸܬ ܦܵܐܹܫ ܛܲܡܐܵܐ ܗܲܠ ܪܲܡܫܵܐ. 40ܟܠ ܕܐܵܟܹܠ ܡ̣ܢ ܒܸܣܪܘܼܗ̇، ܝܲܢ ܛܵܥܹܢ ܫܠܲܕܘܼܗ̇، ܡܵܣܹܐ ܓ̰ܘܼܠܘܼ̈ܗܝ، ܘܒܸܬ ܦܵܐܹܫ ܛܲܡܐܵܐ ܗܲܠ ܪܲܡܫܵܐ.
41ܟܠ ܪܲܚܫܵܐ ܕܓ̰ܵܘܹܓ̰ ܥܲܠ ܐܲܪܥܵܐ ܛܲܡܐܵܐ ܝܠܹܗ، ܠܵܐ ܦܵܐܹܫ ܐ݇ܟ݂ܝܼܠܵܐ. 42ܟܠ ܚܲܝܘܬܵܐ ܕܐܵܙܵܠ݇ܐ ܥܲܠ ܟܹܪ݇ܣܘܼܗ̇، ܘܟܠ ܕܐܵܙܵܠ݇ܐ ܥܲܠ ܐܲܪܒܲܥ ܐܲܩܠܹ̈ܐ، ܘܟܠ ܕܐܝܼܬ ܠܵܗ̇ ܪܵܒܵܐ ܐܲܩܠܹ̈ܐ، ܟܠ ܪܲܚܫܵܐ ܕܓ̰ܵܘܹܓ̰ ܥܲܠ ܐܲܪܥܵܐ، ܠܵܐ ܐܵܟ݂ܠܝܼܬܘܿܢ ܡܸܢܲܝܗܝ ܣܵܒܵܒ ܛܲܡܐܹܐ ܝܢܵܐ. 43ܠܵܐ ܟ̰ܲܦܠܸܢܝܼܬܘܿܢ ܓܵܢܵܘܟ݂ܘܿܢ ܒܗܸܟ̃ ܪܲܚܫܵܐ ܕܪܵܚܹܫ، ܘܠܵܐ ܥܵܒ݂ܕܝܼܬܘܿܢ ܓܵܢܵܘܟ݂ܘܿܢ ܛܲܡܐܹܐ ܒܝܼܲܝܗܝ ܘܦܵܝܫܝܼܬܘܿܢ ܛܲܡ̈ܐܹܐ، 44ܣܵܒܵܒ ܐܵܢܵܐ ܝܘܸܢ ܡܵܪܝܵܐ ܐܲܠܵܗܵܘܟ݂ܘܿܢ، ܒܘܼܬ ܐܵܗܵܐ ܩܲܕܫܘܼܢ ܓܵܢܵܘܟ݂ܘܿܢ ܘܗܘܹܝܡܘܼܢ ܩܲܕܝܼܫܹ̈ܐ، ܣܵܒܵܒ ܐܵܢܵܐ ܩܲܕܝܼܫܵܐ ܝܘܸܢ، ܘܠܵܐ ܥܵܒ݂ܕܝܼܬܘܿܢ ܛܲܡ̈ܐܹܐ ܓܵܢܵܘܟ݂ܘܿܢ ܒܗܸܟ̃ ܪܲܚܫܵܐ ܕܪܵܚܹܫ ܥܲܠ ܐܲܪܥܵܐ، 45ܣܵܒܵܒ ܐܵܢܵܐ ܝܘܸܢ ܡܵܪܝܵܐ ܕܡܘܼܐܣܸܩ ܠܹܗ ܐܸܠܵܘܟ݂ܘܿܢ ܡ̣ܢ ܐܲܪܥܵܐ ܕܡܸܨܪܹܝܢ، ܘܗܵܘܹܝܢ ܐܸܠܵܘܟ݂ܘܿܢ ܐܲܠܵܗܵܐ؛ ܗܘܹܝܡܘܼܢ ܩܲܕܝܼܫܹ̈ܐ، ܣܵܒܵܒ ܐܵܢܵܐ ܩܲܕܝܼܫܵܐ ܝܘܸܢ.
46ܐܵܗܵܐ ܝܠܹܗ ܢܵܡܘܿܣܵܐ ܒܘܼܬ ܚܲܝܘܬܵܐ ܘܦܵܪܲܚܬܵܐ، ܘܟܠ ܓܵܢܵܐ ܚܵܝܬܵܐ ܓ̰ܵܘܓ̰ܵܐ ܓܵܘ ܡ̈ܝܼܵܐ، ܘܟܠ ܓܵܢܵܐ ܕܪܲܚܫܵܐ ܥܲܠ ܐܲܪܥܵܐ، 47ܦܵܪܫܝܼܬܘܿܢ ܒܹܝܠ ܛܲܡܐܵܐ ܘܒܹܝܠ ܕܸܟ݂ܝܵܐ، ܘܒܹܝܠ ܚܲܝܘܬܵܐ ܕܦܵܝܫܵܐ ܐ݇ܟ݂ܝܼܠܬܵܐ ܘܒܹܝܠ ܚܲܝܘܬܵܐ ܕܠܵܐ ܦܵܝܫܵܐ ܐ݇ܟ݂ܝܼܠܬܵܐ.“
Currently Selected:
ܟܗܢ̈ܐ 11: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
