ܡܦܩܢܐ 39
39
ܓ̰ܘܼܠܹ̈ܐ ܕܟܵܗܢܹ̈ܐ
1ܘܬܘܼܪܸܨ ܠܗܘܿܢ ܠܒ݂ܘܼܫܹ̈ܐ ܕܚܸܠܡܲܬ ܒܙܩܘܼܪܵܐ ܥܸܠܵܝܵܐ ܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܕܥܵܒܹܕ ܚܸܠܡܲܬ ܒܒܹܝܬ ܩܘܼܕܫܵܐ. ܘܬܘܼܪܨܲܝ ܠܗܘܿܢ ܠܒ݂ܘܼܫܹ̈ܐ ܩܘܼܕܫܹ̈ܐ ܩܵܐ ܐܲܗܪܘܿܢ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ.
2ܬܘܼܪܸܨ ܠܹܗ ܐܸܦܘܿܕܵܐ ܡ̣ܢ ܕܲܗܒ݂ܵܐ، ܘܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܡ̣ܢ ܟܸܬܵܢܵܐ ܢܵܙܸܟ ܩܡܝܼܛܵܐ. 3ܗ̇ܝܓܵܗ ܬܘܼܪܸܨ ܠܗܘܿܢ ܦܵܪ̈ܘܿܫܝܵܬܹܐ ܢܵܙܸܟ ܡ̣ܢ ܕܲܗܒ݂ܵܐ، ܘܦܪܝܼܡܲܝ ܠܗܘܿܢ ܐܲܝܟ݂ ܓܸܕܹ̈ܐ ܢܵܩܝܼܕܹ̈ܐ ܘܡܘܼܦܠܸܚܲܝ ܠܗܘܿܢ ܓܵܘ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܓܵܘ ܟܸܬܵܢܵܐ ܢܵܙܸܟ، ܦܘܼܠܚܵܢܵܐ ܡܗܝܼܪܵܐ ܕܐܘܼܡܵܢܵܐ. 4ܬܘܼܪܸܨ ܠܗܘܿܢ ܐܸܦܘܿܕܵܐ ܡ̣ܢ ܬܪܹܝ ܩܸܛܥܵܛܹ̈ܐ، ܘܐܸܣܘܼܪܹ̈ܐ ܒܩܘܼܪ̈ܢܝܼܵܬܹܐ، ܕܦܵܝܫܝܼ ܐ݇ܣܝܼܪܹܐ ܒܝܼܲܝܗܝ. 5ܘܙܘܼܢܵܪܵܐ ܕܝܼܗ݇ܘܵܐ ܥܲܠܘܼܗܝ ܩܵܐ ܐ݇ܣܵܪܬܹܗ، ܚܲܕ ܩܸܛܥܵܐ ܝܗ݇ܘܵܐ ܡܸܢܹܗ، ܥܒ݂ܝܼܕܵܐ ܡ̣ܢ ܕܲܗܒ݂ܵܐ، ܘܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܟܸܬܵܢܵܐ ܢܵܙܸܟ ܩܡܝܼܛܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ.
6ܘܬܘܼܪܸܨ ܠܗܘܿܢ ܟܹܐܦܹ̈ܐ ܕܫܘܼܗܲܡ ܘܡܘܼܠܚܸܡܹܐ ܒܫܵܘܦܵܦܹ̈ܐ ܕܛܲܒ݂ܥܹ̈ܐ ܕܕܲܗܒ݂ܵܐ، ܘܥܲܠ ܟܹܐܦܹ̈ܐ ܢܩܝܼܪܹܐ ܝܗ݇ܘܵܘ، ܐܲܝܟ݂ ܢܸܩܪܹ̈ܐ ܕܚܵܬܡܵܐ، ܒܫܸܡܵܢܹ̈ܐ ܕܫܲܒ݂ܛܹ̈ܐ ܕܒܢܲܝ̈ ܝܼܣܪܵܝܹܠ. 7ܘܡܘܼܬܒܲܝ ܠܹܗ ܟܹܐܦܹ̈ܐ ܥܲܠ ܪ̈ܘܼܦ̮ܫܵܢܹܐ ܕܐܸܦܘܿܕܵܐ، ܢܸܩܪܹ̈ܐ ܕܕܟ݂ܵܪܵܐ ܠܒܢܲܝ̈ ܝܼܣܪܵܝܹܠ، ܐܲܝܟ݂ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ.
ܬܵܪܲܨܬܵܐ ܕܒܪܵܬ݇ ܨܲܕܪܵܐ
8ܘܬܘܼܪܸܨ ܠܹܗ ܒܪܵܬ݇ ܨܲܕܪܵܐ ܒܡܗܝܼܪܘܼܬܵܐ، ܐܲܝܟ݂ ܕܝܼܗ݇ܘܵܐ ܥܒ݂ܝܼܕܵܐ ܒܐܸܦܘܿܕܵܐ، ܡ̣ܢ ܕܲܗܒ݂ܵܐ، ܘܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܡ̣ܢ ܟܸܬܵܢܵܐ ܢܵܙܸܟ ܩܡܝܼܛܵܐ. 9ܡܪܲܒܥܵܐ ܝܗ݇ܘܵܐ ܒܪܵܬ݇ ܨܲܕܪܵܐ، ܘܟܦܝܼܠܬܵܐ ܝܗ݇ܘܵܐ ܕܗܵܘܝܵܐ ܗ݇ܘܵܐ ܐܲܝܟ݂ ܟܝܼܣܬܵܐ؛ ܚܲܕ ܨܝܼܛܵܐ ܝܗ݇ܘܵܐ ܝܘܼܪܟ݂ܘܼܬܘܼܗ̇، ܘܚܲܕ ܨܝܼܛܵܐ ܦܸܬܝܘܼܬܘܼܗ̇. 10ܘܡܘܼܬܸܒ݂ ܠܗܘܿܢ ܓܵܘܘܼܗ̇ ܐܲܪܒܥܵܐ ܣܸܕܪܹ̈ܐ ܕܟܹܐܦܹ̈ܐ ܛܝܼܡܵܢܹ̈ܐ. ܒܣܸܕܪܵܐ ܩܵܕ݇ܡܵܝܵܐ ܣܘܼܡܵܩܵܐ، ܙܵܪܓܵܐ، ܘܒܵܪܩܵܐ. 11ܒܣܸܕܪܵܐ ܕܬܪܹܝ ܙܸܡܪܘܼܕ، ܦܝܼܪܘܼܙܵܐ، ܘܐܲܠܡܵܣ. 12ܒܣܸܕܪܵܐ ܕܬܠܵܬܵܐ ܠܹܫܸܡ، ܘܲܫܡܵܐ، ܘܐܲܚܠܵܡܵܐ. 13ܣܸܕܪܵܐ ܕܐܲܪܒܥܵܐ ܬܲܪܫܝܼܫ، ܫܘܼܗܲܡ، ܘܝܲܫܦܹܗ. ܟܠ ܚܲܕ ܡ̣ܢ ܐܲܢܹܐ ܟܹܐܦܹ̈ܐ ܛܝܼܡܵܢܹ̈ܐ ܦܝܼܫܹܐ ܝܗ݇ܘܵܐ ܡܘܼܕܒܸܩܹܐ ܒܕܲܗܒ݂ܵܐ ܒܚܪܵܙܬܲܝܗܝ. 14ܡܸܢܝܵܢܵܐ ܕܟܹܐܦܹ̈ܐ ܦܵܐܹܫ ܗ݇ܘܵܐ ܬܪܸܥܣܲܪ، ܐܲܝܟ݂ ܫܸܡܵܢܹ̈ܐ ܕܒܢܲܝ̈ ܝܼܣܪܵܝܹܠ، ܟܠ ܚܲܕ ܢܩܝܼܪܵܐ ܐܲܝܟ݂ ܚܵܬܡܵܐ، ܥܲܠܘܼܗܝ ܫܸܡܵܐ ܕܚܲܕ ܫܲܒ݂ܛܵܐ.
15ܘܬܘܼܪܸܨ ܠܗܘܿܢ ܥܲܠ ܒܪܵܬ݇ ܨܲܕܪܵܐ ܫܹܫܠܵܬܹ̈ܐ ܦܬܝܼܠܹܐ، ܐܲܝܟ݂ ܓܕܵܠܹ̈ܐ، ܡ̣ܢ ܕܲܗܒ݂ܵܐ ܨܸܦܝܵܐ. 16ܘܬܘܼܪܸܨ ܠܗܘܿܢ ܬܪܹܝ ܫܵܘܦܵܦܹ̈ܐ ܕܛܲܒ݂ܥܹ̈ܐ ܕܕܲܗܒ݂ܵܐ، ܘܬܲܪܬܹܝ ܚܵܠܲܩܝܵܬܹ̈ܐ ܕܕܲܗܒ݂ܵܐ، ܘܡܘܼܬܒܲܝ ܠܗܘܿܢ ܬܲܪܬܹܝ ܚܵܠܲܩܝܵܬܹ̈ܐ ܥܲܠ ܬܸܪܘܲܝܗܝ ܓܹܒܵܢܹ̈ܐ ܕܒܪܵܬ݇ ܨܲܕܪܵܐ. 17ܘܡܘܼܥܒܸܪܲܝ ܠܗܘܿܢ ܬܪܹܝ ܓܸܕܠܹ̈ܐ ܒܬܲܪܬܹܝ ܚܵܠܲܩܝܵܬܹ̈ܐ ܡ̣ܢ ܬܸܪܘܲܝܗܝ ܓܹܒܵܢܹ̈ܐ ܕܒܪܵܬ݇ ܨܲܕܪܵܐ، 18ܘܐ݇ܣܝܼܪܲܝ ܠܗܘܿܢ ܬܸܪܘܲܝܗܝ ܓܹܒܵܢܹ̈ܐ ܕܓܸܕܠܹ̈ܐ ܒܫܵܘܦܵܦܹ̈ܐ ܕܛܲܒ݂ܥܹ̈ܐ، ܘܡܘܼܬܒܲܝ ܠܗܘܿܢ ܥܲܠ ܩܸܛܥܵܛܹ̈ܐ ܕܪ̈ܘܼܦ̮ܫܵܢܹܐ ܕܐܸܦܘܿܕܵܐ ܡ̣ܢ ܠܵܩܵܕ݇ܡܵܐ. 19ܘܬܘܼܪܸܨ ܠܗܘܿܢ ܬܲܪܬܹܝ ܚܵܠܲܩܝܵܬܹ̈ܐ ܕܕܲܗܒ݂ܵܐ ܘܡܘܼܬܒܲܝ ܠܗܘܿܢ ܥܲܠ ܬܸܪܘܲܝܗܝ ܪܹ̈ܫܵܢܹܐ ܕܒܪܵܬ݇ ܨܲܕܪܵܐ، ܥܲܠ ܣܸܦܬܵܐ ܕܝܼܠܵܗ̇ ܠܓܹܒܵܐ ܕܐܸܦܘܿܕܵܐ ܡ̣ܢ ܠܓܵܘܵܐ. 20ܘܬܘܼܪܸܨ ܠܗܘܿܢ ܬܲܪܬܹܝ ܚܵܠܲܩܝܵܬܹ̈ܐ ܐ݇ܚܹܪ̈݇ܢܹܐ ܕܕܲܗܒ݂ܵܐ، ܘܐ݇ܣܝܼܪܲܝ ܠܗܘܿܢ ܡ̣ܢ ܠܵܩܵܕ݇ܡܵܐ، ܡܠܬܸܚܬ ܡ̣ܢ ܩܸܛܥܵܛܹ̈ܐ ܕܪ̈ܘܼܦ̮ܫܵܢܹܐ ܕܐܸܦܘܿܕܵܐ، ܩܘܼܪܒܵܐ ܠܕܘܼܟܵܐ ܕܥܸܠܸܠ ܡ̣ܢ ܙܘܼܢܵܪܵܐ. 21ܘܐ݇ܣܝܼܪܲܝ ܠܗܘܿܢ ܚܵܠܲܩܝܵܬܹ̈ܐ ܕܒܪܵܬ݇ ܨܲܕܪܵܐ ܒܚܵܠܲܩܝܵܬܹ̈ܐ ܕܐܸܦܘܿܕܵܐ ܒܓܸܕܵܐ ܡܝܼܠܵܐ، ܗܵܕܵܐ ܕܒܪܵܬ݇ ܨܲܕܪܵܐ ܢܵܦܠܵܐ ܥܲܠ ܙܘܼܢܵܪܵܐ ܕܐܸܦܘܿܕܵܐ، ܘܠܵܐ ܫܵܪܝܵܐ ܒܪܵܬ݇ ܨܲܕܪܵܐ ܡ̣ܢ ܐܸܦܘܿܕܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ.
ܓ̰ܘܼܠܹ̈ܐ ܐ݇ܚܹܪ̈݇ܢܹܐ
22ܘܬܘܼܪܸܨ ܠܹܗ ܠܩܒ݂ܵܝܬܵܐ ܕܐܸܦܘܿܕܵܐ، ܦܘܼܠܚܵܢܵܐ ܕܙܲܩܵܪܵܐ، ܟܠܵܗ̇ ܡ̣ܢ ܥܸܙܠܵܐ ܡܝܼܠܵܐ. 23ܘܐܝܼܬ ܗ݇ܘܵܐ ܠܵܗ̇ ܦܘܼܡܵܐ ܐܲܝܟ݂ ܦܘܼܡܵܐ ܕܫܸܪܝܵܢܵܐ، ܚܵܕܸܪ̈ܘܵܢܘܼܗܝ ܙܩܝܼܪܹܐ، ܕܠܵܐ ܒܵܠܹܐ ܗ݇ܘܵܐ. 24ܥܲܠ ܫܸܦܘܼܠܵܠܹ̈ܐ ܕܩܒ݂ܵܝܬܵܐ ܬܘܼܪܸܨ ܠܗܘܿܢ ܪܸ̈ܡܘܼܢܹܐ ܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܡ̣ܢ ܟܸܬܵܢܵܐ ܢܵܙܸܟ ܩܡܝܼܛܵܐ. 25ܘܬܘܼܪܸܨ ܠܗܘܿܢ ܙܹܓܹ̈ܐ ܡ̣ܢ ܕܲܗܒ݂ܵܐ ܨܸܦܝܵܐ، ܘܡܘܼܬܒܲܝ ܠܗܘܿܢ ܙܹܓܹ̈ܐ ܒܹܝܠ ܪܸ̈ܡܘܼܢܹܐ، ܠܚܵܕܸܪ̈ܘܵܢܹܐ ܕܫܸܦܘܼܠܵܠܹ̈ܐ ܕܩܒ݂ܵܝܬܵܐ، 26ܚܲܕ ܙܹܓܵܐ ܘܚܲܕ ܪܸܡܘܼܢܵܐ، ܚܲܕ ܙܹܓܵܐ ܘܚܲܕ ܪܸܡܘܼܢܵܐ، ܠܚܵܕܸܪ̈ܘܵܢܹܐ ܕܫܸܦܘܼܠܵܠܹ̈ܐ ܕܩܒ݂ܵܝܬܵܐ، ܗ̇ܝ ܕܦܵܝܫܵܐ ܗ݇ܘܵܐ ܠܒ݂ܝܼܫܬܵܐ ܒܥܕܵܢܵܐ ܕܚܸܠܡܲܬ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ.
27ܘܬܘܼܪܸܨ ܠܗܘܿܢ ܩܵܐ ܐܲܗܪܘܿܢ ܘܩܵܐ ܒܢܘܿܢܘܼ̈ܗܝ ܨܘܼܕܪ̈ܵܬܹܐ ܡ̣ܢ ܟܸܬܵܢܵܐ ܢܵܙܸܟ، ܦܘܼܠܚܵܢܵܐ ܕܙܲܩܵܪܵܐ. 28ܟܪܵܟ݂ܬܵܐ ܕܟܸܬܵܢܵܐ ܢܵܙܸܟ، ܟܘܿܣܝܼܵܬܹ̈ܐ ܕܟܸܬܵܢܵܐ ܢܵܙܸܟ، ܘܦܪ̈ܵܙܘܿܡܹܐ ܕܟܸܬܵܢܵܐ ܢܵܙܸܟ ܩܡܝܼܛܵܐ. 29ܘܚܘܼܪܵܪܵܐ ܕܟܸܬܵܢܵܐ ܢܵܙܸܟ ܩܡܝܼܛܵܐ ܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܠܩܝܼܛܵܐ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ. 30ܘܬܘܼܪܸܨ ܠܗܘܿܢ ܦܵܪܘܿܫܬܵܐ ܩܘܼܕܸܫܬܵܐ ܡ̣ܢ ܕܲܗܒ݂ܵܐ ܨܸܦܝܵܐ، ܘܢܩܝܼܪܗܘܿܢ ܥܲܠܘܼܗ̇ ܟܬܝܼܒ݂ܬܵܐ، ܟܬܝܼܒ݂ܬܵܐ ܕܥܲܠ ܚܵܬܡܵܐ: ”ܩܘܼܕܫܵܐ ܠܡܵܪܝܵܐ.“ 31ܘܦܵܪܘܿܫܬܵܐ ܐ݇ܣܝܼܪܬܵܐ ܝܗ݇ܘܵܐ ܥܲܠ ܟܪܵܟ݂ܬܵܐ ܒܓܕܵܠܵܐ ܡܝܼܠܵܐ ܡ̣ܢ ܠܥܸܠܸܠ، ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ.
ܡܘܼܫܹܐ ܨܲܚܨܘܼܝܹܐ ܠܦܘܼܠܚܵܢܵܐ
32ܦܪܝܼܩ ܠܹܗ ܟܠܹܗ ܦܘܼܠܚܵܢܵܐ ܕܡܲܫܟܢܵܐ، ܡܲܫܟܲܢ ܘܲܥܕܵܐ. ܥܒ݂ܝܼܕ ܠܗܘܿܢ ܒܢܲܝ̈ ܝܼܣܪܵܝܹܠ ܟܠ ܡܸܢܕܝܼ ܐܲܝܟ݂ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ. 33ܘܡܘܼܐܬܹܐ ܠܗܘܿܢ ܠܡܲܫܟܢܵܐ ܠܟܸܣ ܡܘܼܫܹܐ، ܟ̰ܲܕܪܵܐ ܘܟܠܲܝܗܝ ܡܵܐܢܘܼ̈ܗܝ: ܟܪ̈ܘܿܠܘܼܗܝ، ܕܲܦܘܼ̈ܗܝ، ܩܲܝܣܘܼ̈ܗܝ ܕܐ݇ܓܵܪܹܗ، ܣܛܘܼܢܘܼ̈ܗܝ، ܘܣܵܡܟܘܼ̈ܗܝ، 34ܘܟܲܣܵܝܬܵܐ ܕܬܘܼܪܸܨܬܵܐ ܝܗ݇ܘܵܐ ܡ̣ܢ ܓܸܠܕܹ̈ܐ ܡܘܼܣܡܸܩܹܐ ܕܒܲܪ̈ܥܵܢܹܐ ܘܕܟܲܠܒܹ̈ܐ ܕܝܵܡܵܐ، ܘܣܸܬܪܵܐ ܕܡܲܟܲܣܬܵܐ؛ 35ܘܩܹܒ݂ܘܼܬܵܐ ܕܣܵܗܕܘܼܬܵܐ ܘܕܝܼܘܲܢܝܵܬܹ̈ܗ، ܘܟܘܼܪܣܝܵܐ ܕܚܘܼܣܵܝܵܐ؛ 36ܘܦܵܬܘܿܪܵܐ، ܘܟܠܲܝܗܝ ܡܸܢܕܝܼܵܢܹ̈ܐ ܕܥܲܠܘܼܗܝ، ܘܠܚܸܡ ܐܲܦܹ̈ܐ؛ 37ܘܡܢܵܪܬܵܐ ܕܡ̣ܢ ܕܲܗܒ݂ܵܐ ܨܸܦܝܵܐ، ܘܫܪ̈ܵܓ݂݇ܝܵܬܘܼܗ̇، ܘܡܵܐܢܹ̈ܐ ܕܫܪ̈ܵܓ݂݇ܝܵܬܹܐ، ܘܡܸܫܚܵܐ ܩܵܐ ܒܲܗܪܵܐ؛ 38ܘܡܲܕܒܚܵܐ ܕܕܲܗܒ݂ܵܐ، ܘܡܸܫܚܵܐ ܕܡܫܵܚܬܵܐ، ܘܒܸܣܡܵܐ ܪܹܝܚܵܢܵܐ، ܘܦܲܪܕܵܐ ܩܵܐ ܬܲܪܥܵܐ ܕܟ̰ܲܕܪܵܐ؛ 39ܘܡܲܕܒܚܵܐ ܕܢܚܵܫܵܐ، ܘܩܲܪܩܸܠ ܕܢܚܵܫܵܐ، ܕܝܼܘܲܢܝܵܬܹ̈ܗ، ܘܟܠܲܝܗܝ ܡܸܢܕܝܼܵܢܘܼ̈ܗܝ، ܘܠܲܩܢܵܐ ܘܟܲܢܘܼܗ̇؛ 40ܘܣܸܬܪܹ̈ܐ ܕܕܵܪܬܵܐ، ܘܣܛܘܼܢܘܼ̈ܗ̇ ܘܣܵܡܟܘܼ̈ܗ̇، ܘܦܲܪܕܵܐ ܕܬܲܪܥܵܐ ܕܕܵܪܬܵܐ، ܘܚܲܒ݂ܠܘܼ̈ܗ̇، ܘܣܸܟܵܟܘܼ̈ܗ̇، ܘܟܠܲܝܗܝ ܡܸܢܕܝܼܵܢܹ̈ܐ ܐ݇ܚܹܪ̈݇ܢܹܐ ܩܵܐ ܚܸܠܡܲܬ ܕܓܵܘ ܡܲܫܟܲܢ ܘܲܥܕܵܐ؛ 41ܠܒ݂ܘܼܫܹ̈ܐ ܕܚܸܠܡܲܬ، ܩܵܐ ܥܒ݂ܵܕܬܵܐ ܕܚܸܠܡܲܬ ܓܵܘ ܡܲܩܕܫܵܐ، ܠܒ݂ܘܼܫܹ̈ܐ ܩܘܼܕܫܹ̈ܐ ܕܐܲܗܪܘܿܢ ܟܵܗܢܵܐ، ܘܠܒ݂ܘܼܫܹ̈ܐ ܕܒܢܘܿܢܘܼ̈ܗܝ ܠܸܥܒ݂ܵܕܵܐ ܟܵܗܢܘܼܬܵܐ.
42ܗܲܕܟ݂ܵܐ ܥܒ݂ܝܼܕ ܠܗܘܿܢ ܟܠ ܡܸܢܕܝܼ ܒܢܲܝ̈ ܝܼܣܪܵܝܹܠ، ܐܲܝܟ݂ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ. 43ܘܚܝܼܪܹܗ ܡܘܼܫܹܐ ܠܟܠܹܗ ܦܘܼܠܚܵܢܵܐ، ܘܗܵܐ، ܚܙܹܐ ܠܹܗ ܕܥܒ݂ܝܼܕܹܗ ܝܗ݇ܘܵܘ ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ، ܗܲܕܟ݂ܵܐ ܥܒ݂ܝܼܕ ܠܗܘܿܢ. ܘܒܘܼܪܟܲܝ ܠܹܗ ܡܘܼܫܹܐ.
Currently Selected:
ܡܦܩܢܐ 39: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
