ܡܦܩܢܐ 5

ܡܘܼܫܹܐ ܘܐܲܗܪܘܿܢ ܩܵܕ݇ܡ ܦܸܪܥܘܿܢ

1ܡ̣ܢ ܒܵܬ݇ܪ ܐܲܢܹܐ، ܐ݇ܬܹܐ ܠܗܘܿܢ ܡܘܼܫܹܐ ܘܐܲܗܪܘܿܢ ܘܐ݇ܡܝܼܪܗܘܿܢ ܠܦܸܪܥܘܿܢ، ”ܗܲܕܟ݂ܵܐ ܒܹܐܡܵܪܵܐ ܝܠܹܗ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ، ’ܫܒ݂ܘܿܩ ܥܲܡܝܼ ܐܵܙܹܠ ܘܥܵܒܹܕ ܥܹܐܕܵܐ ܐܸܠܝܼ ܓܵܘ ܒܲܪܝܼܵܐ.‘“ 2ܓ̰ܘܼܘܸܒ ܠܹܗ ܦܸܪܥܘܿܢ، ”ܡܵܢܝܼ ܝܠܹܗ ܡܵܪܝܵܐ ܕܫܵܡܥܹܢ ܠܩܵܠܹܗ ܠܫܲܕܘܼܪܹܐ ܠܝܼܣܪܵܝܹܠ؟ ܠܹܐ ܝܵܕܥܹܢ ܠܡܵܪܝܵܐ، ܐܘܼܦ ܠܝܼܣܪܵܝܹܠ ܠܹܐ ܫܲܕܪܸܢ.“ 3ܘܐ݇ܡܝܼܪܗܘܿܢ، ”ܐܲܠܵܗܵܐ ܕܥܸܒ݂ܪ̈ܵܝܹܐ ܬܦܝܼܩ ܠܹܗ ܒܝܼܲܢ؛ ܫܒ݂ܘܿܩ ܐܵܙܲܠ݇ܚ، ܦܲܪܦܘܼܠܹܐ ܝܘܲܚ، ܐܘܼܪܚܵܐ ܕܬܠܵܬܵܐ ܝܵܘܡܵܢܹ̈ܐ ܓܵܘ ܒܲܪܝܼܵܐ ܕܥܵܒ݂ܕܲܚ ܕܸܒ݂ܚܵܐ ܠܡܵܪܝܵܐ ܐܲܠܵܗܲܢ، ܕܠܵܐ ܗܵܘܝܵܐ ܕܐܵܬܹܐ ܥܲܠܲܢ ܒܡܵܘܬܵܐ ܝܲܢ ܒܣܲܝܦܵܐ.“ 4ܐܝܼܢܵܐ ܐ݇ܡܝܼܪܹܗ ܐܸܠܲܝܗܝ ܡܲܠܟܵܐ ܕܡܸܨܪܹܝܢ، ”ܝܵܐ ܡܘܼܫܹܐ ܘܐܲܗܪܘܿܢ، ܩܵܡܘܿܕܝܼ ܡܲܒܛܘܼܠܹܐ ܝܬܘܿܢ ܠܥܲܡܵܐ ܡ̣ܢ ܦܘܼܠܚܵܢܹܗ؟ ܕܘܼܪܘܼܢ ܠܦܘܼܠܚܵܢܵܘܟ݂ܘܿܢ.“ 5ܗ̇ܝܓܵܗ ܐ݇ܡܝܼܪܹܗ ܦܸܪܥܘܿܢ، ”ܥܲܡܵܐ ܪܵܒܵܐ ܝܠܹܗ ܒܐܲܪܥܵܐ، ܘܐܲܚܬܘܿܢ ܡܲܟܠܘܼܝܹܗ ܝܬܘܿܢ ܡ̣ܢ ܦܘܼܠܚܵܢܹܗ.“

ܦܸܪܥܘܿܢ ܡܲܙܝܘܼܕܹܐ ܦܘܼܠܚܵܢܵܐ ܕܒܢܲܝ̈ ܝܼܣܪܵܝܹܠ

6ܒܗ̇ܘ ܝܵܘܡܵܐ ܦܩܝܼܕ ܠܹܗ ܦܸܪܥܘܿܢ ܠܡܲܦܠܸܚܵܢܹ̈ܐ ܕܫܘܼܚܪܵܐ ܕܥܲܡܵܐ ܘܠܪܹ̈ܫܵܢܲܝܗܝ، ܒܹܐܡܵܪܵܐ، 7”ܠܵܐ ܝܵܗ݇ܒ݂ܝܼܬܘܿܢ ܐ݇ܚܹܪ݇ܢܵܐ ܬܸܒ݂ܢܵܐ ܠܥܲܡܵܐ ܕܕܵܪܝܼ ܠܸܒ݂ܢܹ̈ܐ ܐܲܝܟ݂ ܐ݇ܬܸܡܵܠܝ ܘܝܵܘܡܵܐ ܐ݇ܚܹܪ݇ܢܵܐ؛ ܐܵܙܠ݇ܝܼ ܒܓܵܢܲܝܗܝ ܘܓ̰ܲܡܥܝܼ ܬܸܒ݂ܢܵܐ. 8ܒܡܸܢܝܵܢܵܐ ܕܠܸܒ݂ܢܹ̈ܐ ܕܥܒ݂ܝܼܕ ܠܗܘܿܢ ܐ݇ܬܸܡܵܠܝ ܘܝܵܘܡܵܐ ܐ݇ܚܹܪ݇ܢܵܐ، ܪܵܫܡܝܼܬܘܿܢ ܐܸܠܲܝܗܝ ܠܸܥܒ݂ܵܕܵܐ؛ ܠܵܐ ܡܲܒܨܸܪܝܼܬܘܿܢ ܠܹܗ ܡܸܢܝܵܢܵܐ ܣܵܒܵܒ ܡܲܟܣܸܠܵܢܹ̈ܐ ܝܢܵܐ؛ ܒܘܼܬ ܐܵܗܵܐ ܡܲܩܘܘܼܚܹܐ ܝܢܵܐ، ’ܐܵܙܲܠ݇ܚ ܘܥܵܒ݂ܕܲܚ ܕܸܒ݂ܚܵܐ ܠܐܲܠܵܗܲܢ.‘ 9ܦܘܼܠܚܵܢܵܐ ܒܘܼܫ ܝܲܩܘܼܪܵܐ ܡܲܬܒ݂ܘܼܢ ܥܲܠ ܐܲܢܹܐ ܐ݇ܢܵܫܹ̈ܐ، ܕܒܵܠܓܝܼ ܘܠܵܐ ܫܵܡܥܝܼ ܠܗܹܡܸܙܡܵܢܹ̈ܐ ܕܕܘܼܓܠܵܐ.“

10ܘܦܠܝܼܛ ܠܗܘܿܢ ܡܲܦܠܸܚܵܢܹ̈ܐ ܕܫܘܼܚܪܵܐ ܕܥܲܡܵܐ ܘܪܹ̈ܫܵܢܲܝܗܝ ܘܐ݇ܡܝܼܪܗܘܿܢ ܐܸܠܲܝܗܝ، ”ܗܲܕܟ݂ܵܐ ܒܹܐܡܵܪܵܐ ܝܠܹܗ ܦܸܪܥܘܿܢ، ’ܠܹܐ ܝܵܗ݇ܒܹܢܵܘܟ݂ܘܿܢ ܬܸܒ݂ܢܵܐ. 11ܙܹܠ݇ܡܘܼܢ ܒܓܵܢܵܘܟ݂ܘܿܢ ܘܫܩܘܿܠܘܼܢ ܠܵܘܟ݂ܘܿܢ ܬܸܒ݂ܢܵܐ ܡ̣ܢ ܐܲܝܟܵܐ ܕܡܲܫ݇ܟ̰ܚܝܼܬܘܿܢ، ܘܡܸܢܕܝܼ ܠܹܐ ܦܵܐܹܫ ܡܘܼܒܨܸܪܵܐ ܡ̣ܢ ܦܘܼܠܚܵܢܵܘܟ݂ܘܿܢ.‘“ 12ܘܒܙܝܼܩ ܠܹܗ ܥܲܡܵܐ ܒܟܠܵܗ̇ ܐܲܪܥܵܐ ܕܡܸܨܪܹܝܢ ܠܓ̰ܲܡܘܼܥܹܐ ܟܘܼܠܵܫ ܩܵܐ ܬܸܒ݂ܢܵܐ. 13ܘܡܲܦܠܸܚܵܢܹ̈ܐ ܕܫܘܼܚܪܵܐ ܡܲܠܝܸܨܝܼ ܗ݇ܘܵܘ ܠܗܘܿܢ ܘܐܵܡܪܝܼ ܗ݇ܘܵܘ، ”ܬܲܡܸܡܘܼܢ ܦܘܼܠܚܵܢܵܘܟ݂ܘܿܢ، ܦܘܼܠܚܵܢܵܘܟ݂ܘܿܢ ܕܝܵܘܡܵܐ، ܐܲܝܟ݂ ܐܝܼܡܲܢ ܕܐܝܼܬ ܗ݇ܘܵܘ ܠܵܘܟ݂ܘܿܢ ܬܸܒ݂ܢܵܐ.“ 14ܘܦܝܼܫ ܠܗܘܿܢ ܡܸܚܝܹܐ ܪܹ̈ܫܵܢܹܐ ܕܒܢܲܝ̈ ܝܼܣܪܵܝܹܠ ܕܡܘܼܬܒܲܝ ܗ݇ܘܵܘ ܥܲܠܲܝܗܝ ܡܲܦܠܸܚܵܢܹ̈ܐ ܕܫܘܼܚܪܵܐ ܕܦܸܪܥܘܿܢ، ܒܹܐܡܵܪܵܐ، ”ܩܵܡܘܿܕܝܼ ܠܵܐ ܬܘܼܡܸܡ ܠܵܘܟ݂ܘܿܢ ܦܘܼܠܚܵܢܵܘܟ݂ܘܿܢ ܒܕܪܵܝܬܵܐ ܕܠܸܒ݂ܢܹ̈ܐ ܐܸܕܝܘܿܡ، ܐܲܝܟ݂ ܐ݇ܬܸܡܵܠܝ ܘܝܵܘܡܵܐ ܐ݇ܚܹܪ݇ܢܵܐ؟“

15ܐ݇ܙܝܼܠ ܠܗܘܿܢ ܪܹ̈ܫܵܢܹܐ ܕܒܢܲܝ̈ ܝܼܣܪܵܝܹܠ ܘܡܘܼܩܘܸܚ ܠܗܘܿܢ ܠܦܸܪܥܘܿܢ، ܒܹܐܡܵܪܵܐ، ”ܩܵܡܘܿܕܝܼ ܒܸܥܒ݂ܵܕܵܐ ܝܘܸܬ ܗܲܕܟ݂ܵܐ ܠܥܲܒ݂ܕܘܼ̈ܟ݂؟ 16ܬܸܒ݂ܢܵܐ ܠܹܐ ܝܠܹܗ ܦܝܵܫܵܐ ܝܘܼܗ݇ܒ݂ܵܐ ܠܥܲܒ݂ܕܘܼ̈ܟ݂؛ ܐܝܼܢܵܐ ܒܹܐܡܵܪܵܐ ܝܢܵܐ ܐܸܠܲܢ، ’ܕܪܹܝܡܘܼܢ ܠܸܒ݂ܢܹ̈ܐ.‘ ܥܲܒ݂ܕܘܼ̈ܟ݂ ܦܝܵܫܵܐ ܝܢܵܐ ܡܸܚܝܹܐ؛ ܐܝܼܢܵܐ ܓܢܵܗܵܐ ܠܟܸܣ ܐ݇ܢܵܫܘܼ̈ܟ݂ ܝܼܠܵܗ̇.“ 17ܐ݇ܡܝܼܪܹܗ ܦܸܪܥܘܿܢ ܐܸܠܲܝܗܝ، ”ܡܲܟܣܸܠܵܢܹ̈ܐ ܝܬܘܿܢ، ܡܲܟܣܸܠܵܢܹ̈ܐ! ܒܘܼܬ ܐܵܗܵܐ ܒܹܐܡܵܪܵܐ ܝܬܘܿܢ، ’ܐܵܙܲܠ݇ܚ ܘܥܵܒ݂ܕܲܚ ܕܸܒ݂ܚܵܐ ܠܡܵܪܝܵܐ.‘ 18ܐܵܕܝܼܵܐ ܙܹܠ݇ܡܘܼܢ ܘܦܠܘܿܚܘܼܢ؛ ܘܬܸܒ݂ܢܵܐ ܠܹܐ ܦܵܐܹܫ ܝܘܼܗ݇ܒ݂ܵܐ ܐܸܠܵܘܟ݂ܘܿܢ، ܐܝܼܢܵܐ ܕܵܪܹܝܬܘܿܢ ܗܲܪ ܗ̇ܘ ܡܸܢܝܵܢܵܐ ܕܠܸܒ݂ܢܹ̈ܐ.“ 19ܚܸܙܝܵܐ ܠܗܘܿܢ ܪܹ̈ܫܵܢܹܐ ܕܒܢܲܝ̈ ܝܼܣܪܵܝܹܠ ܓܵܢܲܝܗܝ ܓܵܘ ܚܕܵܐ ܐܲܝܟܲܢܵܝܘܼܬܵܐ ܣܪܝܼܬܵܐ، ܕܦܝܼܫ ܠܵܗ̇ ܐ݇ܡܝܼܪܬܵܐ، ”ܠܵܐ ܡܲܒܨܸܪܝܼܬܘܿܢ ܡ̣ܢ ܡܸܢܝܵܢܵܐ ܝܵܘܡܵܝܵܐ ܕܠܸܒ݂ܢܹ̈ܐ.“ 20ܟܲܕ ܦܠܝܼܛ ܠܗܘܿܢ ܡ̣ܢ ܠܟܸܣ ܦܸܪܥܘܿܢ، ܬܦܝܼܩ ܠܗܘܿܢ ܒܡܘܼܫܹܐ ܘܒܐܲܗܪܘܿܢ، ܟܸܠܝܹܐ ܥܲܠ ܐܘܼܪܚܲܝܗܝ؛ 21ܘܐ݇ܡܝܼܪܗܘܿܢ ܐܸܠܲܝܗܝ، ”ܡܵܪܝܵܐ ܚܵܐܹܪ ܒܝܼܵܘܟ݂ܘܿܢ ܘܕܵܐܹܢܵܘܟ݂ܘܿܢ، ܣܵܒܵܒ ܥܒ݂ܝܼܕ ܠܵܘܟ݂ܘܿܢ ܣܸܪܝܹܐ ܐܸܠܲܢ ܒܥܲܝܢܹ̈ܐ ܕܦܸܪܥܘܿܢ ܘܒܥܲܝܢܹ̈ܐ ܕܪܹ̈ܓܵܘܵܬܹܗ، ܘܝܘܼܗ݇ܒܸܠ ܠܵܘܟ݂ܘܿܢ ܣܲܝܦܵܐ ܒܐܝܼܕܲܝ̈ܗܝ ܠܸܩܛܵܠܲܢ.“

22ܕܝܼܪܹܗ ܡܘܼܫܹܐ ܠܟܸܣ ܡܵܪܝܵܐ ܘܐ݇ܡܝܼܪܹܗ، ”ܝܵܐ ܡܵܪܝܵܐ، ܩܵܡܘܿܕܝܼ ܥܒ݂ܝܼܕ ܠܘܼܟ݂ ܣܪܝܼܬܵܐ ܠܐܵܗܵܐ ܥܲܡܵܐ؟ ܩܵܡܘܿܕܝܼ ܐܸܠܝܼ ܫܘܼܕܸܪܘܼܟ݂؟ 23ܗܵܐ ܡ̣ܢ ܥܕܵܢܵܐ ܕܐ݇ܬܹܐ ܠܝܼ ܠܟܸܣ ܦܸܪܥܘܿܢ ܠܗܲܡܙܘܼܡܹܐ ܒܫܸܡܘܼܟ݂، ܥܒ݂ܝܼܕ ܠܹܗ ܣܪܝܼܬܵܐ ܠܐܵܗܵܐ ܥܲܡܵܐ، ܘܦܲܨܘܼܝܹܐ ܠܵܐ ܦܘܼܨܹܐ ܠܘܼܟ݂ ܠܥܲܡܘܼܟ݂.“

Currently Selected:

ܡܦܩܢܐ 5: ABTAB

Highlight

Copy

Compare