ܡܦܩܢܐ 37
37
ܒܢܵܝܬܵܐ ܕܩܹܒ݂ܘܼܬܵܐ
1ܘܬܘܼܪܸܨ ܠܹܗ ܒܲܨܠܝܼܐܹܝܠ ܠܩܹܒ݂ܘܼܬܵܐ ܡ̣ܢ ܩܲܝܣܵܐ ܕܐܵܩܵܩܝܼܵܐ، ܬܲܪܬܹܝ ܝܲܡܝܼܢܹ̈ܐ ܘܦܲܠܓܹܐ ܝܘܼܪܟ݂ܘܼܬܘܼܗ̇، ܘܝܲܡܝܼܢܵܐ ܘܦܲܠܓܹܐ ܦܸܬܝܘܼܬܘܼܗ̇، ܘܝܲܡܝܼܢܵܐ ܘܦܲܠܓܹܐ ܪܵܡܘܼܬܘܼܗ̇. 2ܘܩܪܝܼܡܵܐ ܠܹܗ ܒܕܲܗܒ݂ܵܐ ܨܸܦܝܵܐ ܡ̣ܢ ܠܓܵܘܵܐ ܘܡ̣ܢ ܠܒܲܕܲܪ، ܘܟܪܝܼܟ݂ ܠܹܗ ܠܚܵܕܸܪ̈ܘܵܢܘܼܗ̇ ܡܲܠܒ݂ܵܫܵܐ ܕܕܲܗܒ݂ܵܐ. 3ܘܪܡܹܐ ܠܹܗ ܐܸܠܘܼܗ̇ ܐܲܪܒܲܥ ܚܵܠܲܩܝܵܬܹ̈ܐ ܕܕܲܗܒ݂ܵܐ ܠܐܲܪܒܲܥ ܐܲܩܠܵܬܘܼ̈ܗ̇؛ ܬܲܪܬܹܝ ܚܵܠܲܩܝܵܬܹ̈ܐ ܡ̣ܢ ܚܲܕ ܓܹܒܵܐ، ܘܬܲܪܬܹܝ ܚܵܠܲܩܝܵܬܹ̈ܐ ܡ̣ܢ ܕܗ̇ܘ ܓܹܒܵܐ ܐ݇ܚܹܪ݇ܢܵܐ. 4ܘܬܘܼܪܸܨ ܠܹܗ ܕܝܼܘܲܢܝܵܬܹ̈ܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ ܘܩܪܝܼܡܲܝ ܠܹܗ ܒܕܲܗܒ݂ܵܐ، 5ܘܡܘܼܥܒܸܪܹܗ ܠܕܝܼܘܲܢܝܵܬܹ̈ܐ ܒܚܵܠܲܩܝܵܬܹ̈ܐ ܡ̣ܢ ܕܸܦܢܵܬܹ̈ܐ ܕܩܹܒ݂ܘܼܬܵܐ ܕܦܵܝܫܵܐ ܛܥܝܼܢܬܵܐ ܒܝܼܲܝܗܝ.
6ܘܬܘܼܪܸܨ ܠܹܗ ܟܲܣܵܝܬܵܐ ܩܵܐ ܚܘܼܣܵܝܵܐ ܡ̣ܢ ܕܲܗܒ݂ܵܐ ܨܸܦܝܵܐ، ܬܲܪܬܹܝ ܝܲܡܝܼܢܹ̈ܐ ܘܦܲܠܓܹܐ ܝܘܼܪܟ݂ܘܼܬܘܼܗ̇ ܘܝܲܡܝܼܢܵܐ ܘܦܲܠܓܹܐ ܦܸܬܝܘܼܬܘܼܗ̇. 7ܘܬܘܼܪܸܨ ܠܹܗ ܬܪܹܝ ܟܪ̈ܘܿܒܹܐ ܕܕܲܗܒ݂ܵܐ، ܦܘܼܠܚܵܢܵܐ ܕܐܘܼܡܵܢܵܐ، ܘܡܘܼܬܒܲܝ ܠܹܗ ܒܬܸܪܘܲܝܗܝ ܪܹ̈ܫܵܢܹܐ، ܟܲܣܵܝܬܵܐ ܕܚܘܼܣܵܝܵܐ. 8ܬܘܼܪܸܨ ܠܹܗ ܚܲܕ ܟܪܘܿܒ݂ܵܐ ܒܐܵܗܵܐ ܪܹܫܵܐ، ܘܚܲܕ ܒܗ̇ܘ ܪܹܫܵܐ ܐ݇ܚܹܪ݇ܢܵܐ. ܚܲܕ ܩܸܛܥܵܐ ܥܲܡ ܟܲܣܵܝܬܵܐ ܕܚܘܼܣܵܝܵܐ ܬܘܼܪܸܨ ܠܹܗ ܟܪ̈ܘܿܒܹܐ ܥܲܠ ܬܸܪܘܲܝܗܝ ܪܹ̈ܫܵܢܘܼܗ̇. 9ܓܘܼܠܦܵܢܹ̈ܐ ܕܟܪ̈ܘܿܒܹܐ ܒܸܦܪܵܣܵܐ ܝܗ݇ܘܵܘ ܠܥܸܠܸܠ؛ ܒܓܘܼܠܦܵܢܲܝ̈ܗܝ ܟܲܣܘܼܝܹܐ ܝܗ݇ܘܵܘ ܠܚܘܼܣܵܝܵܐ. ܦܵܬܘܵܬܲܝ̈ܗܝ ܗܘܹܐ ܠܗܘܿܢ ܚܲܕ ܠܗ̇ܘ ܐ݇ܚܹܪ݇ܢܵܐ؛ ܦܵܬܘܵܬܹ̈ܐ ܕܟܪ̈ܘܿܒܹܐ ܗܘܹܐ ܠܗܘܿܢ ܠܓܹܒܵܐ ܕܟܲܣܵܝܬܵܐ ܕܚܘܼܣܵܝܵܐ.
ܬܵܪܲܨܬܵܐ ܕܦܵܬܘܿܪܵܐ ܘܡܵܐܢܹ̈ܐ
10ܬܘܼܪܸܨ ܠܹܗ ܦܵܬܘܿܪܵܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ، ܬܲܪܬܹܝ ܝܲܡܝܼܢܹ̈ܐ ܝܘܼܪܟ݂ܘܼܬܹܗ، ܘܚܕܵܐ ܝܲܡܝܼܢܵܐ ܦܸܬܝܘܼܬܹܗ، ܘܝܲܡܝܼܢܵܐ ܘܦܲܠܓܹܐ ܪܵܡܘܼܬܹܗ. 11ܘܩܪܝܼܡ ܠܹܗ ܒܕܲܗܒ݂ܵܐ ܨܸܦܝܵܐ، ܘܥܒ݂ܝܼܕ ܠܹܗ ܠܚܵܕܸܪ̈ܘܵܢܘܼܗܝ ܟܠܝܼܠܵܐ ܕܕܲܗܒ݂ܵܐ. 12ܘܬܘܼܪܸܨ ܠܹܗ ܩܵܬܹܗ ܣܸܦܬܵܐ ܐܲܝܟ݂ ܦܸܬܝܘܼܬܵܐ ܕܐܝܼܕܵܐ، ܘܬܘܼܪܸܨ ܠܹܗ ܟܠܝܼܠܵܐ ܕܕܲܗܒ݂ܵܐ ܠܚܵܕܸܪ̈ܘܵܢܹܐ ܕܣܸܦܬܵܐ. 13ܪܡܹܐ ܠܹܗ ܐܸܠܹܗ ܐܲܪܒܲܥ ܚܵܠܲܩܝܵܬܹ̈ܐ ܕܕܲܗܒ݂ܵܐ، ܘܡܘܼܬܸܒ݂ ܠܹܗ ܥܲܠ ܐܲܪܒܲܥ ܩܘܼܪ̈ܢܝܼܵܬܹܐ ܕܝ݇ܬܝܼܒܹܐ ܝܢܵܐ ܥܲܠ ܐܲܪܒܲܥ ܐܲܩܠܵܬܹ̈ܗ. 14ܚܵܠܲܩܝܵܬܹ̈ܐ ܩܘܼܪܒܵܐ ܝܗ݇ܘܵܘ ܠܣܸܦܬܵܐ، ܩܵܐ ܕܢܵܛܪܝܼ ܗ݇ܘܵܘ ܠܕܝܼܘܲܢܝܵܬܹ̈ܐ ܟܲܕ ܦܵܐܹܫ ܗ݇ܘܵܐ ܛܥܝܼܢܵܐ ܦܵܬܘܿܪܵܐ. 15ܘܬܘܼܪܨܲܝ ܠܹܗ ܕܝܼܘܲܢܝܵܬܹ̈ܐ ܡ̣ܢ ܩܲܝܣܵܐ ܕܐܵܩܵܩܝܼܵܐ ܘܩܪܝܼܡܲܝ ܠܹܗ ܒܕܲܗܒ݂ܵܐ، ܕܦܵܐܹܫ ܛܥܝܼܢܵܐ ܦܵܬܘܿܪܵܐ ܒܝܼܲܝܗܝ. 16ܘܬܘܼܪܸܨ ܠܹܗ ܠܡܵܐܢܹ̈ܐ ܕܥܲܠ ܦܵܬܘܿܪܵܐ ܡ̣ܢ ܕܲܗܒ݂ܵܐ ܨܸܦܝܵܐ: ܦܝܼܠܵܣܹ̈ܐ، ܘܟܵܣܹ̈ܐ، ܘܙܵܒ݂ܘܿܪܹ̈ܐ، ܘܛܵܣܹ̈ܐ، ܩܵܐ ܨܲܢܨܘܼܠܹܐ ܒܝܼܲܝܗܝ.
ܬܵܪܲܨܬܵܐ ܕܡܢܵܪܬܵܐ
17ܘܬܘܼܪܸܨ ܠܹܗ ܡܢܵܪܬܵܐ ܡ̣ܢ ܕܲܗܒ݂ܵܐ ܨܸܦܝܵܐ ܚܫܝܼܠܵܐ ܒܐܘܼܡܵܢܵܐ. ܒܵܣܸܣܘܼܗ̇ ܘܩܲܢܝܘܼܗ̇ ܘܦܝܼܵܠܘܼ̈ܗ̇ ܘܛܥܘܼܢܝܵܬܘܼ̈ܗ̇ ܘܦܸܩܚܘܼ̈ܗ̇، ܚܲܕ ܩܸܛܥܵܐ ܝܗ݇ܘܵܘ ܡܸܢܘܼܗ̇. 18ܐܝܼܬ ܗ݇ܘܵܐ ܠܵܗ̇ ܐܸܫܬܵܐ ܦܲܥܘܵܢܹ̈ܐ ܦܠܝܼܛܹܐ ܡ̣ܢ ܕܸܦܢܵܬܘܼ̈ܗ̇؛ ܬܠܵܬܵܐ ܡ̣ܢ ܚܲܕ ܕܸܦܢܘܼܗ̇، ܘܬܠܵܬܵܐ ܡ̣ܢ ܗ̇ܝ ܕܸܦܢܘܼܗ̇ ܐ݇ܚܹܪ݇ܬܵܐ، 19ܬܠܵܬܵܐ ܦܝܼܵܠܹ̈ܐ ܐܲܝܟ݂ ܫܲܓ݂݇ܕܹ̈ܐ ܒܚܲܕ ܦܲܥܘܵܐ، ܟܠ ܚܲܕ ܒܛܥܘܼܢܬܵܐ ܘܒܦܸܩܚܵܐ، ܘܬܠܵܬܵܐ ܦܝܼܵܠܹ̈ܐ ܐ݇ܚܹܪ̈݇ܢܹܐ ܐܲܝܟ݂ ܫܲܓ݂݇ܕܹ̈ܐ ܒܚܲܕ ܦܲܥܘܵܐ، ܟܠ ܚܲܕ ܒܛܥܘܼܢܬܵܐ ܘܒܦܸܩܚܵܐ. ܗܲܕܟ݂ܵܐ ܝܗ݇ܘܵܘ ܦܠܝܼܛܹܐ ܐܸܫܬܵܐ ܦܲܥܘܵܢܹ̈ܐ ܡ̣ܢ ܡܢܵܪܬܵܐ. 20ܘܒܡܢܵܪܬܵܐ ܐܝܼܬ ܗ݇ܘܵܘ ܐܲܪܒܥܵܐ ܦܝܼܵܠܹ̈ܐ ܐܲܝܟ݂ ܫܲܓ݂݇ܕܹ̈ܐ، ܒܛܥܘܼܢܝܵܬܲܝ̈ܗܝ ܘܒܦܸܩܚܲܝ̈ܗܝ. 21ܘܚܕܵܐ ܛܥܘܼܢܬܵܐ ܬܚܘܿܬ ܟܠ ܙܵܘܓܵܐ ܕܦܲܥܘܵܢܹ̈ܐ ܒܚܲܕ ܩܸܛܥܵܐ ܡܸܢܘܼܗ̇، ܘܚܕܵܐ ܛܥܘܼܢܬܵܐ ܬܚܘܿܬ ܗ̇ܘ ܙܵܘܓܵܐ ܐ݇ܚܹܪ݇ܢܵܐ ܕܦܲܥܘܵܢܹ̈ܐ ܒܚܲܕ ܩܸܛܥܵܐ ܡܸܢܘܼܗ̇، ܚܕܵܐ ܛܥܘܼܢܬܵܐ ܬܚܘܿܬ ܗ̇ܘ ܙܵܘܓܵܐ ܐ݇ܚܹܪ݇ܢܵܐ ܕܦܲܥܘܵܢܹ̈ܐ ܒܚܲܕ ܩܸܛܥܵܐ ܡܸܢܘܼܗ̇، ܗܲܕܟ݂ܵܐ ܒܐܸܫܬܵܐ ܦܲܥܘܵܢܹ̈ܐ ܕܒܸܦܠܵܛܵܐ ܝܢܵܐ ܡ̣ܢ ܡܢܵܪܬܵܐ. 22ܛܥܘܼܢܝܵܬܲܝ̈ܗܝ ܘܦܲܥܘܵܢܲܝ̈ܗܝ ܒܚܲܕ ܩܸܛܥܵܐ ܡ̣ܢ ܡܢܵܪܬܵܐ، ܟܠܲܝܗܝ ܦܘܼܠܚܵܢܵܐ ܕܐܘܼܡܵܢܵܐ، ܡ̣ܢ ܕܲܗܒ݂ܵܐ ܨܸܦܝܵܐ. 23ܘܬܘܼܪܸܨ ܠܹܗ ܐܸܠܘܼܗ̇ ܫܒܲܥ ܫܪ̈ܵܓ݂݇ܝܵܬܹܐ، ܘܫܲܒ݂ܥܵܐ ܡܲܟ̰ܡܸܥܵܢܹ̈ܐ ܕܢܘܼܗܪܹ̈ܐ، ܘܡܵܐܢܹ̈ܐ، ܟܠܲܝܗܝ ܡ̣ܢ ܕܲܗܒ݂ܵܐ ܨܸܦܝܵܐ. 24ܡܢܵܪܬܵܐ ܘܟܠܲܝܗܝ ܡܵܐܢܘܼ̈ܗ̇ ܦܝܼܫܹܐ ܝܗ݇ܘܵܘ ܬܘܼܪܨܹܐ ܡ̣ܢ ܚܲܕ ܟܲܟܪܵܐ ܕܕܲܗܒ݂ܵܐ ܨܸܦܝܵܐ.
ܬܵܪܲܨܬܵܐ ܕܡܲܕܒܚܵܐ ܕܒܸܣܡܵܐ
25ܘܬܘܼܪܸܨ ܠܹܗ ܡܲܕܒܚܵܐ ܠܡܲܩܘܼܕܹܐ ܒܸܣܡܵܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ؛ ܝܘܼܪܟ݂ܘܼܬܹܗ ܚܕܵܐ ܝܲܡܝܼܢܵܐ ܘܦܸܬܝܘܼܬܹܗ ܚܕܵܐ ܝܲܡܝܼܢܵܐ؛ ܡܪܲܒܥܵܐ ܝܗ݇ܘܵܐ، ܘܬܲܪܬܹܝ ܝܲܡܝܼܢܹ̈ܐ ܪܵܡܘܼܬܹܗ. ܩܵܪ̈݇ܢܵܢܘܼܗܝ ܚܲܕ ܩܸܛܥܵܐ ܝܗ݇ܘܵܘ ܡܸܢܹܗ. 26ܘܩܪܝܼܡ ܠܹܗ ܒܕܲܗܒ݂ܵܐ ܨܸܦܝܵܐ ܠܐ݇ܓܵܪܹܗ، ܠܓܘܼܕܵܢܘܼ̈ܗܝ ܕܚܵܕܸܪ̈ܘܵܢܘܼܗܝ، ܘܠܩܵܪ̈݇ܢܵܢܘܼܗܝ؛ ܘܥܒ݂ܝܼܕ ܠܹܗ ܟܠܝܼܠܵܐ ܕܕܲܗܒ݂ܵܐ ܠܚܵܕܸܪ̈ܘܵܢܘܼܗܝ. 27ܘܬܘܼܪܸܨ ܠܹܗ ܐܸܠܹܗ ܬܲܪܬܹܝ ܚܵܠܲܩܝܵܬܹ̈ܐ ܕܕܲܗܒ݂ܵܐ ܠܠܬܸܚܬ ܡ̣ܢ ܟܠܝܼܠܵܐ ܥܲܠ ܬܸܪܘܲܝܗܝ ܓܹܒܵܢܹ̈ܐ، ܩܵܐ ܕܝܼܘܲܢܝܵܬܹ̈ܐ ܠܸܛܥܵܢܹܗ ܒܝܼܲܝܗܝ. 28ܘܬܘܼܪܸܨ ܠܹܗ ܕܝܼܘܲܢܝܵܬܹ̈ܐ ܡ̣ܢ ܩܲܝܣܵܐ ܕܐܵܩܵܩܝܼܵܐ، ܘܩܪܝܼܡܲܝ ܠܹܗ ܒܕܲܗܒ݂ܵܐ.
29ܘܬܘܼܪܸܨ ܠܹܗ ܡܸܫܚܵܐ ܩܘܼܕܫܵܐ ܩܵܐ ܡܫܵܚܬܵܐ، ܘܒܸܣܡܵܐ ܪܹܝܚܵܢܵܐ ܨܸܦܝܵܐ، ܐܲܝܟ݂ ܦܘܼܠܚܵܢܵܐ ܕܬܲܪܨܵܢܵܐ ܕܥܸܛܪܹ̈ܐ.
Currently Selected:
ܡܦܩܢܐ 37: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
