ܡܦܩܢܐ 36
36
1”ܐܵܕܝܼܵܐ ܒܲܨܠܝܼܐܹܝܠ ܘܐܲܗܵܠܝܼܐܲܒ݂، ܘܟܠ ܐ݇ܢܵܫܵܐ ܚܲܟܝܼܡܵܐ، ܕܝܘܼܗ݇ܒ݂ܵܐ ܠܹܗ ܡܵܪܝܵܐ ܚܸܟ݂ܡܬܵܐ ܘܦܲܪܡܵܝܬܵܐ ܕܝܵܕܹܥ ܕܵܐܟ݂ܝܼ ܕܦܵܠܹܚ ܟܠ ܦܘܼܠܚܵܢܵܐ ܕܒܢܵܝܬܵܐ ܕܒܹܝܬ ܩܘܼܕܫܵܐ، ܥܵܒ݂ܕܝܼ ܕܵܐܟ݂ܝܼ ܕܦܩܝܼܕ ܠܹܗ ܡܵܪܝܵܐ.“
ܥܲܡܵܐ ܡܲܝܬܘܼܝܹܐ ܙܵܘܕܵܐ ܡ̣ܢ ܠܵܙܸܡ
2ܗ̇ܝܓܵܗ ܩܪܹܐ ܠܹܗ ܡܘܼܫܹܐ ܠܒܲܨܠܝܼܐܹܝܠ ܘܠܐܲܗܵܠܝܼܐܲܒ݂، ܘܠܟܠ ܐ݇ܢܵܫܵܐ ܚܲܟܝܼܡܵܐ ܕܝܘܼܗ݇ܒܹܗ ܝܗ݇ܘܵܐ ܡܵܪܝܵܐ ܚܸܟ݂ܡܬܵܐ، ܕܐܵܬܝܼ ܗ݇ܘܵܘ، ܗ̇ܘ ܕܚܘܼܦܸܛ ܠܹܗ ܐܸܠܹܗ ܠܸܒܹܗ، ܕܫܲܪܝܼ ܗ݇ܘܵܘ ܒܦܘܼܠܚܵܢܵܐ. 3ܡܘܼܫܹܐ ܝܘܼܗ݇ܒܸܠ ܠܹܗ ܐܸܠܲܝܗܝ ܟܠܲܝܗܝ ܡܸܢܕܝܼܵܢܹ̈ܐ ܕܡܘܼܐܬܲܝ ܝܗ݇ܘܵܘ ܒܢܲܝ̈ ܝܼܣܪܵܝܹܠ ܩܵܐ ܒܢܵܝܬܵܐ ܕܒܹܝܬ ܩܘܼܕܫܵܐ. ܐܝܼܢܵܐ ܐܵܢܝܼ ܗܹܫ ܟܹܐ ܡܲܝܬܝܼ ܗ݇ܘܵܘ ܐܸܠܹܗ ܕܸܒ݂ܚܵܐ ܕܨܸܒ݂ܝܵܢܵܐ ܒܟܠ ܨܲܦܪܵܐ. 4ܟܠܲܝܗܝ ܐ݇ܢܵܫܹ̈ܐ ܡܵܨܝܵܢܹ̈ܐ ܫܒ݂ܝܼܩ ܠܗܘܿܢ ܦܘܼܠܚܵܢܵܐ ܕܒܸܥܒ݂ܵܕܵܐ ܝܗ݇ܘܵܘ، ܘܐ݇ܬܹܐ ܠܗܘܿܢ ܠܸܦܠܵܚܵܐ ܓܵܘ ܒܹܝܬ ܩܘܼܕܫܵܐ. 5ܘܐ݇ܡܝܼܪܗܘܿܢ ܠܡܘܼܫܹܐ، ”ܡܲܝܬܘܼܝܹܐ ܝܠܹܗ ܥܲܡܵܐ ܡܸܢܕܝܼ ܒܘܼܫ ܙܵܘܕܵܐ ܡ̣ܢ ܕܝܼܘܲܚ ܣܢܝܼܩܹܐ ܠܸܥܒ݂ܵܕܵܐ ܫܘܼܠܵܐ ܕܦܩܝܼܕ ܠܹܗ ܡܵܪܝܵܐ.“ 6ܗ̇ܝܓܵܗ ܦܩܝܼܕ ܠܹܗ ܡܘܼܫܹܐ ܕܦܵܝܫܵܐ ܡܘܼܚܒܸܪܬܵܐ ܒܡܲܫܪܝܼܬܵܐ، ”ܠܵܐ ܒܲܟ݂ܬܵܐ ܘܠܵܐ ܐܘܼܪܙܵܐ ܡܲܝܬܝܼ ܐ݇ܚܹܪ݇ܢܵܐ ܡܸܢܕܝܼ ܩܵܐ ܒܹܝܬ ܩܘܼܕܫܵܐ.“ ܘܦܝܼܫ ܠܹܗ ܡܘܼܟܠܝܼܵܐ ܥܲܡܵܐ ܡ̣ܢ ܡܲܝܬܘܼܝܹܐ ܡܸܢܕܝܼ ܙܵܘܕܵܐ. 7ܣܵܒܵܒ ܡܸܢܕܝܼ ܕܡܘܼܐܬܝܹܐ ܝܗ݇ܘܵܘ ܡܵܠܝܵܢܵܐ ܝܗ݇ܘܵܐ، ܘܒܘܼܫ ܙܵܘܕܵܐ ܡ̣ܢ ܠܡܲܟܡܘܼܠܹܐ ܦܘܼܠܚܵܢܵܐ.
ܬܵܪܲܨܬܵܐ ܕܡܲܫܟܢܵܐ
8ܘܟܠܲܝܗܝ ܐ݇ܢܵܫܹ̈ܐ ܡܵܨܝܵܢܹ̈ܐ ܕܓܵܘ ܦܲܠܵܚܹ̈ܐ ܕܡܲܫܟܢܵܐ ܬܘܼܪܸܨ ܠܗܘܿܢ ܥܸܣܪܵܐ ܣܸܬܪܹ̈ܐ ܕܟܸܬܵܢܵܐ ܢܵܙܸܟ ܩܡܝܼܛܵܐ، ܘܕܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܥܲܡ ܟܪ̈ܘܿܒܹܐ، ܦܘܼܠܚܵܢܵܐ ܡܗܝܼܪܵܐ ܕܐܘܼܡܵܢܵܐ. 9ܝܘܼܪܟ݂ܵܐ ܕܟܠ ܣܸܬܪܵܐ ܥܸܣܪܝܼ ܘܬܡܵܢܝܵܐ ܝܲܡܝܼܢܹ̈ܐ ܝܗ݇ܘܵܐ، ܘܦܸܬܘܵܐ ܐܲܪܒܲܥ ܝܲܡܝܼܢܹ̈ܐ؛ ܟܠܲܝܗܝ ܣܸܬܪܹ̈ܐ ܒܚܲܕ ܟܝܘܼܠܵܐ ܝܗ݇ܘܵܘ. 10ܘܐ݇ܣܝܼܪܲܝ ܠܹܗ ܚܲܡܫܵܐ ܣܸܬܪܹ̈ܐ ܚܲܕ ܒܗ̇ܘ ܐ݇ܚܹܪ݇ܢܵܐ، ܘܐܵܢܝܼ ܚܲܡܫܵܐ ܐ݇ܚܹܪ̈݇ܢܹܐ ܚܲܕ ܒܗ̇ܘ ܐ݇ܚܹܪ݇ܢܵܐ. 11ܘܬܘܼܪܸܨ ܠܹܗ ܚܵܠܲܩܝܵܬܹ̈ܐ ܡܝܼܠܹ̈ܐ ܠܣܸܦܬܵܐ ܕܣܸܬܪܵܐ ܒܲܪܵܝܵܐ ܡ̣ܢ ܪܹܐܙܵܐ ܩܵܕ݇ܡܵܝܵܐ، ܘܐܘܼܦ ܬܘܼܪܸܨ ܠܹܗ ܚܵܠܲܩܝܵܬܹ̈ܐ ܠܣܸܦܬܵܐ ܕܣܸܬܪܵܐ ܕܝܼܗ݇ܘܵܐ ܒܲܪܵܝܵܐ ܡ̣ܢ ܪܹܐܙܵܐ ܬܪܲܝܵܢܵܐ. 12ܬܘܼܪܸܨ ܠܹܗ ܚܲܡܫܝܼ ܚܵܠܲܩܝܵܬܹ̈ܐ ܥܲܠ ܚܲܕ ܣܸܬܪܵܐ، ܘܚܲܡܫܝܼ ܚܵܠܲܩܝܵܬܹ̈ܐ ܠܣܸܬܪܵܐ ܡܗ̇ܘ ܓܹܒܵܐ ܐ݇ܚܹܪ݇ܢܵܐ. ܚܵܠܲܩܝܵܬܹ̈ܐ ܒܲܠܩܘܼܒ݂ܠ ܕܚܲܕ ܕܗ̇ܘ ܐ݇ܚܹܪ݇ܢܵܐ ܝܗ݇ܘܵܘ. 13ܘܬܘܼܪܸܨ ܠܹܗ ܚܲܡܫܝܼ ܟܪ̈ܘܿܠܹܐ ܕܕܲܗܒ݂ܵܐ، ܘܐ݇ܣܝܼܪܲܝ ܠܹܗ ܣܸܬܪܹ̈ܐ ܚܲܕ ܒܗ̇ܘ ܐ݇ܚܹܪ݇ܢܵܐ ܒܝܲܕ ܐܲܢܹܐ ܟܪ̈ܘܿܠܹܐ، ܗܵܕܵܐ ܡܲܫܟܢܵܐ ܗܘܹܐ ܠܹܗ ܚܲܕ ܩܸܛܥܵܐ.
14ܐܘܼܦ ܬܘܼܪܸܨ ܠܹܗ ܣܸܬܪܹ̈ܐ ܡ̣ܢ ܣܲܥܪܵܐ ܕܥܸܙܹ̈ܐ ܩܵܐ ܡܲܟܲܣܬܵܐ؛ ܚܲܕܸܥܣܲܪ ܣܸܬܪܹ̈ܐ ܬܘܼܪܨܲܝ ܠܹܗ. 15ܝܘܼܪܟ݂ܘܼܬܵܐ ܕܟܠ ܣܸܬܪܵܐ ܬܠܵܬܝܼ ܝܲܡܝܼܢܹ̈ܐ، ܘܦܸܬܘܹܗ ܐܲܪܒܥܝܼ ܝܲܡܝܼܢܹ̈ܐ. ܟܠܲܝܗܝ ܣܸܬܪܹ̈ܐ ܒܚܲܕ ܟܝܘܼܠܵܐ ܝܗ݇ܘܵܘ. 16ܐ݇ܣܝܼܪܹܗ ܚܲܡܫܵܐ ܣܸܬܪܹ̈ܐ ܒܢܲܦ̮ܫܲܝܗܝ، ܐܘܼܦ ܐܵܢܝܼ ܐܸܫܬܵܐ ܐ݇ܚܹܪ̈݇ܢܹܐ ܒܢܲܦ̮ܫܲܝܗܝ. 17ܘܬܘܼܪܸܨ ܠܹܗ ܚܲܡܫܝܼ ܚܵܠܲܩܝܵܬܹ̈ܐ ܠܣܸܦܬܵܐ ܕܣܸܬܪܵܐ ܐ݇ܚܵܪܵܝܵܐ ܒܚܲܕ ܓܹܒܵܐ، ܘܚܲܡܫܝܼ ܚܵܠܲܩܝܵܬܹ̈ܐ ܠܣܸܦܬܵܐ ܕܣܸܬܪܵܐ ܐ݇ܚܵܪܵܝܵܐ ܕܗ̇ܘ ܓܹܒܵܐ ܐ݇ܚܹܪ݇ܢܵܐ. 18ܘܬܘܼܪܸܨ ܠܹܗ ܚܲܡܫܝܼ ܟܪ̈ܘܿܠܹܐ ܕܢܚܵܫܵܐ ܕܐܵܣܹܪ ܗ݇ܘܵܐ ܠܡܲܫܟܢܵܐ ܒܥܘܼܕܵܠܹ̈ܐ، ܕܗܵܘܹܐ ܗ݇ܘܵܐ ܚܲܕ ܩܸܛܥܵܐ. 19ܘܬܘܼܪܸܨ ܠܹܗ ܟܲܣܵܝܬܵܐ ܠܡܲܫܟܢܵܐ ܒܓܸܠܕܹ̈ܐ ܡܘܼܣܡܸܩܹܐ ܕܒܲܪ̈ܥܵܢܹܐ، ܘܟܲܣܵܝܬܵܐ ܕܓܸܠܕܹ̈ܐ ܕܟܲܠܒܹ̈ܐ ܕܝܵܡܵܐ ܡܘܼܠܒܸܫ ܠܹܗ ܥܲܠܘܼܗ̇.
20ܘܬܘܼܪܸܨ ܠܹܗ ܕܲܦܹ̈ܐ ܠܡܲܫܟܢܵܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ ܟܸܠܝܹܐ ܠܐܲܩܠܲܝܗܝ. 21ܝܘܼܪܟ݂ܵܐ ܕܟܠ ܕܲܦܵܐ ܥܣܲܪ ܝܲܡܝܼܢܹ̈ܐ ܝܗ݇ܘܵܐ، ܘܦܸܬܝܘܼܬܘܼܗ̇ ܝܲܡܝܼܢܵܐ ܘܦܲܠܓܹܐ. 22ܟܠ ܕܲܦܵܐ ܐܝܼܬ ܗ݇ܘܵܐ ܠܵܗ̇ ܬܲܪܬܹܝ ܠܸܫܲܢܝܵܬܹ̈ܐ ܒܸܠܚܵܡܵܐ ܠܗ̇ܝ ܕܲܦܵܐ ܐ݇ܚܹܪ݇ܬܵܐ. ܗܲܕܟ݂ܵܐ ܟܠܲܝܗܝ ܕܲܦܹ̈ܐ ܦܝܼܫܹܐ ܝܗ݇ܘܵܘ ܬܘܼܪܨܹܐ. 23ܬܘܼܪܸܨ ܠܹܗ ܥܸܣܪܝܼ ܡ̣ܢ ܕܐܲܢܹܐ ܕܲܦܹ̈ܐ ܠܓܹܒܵܐ ܕܬܲܝܡܢܵܐ ܕܡܲܫܟܢܵܐ. 24ܘܬܘܼܪܸܨ ܠܹܗ ܐܲܪܒܥܝܼ ܣܵܡܟܹ̈ܐ ܕܣܹܐܡܵܐ ܕܦܵܝܫܝܼ ܡܘܼܬܒܹܐ ܬܚܘܿܬ ܥܸܣܪܝܼ ܕܲܦܹ̈ܐ، ܬܪܹܝ ܣܵܡܟܹ̈ܐ ܬܚܘܿܬ ܚܕܵܐ ܕܲܦܵܐ ܩܵܐ ܬܲܪܬܹܝ ܠܸܫܲܢܝܵܬܹ̈ܗ، ܘܬܪܹܝ ܣܵܡܟܹ̈ܐ ܬܚܘܿܬ ܕܗ̇ܝ ܕܲܦܵܐ ܐ݇ܚܹܪ݇ܬܵܐ ܩܵܐ ܬܲܪܬܹܝ ܠܸܫܲܢܝܵܬܹ̈ܗ. 25ܠܕܸܦܢܵܐ ܐ݇ܚܹܪ݇ܬܵܐ ܕܡܲܫܟܢܵܐ، ܡ̣ܢ ܓܹܒܵܐ ܕܓܲܪܒܝܵܐ ܕܡܲܫܟܢܵܐ، ܬܘܼܪܸܨ ܠܹܗ ܥܸܣܪܝܼ ܕܲܦܹ̈ܐ، 26ܘܐܲܪܒܥܝܼ ܣܵܡܟܹ̈ܐ ܕܣܹܐܡܵܐ، ܬܪܹܝ ܣܵܡܟܹ̈ܐ ܬܚܘܿܬ ܚܕܵܐ ܕܲܦܵܐ، ܘܬܪܹܝ ܣܵܡܟܹ̈ܐ ܬܚܘܿܬ ܕܗ̇ܝ ܕܲܦܵܐ ܐ݇ܚܹܪ݇ܬܵܐ. 27ܘܩܵܐ ܒܵܬ݇ܪܵܐ ܕܡܲܫܟܢܵܐ، ܠܓܹܒܵܐ ܕܡܲܥܪܒ݂ܵܐ، ܬܘܼܪܸܨ ܠܹܗ ܐܸܫܸܬ ܕܲܦܹ̈ܐ. 28ܘܬܘܼܪܸܨ ܠܹܗ ܬܲܪܬܹܝ ܕܲܦܹ̈ܐ ܩܵܐ ܩܘܼܪ̈ܢܝܼܵܬܹܐ ܕܡܲܫܟܢܵܐ ܡ̣ܢ ܒܵܬ݇ܪܵܐ. 29ܐܲܢܹܐ ܕܲܦܹ̈ܐ ܙܵܘܓܹ̈ܐ ܝܗ݇ܘܵܘ ܡ̣ܢ ܠܬܸܚܬ، ܘܩܕܝܼܚܹܐ ܝܗ݇ܘܵܘ ܡ̣ܢ ܠܥܸܠܸܠ ܒܚܕܵܐ ܚܵܠܲܩܬܵܐ. ܗܲܕܟ݂ܵܐ ܬܘܼܪܨܲܝ ܠܹܗ ܬܸܪܘܲܝܗܝ ܩܵܐ ܬܲܪܬܹܝ ܩܘܼܪ̈ܢܝܼܵܬܹܐ. 30ܗܲܕܟ݂ܵܐ ܐܝܼܬ ܗ݇ܘܵܐ ܬܡܵܢܝܵܐ ܕܲܦܹ̈ܐ، ܥܲܡ ܐܸܫܬܲܥܣܲܪ ܣܵܡܟܲܝ̈ܗܝ ܕܣܹܐܡܵܐ، ܟܠ ܬܪܹܝ ܬܚܘܿܬ ܚܕܵܐ ܕܲܦܵܐ.
31ܘܬܘܼܪܸܨ ܠܹܗ ܥܲܡܘܼܕܹ̈ܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ، ܚܲܡܫܵܐ ܩܵܐ ܕܲܦܹ̈ܐ ܕܚܲܕ ܓܹܒܵܐ ܕܡܲܫܟܢܵܐ، 32ܘܚܲܡܫܵܐ ܩܵܐ ܕܲܦܹ̈ܐ ܕܗ̇ܝ ܕܸܦܢܵܐ ܐ݇ܚܹܪ݇ܬܵܐ ܕܡܲܫܟܢܵܐ، ܘܚܲܡܫܵܐ ܐ݇ܚܹܪ̈݇ܢܹܐ ܩܵܐ ܒܵܬ݇ܪܵܐ ܕܡܲܫܟܢܵܐ ܠܓܹܒܵܐ ܕܡܲܥܪܒ݂ܵܐ. 33ܘܥܒ݂ܝܼܕ ܠܹܗ ܣܛܘܼܢܵܐ ܕܒܹܝܬ݇ ܦܲܠܓܵܐ ܕܥܵܒܹܪ ܒܦܲܠܓܘܼܬܵܐ ܕܕܲܦܹ̈ܐ، ܡ̣ܢ ܓܹܒܵܐ ܠܓܹܒܵܐ. 34ܘܩܪܝܼܡ ܠܹܗ ܠܕܲܦܹ̈ܐ ܒܕܲܗܒ݂ܵܐ، ܘܬܘܼܪܸܨ ܠܹܗ ܚܵܠܲܩܝܵܬܹ̈ܐ ܕܕܵܒ݂ܩܝܼ ܠܸܛܥܵܢܵܐ ܠܥܲܡܘܼܕܹ̈ܐ، ܘܩܪܝܼܡ ܠܹܗ ܥܲܡܘܼܕܹ̈ܐ ܒܕܲܗܒ݂ܵܐ.
35ܬܘܼܪܸܨ ܠܹܗ ܠܣܸܬܪܵܐ ܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܡ̣ܢ ܟܸܬܵܢܵܐ ܢܵܙܸܟ ܩܡܝܼܛܵܐ، ܘܬܘܼܪܸܨ ܠܹܗ ܟܪ̈ܘܿܒܹܐ، ܦܘܼܠܚܵܢܵܐ ܡܗܝܼܪܵܐ ܕܐܘܼܡܵܢܵܐ. 36ܬܘܼܪܸܨ ܠܹܗ ܩܵܬܹܗ ܐܲܪܒܥܵܐ ܣܛܘܼܢܹ̈ܐ ܡ̣ܢ ܩܲܝܣܹ̈ܐ ܕܐܵܩܵܩܝܼܵܐ، ܘܩܪܝܼܡܲܝ ܠܹܗ ܒܕܲܗܒ݂ܵܐ، ܐܘܼܦ ܟܪ̈ܘܿܠܲܝܗܝ ܡ̣ܢ ܕܲܗܒ݂ܵܐ، ܘܡܘܼܠܚܸܡ ܠܹܗ ܥܲܠܲܝܗܝ ܐܲܪܒܥܵܐ ܣܵܡܟܹ̈ܐ ܕܣܹܐܡܵܐ. 37ܘܬܘܼܪܸܨ ܠܹܗ ܦܲܪܕܵܐ ܩܵܐ ܬܲܪܥܵܐ ܕܡܲܫܟܢܵܐ، ܡ̣ܢ ܥܸܙܠܵܐ ܡܝܼܠܵܐ، ܘܐܲܪܓܘܵܢܵܐ، ܘܩܸܪܡܝܼܙ، ܘܡ̣ܢ ܟܸܬܵܢܵܐ ܢܵܙܸܟ ܩܡܝܼܛܵܐ، ܦܘܼܠܚܵܢܵܐ ܕܙܵܩܪܵܢܵܐ ܕܠܲܩܛܹ̈ܐ، 38ܘܚܲܡܫܵܐ ܣܛܘܼܢܹ̈ܐ ܥܲܡ ܚܵܠܲܩܝܵܬܹ̈ܗ. ܣܛܘܼܢܹ̈ܐ ܘܪܹ̈ܫܵܢܲܝܗܝ ܩܪܝܼܡ ܠܹܗ ܒܕܲܗܒ݂ܵܐ، ܘܚܲܡܫܵܐ ܣܵܡܟܲܝ̈ܗܝ ܕܢܚܵܫܵܐ ܝܗ݇ܘܵܘ.
Currently Selected:
ܡܦܩܢܐ 36: ABTAB
Highlight
Copy
Compare
Share
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
