ܡܦܩܢܐ 38
38
ܒܢܵܝܬܵܐ ܕܡܲܕܒܚܵܐ ܕܕܸܒ݂ܚܵܐ
1ܬܘܼܪܸܨ ܠܹܗ ܡܲܕܒܚܵܐ ܩܵܐ ܕܸܒ݂ܚܵܐ ܡܘܼܩܕܵܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ؛ ܚܲܡܸܫ ܝܲܡܝܼܢܹ̈ܐ ܝܘܼܪܟ݂ܘܼܬܹܗ ܘܚܲܡܸܫ ܝܲܡܝܼܢܹ̈ܐ ܦܸܬܝܘܼܬܹܗ. ܡܪܲܒܥܵܐ ܝܗ݇ܘܵܐ، ܘܬܠܵܬ ܝܲܡܝܼܢܹ̈ܐ ܪܵܡܘܼܬܹܗ. 2ܘܬܘܼܪܸܨ ܠܹܗ ܩܵܪ̈݇ܢܵܢܹܐ ܐܸܠܹܗ ܥܲܠ ܐܲܪܒܲܥ ܩܘܼܪ̈ܢܝܼܵܬܹܐ؛ ܘܩܵܪ̈݇ܢܵܢܘܼܗܝ ܚܲܕ ܩܸܛܥܵܐ ܝܗ݇ܘܵܘ ܡܸܢܹܗ. ܘܩܪܝܼܡܲܝ ܠܹܗ ܒܢܚܵܫܵܐ. 3ܘܬܘܼܪܸܨ ܠܹܗ ܠܟܠܲܝܗܝ ܡܵܐܢܹ̈ܐ ܕܡܲܕܒܚܵܐ: ܡܲܪܸ̈ܓܠܹܐ، ܓܵܪ̈ܘܿܦܹܐ، ܛܵܣܹ̈ܐ، ܟܪ̈ܘܿܠܹܐ، ܘܡܵܐܢܹ̈ܐ ܕܢܘܼܪܵܐ. ܟܠܲܝܗܝ ܡܵܐܢܘܼ̈ܗܝ ܬܘܼܪܸܨ ܠܗܘܿܢ ܡ̣ܢ ܢܚܵܫܵܐ. 4ܘܬܘܼܪܸܨ ܠܹܗ ܩܵܐ ܡܲܕܒܚܵܐ ܩܲܪܩܸܠ، ܡ̣ܢ ܓܲܪܕܵܐ ܕܢܚܵܫܵܐ، ܬܚܘܿܬ ܣܸܦܬܹܗ، ܡ̣ܢ ܠܠܬܸܚܬ ܗܲܠ ܦܲܠܓܹܗ. 5ܘܚܫܝܼܠ ܠܹܗ ܐܲܪܒܲܥ ܚܵܠܲܩܝܵܬܹ̈ܐ ܒܐܲܪܒܲܥ ܩܘܼܪ̈ܢܝܼܵܬܹܐ ܕܩܲܪܩܸܠ ܕܢܚܵܫܵܐ ܩܵܐ ܕܝܼܘܲܢܝܵܬܹ̈ܐ ܠܸܛܥܵܢܹܗ. 6ܘܕܝܼܘܲܢܝܵܬܹ̈ܐ ܬܘܼܪܨܲܝ ܠܹܗ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ، ܘܩܪܝܼܡܲܝ ܠܹܗ ܒܢܚܵܫܵܐ. 7ܘܡܘܼܥܒܸܪܲܝ ܠܹܗ ܕܝܼܘܲܢܝܵܬܹ̈ܐ ܒܚܵܠܲܩܝܵܬܹ̈ܐ ܡ̣ܢ ܕܸܦܢܵܬܹ̈ܐ ܕܡܲܕܒܚܵܐ ܕܦܵܐܹܫ ܛܥܝܼܢܵܐ ܒܝܼܲܝܗܝ؛ ܘܬܘܼܪܸܨ ܠܹܗ ܐܸܠܹܗ ܡ̣ܢ ܕܲܦܹ̈ܐ، ܓܵܘܹܗ ܣܦܝܼܩܵܐ.
ܡܵܐܢܵܐ ܕܚܵܠܲܠܬܵܐ
8ܡܵܐܢܵܐ ܕܚܵܠܲܠܬܵܐ، ܟܲܢܹܗ ܬܘܼܪܨܲܝ ܠܹܗ ܡ̣ܢ ܢܚܵܫܵܐ، ܡ̣ܢ ܢܵܘܪܵܐ ܕܕܒ݂ܝܼܚܲܝ ܝܗ݇ܘܵܘ ܒܲܟ݂ܬܵܬܹ̈ܐ ܕܟܹܐ ܦܵܠܚܝܼ ܗ݇ܘܵܘ ܩܵܕ݇ܡ ܬܲܪܥܵܐ ܕܡܲܫܟܲܢ ܘܲܥܕܵܐ.
ܬܵܪܲܨܬܵܐ ܕܕܵܪܬܵܐ ܕܡܲܫܟܢܵܐ
9ܘܬܘܼܪܸܨ ܠܹܗ ܕܵܪܬܵܐ. ܓܘܼܕܘܼܗ̇ ܕܬܲܝܡܢܵܐ ܥܒ݂ܝܼܕܵܐ ܝܗ݇ܘܵܐ ܡ̣ܢ ܣܸܬܪܹ̈ܐ ܕܟܸܬܵܢܵܐ ܢܵܙܸܟ ܩܡܝܼܛܵܐ، ܝܘܼܪܟ݂ܘܼܬܲܝܗܝ ܐܸܡܵܐܐ ܝܲܡܝܼܢܹ̈ܐ. 10ܐܝܼܬ ܗ݇ܘܵܘ ܠܗܘܿܢ ܥܸܣܪܝܼ ܣܛܘܼܢܹ̈ܐ، ܘܥܸܣܪܝܼ ܣܵܡܟܹ̈ܐ ܕܢܚܵܫܵܐ؛ ܐܝܼܢܵܐ ܟܪ̈ܘܿܠܹܐ ܕܣܛܘܼܢܹ̈ܐ ܘܬܘܼܪ̈ܲܝܗܝ ܕܣܹܐܡܵܐ ܝܗ݇ܘܵܘ. 11ܐܘܼܦ ܓܘܼܕܵܐ ܕܓܲܪܒܝܵܐ ܐܸܡܵܐܐ ܝܲܡܝܼܢܹ̈ܐ ܒܝܘܼܪܟ݂ܵܐ ܝܗ݇ܘܵܐ. ܣܛܘܼܢܲܝ̈ܗܝ ܥܸܣܪܝܼ ܘܣܵܡܟܲܝ̈ܗܝ ܥܸܣܪܝܼ، ܕܢܚܵܫܵܐ، ܐܝܼܢܵܐ ܟܪ̈ܘܿܠܹܐ ܕܣܛܘܼܢܹ̈ܐ ܘܬܘܼܪ̈ܲܝܗܝ ܡ̣ܢ ܣܹܐܡܵܐ ܝܗ݇ܘܵܘ. 12ܘܣܸܬܪܹ̈ܐ ܕܓܘܼܕܵܐ ܕܡܲܥܪܒ݂ܵܐ ܚܲܡܫܝܼ ܝܲܡܝܼܢܹ̈ܐ ܝܗ݇ܘܵܘ، ܥܲܡ ܥܸܣܪܵܐ ܣܛܘܼܢܹ̈ܐ ܘܥܸܣܪܵܐ ܣܵܡܟܹ̈ܐ. ܟܪ̈ܘܿܠܹܐ ܕܣܛܘܼܢܹ̈ܐ، ܘܬܘܼܪ̈ܲܝܗܝ ܕܣܹܐܡܵܐ ܝܗ݇ܘܵܘ. 13ܘܕܓܹܒܵܐ ܕܡܲܕܢܚܵܐ، ܠܵܙܪܵܩܵܐ، ܚܲܡܫܝܼ ܝܲܡܝܼܢܹ̈ܐ ܝܗ݇ܘܵܘ. 14ܣܸܬܪܹ̈ܐ ܠܚܲܕ ܓܹܒܵܐ ܕܬܲܪܥܵܐ ܚܲܡܫܲܥܣܲܪ ܝܲܡܝܼܢܹ̈ܐ ܗ݇ܘܵܘ، ܥܲܡ ܬܠܵܬܵܐ ܣܛܘܼܢܹ̈ܐ ܘܬܠܵܬܵܐ ܣܵܡܟܹ̈ܐ. 15ܘܡ̣ܢ ܗ̇ܘ ܓܹܒܵܐ ܐ݇ܚܹܪ݇ܢܵܐ، ܠܐܵܗܵܐ ܕܸܦܢܵܐ ܘܠܗ̇ܝ ܕܸܦܢܵܐ ܕܬܲܪܥܵܐ ܕܕܵܪܬܵܐ، ܣܸܬܪܹ̈ܐ ܚܲܡܫܲܥܣܲܪ ܝܲܡܝܼܢܹ̈ܐ ܝܗ݇ܘܵܘ، ܬܸܠܝܹܐ ܒܬܠܵܬܵܐ ܣܛܘܼܢܹ̈ܐ ܘܡܘܼܬܒܹܐ ܥܲܠ ܬܠܵܬܵܐ ܣܵܡܟܹ̈ܐ. 16ܟܠܲܝܗܝ ܣܸܬܪܹ̈ܐ ܠܚܵܕܸܪ̈ܘܵܢܹܐ ܕܕܵܪܬܵܐ ܦܝܼܫܹܐ ܝܗ݇ܘܵܘ ܥܒ݂ܝܼܕܹܐ ܡ̣ܢ ܟܸܬܵܢܵܐ ܢܵܙܸܟ ܩܡܝܼܛܵܐ. 17ܣܵܡܟܹ̈ܐ ܕܣܛܘܼܢܹ̈ܐ ܡ̣ܢ ܢܚܵܫܵܐ ܝܗ݇ܘܵܘ، ܐܝܼܢܵܐ ܟܪ̈ܘܿܠܹܐ ܕܣܛܘܼܢܹ̈ܐ ܘܬܘܼܪ̈ܲܝܗܝ ܡ̣ܢ ܣܹܐܡܵܐ ܝܗ݇ܘܵܘ، ܘܩܪܵܡܬܵܐ ܕܪܹ̈ܫܲܝܗܝ ܡ̣ܢ ܣܹܐܡܵܐ ܝܗ݇ܘܵܐ. ܟܠܲܝܗܝ ܣܛܘܼܢܹ̈ܐ ܕܕܵܪܬܵܐ ܩܪܝܼܡܹܐ ܝܗ݇ܘܵܘ ܒܣܹܐܡܵܐ.
18ܦܲܪܕܵܐ ܕܬܲܪܥܵܐ ܕܕܵܪܬܵܐ ܦܝܼܫܵܐ ܝܗ݇ܘܵܐ ܙܩܝܼܪܵܐ ܒܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܟܸܬܵܢܵܐ ܢܵܙܸܟ ܩܡܝܼܛܵܐ؛ ܥܸܣܪܝܼ ܝܲܡܝܼܢܹ̈ܐ ܝܘܼܪܟ݂ܘܼܬܹܗ؛ ܘܚܲܡܸܫ ܝܲܡܝܼܢܹ̈ܐ ܪܵܡܘܼܬܹܗ، ܐܲܝܟ݂ ܣܸܬܪܹ̈ܐ ܕܓܘܼܕܹ̈ܐ ܕܕܵܪܬܵܐ. 19ܐܝܼܬ ܗ݇ܘܵܘ ܠܗܘܿܢ ܐܲܪܒܥܵܐ ܣܛܘܼܢܹ̈ܐ، ܘܐܲܪܒܥܵܐ ܣܵܡܟܹ̈ܐ ܕܢܚܵܫܵܐ؛ ܟܪ̈ܘܿܠܲܝܗܝ ܕܣܹܐܡܵܐ ܝܗ݇ܘܵܘ، ܐܘܼܦ ܩܪܵܡܬܵܐ ܕܪܹ̈ܫܲܝܗܝ ܘܬܘܼܪ̈ܲܝܗܝ ܕܣܹܐܡܵܐ ܝܗ݇ܘܵܘ. 20ܟܠܲܝܗܝ ܣܸܟܵܟܹ̈ܐ ܕܡܲܫܟܢܵܐ ܘܕܚܵܕܸܪ̈ܘܵܢܹܐ ܕܕܵܪܬܵܐ ܡ̣ܢ ܢܚܵܫܵܐ ܝܗ݇ܘܵܘ.
ܟܡܵܝܘܼܬܵܐ ܕܕܸܒ݂ܚܹ̈ܐ
21ܐܵܗܵܐ ܝܠܹܗ ܚܸܫܒܘܼܢܵܐ ܕܡܲܫܟܢܵܐ، ܡܲܫܟܢܵܐ ܕܣܵܗܕܘܼܬܵܐ، ܕܦܝܼܫܵܐ ܝܗ݇ܘܵܐ ܚܘܼܫܒܸܢܵܐ ܒܦܘܼܩܕܵܢܵܐ ܕܡܘܼܫܹܐ ܩܵܐ ܚܸܠܡܲܬ ܕܠܹܘܵܝܹ̈ܐ، ܬܚܘܿܬ ܬܲܓܒܲܪܬܵܐ ܕܐܝܼܬܵܡܵܪ، ܒܪܘܿܢܵܐ ܕܐܲܗܪܘܿܢ ܟܵܗܢܵܐ. 22ܒܲܨܠܝܼܐܹܝܠ ܒܪܘܿܢܵܐ ܕܐܘܼܪܝܼ، ܒܪܘܿܢܵܐ ܕܚܘܿܪ، ܡ̣ܢ ܫܲܒ݂ܛܵܐ ܕܝܼܗܘܼܕܵܐ، ܬܘܼܪܸܨ ܠܹܗ ܟܠ ܡܸܢܕܝܼ ܕܦܩܝܼܕ ܠܹܗ ܡܵܪܝܵܐ ܠܡܘܼܫܹܐ، 23ܘܦܠܝܼܚ ܠܹܗ ܥܲܡܹܗ ܐܲܗܵܠܝܼܐܲܒ݂ ܒܪܘܿܢܵܐ ܕܐܲܚܝܼܣܡܲܟ݂، ܡ̣ܢ ܫܲܒ݂ܛܵܐ ܕܕܵܢ، ܢܵܓܪܵܢܵܐ ܘܐܘܼܡܵܢܵܐ ܡܗܝܼܪܵܐ، ܘܠܵܩܛܵܢܵܐ ܒܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ ܘܩܸܪܡܝܼܙ، ܘܒܟܸܬܵܢܵܐ ܢܵܙܸܟ.
24ܟܠܹܗ ܕܲܗܒ݂ܵܐ ܕܦܝܼܫܵܐ ܝܗ݇ܘܵܐ ܡܘܼܦܠܸܚܵܐ ܩܵܐ ܒܢܵܝܬܵܐ ܕܒܹܝܬ ܩܘܼܕܫܵܐ، ܐܘܼܦ ܕܲܗܒ݂ܵܐ ܕܒ݂ܝܼܚܵܐ، ܥܸܣܪܝܼ ܘܬܸܫܥܵܐ ܟܲܟܪܹ̈ܐ، ܘܫܒܲܥܡܵܐܐ ܘܬܠܵܬܝܼ ܡܲܬܩܵܠܹ̈ܐ ܝܗ݇ܘܵܐ، ܒܡܲܬܩܵܠܵܐ ܕܡܲܩܕܫܵܐ. 25ܘܣܹܐܡܵܐ ܕܦܝܼܫܵܐ ܝܗ݇ܘܵܐ ܓ̰ܘܼܡܥܵܐ ܡ̣ܢ ܥܲܡܵܐ، ܐܸܡܵܐܐ ܟܲܟܪܹ̈ܐ، ܘܐܲܠܦܵܐ ܘܫܒܲܥܡܵܐܐ ܘܫܲܒ݂ܥܝܼ ܘܚܲܡܫܵܐ ܡܲܬܩܵܠܹ̈ܐ ܝܗ݇ܘܵܐ، ܒܬܩܘܼܠܬܵܐ ܕܒܹܝܬ ܩܘܼܕܫܵܐ. 26ܚܲܕ ܒܹܩܲܥ ܠܟܠ ܐ݇ܢܵܫܵܐ، ܝܲܥܢܹܐ، ܦܲܠܓܵܐ ܕܡܲܬܩܵܠܵܐ ܒܬܩܘܼܠܬܵܐ ܕܒܹܝܬ ܩܘܼܕܫܵܐ، ܠܟܠ ܚܲܕ ܕܦܝܼܫܵܐ ܝܗ݇ܘܵܐ ܡܸܢܝܵܐ، ܡ̣ܢ ܥܸܣܪܝܼ ܫܸܢܹ̈ܐ ܘܠܥܸܠܸܠ. ܟܠܵܢܵܐܝܼܬ ܐܸܫܸܬܡܵܐܐ ܘܬܠܵܬܵܐ ܐܲܠܦܹ̈ܐ ܘܚܲܡܸܫܡܵܐܐ ܘܚܲܡܫܝܼ ܐܘܼܪ̈ܙܹܐ ܝܗ݇ܘܵܐ. 27ܐܸܡܵܐܐ ܟܲܟܪܹ̈ܐ ܕܣܹܐܡܵܐ ܦܝܼܫ ܠܗܘܿܢ ܡܘܼܦܠܸܚܹܐ ܠܸܚܫܵܠܵܐ ܣܵܡܟܹ̈ܐ ܕܒܹܝܬ ܩܘܼܕܫܵܐ ܘܣܵܡܟܹ̈ܐ ܕܣܸܬܪܵܐ: ܐܸܡܵܐܐ ܣܵܡܟܹ̈ܐ ܡ̣ܢ ܐܸܡܵܐܐ ܟܲܟܪܹ̈ܐ، ܟܠ ܣܵܡܟܵܐ. 28ܘܡ̣ܢ ܐܲܠܦܵܐ ܘܫܒܲܥܡܵܐܐ ܘܫܲܒ݂ܥܝܼ ܘܚܲܡܫܵܐ ܡܲܬܩܵܠܹ̈ܐ ܕܣܹܐܡܵܐ ܬܘܼܪܸܨ ܠܹܗ ܟܪ̈ܘܿܠܹܐ ܩܵܐ ܣܛܘܼܢܹ̈ܐ، ܘܩܪܝܼܡ ܠܹܗ ܪܹ̈ܫܲܝܗܝ ܘܙܘܼܘܸܓܲܝ ܠܹܗ ܒܩܲܕܚܵܢܲܝ̈ܗܝ.
29ܢܚܵܫܵܐ ܕܦܝܼܫܵܐ ܝܗ݇ܘܵܐ ܕܒ݂ܝܼܚܵܐ، ܫܲܒ݂ܥܝܼ ܟܲܟܪܹ̈ܐ ܘܬܪܹܝ ܐܲܠܦܹ̈ܐ ܘܐܲܪܒܲܥܡܵܐܐ ܡܲܬܩܵܠܹ̈ܐ ܝܗ݇ܘܵܐ. 30ܡܸܢܹܗ ܬܘܼܪܸܨ ܠܹܗ ܣܵܡܟܹ̈ܐ ܩܵܐ ܬܲܪܥܵܐ ܕܡܲܫܟܲܢ ܘܲܥܕܵܐ، ܘܡܲܕܒܚܵܐ ܒܢܚܵܫܵܐ، ܘܩܲܪܩܸܠ ܕܝܼܹܗ ܒܢܚܵܫܵܐ، ܘܠܟܠܲܝܗܝ ܡܵܐܢܹ̈ܐ ܕܡܲܕܒܚܵܐ، 31ܘܣܵܡܟܹ̈ܐ ܕܚܵܕܸܪ̈ܘܵܢܹܐ ܕܕܵܪܬܵܐ، ܘܣܵܡܟܹ̈ܐ ܕܬܲܪܥܵܐ ܕܕܵܪܬܵܐ، ܟܠܲܝܗܝ ܣܸܟܵܟܹ̈ܐ ܕܡܲܫܟܢܵܐ، ܟܠܲܝܗܝ ܣܸܟܵܟܹ̈ܐ ܕܚܵܕܸܪ̈ܘܵܢܹܐ ܕܕܵܪܬܵܐ.
Currently Selected:
ܡܦܩܢܐ 38: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
