ܡܦܩܢܐ 40

ܩܵܕܲܫܬܵܐ ܕܡܲܫܟܢܵܐ

1ܐ݇ܡܝܼܪܹܗ ܡܵܪܝܵܐ ܠܡܘܼܫܹܐ، 2”ܒܝܵܘܡܵܐ ܩܵܕ݇ܡܵܝܵܐ ܕܝܲܪܚܵܐ ܩܵܕ݇ܡܵܝܵܐ، ܡܲܩܸܡܸܬ ܠܹܗ ܡܲܫܟܲܢ ܘܲܥܕܵܐ. 3ܡܲܬܒܸܬ ܓܵܘܹܗ ܠܩܹܒ݂ܘܼܬܵܐ ܕܣܵܗܕܘܼܬܵܐ، ܘܦܵܪܣܹܬ ܠܣܸܬܪܵܐ ܩܵܕ݇ܡ ܩܹܒ݂ܘܼܬܵܐ، 4ܘܡܲܥܒܸܪܸܬ ܠܦܵܬܘܿܪܵܐ، ܘܚܵܪܙܸܬ ܠܡܵܐܢܘܼ̈ܗܝ ܥܲܠܘܼܗܝ، ܘܡܲܝܬܸܝܬ ܠܡܢܵܪܬܵܐ، ܘܡܲܬܒܸܬ ܥܲܠܘܼܗ̇ ܫܪ̈ܵܓ݂݇ܝܵܬܘܼܗ̇. 5ܡܲܬܒܸܬ ܠܡܲܕܒܚܵܐ ܕܕܲܗܒ݂ܵܐ ܩܵܐ ܒܸܣܡܵܐ ܩܵܕ݇ܡ ܩܹܒ݂ܘܼܬܵܐ ܕܣܵܗܕܘܼܬܵܐ، ܘܬܵܠܹܝܬ ܠܹܗ ܦܲܪܕܵܐ ܕܬܲܪܥܵܐ ܕܡܲܫܟܢܵܐ.

6ܡܲܬܒܸܬ ܠܡܲܕܒܚܵܐ ܕܕܸܒ݂ܚܵܐ ܡܘܼܩܕܵܐ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ، 7ܡܲܬܒܸܬ ܠܠܲܩܢܵܐ ܒܹܝܠ ܡܲܫܟܲܢ ܘܲܥܕܵܐ ܘܒܹܝܠ ܡܲܕܒܚܵܐ، ܘܕܵܪܹܝܬ ܓܵܘܘܼܗ̇ ܡ̈ܝܼܵܐ. 8ܒܵܢܹܝܬ ܕܵܪܬܵܐ ܠܚܵܕܸܪ̈ܘܵܢܹܐ ܕܡܲܫܟܢܵܐ، ܘܕܵܪܹܝܬ ܦܲܪܕܵܐ ܠܬܲܪܥܵܐ ܕܕܵܪܬܵܐ.

9ܗ̇ܝܓܵܗ ܫܵܩܠܹܬ ܡܸܫܚܵܐ ܕܡܫܵܚܬܵܐ ܘܡܵܫܚܹܬ ܠܹܗ ܡܲܫܟܢܵܐ ܘܟܠ ܡܸܢܕܝܼ ܕܓܵܘܹܗ. ܩܲܕܫܸܬ ܐܸܠܹܗ ܘܠܟܠܲܝܗܝ ܡܵܐܢܘܼ̈ܗܝ، ܘܒܸܬ ܗܵܘܹܐ ܩܘܼܕܫܵܐ. 10ܘܡܵܫܚܹܬ ܠܡܲܕܒܚܵܐ ܕܕܸܒ݂ܚܵܐ ܡܘܼܩܕܵܐ ܘܠܟܠܲܝܗܝ ܡܵܐܢܘܼ̈ܗܝ. ܘܩܲܕܫܸܬ ܠܡܲܕܒܚܵܐ، ܘܒܸܬ ܦܵܐܹܫ ܩܘܼܕܫܵܐ. 11ܡܵܫܚܹܬ ܠܵܗ̇ ܠܲܩܢܵܐ ܘܟܲܢܘܼܗ̇، ܘܩܲܕܫܸܬ ܠܵܗ̇.

12”ܗ̇ܝܓܵܗ ܡܲܝܬܸܝܬ ܠܐܲܗܪܘܿܢ ܘܠܒܢܘܿܢܘܼ̈ܗܝ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ ܘܡܲܣܚܸܝܬ ܠܗܘܿܢ ܒܡ̈ܝܼܵܐ، 13”ܡܲܠܒܸܫܸܬ ܠܐܲܗܪܘܿܢ ܠܒ݂ܘܼܫܹ̈ܐ ܩܘܼܕܫܹ̈ܐ، ܘܡܵܫܚܹܬ ܠܹܗ ܘܩܲܕܫܸܬ ܠܹܗ ܕܥܵܒܹܕ ܟܵܗܢܘܼܬܵܐ ܐܸܠܝܼ. 14”ܘܡܲܝܬܸܝܬ ܠܒܢܘܿܢܘܼ̈ܗܝ ܘܡܲܠܒܸܫܸܬ ܠܗܘܿܢ ܨܘܼܕܪ̈ܵܬܹܐ، 15”ܡܵܫܚܹܬ ܠܗܘܿܢ ܐܲܝܟ݂ ܕܡܫܝܼܚ ܠܘܼܟ݂ ܠܒܵܒܲܝܗܝ، ܕܥܵܒ݂ܕܝܼ ܟܵܗܢܘܼܬܵܐ ܐܸܠܝܼ. ܡܫܵܚܬܲܝܗܝ ܒܸܬ ܗܵܘܝܵܐ ܐܸܠܲܝܗܝ ܪܘܼܫܡܵܐ ܕܟܵܗܢܘܼܬܵܐ ܡ̣ܢ ܕܵܘܪܵܐ ܠܕܵܘܪܵܐ.“

16ܗܲܕܟ݂ܵܐ ܥܒ݂ܝܼܕ ܠܹܗ ܡܘܼܫܹܐ ܟܠ ܡܸܢܕܝܼ ܐܲܝܟ݂ ܕܦܩܝܼܕ ܠܹܗ ܐܸܠܹܗ ܡܵܪܝܵܐ، 17ܘܗܘܹܐ ܠܵܗ̇، ܒܝܲܪܚܵܐ ܩܵܕ݇ܡܵܝܵܐ ܒܫܹܢ݇ܬܵܐ ܕܬܪܹܝ، ܒܝܵܘܡܵܐ ܩܵܕ݇ܡܵܝܵܐ ܕܝܲܪܚܵܐ، ܦܝܼܫ ܠܹܗ ܡܘܼܩܸܡܵܐ ܡܲܫܟܢܵܐ. 18ܡܘܼܩܸܡ ܠܹܗ ܡܘܼܫܹܐ ܠܡܲܫܟܢܵܐ، ܡܘܼܬܸܒ݂ ܠܹܗ ܠܣܵܡܟܘܼ̈ܗܝ، ܡܘܼܬܸܒ݂ ܠܹܗ ܠܕܲܦܘܼ̈ܗܝ ܘܠܩܲܝܣܘܼ̈ܗܝ، ܘܡܘܼܩܸܡ ܠܹܗ ܠܣܛܘܼܢܘܼ̈ܗܝ. 19ܗ̇ܝܓܵܗ ܦܪܝܼܣ ܠܹܗ ܠܟ̰ܲܕܪܵܐ ܥܲܠ ܡܲܫܟܢܵܐ، ܘܡܘܼܬܸܒ݂ ܠܹܗ ܟܲܣܵܝܬܵܐ ܕܟ̰ܲܕܪܵܐ ܥܲܠܘܼܗܝ، ܐܲܝܟ݂ ܕܦܩܝܼܕ ܠܹܗ ܡܵܪܝܵܐ ܐܸܠܹܗ.

20ܫܩܝܼܠ ܠܹܗ ܠܣܵܗܕܘܼܬܵܐ ܘܡܘܼܬܒ݂ܵܐ ܠܹܗ ܓܵܘ ܩܹܒ݂ܘܼܬܵܐ، ܘܡܘܼܬܸܒ݂ ܠܹܗ ܠܕܝܼܘܲܢܝܵܬܹ̈ܐ ܥܲܠ ܩܹܒ݂ܘܼܬܵܐ، ܘܡܘܼܬܸܒ݂ ܠܹܗ ܟܲܣܵܝܬܵܐ ܕܚܘܼܣܵܝܵܐ ܥܲܠܘܼܗ̇؛ 21ܗ̇ܝܓܵܗ ܡܘܼܥܒܸܪܹܗ ܠܩܹܒ݂ܘܼܬܵܐ ܓܵܘ ܡܲܫܟܢܵܐ، ܘܕܪܹܐ ܠܹܗ ܠܣܸܬܪܵܐ ܕܡܲܟܲܣܬܵܐ، ܘܦܪܝܼܣ ܠܹܗ ܩܵܕ݇ܡ ܩܹܒ݂ܘܼܬܵܐ ܕܣܵܗܕܘܼܬܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܐܸܠܹܗ.

22ܡܘܼܬܸܒ݂ ܠܹܗ ܠܦܵܬܘܿܪܵܐ ܓܵܘ ܡܲܫܟܲܢ ܘܲܥܕܵܐ، ܥܲܠ ܕܸܦܢܵܐ ܕܡܲܫܟܢܵܐ ܠܓܹܒܵܐ ܕܓܲܪܒܝܵܐ، ܠܒܲܕܲܪ ܡ̣ܢ ܣܸܬܪܵܐ، 23ܘܡܘܼܪܝܸܙ ܠܹܗ ܥܲܠܘܼܗܝ ܠܲܚܡܵܐ ܩܵܕ݇ܡ ܡܵܪܝܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܐܸܠܹܗ.

24ܡܘܼܬܸܒ݂ ܠܹܗ ܠܡܢܵܪܬܵܐ ܓܵܘ ܡܲܫܟܲܢ ܘܲܥܕܵܐ ܠܒܲܠܩܘܼܒ݂ܠ ܕܦܵܬܘܿܪܵܐ، ܥܲܠ ܕܸܦܢܵܐ ܕܡܲܫܟܢܵܐ ܠܓܹܒܵܐ ܕܬܲܝܡܢܵܐ، 25ܘܡܘܼܬܸܒ݂ ܠܹܗ ܠܫܪ̈ܵܓ݂݇ܝܵܬܹܐ ܩܵܕ݇ܡ ܡܵܪܝܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܐܸܠܹܗ.

26ܡܘܼܬܸܒ݂ ܠܹܗ ܠܡܲܕܒܚܵܐ ܕܕܲܗܒ݂ܵܐ ܓܵܘ ܡܲܫܟܲܢ ܘܲܥܕܵܐ ܩܵܕ݇ܡ ܣܸܬܪܵܐ. 27ܘܡܘܼܩܸܕ ܠܹܗ ܥܲܠܘܼܗܝ ܒܸܣܡܵܐ ܪܹܝܚܵܢܵܐ ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܐܸܠܹܗ. 28ܗ̇ܝܓܵܗ ܬܠܹܐ ܠܹܗ ܠܦܲܪܕܵܐ ܥܲܠ ܬܲܪܥܵܐ ܕܡܲܫܟܢܵܐ.

29ܡܘܼܬܸܒ݂ ܠܹܗ ܠܡܲܕܒܚܵܐ ܕܕܸܒ݂ܚܵܐ ܡܘܼܩܕܵܐ ܩܘܼܪܒܵܐ ܕܬܲܪܥܵܐ ܕܡܲܫܟܲܢ ܘܲܥܕܵܐ، ܘܡܘܼܩܪܸܒ݂ ܠܹܗ ܥܲܠܘܼܗܝ ܕܸܒ݂ܚܵܐ ܡܘܼܩܕܵܐ ܘܩܘܼܪܒܵܢܵܐ ܕܕܲܚܠܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܐܸܠܹܗ.

30ܡܘܼܬܸܒ݂ ܠܹܗ ܠܠܲܩܢܵܐ ܒܹܝܠ ܡܲܫܟܲܢ ܘܲܥܕܵܐ ܘܒܹܝܠ ܡܲܕܒܚܵܐ، ܘܕܪܹܐ ܠܹܗ ܓܵܘܹܗ ܡ̈ܝܼܵܐ ܩܵܐ ܚܵܠܲܠܬܵܐ، 31ܘܚܘܼܠܸܠ ܠܗܘܿܢ ܡܸܢܹܗ ܡܘܼܫܹܐ ܘܐܲܗܪܘܿܢ ܘܒܢܘܿܢܹ̈ܐ ܕܐܲܗܪܘܿܢ ܐܝܼܕܵܬܲܝ̈ܗܝ ܘܐܲܩܠܵܬܲܝ̈ܗܝ. 32ܟܲܕ ܥܵܒ݂ܪܝܼ ܗ݇ܘܵܘ ܓܵܘ ܡܲܫܟܲܢ ܘܲܥܕܵܐ ܘܩܲܪܒܸܢܝܼ ܗ݇ܘܵܘ ܠܡܲܕܒܚܵܐ، ܟܹܐ ܚܲܠܸܠܝܼ ܗ݇ܘܵܘ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ.

33ܗ̇ܝܓܵܗ ܥܒ݂ܝܼܕ ܠܹܗ ܕܵܪܬܵܐ ܠܚܵܕܸܪ̈ܘܵܢܹܐ ܕܡܲܫܟܢܵܐ ܘܕܡܲܕܒܚܵܐ، ܘܕܪܹܐ ܠܹܗ ܦܲܪܕܵܐ ܠܬܲܪܥܵܐ ܕܕܵܪܬܵܐ. ܗܲܕܟ݂ܵܐ ܬܘܼܡܸܡ ܠܹܗ ܡܘܼܫܹܐ ܠܦܘܼܠܚܵܢܵܐ.

ܥܢܵܢܵܐ ܟܲܣܘܼܝܹܐ ܠܡܲܫܟܢܵܐ

34ܗ̇ܝܓܵܗ ܥܢܵܢܵܐ ܟܘܼܣܹܐ ܠܵܗ̇ ܠܡܲܫܟܲܢ ܘܲܥܕܵܐ، ܘܬܸܫܒܘܿܚܬܵܐ ܕܡܵܪܝܵܐ ܡܠܹܐ ܠܵܗ̇ ܠܡܲܫܟܢܵܐ. 35ܠܵܐ ܡܨܹܐ ܠܹܗ ܡܘܼܫܹܐ ܠܸܥܒ݂ܵܪܵܐ ܠܡܲܫܟܲܢ ܘܲܥܕܵܐ، ܣܵܒܵܒ ܫܪܹܐ ܠܵܗ̇ ܥܲܠܘܼܗ̇ ܥܢܵܢܵܐ، ܘܬܸܫܒܘܿܚܬܵܐ ܕܡܵܪܝܵܐ ܡܠܹܐ ܠܵܗ̇ ܠܡܲܫܟܢܵܐ. 36ܟܲܕ ܟܹܐ ܪܵܝܡܵܐ ܗ݇ܘܵܐ ܥܢܵܢܵܐ ܡܥܲܠ ܡܲܫܟܢܵܐ، ܟܹܐ ܐܵܙܠ݇ܝܼ ܗ݇ܘܵܘ ܒܢܲܝ̈ ܝܼܣܪܵܝܹܠ ܒܐܘܼܪܚܲܝܗܝ. 37ܐܝܼܢܵܐ ܐܸܢ ܠܵܐ ܦܵܐܹܫ ܗ݇ܘܵܐ ܫܩܝܼܠܵܐ ܥܢܵܢܵܐ، ܠܹܐ ܐܵܙܠ݇ܝܼ ܗ݇ܘܵܘ ܗܲܠ ܝܵܘܡܵܐ ܕܦܵܐܹܫ ܗ݇ܘܵܐ ܫܩܝܼܠܵܐ. 38ܣܵܒܵܒ ܥܢܵܢܵܐ ܕܡܵܪܝܵܐ ܟܹܐ ܗܵܘܹܐ ܗ݇ܘܵܐ ܥܲܠ ܡܲܫܟܢܵܐ ܒܝܵܘܡܵܐ، ܘܢܘܼܪܵܐ ܟܹܐ ܗܵܘܹܐ ܗ݇ܘܵܐ ܓܵܘܹܗ ܒܠܲܝܠܹܐ ܩܵܕ݇ܡ ܥܲܝܢܹ̈ܐ ܕܟܠܹܗ ܒܹܝܬ ܝܼܣܪܵܝܹܠ ܒܟܠܲܝܗܝ ܐܘܼܪ̈ܚܵܬܲܝܗܝ.

Currently Selected:

ܡܦܩܢܐ 40: ABTAB

Highlight

Copy

Compare